ဟေရှာယ ၃၂:၁-၂၀
၃၂ ကြည့်ပါ။ ဘုရင်တစ်ပါးက+ ဖြောင့်မတ်ခြင်းလွှမ်းမိုးစေဖို့ နန်းထိုင်လိမ့်မယ်။+
မင်းညီမင်းသားတွေကလည်း တရားမျှတမှု စိုးမိုးစေဖို့ အုပ်ချုပ်လိမ့်မယ်။
၂ သူတို့ဟာ လေကွယ်ရာအရပ်လို၊မိုးသက်မုန်တိုင်း ကျတဲ့အခါ ပုန်းခိုရာအရပ်လို၊ရေမရှိတဲ့မြေမှာ စီးဆင်းနေတဲ့ စမ်းချောင်းတွေလို၊+ပူပြင်းခြောက်သွေ့တဲ့မြေမှာ ကျောက်ဆောင်ကြီးအရိပ်လို ဖြစ်မယ်။
၃ အဲဒီအခါ မြင်တဲ့မျက်စိဟာ အပိတ်မခံရတော့ဘူး။
ကြားတဲ့နားကလည်း အာရုံစိုက်မယ်။
၄ စိတ်လိုက်မာန်ပါ လုပ်တတ်သူတွေက အသိပညာအကြောင်း တွေးတောဆင်ခြင်လိမ့်မယ်။
စကားထစ်တဲ့သူတွေလည်း သွက်လက်ပီသစွာ ပြောဆိုလိမ့်မယ်။+
၅ အသိတရားကင်းမဲ့သူကို ရက်ရောသူလို့ မခေါ်ကြတော့ဘူး။
ကိုယ်ကျင့်တရား မကောင်းသူကို ဂုဏ်အသရေရှိသူလို့ မခေါ်ကြတော့ဘူး။
၆ အသိတရားကင်းမဲ့သူက ပေါက် ကရတွေပဲ ပြောလိမ့်မယ်။
ထိခိုက်စေတဲ့အရာတွေကို စိတ်ထဲမှာ ကြံစည်ပြီး+ အယူဖောက်ပြန်မှုကို အားပေးအားမြှောက် လုပ်လိမ့်မယ်။
ယေဟောဝါဆီကနေ လမ်းလွဲစေမယ့် စကားတွေကို ပြောလိမ့်မယ်။
ဆာလောင်နေသူကို စားစရာမကျွေးသလို ရေငတ်နေသူကိုလည်း သောက်စရာမပေးဘူး။
၇ ကိုယ်ကျင့်တရား မကောင်းသူက ဆိုးညစ်တာတွေ ကြံစည်တတ်တယ်။+
အရှက်မရှိတဲ့ လုပ်ရပ်တွေကို အားပေးအားမြှောက် လုပ်တတ်တယ်။
ဆင်းရဲသားတွေ မှန်တာကို ပြောနေရင်တောင် သူက ဒုက္ခရောက်နေတဲ့သူတွေ ပျက်စီးသွားအောင် မုသာစကားတွေ ပြောတတ်တယ်။+
၈ ရက်ရောတဲ့သူက ရက်ရောကြဖို့ အကြံပေးတတ်တယ်။
ကိုယ်တိုင်လည်း ရက်ရက်ရောရော ပေးကမ်းတတ်တယ်။
၉ “ကိုယ့်ကိုယ်ကိုယ် ကျေနပ်နေတဲ့ မိန်းမတို့၊ ထကြ။ ငါပြောတာကို နားထောင်ကြ။
အပူအပင်ကင်းနေတဲ့ အမျိုးသမီးတို့၊+ ငါပြောတာကို အာရုံစိုက်ကြ။
၁၀ အပူအပင်ကင်းတဲ့ မင်းတို့ဟာ တစ်နှစ်ကျော်သွားတာနဲ့ ဖိမ့်ဖိမ့်တုန်ရလိမ့်မယ်။
စပျစ်သီးဆွတ်ခူးချိန် ကုန်သွားပေမဲ့ တစ်လုံးမှ စုသိမ်းလိုက်ရမှာ မဟုတ်ဘူး။+
၁၁ ကိုယ့်ကိုယ်ကိုယ် ကျေနပ်နေတဲ့ မိန်းမတို့၊ တုန်လှုပ်ကြပါ။
အပူအပင်ကင်းနေသူတို့၊ ဖိမ့်ဖိမ့်တုန်ကြပါ။
အဝတ်တွေ ချွတ်ပြီး အထည်ကြမ်း ဝတ်ထားပါ။+
၁၂ သီးနှံဖြစ်ထွန်းခဲ့ဖူးတဲ့ လယ်မြေနဲ့ စပျစ်ခြံတွေအတွက် ရင်ဘတ်ထုပြီး မြည်တမ်းကြပါ။
၁၃ ငါ့လူတွေရဲ့ မြေပေါ်မှာ ဆူးပင်တွေ၊ နှင်းဆီရိုင်းတွေပဲ တောထနေလိမ့်မယ်။
ရွှင်လန်းခဲ့တဲ့မြို့နဲ့ ဝမ်းမြောက်ခဲ့တဲ့ အိမ်တွေအားလုံးကို အဲဒီအပင်တွေ ဖုံးလွှမ်းပစ်လိမ့်မယ်။+
၁၄ ခံတပ်မျှော်စင်ဟာ ထီးတည်းကျန်ရစ်ခဲ့လိမ့်မယ်။
ဆူညံနေတဲ့မြို့ဟာ လူသူကင်းမဲ့သွားမယ်။+
သြဖေလအရပ်နဲ့+ ကင်းမျှော်စင်ဟာ ထာဝစဉ် လွင်တီးခေါင် ဖြစ်သွားမယ်။
မြည်းရိုင်းတို့ စံပျော်ရာ၊သိုးအုပ်တို့ ကျက်စားရာ ဖြစ်သွားမယ်။+
၁၅ ငါတို့အပေါ် အထက်အရပ်ကနေ စွမ်းအားတော် သွန်းလောင်းချိန် မရောက်ခင်အထိ အဲဒီလိုဖြစ်မယ်။+
သွန်းလောင်းတဲ့အခါ မှာတော့ တောကန္တာရဟာ သစ်သီးခြံဖြစ်လာပြီးသစ်သီးခြံလည်း သစ်တောလို ဖြစ်လာမယ်။+
၁၆ တောကန္တာရမှာတောင် တရားမျှတမှု တည်နေမယ်။
သစ်သီးခြံမှာလည်း ဖြောင့်မတ်မှု တည်ရှိမယ်။+
၁၇ စစ်မှန်တဲ့ ဖြောင့်မတ်မှုကြောင့် ငြိမ်းချမ်းလာမယ်။+
စစ်မှန်တဲ့ ဖြောင့်မတ်မှုရဲ့ အသီးအပွင့်တွေက တည်မြဲတဲ့ အေးချမ်းမှုနဲ့ လုံခြုံမှုပဲ။+
၁၈ ငါ့လူတွေဟာ ငြိမ်းချမ်းလုံခြုံတဲ့နေရာ၊ငြိမ်သက်အေးချမ်းတဲ့ နားခိုစရာနေရာတွေမှာ နေထိုင်ရလိမ့်မယ်။+
၁၉ သစ်တောကတော့ မိုးသီးတွေကြောင့် ပြားပြားဝပ်သွားမယ်။
မြို့ကလည်း မြေနဲ့တစ်ညီတည်း ဖြစ်သွားမယ်။
၂၀ ရေနားမှာ မျိုးစေ့ကြဲပြီး နွားထီးနဲ့ မြည်းကို လွှတ်ထားပေးတဲ့ မင်းတို့ဟာ ပျော်ရွှင်ချမ်းမြေ့တယ်။”+
