မာတိကာဆီ ကျော်သွား

မာတိကာဆီ ကျော်သွား

ကမ္ဘာဦး ၁၆:၁-၁၆

မာတိကာ

  • ဟာဂရ​နဲ့ အိရှမေလ (၁-၁၆)

၁၆  အာဗြံ​ရဲ့​ဇနီး စာရဲ​က ကလေးမ​ရဘူး။+ သူ့မှာ အီဂျစ်လူမျိုး ဟာဂရ​လို့​ခေါ်တဲ့ ကျွန်မ​တစ်ယောက်​တော့ ရှိတယ်။+ ၂  စာရဲ​က အာဗြံ​ကို “အစ်ကို၊ ကျွန်မ​ပြောတာ နားထောင်ပါ​ဦး။ ယေဟောဝါ​ဘုရားက ကျွန်မကို သားသမီး​မပေးဘူး။ ဒါကြောင့် ဟာဂရ​ကို ယူ​လိုက်ပါ​လား။ ဒီနည်းနဲ့ ကျွန်မ ကလေး​ရနိုင်​မလား​လို့​ပါ”+ ဆို​ပြီး​ပြောတယ်။ အာဗြံ​လည်း စာရဲ​ပြောတာကို နားထောင်​တယ်။ ၃  ခါနန်ပြည်​မှာ ဆယ်နှစ်​ကြာ နေထိုင်​ပြီးတဲ့နောက် စာရဲ​က သူ့​ယောက်ျား အာဗြံ​လက်ထဲ အီဂျစ်​ကျွန်မ ဟာဂရ​ကို အပ်​လိုက်တယ်။ ၄  အာဗြံ​နဲ့ ဟာဂရ အတူ​နေတဲ့​အတွက် ဟာဂရ​မှာ ကိုယ်ဝန်​ရှိ​လာတယ်။ ကိုယ်ဝန်​ရှိမှန်း​လည်း သိ​ရော သခင်မ​ကို မလေးမစား လုပ်​တော့​တယ်။ ၅  အဲဒီအခါ စာရဲ​က အာဗြံ​ကို “အစ်ကို့​ကြောင့် ကျွန်မ ခု​လို စိတ်ထိခိုက်​နေရတာ။ ဒီ​ကျွန်မိန်းမ​ကို အစ်ကို့​ရင်ခွင်​ထဲ အပ်​လိုက်တာ ကျွန်​မပါ။ အခု သူ့မှာ ကိုယ်ဝန်​ရှိမှန်း​လည်း သိ​ရော ကျွန်မကို မလေးမစား​လုပ်​တော့​တာပဲ။ အစ်ကို​နဲ့​ကျွန်မကို ယေဟောဝါ​ဘုရား​ပဲ တရားစီရင်​ပေးပါစေ” လို့​ပြောတယ်။ ၆  အာဗြံ​က​လည်း “ဟာဂရ​က မင်း​လက်ထဲ​မှာ ရှိတာပဲ။ ကော​င်း​မယ်​ထင်သလို​သာ လုပ်ပါ” လို့​ပြောတယ်။ ဒါနဲ့ စာရဲ ညှဉ်းဆဲ​တဲ့​အတွက် ဟာဂရ​လည်း ထွက်ပြေး​သွားတယ်။ ၇  အဲဒီနောက် ယေဟောဝါရဲ့ ကောင်းကင်တမန်​က ရှု​ရ​အရပ်​ကို​သွား​တဲ့+ တောလမ်း​မှာ​ရှိတဲ့ ရေတွင်းနား​မှာ ဟာဂရ​ကို တွေ့​တယ်။ ၈  “စာရဲ​ရဲ့​ကျွန်မ ဟာဂရ၊ ဘယ်​က လာ​တာ​လဲ။ ဘယ်​ကို သွား​မှာ​လဲ” လို့​မေး​တော့ “သခင်မ စာရဲ​ဆီက ထွက်ပြေး​လာ​တာ​ပါ” လို့​ပြန်ဖြေ​တယ်။ ၉  ယေဟောဝါရဲ့ ကောင်းကင်တမန်​က “မင်း​ရဲ့​သခင်မ​ဆီ ပြန်သွား​ပါ။ ကိုယ့်ကို​ယ်​ကိုယ် နှိမ့်​ချပြီး သူ့​လက်အောက်​မှာပဲ နေ​ပါ” လို့​ပြောတယ်။ ၁၀  ပြီးတော့ ယေဟောဝါရဲ့ ကောင်းကင်တမန်​က “မင်း​ရဲ့​မျိုးနွယ်​ကို မရေတွက်​နိုင်​လောက်အောင် ငါ​များပြား​စေမယ်” လို့​ပြောတယ်။+ ၁၁  ယေဟောဝါရဲ့ ကောင်းကင်တမန်​က “အခု၊ မင်း​မှာ ကိုယ်ဝန်​ရှိနေ​ပြီ။ သားလေး မွေး​မယ်။ မင်း​ဒုက္ခရောက်​လို့ ညည်းတွား​တဲ့ အသံ​ကို ယေဟောဝါ​ကြား​ပြီ။ ဒါကြောင့် သားလေး​ကို အိရှမေလ* လို့ နာမည် ပေး​ရမယ်။ ၁၂  အိရှမေလ​ဟာ မြည်း​ရိုင်း​လို လူစား​မျိုး ဖြစ်လာမယ်။ လူတိုင်း​နဲ့ ရန်ဘက်​ဖြစ်​လိမ့်မယ်။ လူတိုင်း​က​လည်း သူ့ကို ရန်​လုပ်​လိမ့်မယ်။ သူက ညီအစ်ကို​တွေ​ရဲ့ အနီးအနား​မှာ နေထိုင်​လိမ့်မယ်”* လို့​ဆက်​ပြောတယ်။ ၁၃  ဟာဂရ​လည်း သူနဲ့​စကား​ပြောတဲ့ ယေဟောဝါရဲ့​နာမည်ကို ခေါ်ပြီး “အို ဘုရား​သခင်၊ ကိုယ်တော်​ဟာ အရာအားလုံးကို မြင်​တဲ့​ဘုရား​ပါ”+ လို့​ဆုတောင်း​တယ်။ ပြီးတော့ “ငါ့ကို​မြင်​တဲ့​အရှင်​ကို ဒီနေရာ​မှာ ငါ​မြင်ဖူး​ပြီ” လို့​လည်း ပြောတယ်။ ၁၄  ဒါကြောင့် အဲ​ဒီရေ​တွင်း​ကို ဗေ​ရ​လ​ဟဲ​ရော* လို့​ခေါ်တယ်။ (အဲဒီ​ရေတွင်း​က ကာဒေရှ​နဲ့ ဗေ​ရက်​အရပ်​ကြားမှာ ရှိတယ်။) ၁၅  ဟာဂရ သားလေး​မွေး​လာတဲ့အခါ အာဗြံ​က သားကို အိရှမေလ​လို့ နာမည်​ပေးတယ်။+ ၁၆  သား​အိရှမေလ​ကို ဟာဂရ​မွေးတဲ့အချိန်​မှာ အာဗြံ အသက် ၈၆ နှစ်​ရှိပြီ။

အောက်ခြေမှတ်ချက်များ

အဓိပ္ပာယ်၊ “ဘုရား​သခင် ကြား​ပြီ။”
“ညီအစ်ကိုတွေနဲ့ မတည့်​အတူ နေ​လိမ့်မယ်” လည်း​ဖြစ်နိုင်။
အဓိပ္ပာယ်၊ “ငါ့ကို​မြင်​တဲ့​အရှင်​ရဲ့ ရေတွင်း။”