Skip to content

Skip to table of contents

 CILONGESA 1

Lihungu li tua Viukilila ku Tantekeya

Lihungu li tua Viukilila ku Tantekeya

Va ku lekaho laza limo lihungu ni?​— * Mu Mbimbiliya va sonekamo via limo ‘lihungu’ lia Njambi lia seho ya kama. Va li tumbula ku pua lihungu muomu vantu ka va li tantekeyele. Tungelo navo va tondele ku li tantekeya. Nove u tonda ku tantekeya lihungu liaco ni?—

Mu ku mona cove, tungelo va tondele ku tantekeya vika?

Ha katete, Njambi ua tangele yala na mpuevo. Mazina avo Andama na Eva. Njambi ua va hele limbo lia cili, lihia lia Endene. Nga va Andama na Eva va singimikile Njambi, nga vakevo na vana vavo va puisile ano mavu ose ku pua palandaizi. Nga va yoyele miaka yose mu palandaizi. Ua vuluka vika va lingile va Andama na Eva ni?—

Andama na Eva va sahuile Njambi, ngeci mukemuo ka tua yoyele mu palandaizi lelo lino. Vunoni Njambi ua handekele ngueni tangua a ka viukisa mavu ose, kaha vantu va ka yoya mu ndzolela ku miaka yose. Vati ue ku lingilemo? Mua hitile miaka ya yingi, vunoni kasi vantu ka va vi tantekeyele. Lia puile lihungu.

Omo Yesu uezile ha mavu, ua longesele vantu via vingi ha lihungu liaco. Ua handekele ngueni lihungu liaco lia pua Vuangana vua Njambi. Yesu ua lekele vantu ku vundila linga Vuangana vuaco vuize. Vu ka alulula ano mavu ku pua palandaizi ya cili.

Ua viukilila ku tantekeya eli lihungu ni?—

Tantekeya ngecize vaze lika ve ku ononoka Yehova vakevo va ka kala mu Palandaizi. Mu Mbimbiliya mua kala mizimbu ya ingi ya handeka via vamala na vampuevo vononokele Yehova. U tonda ku lilongesa viavo ni?— Tu ci va tantekeye, na ku lilongesa vati tu hasa ku va temunuina.

TANDA MU MBIMBILIYA YOVE

  • Mako 4:11

  • 1 Petulu 1:12

  • Njenisisi 1:26-28; 2:8, 9; 3:6, 23

  • Mateo 6:9, 10

  • Visamo 37:11, 29

^ cin. 3 Omo mu tanda ino mizimbu, mu ka uana ha va na haka cipalo eci (—) mu nima ya cimo cihula. Nga mu heta ha cipalo caco mua pande ku mana, linga muanenu a kumbulule.