Skip to content

Skip to table of contents

 MUZIMBU 1

God Begins to Make Things

God Begins to Make Things

VIUMA viose via cili vi tua kala navio via fuma kuli Njambi. Ikeye ua tangele litangua linga li tu hane ceke ku mutana, na ngonde na zintangantanga linga tu kale na cimo ceke ku vutsiki. Kaha Njambi ua tangele naua mavu linga tu kaleho.

Vunoni litangua, ngonde, zintangantanga na mavu kati vikevio viuma via livangele ku tanga Njambi. Ua tantekeya vika ua tangele ha katete ni? Njambi ha katete ua tangele vantu va ku lifua neni. Ka tu hasa ku va mona, ngue muze ka ci tava ku mona Njambi. Ava vantu vaco mu Mbimbiliya ve ku va sana nguavo tungelo. Njambi ua tangele tungelo linga va yoye neni muilu.

Ha katete Njambi ua tangele umo kangelo ua ku lifuila. Ua puile Muana Njambi ua ku livanga, kaha ua pangele hamo lika na Ise. Ua kuasele Njambi ku panga viuma viose vikuavo. Ua kuasele Njambi ku tanga litangua, ngonde, zintangantanga kaha na mavu.

Mavu a fuile vati? Ha katete na umo ua hasele ku yoya hano ha mavu uahi. Helu lia mavu ose ha kele lika kalunga ndonga. Vunoni Njambi ua tondele linga vantu va kale ha mavu. Ngeci ua putukile ku tu viukisila viuma. Vika ua lingile?

Ca ku livanga ha mavu ha tondekele ceke. Ngeci Njambi ua pangele ceke ku litangua linga ci tuile ha mavu. Ua vi tangele mu cifua ca kulinga ku kale vutsiki na mutana. Mu nima yaco Njambi ua lingisile mavu ku tumpuka helu lia mema a kalunga ndonga.

Mbangelo ha mavu ka ha kele na vimo viahi. Ha solokele ngue eci cikupulo ci u na mono aha. Ka ha kele vintemo cipue miti ni tusitu. Ambe mu kalunga ndonga ka mua kele intsi na umo uahi. Njambi ua kele na vipanga via vingi via ku viukisa mavu linga ha kale vantu na tusitu.

Yelemiya 10:12; Kolose 1:15-17; Njenisisi 1:1-10.

Study Questions