Skip to content

Skip to table of contents

 CILONGESA 6

Ndaviti ka Vuile Vuoma

Ndaviti ka Vuile Vuoma

Vati ue ku linga nga u nevu vuoma?— Halumo ue ku tinina kuli vanoko ni vaiso. Vunoni kua kala mukuavo a hasa ku ku kuasa. Ua kala na ngolo ku hiana vose. Ua mu tantekeya ni?— Ikeye Yehova Njambi. Tu ci simutuile via umo mukuendze u va soneka mu Mbimbiliya lizina lieni Ndaviti. Ndaviti ka kele na vuoma muomu ua tantekeyele ngecize Yehova a ka mu kuasa ntsimbu yose.

Tele Ndaviti a ci li kanike, visemi veni va mu longesele ku lema Yehova. Eci ca mu kuasele ku simpa ambe omo viuma vie ku neha vuoma via mu solokelele. Ua tantekeyele ngecize Yehova ua puile Kavusamba keni kaha a ka mu kuasa. Tangua limo, omo Ndaviti ua kele na ku lisa vampanga, ndumba ua kama ua kuatele mpanga! Ua tantekeya vati ua lingile Ndaviti ni? Ua mu kavele na ku ka mu tsiha! Kaha tangua lieka omo urso ua kuatele mpanga, Ndaviti ua mu tsihile naua! Mu ku mona cove iya ua kele na ku kuasa Ndaviti?— Ue ka uahi, Yehova vene.

Vunoni kua kele ntsimbu ikuavo omo Ndaviti ua simpile cikuma. VaIsaleli va luile ndzita na vamo vantu va va lukile vaFilisteo. Umo lisualale ua kaFilisteo ua puile ua ku tuntuka cikumakuma, ua puile likisikisi! Lizina lieni Ngoliata. Ua sahuile masualale vaIsaleli na Yehova. Ua sanene masualale vaIsaleli va ku lue neni. Vunoni vaIsaleli vose va mu vuilile vuoma. Omo Ndaviti ua vi vuile, ua lekele Ngoliata ngueni: ‘Yange nji lua nove! Yehova a ka nji kuasa, nji ka ku vula!’ Mu ku mona cove, Ndaviti ua puile mukuendze ua ku simpa ni?— Eyo, ua ku simpa cikumakuma. U tonda ku tantekeya vika via lingikile mu nima yaco ni?

Ndaviti ua nonene fisika yeni na mavue atanu a ku lamba, kaha ua ile mu ku lua na uze likisikisi. Omo Ngoliata ua muene ngecize Ndaviti ua puile kanike, ua mu sahuile! Vunoni Ndaviti ua mu lekele, ngueni: ‘Ove u iza kuli ange na mukuale, vunoni ange nji iza kuli ove mu lizina lia Yehova!’ Kaha ua hakele livue mu fisika yeni na ku tuntila kuli Ngoliata, kaha ua mu asele. Livue lia mu kuatele ha luholo! Uze likisikisi ua uile kaha ua tsile! VaFilisteo va vuile vuoma vua kama ngeci va tinine. Vati kanike ua yala ngeci mua Ndaviti ua hasele ku vula likisikisi?— Yehova ua mu kuasele, muomu Yehova ua kala na ngolo cikuma ku hiana uze likisikisi!

Ndaviti ka vuile vuoma muomu ua tantekeyele ngecize Yehova a ka mu kuasa

Vika u hasa ku lilongese ha muzimbu ou ua Ndaviti?— Yehova ua kala na ngolo ku hiana vose. Kaha ua pua Kavusamba kove. Ngeci mukemuo, ambe tangua lieka nga u nevu vuoma, vuluka nguove, Yehova a ka ku simpisa!

TANDA MU MBIMBILIYA YOVE

  • Visamo 56:3, 4

  • 1 Samuele 17:20-54