၁ ရာဇဝင်ချုပ် ၁၇:၁-၂၇
၁၇ ဒါဝိဒ်မင်းက နန်းတော်မှာ စံမြန်းနေရတဲ့အခါ ပရောဖက်နာသန်ကို+ ခေါ်ပြီး “ငါက သစ်ကတိုးသားနဲ့ ဆောက်တဲ့ နန်းတော်မှာ စံနေရပေမဲ့+ ယေဟောဝါရဲ့ ပဋိညာဉ်သေတ္တာကျတော့ တဲမှာပဲ ရှိနေတယ်”+ လို့ပြောတယ်။
၂ နာသန်က “စစ်မှန်တဲ့ဘုရားသခင်ဟာ မင်းကြီးနဲ့အတူ ရှိတဲ့အတွက် ဆန္ဒရှိတဲ့အတိုင်းသာ လုပ်ပါ” လို့ ပြန်ပြောတယ်။
၃ အဲဒီညမှာပဲ ဘုရားသခင်က နာသန်ကို မှာတယ်–
၄ “ငါ့ကျွန်ဒါဝိဒ်ကို သွားပြောလိုက်။ ‘ယေဟောဝါ မိန့်မှာတာက “ငါ့အတွက် စံအိမ်ကို တည်ဆောက်ပေးမယ့်သူဟာ မင်း မဟုတ်ဘူး။+
၅ ငါက အစ္စရေးတွေကို ခေါ်ထုတ်လာတဲ့နေ့ကစပြီး ဒီနေ့အထိ စံအိမ်ထဲမှာ မနေခဲ့ဘူး။ တဲမှာပဲနေပြီး တစ်နေရာပြီး တစ်နေရာ သွားလာခဲ့တယ်။+
၆ အစ္စရေးတွေနဲ့အတူ သွားလာချိန်တစ်လျှောက်မှာ သူတို့ကို ထိန်းကျောင်းဖို့ ငါခန့်အပ်ခဲ့တဲ့ အစ္စရေးတရားသူကြီးတွေကို ‘ငါ့အတွက် သစ်ကတိုးသားစံအိမ် ဘာလို့ မဆောက်ပေးတာလဲ’ ဆိုပြီး တစ်ခွန်းလောက် ငါပြောခဲ့ဖူးသလား။”’
၇ “အခု ငါ့ကျွန်ဒါဝိဒ်ကို ပြောလိုက်ပါ။ ‘ဗိုလ်ခြေတို့ရဲ့အရှင် ယေဟောဝါ ပြောတာက– “မင်းကို ငါ့လူမျိုးအစ္စရေးရဲ့ ခေါင်းဆောင်အဖြစ် ခန့်အပ်ဖို့ သိုးကျောင်းရာ စားကျက်မြေကနေ ငါခေါ်ထုတ်ခဲ့ပြီ။+
၈ မင်းသွားလေရာမှာ မင်းနဲ့အတူ ငါရှိမယ်။+ မင်းရဲ့ရန်သူအားလုံးကို ရှေ့ကနေ ငါဖယ်ရှားမယ်။+ ကမ္ဘာပေါ်က ထင်ပေါ်ကျော်ကြားသူတွေလို မင်းရဲ့နာမည်ကို ကျော်ကြားစေမယ်။+
၉ ငါ့လူမျိုးအစ္စရေးတွေအတွက် နေရာတစ်နေရာကို သတ်မှတ်ပြီး နေရာချပေးမယ်။ သူတို့ အဲဒီနေရာမှာ နေထိုင်ကြမယ်။ ဘယ်တော့မှ နှောင့်ယှက်ခံရမှာ မဟုတ်ဘူး။ လူဆိုးတွေက ငါ့လူမျိုးအစ္စရေးတွေကို ဟိုးအရင်တုန်းကလို၊+
၁၀ တရားသူကြီးတွေ လက်ထက်တုန်းကလို+ ဖိနှိပ်တော့မှာ မဟုတ်ဘူး။ မင်းရဲ့ရန်သူအားလုံးကို ငါနှိမ်နင်းမယ်။+ အဲဒီအပြင် ငါထပ်ပြောမယ်– ‘မင်းရဲ့ မင်းဆက်ကို ငါယေဟောဝါ တည်မြဲစေမယ်။’
၁၁ “‘“မင်းကွယ်လွန်ပြီး ဘိုးဘေးတွေရှိရာကို ရောက်သွားတဲ့အခါ မင်းရဲ့မျိုးနွယ်၊ မင်းရဲ့ရင်သွေးကို ငါ မင်းမြှောက်မယ်။+ သူ့ရဲ့မင်းအာဏာကို ငါတည်မြဲစေမယ်။+
၁၂ သူက ငါ့အတွက် အိမ်တော်ကို တည်ဆောက်လိမ့်မယ်။+ သူ့ရာဇပလ္လင်ကို ထာဝစဉ် ငါတည်မြဲစေမယ်။+
၁၃ ငါဟာ သူ့ဖခင် ဖြစ်လာမယ်။ သူဟာ ငါ့သားဖြစ်လာမယ်။+ မင်းမတိုင်ခင် နန်းထိုင်ခဲ့သူဆီကနေ ငါ့ရဲ့ခိုင်မြဲတဲ့မေတ္တာကို ရုပ်သိမ်းသလိုမျိုး+ မင်းရဲ့သားဆီကနေ ငါရုပ်သိမ်းမှာ မဟုတ်ဘူး။+
၁၄ သူ့ကို ငါ့ရာဇပလ္လင်မှာ ထာဝစဉ် နန်းထိုင်စေမယ်။+ သူ့ရဲ့အာဏာနဲ့ မင်းဆက်ဟာ ထာဝစဉ် တည်လိမ့်မယ်။”’”+
၁၅ နာသန်က မြင်ခဲ့ရတဲ့ စိတ်အာရုံအကြောင်း၊ ကြားခဲ့ရတဲ့စကားတွေအကြောင်း တစ်ခုမကျန် ဒါဝိဒ်ကို ပြန်ပြောပြတယ်။
၁၆ အဲဒီအခါ ဒါဝိဒ်မင်းက ယေဟောဝါရှေ့ ဝင်လာပြီး ထိုင်နေတယ်။ ပြီးတော့ “ယေဟောဝါဘုရား၊ ကျွန်တော်နဲ့ ကျွန်တော့်အမျိုးဟာ ဘယ်သူတွေမို့လို့ ဒီလောက်အထိ ကျေးဇူးပြုရတာလဲ။+
၁၇ ဘုရားသခင်၊ ဒါနဲ့တင် အားမရသေးဘဲ ဟိုးအနာဂတ်ကာလအထိ ကျွန်တော့်အမျိုး တည်တံ့မယ်လို့တောင် မိန့်မှာပါပြီ။+ ယေဟောဝါဘုရား၊ ကိုယ်တော်က ကျွန်တော့်ကို ထပ်ဆင့် ချီးမြှောက်ခံထိုက်သူလို ယူမှတ်ပါပြီ။
၁၈ ကျွန်တော့်ကို ကိုယ်တော် ကောင်းကောင်း သိပါတယ်။+ အခုလို ချီးမြှောက်တာနဲ့ ပတ်သက်ပြီး ကျွန်တော်မျိုးဒါဝိဒ် ဘာများထပ်ပြောနိုင်မှာလဲ။
၁၉ ယေဟောဝါဘုရား၊ ကိုယ်တော်က ကြီးမြတ်တဲ့ ဒီအရာအားလုံးကို ကျွန်တော့်အကျိုးအတွက်၊ စိတ်သဘောတော်အတိုင်း လုပ်ဆောင်ပြီး ကိုယ်တော့်ကြီးမြတ်မှုကို ဖော်ပြခဲ့ပါပြီ။+
၂၀ ယေဟောဝါဘုရား၊ ကိုယ်တော်နဲ့တူတဲ့ဘုရား မရှိဘူး၊+ ကိုယ်တော်ကလွဲလို့ တခြားဘုရား မရှိဘူး+ ဆိုတာကို ကြားသိသမျှအရာတွေက ထောက်ခံနေပါတယ်။
၂၁ ကမ္ဘာပေါ်မှာ ကိုယ်တော့်လူမျိုးကို ဘယ်လူမျိုးက ယှဉ်နိုင်ပါသလဲ။+ ဘုရားသခင်က အစ္စရေးတွေကို မိမိရဲ့လူမျိုးအဖြစ် ရွေးယူခဲ့ပြီ။+ ကြီးမြတ်တဲ့ အံ့မခန်းဖွယ်လုပ်ရပ်တွေအားဖြင့် နာမတော်ကို ထင်ရှားစေခဲ့ပြီ။+ အီဂျစ်ပြည်ကနေ ရွေးယူခဲ့တဲ့ မိမိရဲ့လူမျိုးရှေ့ကနေ လူမျိုးခြားတွေကို နှင်ထုတ်ခဲ့ပြီ။+
၂၂ ကိုယ်တော်က အစ္စရေးလူမျိုးကို အစဉ်အမြဲပိုင်ဆိုင်တဲ့ လူမျိုးတော်အဖြစ် သတ်မှတ်လိုက်ပြီ။+ ယေဟောဝါဘုရား၊ ကိုယ်တော်ဟာ သူတို့ရဲ့ဘုရားသခင် ဖြစ်လာပါပြီ။+
၂၃ ယေဟောဝါဘုရား၊ အခု ကျွန်တော်နဲ့ ကျွန်တော့်အမျိုးကို ပေးခဲ့တဲ့ ကတိတော်ကို အစဉ်အမြဲတည်စေပါ။ ကတိတော်အတိုင်း လုပ်ဆောင်ပေးပါ။+
၂၄ နာမတော် ထာဝစဉ်တည်တံ့ပါစေ။ လူတွေက ‘အစ္စရေးတို့ရဲ့ဘုရား၊ ဗိုလ်ခြေတို့ရဲ့အရှင် ယေဟောဝါဟာ အစ္စရေးတို့ရဲ့ ဘုရားသခင်ပဲ’ လို့ပြောပြီး နာမတော်ကို ချီးမြှောက်ကြပါစေ။+ ကျွန်တော်မျိုးဒါဝိဒ်ရဲ့ မင်းဆက်ဟာ ရှေ့တော်မှာ အမြဲတည်တံ့ပါစေ။+
၂၅ ဘုရားသခင်၊ ကိုယ်တော်က ကျွန်တော့်မင်းဆက်ကို တည်စေမယ်ဆိုတဲ့ ရည်ရွယ်ချက်ကို ဖော်ပြခဲ့ပါပြီ။ ဒါကြောင့် အခုလို ယုံကြည်စိတ်ချမှုအပြည့်နဲ့ ဆုတောင်းရတာပါ။
၂၆ ယေဟောဝါဘုရား၊ ကိုယ်တော်ဟာ စစ်မှန်တဲ့ ဘုရားသခင်ပါ။ ကျွန်တော့်ကို ဒီဆုကျေးဇူးတွေ ပေးသနားမယ်လို့ ကတိပြုထားပါပြီ။
၂၇ ဒါကြောင့် ကျွန်တော့်မင်းဆက်ကို အလိုတော်အတိုင်း ကောင်းချီးပေးပြီး ရှေ့တော်မှာ ထာဝစဉ်တည်မြဲစေပါ။ ယေဟောဝါဘုရား၊ ကိုယ်တော်တိုင် ကောင်းချီးပေးခဲ့ပြီဖြစ်လို့ ကျွန်တော့်မင်းဆက်ဟာ ထာဝစဉ် ကောင်းချီးခံစားရပါစေ” လို့ဆုတောင်းတယ်။
