Skip to content

Skip to table of contents

 CILONGESA 8

Yosiya ua Kele na Vavusamba va Cili

Yosiya ua Kele na Vavusamba va Cili

Mu ku mona cove, ca pua ca cikalu ku linga via cili ni?— Vavengi ve ku singanieka nguavo ca cikalu. Mbimbiliya ya muesa ngecize ca puile ca cikalu kuli umo kanike ua yala lizina lieni Yosiya. Vunoni ua kele na vavusamba va cili vaze va mu kuasele. Tu ci tantekeyenu via vingi hali Yosiya na vavusamba vueni.

Ise ya Yosiya ua puile Amone, muangana ua Yunda. Amone ua puile muntu ua ku pihia mukonda ua kele na ku lemesa tumponia. Omo Ise ya Yosiya ua tsile, Yosiya va mu hakele ku pua muangana ua Yunda. Vunoni tele ali lika na miaka 8! Ua singanieka ngecize neni ua puile ua ku pihia ngue Ise ni?— Houe, ka fuile Ise!

Yosiya na Yelemiya va likuasele umo na mukuavo ku linga via cili

Ambe tele a cili kanike ua mundende, ua tondele ku ononoka Yehova. Ngeci ua tondele vavusamba va lemene Yehova. Kaha va kuasele Yosiya ku linga viuma via cili. Veya vamo va puile va vusamba va Yosiya?

Umo ua vavusamba veni ua puile Zefaniya. Zefaniya ua puile kapolofeto ua mamuine vantu va mu Yunda, ngecize viuma via ku pihia vi ka va solokela nga va lemesa tumponia. Yosiya ua halakanene via handekele Zefania kaha ua lemesele Yehova, ka tavele ku lemesa tumponia.

Kavusamba ka Yosiya mukuavo ua puile Yelemiya. Kampe vose va puile va citso cimo, vose va kolelele hamo lika va yoyele ku cihela cimo lika. Va puile vavusamba va kama cikuma, ambe omo Yosiya ua tsile, Yelemiya ua sonekele muaso ua ku linienga. Yelemiya na Yosiya va likuasele umo na mukuavo mu linga via cili na ku ononoka Yehova.

Zefania ua mamuine vantu ku likela ku lemesa tumponia

Vika u hasa ku lilongesa ku lungano lua Yosiya?— Ambe tele a cili kanike ua mundende, Yosiya ua tondele ku linga via cili. Ua tantekeyele ngecize ua pandele ku likata vusamba na vantu va lema Yehova. Nove ua pande ku hangula va vasumba va lema Yehova vaze va hasa ku kuasa ku linga via cili!

TANDA MU MBIMBILIYA YOVE

  • 2 Mizimbu 33:21-25; 34:1, 2; 35:25