Skip to content

Skip to table of contents

 CILONGESA 10

Ku Lemesa ca mu Vusoko Capua Cika?

Ku Lemesa ca mu Vusoko Capua Cika?

Koreia

Brazil

Austrália

Guiné

Fume ku laza Yehova ua tonda ngueni, vakua ndzivo va pue na ku lilongesa Mbimbiliya hamo mu vusoko. Linga va kaniamese lutsilielo luavo. (Ndeutelonomi 6:6, 7) Ngeci mukemuo Vakaleho va Yehova ve ku hangula litangua limo mu simano lia ku lemesa Njambi mu vusoko​—ve ku sikama hamo na ku lilongesa vati mezi a Njambi a hasa ku va kuatesa mu visoti viavo. Nga ua kala lika liove, nove u hasa ku pangesa ntsimbu yaco mu ku lilongesa via Njambi.

Ya pua ntsimbu ya ku suena kuli Yehova. “Suenenu kuli Njambi, kaha ikeye a ka suena kuli enu.” (Tiango 4:8) Tu hasa ku tantekeya mua cili Yehova, mu ku lilongesa vifua vieni na vilinga vieni ku hitila mu Mbimbiliya. Njila imo ya yasi ya ku putuka ku lemesa ca mu vusoko ya pua ku tanda Mbimbiliya hamo lika, halumo mu ku kavangeya vi tue ku lilongesa mu simano ku simano ku Ciuano ca Muono Uetu Vakua Kilistu na Vipanga Vietu. Mu hasa ku litepela muntu ku muntu cinimbu cimo, kaha mu vose mu simutuila ha viuma vi mu na lilongesamo.

Ya pua ntsimbu ya ku likungulula hamo mu vusoko. Vusamba vue ku kola cikuma ha kati ka vana na visemi na yala na mpueyeni nga va lilongesa Mbimbiliya hamo. Eyi ntsimbu i na pande ku pua ya ciyulo na ndzolela, na ku tsimana cikuma mu simano. Ku liya na vitso via vana vavo, visemi va na pande ku hangula vimpande via ku simutuila vi hasa ku va kuatesa vili mu Vutala vua Kaniungi na Despertai! Mu hasa ku handeka ha visoti vi ve ku liuana navio vana venu ku sikola na ku va longesa vati va na pande ku lua navio. Citava mu tale imo video mu JW Broadcasting (tv.jw.org) kaha mu nima yaco simutuilenu vi mu na lilongesamo. Mu hasa naua ku lilongesa ku imba miaso ya ku likungulula ca simano izaho kaha na ku lia hamo ku fuma ha ku lemesa ca mu vusoko.

Nga u kala na ntsimbu ya ku lemesa Yehova mu simano, ci ka kuasa vusoko vuose ku uana ku viukilila mu Lizi lia Njambi, kaha Yehova aka mi vezikisa.​—Visamo 1:1-3.

  • Vika tue ku hanguila litangua lia ku lemesa mu vusoko?

  • Vika va na pande ku linga visemi mangana ku lemesa ca mu vusoko ci pue ca cili?