ရုသ ၂:၁-၂၃
၂ နောမိမှာ ဗောဇလို့ခေါ်တဲ့+ အမျိုးတစ်ယောက်ရှိတယ်။ သူဟာ နောမိရဲ့ခင်ပွန်း ဧလိမလက်ရဲ့ ဆွေမျိုးဖြစ်ပြီး သိပ်ချမ်းသာတယ်။
၂ မောဘအမျိုးသမီး ရုသက “လယ်ထဲသွားပြီး ကျွန်မကို မျက်နှာသာပေးတဲ့သူနောက်ကနေ ကောက်သင်းလိုက်ကောက်ပါရစေ”+ လို့ခွင့်တောင်းတော့ နောမိက “သွားလေ၊ သမီး”လို့ပြောတယ်။
၃ ရုသလည်း လယ်ထဲသွားပြီး ကောက်ရိတ်သမားတွေ နောက်ကနေ ကောက်သင်းလိုက်ကောက်ရင်း ဧလိမလက်ရဲ့ဆွေမျိုး+ ဗောဇရဲ့လယ်ထဲ အမှတ်တမဲ့ ရောက်သွားတယ်။+
၄ အဲဒီအချိန်မှာပဲ ဗောဇက ဘက်သလီဟင်မြို့ ကနေ ရောက်လာပြီး ကောက်ရိတ်သမားတွေကို “မင်းတို့နဲ့အတူ ယေဟောဝါဘုရား ရှိပါစေ” လို့ နှုတ်ဆက်တော့ သူတို့ကလည်း “သခင့်ကို ယေဟောဝါဘုရား ကောင်းချီးပေးပါစေ” လို့ ပြန်ပြောတယ်။
၅ ဗောဇက ကောက်ရိတ်သမား ခေါင်းဆောင်လူငယ်ကို “ဒီမိန်းကလေးက ဘယ်မိသားစုကလဲ” လို့မေးတော့၊
၆ လူငယ်က “နောမိနဲ့အတူ မောဘပြည်ကနေ လိုက်လာတဲ့ မောဘမိန်းကလေးပါ။+
၇ ‘ကောက်ရိတ်သမားတွေနောက်ကနေ ကောက်သင်းလိုက်ကောက်ပါရစေ’+ လို့ ခွင့်တောင်းပြီး မနက်ကတည်းက မနားတမ်း ကောက်သင်းကောက်နေတာ။ အခုမှပဲ တဲထဲဝင်ထိုင်ပြီး ခဏနားတော့တယ်” လို့ ပြန်ဖြေတယ်။
၈ ဒါနဲ့ ဗောဇက ရုသကို “ငါ့သမီး၊ နားထောင်။ တခြားလယ်မှာ ကောက်သင်းသွားမကောက်နဲ့။ ဒီလယ်ကနေ ဘယ်ကိုမှ ထွက်မသွားနဲ့။ ငါ့အလုပ်သမတွေအနားမှာပဲ နေပါ။+
၉ သူတို့ရိတ်တဲ့ လယ်ကွက်ကို မှတ်ထားပြီး သူတို့နောက်ကိုပဲ လိုက်ပါ။ သမီးကို မနှောင့်ယှက်ဖို့ ဒီလူငယ်တွေကို ငါမှာထားပြီးပြီ။ ရေဆာရင်လည်း သူတို့ဖြည့်ထားတဲ့ ရေအိုးကနေ ခပ်သောက်ပါ” လို့ပြောတယ်။
၁၀ ရုသလည်း မြေပေါ် ပျပ်ဝပ်လိုက်ပြီး “လူမျိုးခြားဖြစ်တဲ့ ကျွန်မကို ဘာကြောင့် ဂရုစိုက်ပြီး မျက်နှာသာပေးရတာလဲ”+ လို့ မေးတော့၊
၁၁ ဗောဇက “သမီးရဲ့ခင်ပွန်း သေဆုံးပြီးတဲ့နောက် ယောက္ခမကို ပြုစုခဲ့တာတွေ၊ မိဘကိုစွန့်၊ ဆွေမျိုးတွေရဲ့ပြည်ကို စွန့်ပြီး ကိုယ်မသိတဲ့လူမျိုးဆီ လိုက်လာတာတွေကို ငါအားလုံး ကြားပြီးပြီ။+
၁၂ သမီး လုပ်ခဲ့တာတွေအတွက် ယေဟောဝါဘုရား ဆုချပါစေ။+ သမီးက အစ္စရေးတို့ရဲ့ဘုရား ယေဟောဝါရဲ့ အတောင်အောက်မှာ ခိုလှုံတဲ့အတွက်+ ဘုရားဆီကနေ ပြီးပြည့်စုံတဲ့ဆုရပါစေ” လို့ပြောတယ်။
၁၃ ဒါနဲ့ ရုသက “ကျွန်မဟာ သခင့်ကျွန် မဟုတ်တာတောင် ကျွန်မကို နှစ်သိမ့်ပေးပြီး အားပေးစကားပြောတဲ့အတွက် သခင့်မျက်နှာသာရသူ ဖြစ်ပါရစေ” လို့ပြောတယ်။
၁၄ အစာစားချိန်ရောက်တော့ ဗောဇက ရုသကို “ဒီနားလာပြီး မုန့်ကို ဝိုင်အချဉ်ရည်ထဲ နှစ်စားပါ” လို့ပြောတယ်။ ရုသလည်း ကောက်ရိတ်သမားတွေနား ဝင်ထိုင်တဲ့အခါ ဗောဇက ကောက်နှံလှော်တွေ လှမ်းပေးတယ်။ ရုသ အဝစားရတဲ့အပြင် ပိုတောင်ပိုသေးတယ်။
၁၅ အဲဒီနောက် ကောက်သင်းကောက်ဖို့ ရုသ ထသွားတဲ့အခါ+ ဗောဇက “သူ့ကို ကောက်လှိုင်းတွေကြားမှာ ကောက်သင်းကောက်ခွင့် ပေးလိုက်ပါ။ မနှောင့်ယှက်ကြနဲ့။+
၁၆ ကောက်လှိုင်းစည်းတွေထဲကနေ ကောက်နှံတချို့ ဆွဲထုတ်ပြီး သူ့အတွက် ချထားခဲ့ကြ။ သူ့ကို မတားကြနဲ့” လို့ သူ့လူတွေကို မှာတယ်။
၁၇ ရုသလည်း ညနေအထိကောက်သင်းကောက်တယ်။+ ကောက်ရတာတွေကို ရိုက်ခြွေလိုက်တဲ့အခါ တစ်ဧဖာ* လောက်ရတယ်။
၁၈ မုယောစပါးတွေကို သယ်၊ မြို့ထဲပြန်ဝင်ပြီး ယောက္ခမကို ပြတယ်။ အဝစားပြီးလို့ ပိုတဲ့စားစရာတွေကိုလည်း ထုတ်ပေးတယ်။+
၁၉ ယောက္ခမ နောမိက “ဒီနေ့၊ ဘယ်မှာ ကောက်သင်းကောက်တာလဲ။ ဘယ်မှာ အလုပ်လုပ်ခဲ့သလဲ။ သမီးကိုဂရုစိုက်တဲ့သူ ကောင်းချီးခံစားရပါစေ”+ လို့ပြောတယ်။ အဲဒီအခါ ရုသက “ဒီနေ့ ကျွန်မအလုပ်လုပ်တဲ့ လယ်ပိုင်ရှင်ရဲ့နာမည်က ဗောဇလို့ ခေါ်တယ်” ဆိုပြီး ဘယ်သူ့လယ်မှာ လုပ်ခဲ့တဲ့အကြောင်း ပြန်ပြောပြတယ်။
၂၀ နောမိက “သူဟာ ငါတို့အမျိုးပဲ။+ ငါတို့ကို ပြန်ဝယ်ခွင့်ရှိသူတစ်ယောက်ပဲ။+ အသက်ရှင်သူ၊ သေလွန်သူတွေကို ခိုင်မြဲတဲ့မေတ္တာပြဖို့ မပျက်ကွက်တဲ့ ယေဟောဝါဘုရားက သူ့ကို ကောင်းချီးပေးပါစေ”+ လို့ ချွေးမ ရုသကို ပြောတယ်။
၂၁ ရုသလည်း “အဲဒီလူက ပြောသေးတယ်။ ‘ငါ့လယ်အားလုံးကို ရိတ်သိမ်းပြီးတဲ့အထိ ငါ့အလုပ်သမားတွေနားမှာပဲ နေပါ’+ တဲ့” ဆိုပြီးပြောတော့၊
၂၂ နောမိက “သူ့ အလုပ်သမတွေနဲ့လုပ်တာ ကောင်းတာပေါ့။ တခြားလယ်မှာဆိုရင် နှောင့်ယှက်ခံနေရဦးမယ်” လို့ ရုသကို ပြောတယ်။
၂၃ ရုသဟာ မုယောစပါး ရိတ်သိမ်းချိန်နဲ့+ ဂျုံစပါးရိတ်သိမ်းချိန် ပြီးတဲ့အထိ ဗောဇရဲ့ အလုပ်သမတွေအနားမှာပဲ နေပြီး ကောက်သင်းဆက်ကောက်တယ်။ ပြီးတော့ ယောက္ခမနဲ့အတူ ဆက်နေထိုင်တယ်။+
အောက်ခြေမှတ်ချက်များ
^ တစ်ဧဖာက ၂၂ လီတာဆံ့တဲ့ ပုံးတစ်ပုံးစာရှိ။ နောက်ဆက်တွဲ ခ၁၄ ကိုကြည့်။
