Skip to content

Skip to table of contents

 Muzimbu 62

Trouble in David’s House

Trouble in David’s House

OMO Ndaviti na putuka ku sika mu Yelusalema, Yehova ua vezikisile masualale veni kaha va vulile vitozi viavo. Yehova ua kulahesele ku hana cifuti ca Kanana ku vana va Isaleli. Vuovuno Yehova na va kuasa ku ku kupala cifuti cose linga ci ka pue cavo.

Ndaviti ua pua muangana ua cili. Ikeye ua lema cikuma Yehova. Kaha cuma ca katete ca na lingi, mu nima ya ku tambula Yelusalema na neha cikasa ca litavasiano kuze. Kaha a tonda ku tunga tembele linga a ci hakemo.

Mua kolele, Ndaviti ua lingile vuhenge vua kama. Ikeye ua tantekeyele ngecize ca pua vupi ku tambula cuma ca mbala. Vunoni tangua limo ku cinguezi, Ndaviti ua kele na kuenda helu lia ndzivo yeni, kaha mua na tala ha mavu ua mona umo mpuevo ua ku lelema a li na ku tana. Lizina lieni Mbateseva, yalieni Uliya umo ua masualale va Ndaviti.

Ndaviti ua tondele cikuma Mbateseva kaha ua tuma linga va mu neheleye ku ndzivo yeni. Yalieni tele na i mu ku lua ndzita. Kaha Ndaviti ua linga via cilemo na Mbateseva kaha ua tantekeya ngueni a li na lizimo. Ndaviti ua lisosomuene cikuma kaha ua tumine lizi kuli mukuluntu ua masualele Yoave, linga a ka tuameke Uliya ku lutue mu ndzita linga va ka mu tsihileko. Mua tsile Uliya, Ndaviti ua ambatele Mbateseva ku pua mpueyeni.

Yehova ua nienguele cikuma na Ndaviti. Ngeci ua tumine ngamba yeni Natane linga a ka mu leke via vipi vieni. Tala Natane a li na ku handeka na Ndaviti. Ndaviti ua liveyele cikuma cikuma omo lia vupi vua lingile, ngeci Yehova ka mu tsihile. Vunoni Yehova ua mu lekele ngueni: ‘Muomu u na lingi ovu vupi vua ku pihia ngecize, u ka kala na visoti via vingi mu ndzivo yove’. Via puile mpundu visoti via kama!

Ca ku livanga muana Mbateseva ua tsile. Kaha ku fuma haze Amenone muana ua katete ua Ndaviti ua kuatele ndumbueni Tamale ua panga neni via ntsoni. Avisalome ua nienguele cikuma kaha ua ka tsiha Amenone. Ku lutue lua ntsimbu, Avisalome ua lumbuile mitima ya vantu va vengi kaha ua lipuisa muangana. Vunoni Ndaviti ikeye  ua vulile ndzita muomu Avisalome va mu tsihile. Cili vene, Ndaviti ua kele mu visoti via kama.

Mu ntsimbu ya visoti vize, Mbateseva ua semene umo muana ua yala lizina lieni Solomone. Omo Ndaviti ua kolele kaha ua vavala, muaneni Andoniya ua setekele ku lipuisa muangana. Ngeci Ndaviti ua tumine umo sasendote, lizina lieni Zandoke, linga a ka muaniene mazi ha mutue ua Solomone, ku muesa ngecize ikeye a ka pua muangana. Mua hitile lika ntsimbu ya indende, kaha Ndaviti ua tsile tele a li na miaka 70. Ua sikile miaka ya ku pua 40, vuovuno honi, Solomone ikeye na pu muangana ua Isaleli.

2 Samuele 11:1-27; 12:1-18; 1 Vamiangana 1:1-48.

Study Questions