၂၀၂၁ ခုနှစ်၊ မတ်လကတည်းက ခရိုင်းမီးယားမှာ ထောင်ကျနေတဲ့ ညီအစ်ကို ဗစ်တာ စတာရှက်စကီ

ယုံကြည်ချက်ကြောင့် ထောင်ကျနေတဲ့ ယေဟောဝါသက်သေများ—ဒေသအလိုက်

ဖွင့်ပါ

၂၀၂၆ ခုနှစ်၊ ဧပြီလအထိ မှတ်တမ်းအရ ကမ္ဘာတစ်ဝန်းမှာ ယုံကြည်ချက်ကြောင့် ထောင်ကျနေတဲ့ ယေဟောဝါသက်သေ ၂၇၉ ယောက်ကျော် ရှိတယ်။

လူတိုင်း လွတ်လပ်စွာ တွေးခေါ်ခွင့်၊ လက်ခံကျင့်သုံးခွင့်၊ ကိုးကွယ်ယုံကြည်ခွင့် ရှိတယ်လို့ နိုင်ငံသားနဲ့ နိုင်ငံရေး အခွင့်အရေးဆိုင်ရာ နိုင်ငံတကာ သဘောတူစာချုပ်၊ အပိုဒ် ၁၈ မှာ ဖော်ပြထားတယ်။ ဒါပေမဲ့ နိုင်ငံတချို့မှာ အဲဒီလွတ်လပ်ခွင့်ကို ယေဟောဝါသက်သေတွေ မရကြဘူး။ ဘာသာရေးလုပ်ဆောင်မှုတွေ လုပ်လို့၊ ယုံကြည်ချက်ကြောင့် စစ်မှုမထမ်းလို့ မတရားထောင်ချခံကြရတယ်၊ နှိပ်စက်ခံကြရတယ်။

ခရိုင်းမီးယား

၂၀၁၇ ခုနှစ်၊ ဧပြီလမှာ ယေဟောဝါသက်သေတွေရဲ့ တရားဝင်အသင်းအဖွဲ့ကို ရုရှားအစိုးရ ပိတ်ပင်လိုက်တယ်။ ငြိမ်သက်အေးချမ်းစွာ ဝတ်ပြုလို့ မရစေဖို့ပဲ။ ရုရှားအစိုးရရဲ့ အပြင်းအထန် တိုက်ခိုက်ဆန့်ကျင်မှုဟာ ခရိုင်းမီးယားအထိပါ ရောက်လာတယ်။ အကြိမ်ကြိမ် ဝင်ရောက်စီးနင်း၊ ဖမ်းဆီးပြီး လောလောဆယ် ယေဟောဝါသက်သေ ၁၅ ယောက်ကို ထောင်ချထားတယ်။ အစွန်းရောက်လုပ်ဆောင်မှုတွေကို အားပေးအားမြှောက်လုပ်တယ်ဆိုတဲ့ စွဲချက်နဲ့ပါ။

ခရိုင်းမီးယားမှာ ယုံကြည်ချက်ကြောင့် ထောင်ကျနေတဲ့ ယေဟောဝါသက်သေစာရင်းကို ကူးယူချင်ရင် ဒီနေရာကို နှိပ်ပါ။

အီရီထရီးယား

၁၉၉၄ ခုနှစ်မှာ အီရီထရီးယားနိုင်ငံက ယေဟောဝါသက်သေတွေရဲ့ နိုင်ငံသားဖြစ်ခွင့်ကို သမ္မတ အက်ဖ်ဝါကီ ရုပ်သိမ်းလိုက်တယ်။ အကြောင်းရင်းကတော့ ၁၉၉၃ ခုနှစ် လွတ်လပ်ရေး ဆန္ဒခံယူပွဲမှာ ယေဟောဝါသက်သေတွေ မဲမထည့်လို့၊ ယုံကြည်ချက်ကြောင့် စစ်မှုမထမ်းလို့ပါ။ အဲဒီအချိန်ကစပြီး အစိုးရက အမျိုးသမီး၊ သက်ကြီးရွယ်အို၊ ကလေးပါမရှောင် ယေဟောဝါသက်သေတွေကို ရုံးတင်မစစ်ဆေးဘဲ ထောင်ချတယ်၊ ညှဉ်းပန်းနှိပ်စက်တယ်၊ ဒုက္ခပေးနှောင့်ယှက်တယ်။ လောလောဆယ် ယေဟောဝါသက်သေ ၆၄ ယောက် ထောင်ကျနေပါတယ်။ သူတို့တစ်ယောက်မှ စွဲချက်တင်ခံရတာ၊ စီရင်ချက်ချခံရတာမျိုး မရှိခဲ့ဘူး။

အီရီထရီးယားမှာ ယုံကြည်ချက်ကြောင့် ထောင်ကျနေတဲ့ ယေဟောဝါသက်သေစာရင်းကို ကူးယူချင်ရင် ဒီနေရာကို နှိပ်ပါ။

ရုရှား

၂၀၁၇ ခုနှစ်၊ ဧပြီလမှာ ရုရှားတရားရုံးချုပ်က ယေဟောဝါသက်သေတွေရဲ့ တရားဝင်အသင်းအဖွဲ့ကို အစွန်းရောက်အဖွဲ့လို့ စွပ်စွဲပြီး ပိတ်ပင်လိုက်တယ်။ ဝတ်ပြုရာနေရာတွေကို သိမ်းတယ်။ ဘာသာရေးစာပေတွေကို ပိတ်ပင်တယ်။ အဲဒီနောက်မှာတော့ ယေဟောဝါသက်သေတစ်ဦးချင်းစီကိုပါ ပစ်မှတ်ထားလာတယ်။ ကိုယ့်ဘာသာကိုယ် သီးသန့်လုပ်တဲ့ ဘာသာရေးလုပ်ဆောင်မှုတွေကိုလည်း ပိတ်ပင်ထားတဲ့ အဖွဲ့အစည်းလုပ်ဆောင်မှုတွေဆိုပြီး သမုတ်တယ်။ အိမ်တွေထဲ ရဲတွေ ရုတ်တရက် ဝင်ရောက်စီးနင်းပြီး ကိုယ်ထိလက်ရောက် စော်ကားတာ၊ ပြင်းပြင်းထန်ထန် စစ်ကြောမေးမြန်းတာ၊ ဖမ်းဆီးတာတွေ လုပ်တတ်တယ်။ အမှုမစစ်ခင် ဖမ်းချုပ်ထားခံရတဲ့၊ အလုပ်ကြမ်းနဲ့ ပြစ်ဒဏ်ကျနေတဲ့၊ ထောင်ဒဏ်ကျနေတဲ့ ယေဟောဝါသက်သေ ၁၇၂ ယောက်ထက်မနည်း ရှိတယ်။

ရုရှားမှာ ယုံကြည်ချက်ကြောင့် ထောင်ကျနေတဲ့ ယေဟောဝါသက်သေစာရင်းကို ကူးယူချင်ရင် ဒီနေရာကို နှိပ်ပါ။

စင်ကာပူ

စင်ကာပူအစိုးရဟာ စစ်မှုမထမ်းမနေရ ဥပဒေ ပြဋ္ဌာန်းထားပြီး ယုံကြည်ချက်ကြောင့် စစ်မှုမထမ်းတာကို ခွင့်မပြုဘူး။ စစ်မှုမထမ်းသူတွေကို လပေါင်း ၃၀ အထိ ထောင်ဒဏ်ကျခံစေတယ်။ ယုံကြည်ချက်ကြောင့် စစ်မှုမထမ်းသူတွေအတွက် ကုလသမဂ္ဂက ဆယ်စုနှစ်ချီ မေတ္တာရပ်ခံထားတာတောင် အပြည်ပြည်ဆိုင်ရာ လူ့အခွင့်အရေး စံနှုန်းတွေကို စင်ကာပူအစိုးရ မလိုက်နာသေးဘူး။ စစ်မှုမထမ်းလို့ လောလောဆယ် ယေဟောဝါသက်သေ လူငယ် ၉ ယောက် ထောင်ကျနေပြီး သူတို့ထဲက ၃ ယောက်ဟာ ဒုတိယအကြိမ် ထောင်ကျနေတာပါ။

စင်ကာပူမှာ ယုံကြည်ချက်ကြောင့် ထောင်ကျနေတဲ့ ယေဟောဝါသက်သေစာရင်းကို ကူးယူချင်ရင် ဒီနေရာကို နှိပ်ပါ။

တောင်ကိုရီးယား

ယုံကြည်ချက်ကြောင့် စစ်မှုမထမ်းသူတွေအတွက် အစားထိုး အရပ်ဘက်လုပ်ငန်းကို ၂၀၂၀ ခုနှစ်၊ အောက်တိုဘာလ ၂၆ ရက်မှာ တောင်ကိုရီးယားအစိုးရက စီစဉ်ပေးလိုက်တယ်။ ဒါပေမဲ့ ၃၆ လကြာတဲ့ အစားထိုး အရပ်ဘက်လုပ်ငန်းဟာ စစ်မှုထမ်းရမယ့် သက်တမ်းထက် နှစ်ဆပိုကြာမြင့်နေတယ်။ ဒါကြောင့် အစားထိုး အရပ်ဘက်လုပ်ငန်းဟာ ပြစ်ဒဏ်ပေးတဲ့ပုံစံ ဖြစ်နေတယ်ဆိုပြီး လူတချို့ ပြောလာကြတယ်။ အမှုဖွင့်တိုင်ကြားတာတွေ ရှိပေမဲ့ ဒီအစားထိုး အရပ်ဘက်လုပ်ငန်း အစီအစဉ်ကို ဆက်ကျင့်သုံးသွားဖို့ ၂၀၂၄ ခုနှစ်မှာ တောင်ကိုရီးယား ဖွဲ့စည်းပုံအခြေခံဥပဒေ တရားရုံးက ဆုံးဖြတ်လိုက်တယ်။ အစားထိုး အရပ်ဘက်လုပ်ငန်းဟာ အချိန်ကြာမြင့်ပြီး ပြင်းထန်ပေမဲ့ ယေဟောဝါသက်သေအများစု လက်ခံကြတယ်။ ညီအစ်ကိုငယ် ၁၅ ယောက်ကတော့ လက်မခံကြဘူး။ ဒါကြောင့် တစ်ယောက် ထောင်ကျပြီး တော်တော်များများ အမှုရင်ဆိုင်နေကြရတယ်။ အမှုရင်ဆိုင်ပြီးနောက် ထောင်ကျနိုင်တယ်။

တောင်ကိုရီးယားမှာ ယုံကြည်ချက်ကြောင့် ထောင်ကျနေတဲ့ ယေဟောဝါသက်သေစာရင်းကို ကူးယူချင်ရင် ဒီနေရာကို နှိပ်ပါ။

ယူကရိန်း

ယုံကြည်ချက်ကြောင့် စစ်မှုမထမ်းသူတွေအတွက် အစားထိုး အရပ်ဘက်လုပ်ငန်း လုပ်ခွင့်ပေးတဲ့ ဥပဒေကြောင့် ယူကရိန်းနိုင်ငံက ယေဟောဝါသက်သေတွေ နှစ်သုံးဆယ်နီးပါး အကျိုးရခဲ့ကြတယ်။ ဒါပေမဲ့ ၂၀၂၂ ခုနှစ်၊ ဖေဖော်ဝါရီလ ၂၄ ရက်မှာ စစ်စဖြစ်လို့ အစိုးရက စစ်သားစုဆောင်းတော့တယ်။ စစ်မှုမထမ်းသူတွေအတွက် ရှင်းလင်းတဲ့ ဥပဒေ မရှိလို့ တော်တော်များများ ထောင်ချခံကြရတယ်။ လောလောဆယ် ယေဟောဝါသက်သေ ၉ ယောက် ထောင်ကျနေပြီး ၉ ယောက်ကတော့ အမှုမစစ်ခင် ဖမ်းဆီးခံထားရတယ်။ ယူကရိန်းမှာ အစားထိုး အရပ်ဘက်လုပ်ငန်း မရှိတာနဲ့ပတ်သက်ပြီး ကုလသမဂ္ဂ အထူးကိုယ်စားလှယ် ၃ ယောက်က စိုးရိမ်မကင်းဖြစ်ကြောင်း ဖော်ပြခဲ့တယ်။

ယူကရိန်းမှာ ယုံကြည်ချက်ကြောင့် ထောင်ကျနေတဲ့ ယေဟောဝါသက်သေစာရင်းကို ကူးယူချင်ရင် ဒီနေရာကို နှိပ်ပါ။

“အကျဉ်းကျနေတဲ့သူတွေကို ကိုယ်လည်း သူတို့နဲ့အတူ အကျဉ်းကျနေတယ်လို့ သဘောထားပြီး သတိရကြပါ။”—ဟီဘရူး ၁၃:၃။