၁ ရာဇဝင်ချုပ် ၁၄:၁-၁၇
၁၄ တိုင်ရာဘုရင် ဟိရံက+ ဒါဝိဒ်ဆီ တမန်တွေ စေလွှတ်ပြီး နန်းတော်တည်ဆောက်ဖို့ သစ်ကတိုးသားတွေ၊ ကျောက်ဆစ်သမားတွေ၊ လက်သမားတွေကို ပို့လိုက်တယ်။+
၂ ယေဟောဝါက လူမျိုးတော် အစ္စရေးတွေရဲ့ အကျိုးအတွက် ဒါဝိဒ်ရဲ့ တန်ခိုးအာဏာကို ကြီးမားစေတယ်။+ ဒါကြောင့် ဒါဝိဒ်က အစ္စရေးဘုရင်အဖြစ် မိမိကို မင်းမြှောက်တာ ဘုရားသခင်ပဲဆိုတာ သိတယ်။+
၃ ဒါဝိဒ်က ဂျေရုဆလင်မြို့မှာ မိဖုရားတွေ ထပ်ပြီးသိမ်းပိုက်တဲ့အတွက်+ သားသမီးတွေ ထပ်ရလာတယ်။+
၄ ဂျေရုဆလင်မြို့မှာ ဒါဝိဒ်ရတဲ့ သားသမီးတွေက+ ရှမွာ၊ ရှောဗပ်၊ နာသန်၊+ ရှောလမုန်၊+
၅ အိဗဟာ၊ ဧလိရွှ၊ ဧလိပလက်၊
၆ နောဂ၊ နေဖက်၊ ယာဖျာ၊
၇ ဧလိရှမာ၊ ဗေလျာဒ၊ ဧလိဖလက်တို့ဖြစ်တယ်။
၈ ဒါဝိဒ်ကို အစ္စရေးဘုရင်အဖြစ် ဘိသိက်ပေးလိုက်ပြီဆိုတာ ဖိလိတိတွေ ကြားတဲ့အခါ+ ဒါဝိဒ်ကို ရှာဖို့ ချီတက်လာတယ်။+ ဒီအကြောင်းကို ဒါဝိဒ်ကြားတော့ သူတို့ကိုတိုက်ဖို့ ထွက်လာတယ်။
၉ ဖိလိတိတွေလည်း ချီတက်လာပြီး ရေဖိမ်ချိုင့်ဝှမ်းမှာ နေထိုင်သူတွေကို တိုက်ခိုက်လုယက်တယ်။+
၁၀ အဲဒီအခါ ဒါဝိဒ်က “ဖိလိတိတွေဆီ တက်သွားပြီး တိုက်ခိုက်ရမလား။ ကျွန်တော့်လက်ထဲ အပ်မှာလား” ဆိုပြီး ယေဟောဝါကိုမေးတော့ “တက်သွား။ သူတို့ကိုမင်းလက်ထဲငါဆက်ဆက်အပ်မယ်” လို့ဖြေတယ်။+
၁၁ ဒါဝိဒ်လည်း ဗာလပေရဇိမ်အရပ်ကို+ တက်သွားပြီး သူတို့ကို ချေမှုန်းတယ်။ အဲဒီနောက် “အဟုန်ပြင်းပြင်းနဲ့ ဖြိုခွင်းတဲ့ရေလို စစ်မှန်တဲ့ဘုရားသခင်က ငါ့ကိုသုံးပြီး ရန်သူတွေကို ဖြိုခွင်းလိုက်ပြီ” လို့ပြောတယ်။ ဒါကြောင့် အဲဒီအရပ်ကို ဗာလပေရဇိမ်* ဆိုပြီး သမုတ်ကြတယ်။
၁၂ ဖိလိတိတွေက သူတို့ရဲ့ ဘုရားရုပ်တုတွေကို အဲဒီအရပ်မှာ ထားရစ်ခဲ့တယ်။ ဒါဝိဒ်ရဲ့အမိန့်နဲ့ အဲဒီဘုရားရုပ်တုတွေကို မီးရှို့လိုက်ကြတယ်။+
၁၃ နောက်ပိုင်းမှာ ဖိလိတိတွေက ချိုင့်ဝှမ်းဒေသကို တိုက်ခိုက် လုယက်ပြန်တယ်။+
၁၄ ဒါကြောင့် ဒါဝိဒ်က ဘုရားသခင်ကို ထပ်မေးကြည့်တဲ့အခါ “သူတို့ဆီ တည့်တည့်မတက်သွားဘဲ အနောက်ဘက်ကနေ ပတ်သွားပြီး ဘာကာချုံတောရှေ့မှာ တိုက်ခိုက်ပါ။+
၁၅ ဘာကာချုံပင်ရဲ့ ထိပ်ဖျားကနေ ထွက်ပေါ်လာတဲ့ စစ်ချီသံကို ကြားတာနဲ့ စတိုက်ပေတော့။ ဘုရားသခင်က မင်းရှေ့ကနေ သွားပြီး ဖိလိတိတပ်ကို ချေမှုန်းမယ်”+ လို့ဖြေတယ်။
၁၆ ဒါဝိဒ်လည်း ဘုရားသခင် မိန့်မှာတဲ့အတိုင်း လိုက်နာတယ်။+ ဖိလိတိတပ်ကို ဂိဗောင်မြို့ကနေ ဂေဇာမြို့အထိ ချေမှုန်းတယ်။+
၁၇ ဒီလိုနဲ့ တိုင်းပြည်အသီးသီးမှာ ဒါဝိဒ်ရဲ့ဂုဏ်သတင်း ကျော်စောသွားတယ်။ လူမျိုးအားလုံး ဒါဝိဒ်ကို ကြောက်လာအောင် ယေဟောဝါ လုပ်ဆောင်ပေးတယ်။+
အောက်ခြေမှတ်ချက်များ
^ အဓိပ္ပာယ်၊ “ဖြိုခွင်းတဲ့အရှင်။”
