Skip to content

Skip to table of contents

 Muzimbu 22

Joseph Is Put Into Prison

Joseph Is Put Into Prison

YOSEFE a li lika na miaka 17 mu va mu tuala ku Ingito. Kaha kuze va na ka mu landesa kuli umo yala ua lizina lia Potifale. Potifale ue ku pangela muangana ua Ingito, lizina lieni Falao.

Yosefe a pua mu ka ku fuitanganena kuli muata ueni, Potifale. Kaha omo Yosefe na kolo, Potifale na mu puisa mukuluntu ua ndzivo yeni yose. Amba vika va na mu sokela omu mu kamenga? Omo lia mpuevo ya Potifale.

Yosefe na kolo na ku viuka cikuma, kaha mpuevo ya Potifale a tonda ku kosa neni. Vunoni Yosefe na tantekeya ngueni ovu vua pua vupi, ngeci a viana ku vu linga. Mpuevo ya Potifale na tenuka cikuma. Kaha omo yalieni neza, na mu kuisa ngueni: ‘Uze mukua vupi Yosefe ua tondele ku kosa nange!’ Potifale na tava mezi a mpueyeni, kaha na tenuka cikuma na Yosefe. Ngeci na mu hake mu kamenga.

Ka niungi ua kamenga na mono laza ngueni Yosefe ua pua yala ua cili. Ngeci na mu puisa mukuluntu ua vakuavo mapeleso. Mu nima ya ntsimbu, Falao na niengua na mukua ku makela mu ngandza yeni na mukua ku panga mbolo kaha na va soka mu kamenga. Vutsiki vumo vose vavali va na loto vilota via seho, vunoni ka va tantekeya vika via lomboloka. Lia mukuavo Yosefe ngueni: ‘Nji lekenu vilota vienu.’ Kaha mu va na mu leka vilota viavo kaha Njambi na kuasa Yosefe, ku lombolola.

Kuli mukua ku makela ngandza, na mu leka ngueni: ‘Mu nima ya matangua atatu va ka ku tuhula mu kamenga, kaha u ka hilukila ha vipanga viove.’ Mu ku vuezako Yosefe ngueni: ‘Mu u ka fuma muno, ka nji tumbule kuli Falao linga a nji fumise mu cihela cino.’ Vunoni kuli mukua ku panga mbolo, Yosefe ua mu lekele ngueni: ‘Mu nima ya matangua atatu Falao a ka ku tapa mutue.’

Mu nima ya matangua atatu viuma viaco via li puisilemo ngue muze mua handekele Yosefe. Falao ua tapele mutue ua mukua ku panga mbolo. Mukua ku makela, va mu tuhula mu kamenga ua hilukilile naua ha vipanga vieni. Vunoni uze mukua ku makela ua suvile viose via mu sikile Yosefe! Ka mu zimbuile kuli Falao ngeci Yosefe ua tualeleho mu kamenga.

Njenisisi 39:1-23; 40:1-23.

Study Questions