Skip to content

Skip to table of contents

 VIMPANDE VIA KU VUEZAKO

Kangelo ua Kama Mingeli ua pua Iya?

Kangelo ua Kama Mingeli ua pua Iya?

KANGELO ua lizina Mingeli ka va mu tumbuile ku sua kumo mu Mbimbiliya. Vunoni hose ha va mu tumbula noho ali na ku linga vimo. Mu livulu lia Ndaniele, va muesa Mingeli ali na ku-lua na tungelo va vapi; ku mukanda ua Yunda, va mu muesa a lisompa na Satana; ku Ku-Solola, va mu muesa ali na ku lua ndzita na Ndiavu na vandemone veni. Mu ku hakuila vusuana vua Yehova na ku luisa vitozi va Njambi, Mingeli ue ku puisamo via lomboloka lizina lieni—“Iya ua lifua na Njambi”? Iya mpundu Mingeli?

Vantu vamo va kala na mazina a engi. Cimueso eci: Yakomba lizina lieni likuavo Isaleli, na kapostolo Petulu lizina lieni likuavo Simone. (Njenisisi 49:1, 2; Mateo 10:2) Na vuno vene, Mbimbiliya ya muesa ngecize Mingeli lia pua lizina likuavo lia Yesu Kilistu, tele kanda eze ha mavu na mu nima ya ku hiluka muilu. Tu ci hilulenu Visoneka tu mone muomu vika tu handekela ngoco.

Kangelo ua Kama. Lizi lia Njambi lia tumbula Mingeli ngualio “Kangelo ua kama.” (Yunda 9) Mingeli va na mu tumbula nguavo kangelo ua kama. Eci ci lekesa ngecize kua kala lika kangelo umo ua cifua eci. Mua vusunga, mu Mbimbiliya lizi “kangelo ua kama” va litumbuila kangelo umo, kati va vengi. Cikuavo naua, Yesu va mu tumbuila cipanga ca kangelo ua kama. Mukanda ua 1 Tesalonika 4:16 ua handeka ku tuala hali Muangana Yesu Kilistu nguauo: “Muomu Muangana ivene a ka suluka muilu, na mutambi, na lizi lia kangelo ua kama.” Aha lizi lia Yesu va na litumbula ku pua lia kangelo ua kama. Eci visoneka ci muesa ngecize Yesu ikeye vene kangelo ua kama, Mingeli.

Ntuamena ua Masualale. Mbimbiliya nguayo “Mingeli na tungelo veni va ile mu ku lua ndzita na mukisi . . . na tungelo veni.” (Ku-Solola 12:7) Aa mezi a muesa ngecize, Mingeli ua pua ntuamena ua masualale va ku ononoka tungelo. Kaha  Yesu neni va mu tumbula ku pua ntuamena ua masualale va ku ononoka ku Ku-Solola. (Ku-Solola 19:14-16) Cikuavo naua kapostolo Paulu ua tumbuile mpundu ngueni “Muangana Yesu” na “tungelo vakua ngolo yeni.” (2 Tesalonika 1:7) Ngeci mu tua mono, Mbimbiliya ya tumbula Mingeli na “tungelo veni” na Yesu na “tungelo veni.” (Mateo 13:41; 16:27; 24:31; 1 Petulu 3:22) Kaha mu Mbimbiliya na hamo hahi ha va muesa ngecize kua kala vivunga vivali via masualale va ku ononoka tungelo ni nguetu cimo civunga ci va tuamenena kuli Mingeli kaha cikuavo ci va tuamenena kuli Yesu, ngeci mukemuo citava tu tsihe mpanga nguetu Mingeli ikeye vene Yesu Kilistu, mu vipanga vieni via muilu. *

^ cin. 6 Mu hasa ku uana mizimbu ikuavo ya muesa ngecize Mingeli lia pua lizina likuavo lia Muana Njambi, talenu mu livulu Estudo Perspicaz das Escrituras Volume 2, ha mafo 828-829, li va soneka Vakaleho va Yehova.