Skip to content

Skip to table of contents

 VIMPANDE VIA KU VUEZAKO

Mua ku Nongonuena “Mbambilone ya Kama”

Mua ku Nongonuena “Mbambilone ya Kama”

MU LIVULU lia Ku-Solola mua kala mezi a mahungu ka ci tava ku evuisisa lika ngue muze mu va a soneka. (Ku-Solola 1:1) Ca ku muenako, va sonekamo via umo mpuevo u va soneka lizina lia “Mbambilone ya Kama” ha luholo lueni. Ou mpuevo va mu tumbula nguavo na tumama helu lia “vivunga, na vifuti.” (Ku-Solola 17:1, 5, 15) Ou Mbambilone ya Kama ca pua lika citantekeyeso mukonda na umo mpuevo a hasa ku lingamo uahi. Vika uemanena ou mpuevo mukua vupangala?

Ku Ku-Solola 17:18 ou vene mpuevo ua cimueso, va mu tumbula nguavo “ikeye nganda ize ya kama, i li na ku sika vamiangana va ha mavu.” Lizi “nganda” lia lomboloka civunga ca vantu va likunguluila hamo. Mu ku linga  eyi ‘nganda ya kama’ ili na ngolo ha “vamiangana va ha mavu,” ou mpuevo ua lizina Mbambilone ya kama na pande ku pua lukungulukilo lua ngolo ya kama mu mavu ose. Olu lua pua lukungulukilo lua vulombelo, kati lua pulitika ni lua mingoso houe. Aci talenu imo mizimbu mu livulu lia ku Ku-Solola, i tu lingisa ku handeka ngoco.

Ou mpuevo u va luka Mbambilone ya Kama ka puile civunga ca pulitika, muomu Lizi lia Njambi ngualio “vamiangana va mavu” ni nguetu vakua pulitika va mavu, “va lingile vupangala” neni. Vupangala vuaco vua lomboloka ku likuatasana ceni na vamiangana va mavu, eci ci tu kuasa ku ivuisisa vi va mu lukila nguavo “lipangala uze ua kama.”​—Ku-Solola 17:1, 2; Tiango 4:4.

Mbambilone ya Kama ka citava a pue civunga ca mingoso muomu “vakua mavenda va ha mavu” ni nguetu vakua mingoso va ka linienga mu va ka mu nongesa. (Ku-Solola 18:3, 9, 10, 15-17) Ngeci mukemuo, citava tu handeke nguetu Mbambilone ya Kama kati cikota ca pulitika ni ca mingoso, vunoni civunga ca malombelo ose a makuli.

Cikuavo naua, mezi a handeka ngecize Mbambilone ya Kama ue ku onga vifuti viose na ‘vulozi vueni,’ a muesa ngecize ua pua lukungulukilo lua vulombelo. (Ku-Solola 18:23) Mu ku linga vifua viose via vulozi ve ku vi sambeya kuli vakua malombelo a makuli na vandemone, ka ci tu komouesa ku tantekeya ngecize Mbimbiliya ya tumbula Mbambilone ya Kama nguayo “vukalo vua vandemone.” (Ku-Solola 18:2; Ndeutelonomi 18:10-12) Eci civunga ca malombelo ose a makuli va ci tumbula naua nguavo ci li na ku luisa vulombelo vua vusunga, na ku yandesa “vapolofeto” na “vakua ku lela.” (Ku-Solola 18:24) Mua vusunga, Mbambilone ya Kama ua zinda cikuma vulombelo vua vusunga, ngeci ue ku yandesa na ku tsiha “vakaleho va Yesu.” (Ku-Solola 17:6) Ngeci mukemuo, ou mpuevo ua lizina Mbambilone ya Kama uemanena civunga ca malombelo ose a makuli, aze a kala mu vutozi na Yehova Njambi.