မာတိကာဆီ ကျော်သွား

ငရဲ​ဆိုတာ ဘာလဲ။ လူတွေကို ထာဝစဉ်​ညှဉ်းဆဲ​တဲ့ နေရာတစ်ခု​လား

ငရဲ​ဆိုတာ ဘာလဲ။ လူတွေကို ထာဝစဉ်​ညှဉ်းဆဲ​တဲ့ နေရာတစ်ခု​လား

သမ္မာကျမ်းစာ​ဖြေဆို​ရာ

ဟေဗြဲ​စကားလုံး “ရှီး​အိုး​လ်” နဲ့ ဂရိ​စကားလုံး “ဟေးဒီးစ်” ကို သမ္မာကျမ်းစာ ဘာသာပြန်ကျမ်း​တချို့က “ငရဲ” လို့ ပြန်ဆို​ကြတယ်။ အမှန်​တော့ ရှီး​အိုး​လ် ဒါမှမဟုတ် ဟေးဒီးစ် ဆိုတာက သေဆုံး​သွား​သူတွေ ရောက်ရှိ​နေတဲ့ ပုံဆောင်​နေရာတစ်ခု ဖြစ်ပါတယ်။ (ဆာလံ ၁၆:၁၀; တမန်တော် ၂:၂၇) လူ​တချို့က ဒီ​ဆောင်းပါး​မှာပါတဲ့ သရုပ်ဖော်ပုံ​အတိုင်း လူတွေကို​မီးရှို့​ညှဉ်းဆဲ​တဲ့ ငရဲ​ရှိတယ်လို့ ယုံကြည်​ကြတယ်။ ဒါပေမဲ့ သမ္မာကျမ်းစာ သွန်သင်ချက်​ကတော့ အောက်ပါ​အတိုင်း ဖြစ်ပါတယ်။

  1. ၁။ ငရဲ​မှာ ရှိနေကြ​သူတွေဟာ ဘာကိုမှ​မသိကြ​တော့​သလို ဝေဒနာ​တွေ​လည်း မခံစားရတော့ဘူး။ ‘သေ​သောသူ​မူ​ကား အဘယ်အရာကို​မျှ​မသိ။ သင်​ယခု​သွား၍ ရောက်​ရ​လ​တ္တံ့​သော​အရပ်​တည်းဟူသော မရဏာ​နိုင်ငံ [ရှီး​အိုး​လ်၊ က​ဘ] ၌ လုပ်ဆောင်ခြင်း​မရှိ။ ကြံစည်ခြင်း​မရှိ။ သိပ္ပံ​အတတ်​မရှိ။ ပညာ​မရှိပါ​တကား။’—ဒေသနာ ၉:၅၊ ၁၀

  2. ၂။ လူကောင်း​တွေ​လည်း ငရဲ​ကို ရောက်​သွားကြတယ်။ ဘုရား​အပေါ် သစ္စာ​တည်ကြည်သူ​တွေ​ဖြစ်တဲ့ ယာကုပ်နဲ့ ယောဘ​တို့​လည်း ငရဲ (ဟေဗြဲ​ဘာသာစကား​အရ ရှီး​အိုး​လ်) ကို​သွားဖို့ မျှော်လင့်​ခဲ့​ကြတယ်။—ကမ္ဘာဦး ၃၇:၃၅; ယောဘ ၁၄:၁၃

  3. ၃။ အပြစ်​တရား​အတွက် ပြစ်ဒဏ်​က သေခြင်း​ဖြစ်တယ်။ မီးတောက်လောင်​နေတဲ့ ငရဲ​မှာ ညှဉ်းဆဲ​ခံရ​တာ မဟုတ်ဘူး။ “သေ​သောသူ​သည် အပြစ်​တရား​၏​လက်​မှ ကင်းလွတ်ပြီ။”—ရောမ ၆:၇

  4. ၄။ ထာဝစဉ်​ညှဉ်းဆဲခြင်း​ဟာ ဘုရားသခင်က တရား​မျှတတယ်​ဆိုတဲ့​အချက်​နဲ့ မကိုက်ညီ​ဘူး။ (တရားဟောရာ ၃၂:၄) ပထမဆုံး​လူသား အာဒံ အပြစ်​လုပ်တဲ့​အတွက် သူ တည်ရှိ​မှာ မဟုတ်တော့ဘူးလို့ ဘုရားသခင် ပြောခဲ့တယ်။ ကိုယ်တော် ခုလို​ဆိုတယ်- “သင်သည် မြေမှုန့်​ဖြစ်၍ မြေမှုန့်​သို့​ပြန်​ရမည်။” (ကမ္ဘာဦး ၃:၁၉) တကယ်လို့​သာ အာဒံ​ကို ငရဲ​ကျစေ​မယ်​ဆိုရင် ဘုရားသခင် လိမ်ပြော​ရာ ကျ​ပါလိမ့်မယ်။

  5. ၅။ ဘုရားသခင်က ထာဝစဉ်​ညှဉ်းဆဲ​ဖို့ စဉ်းတောင် မစဉ်းစား​ဘူး။ လူတွေကို မီးတောက်လောင်​နေတဲ့ ငရဲ​မှာ ဒဏ်ခတ်​မယ်ဆိုတဲ့ သွန်သင်ချက်​ဟာ “ဘုရားသခင်သည် ချစ်ခြင်း​မေတ္တာ​ဖြစ်တော်မူ၏” ဆိုတဲ့ ကျမ်းစာ​သွန်သင်ချက်နဲ့ ဆန့်ကျင်ဘက်​ပါပဲ။—၁ ယောဟန် ၄:၈; ယေရမိ ၇:၃၁