မဿဲ ၁၂:၁-၅၀

  • ယေရှု​ဟာ “ဥ​ပုသ်​နေ့​ရဲ့​သခင်” (၁-၈)

  • လက်​တစ်​ဖက်​သေနေ​သူ​ကို ကု​သပေး (၉-၁၄)

  • ဘု​ရား​သခင် ချစ်မြတ်​နိုး​တဲ့​ကျွန် (၁၅-၂၁)

  • နတ်​ဆိုး​တွေ​ကို သန့်​ရှင်း​သော စွမ်းအား​တော်​နဲ့​ နှင်ထုတ် (၂၂-၃၀)

  • ခွင့်​လွှတ်​မခံ​ရ​တဲ့ အပြစ် (၃၁၊ ၃၂)

  • အသီး​ကို​ကြည့်​ပြီး အပင်​ကို သိ​နိုင် (၃၃-၃၇)

  • ယောန​ရဲ့ အံ့​ဖွယ်​အမှု (၃၈-၄၂)

  • နတ်​ဆိုး ပြန်​ရောက်​လာ (၄၃-၄၅)

  • ယေရှု​ရဲ့​မိ​ခင်​နဲ့ ညီ​တွေ (၄၆-၅၀)

၁၂  ​ဥပုသ်​နေ့ တစ်​နေ့​မှာ ယေရှု​နဲ့ တပည့်​တွေ လယ်​ကွက်​ထဲ ဖြတ်​လျှောက်​သွား​တုန်း တ​ပည့်တွေ​က ဗိုက်​ဆာ​ဆာ​နဲ့ ကောက်​နှံ​ကို ဆွတ်​ခူး​ပြီး စား​ကြ​တယ်။+ ၂  ဒါ​ကို ဖာ​ရိ​ရှဲ​တွေ မြင်​တဲ့​အခါ “ခင်​ဗျား​တ​ပည့်တွေ​က ဥပုသ်​နေ့​မှာ လုပ်​ခွင့် မရှိ​တာ​တွေ လုပ်​နေ​ပါ​လား”+ လို့ ပြော​တော့၊ ၃  ယေရှု​က “ဒါဝိဒ်​နဲ့ သူ့​လူ​တွေ ဗိုက်​ဆာ​တဲ့​အခါ ဒါဝိဒ် ဘာ​လုပ်​ခဲ့​တယ်​ဆို​တာ ခင်​ဗျား​တို့ မဖတ်​ဖူး​ဘူး​လား။+ ၄  ဘု​ရား​သခင့်​အိမ်​တော်​ထဲ ဝင်​ပြီး သူ​နဲ့ သူ့​လူ​တွေ စား​ခွင့် မရှိ​တဲ့၊ ပု​ရော​ဟိတ်​တွေ​ပဲ စား​ခွင့် ရှိ​တဲ့+ ရှေ့​တော်​မုန့်​ကို+ စား​ခဲ့​တယ် မဟုတ်​လား။ ၅  ပြီး​တော့၊ ဗိမာန်​တော်​မှာ ရှိ​တဲ့ ပု​ရော​ဟိတ်​တွေ​ဟာ ဥပုသ်​နေ့​တွေ​မှာ အလုပ်​လုပ်​ပေမဲ့ အပြစ်​မသင့်​တဲ့​အကြောင်း ပညတ်​ကျမ်း​မှာ ခင်​ဗျား​တို့ မဖတ်​ဖူး​ဘူး​လား။+ ၆  ကျွန်​တော် ပြော​မယ်။ အခု ဒီ​နေ​ရာ​မှာ ဗိမာန်​တော်​ထက် ကြီးမြတ်​တဲ့​သူ ရှိ​နေ​တယ်။+ ၇  ‘ပူ​ဇော်​သက္ကာ​ကို ငါ​မလို​ချင်​ဘူး။+ သနား​ကြင်နာ​တတ်​တာ​ကို​ပဲ လို​ချင်​တယ်’+ ဆို​တဲ့ ကျမ်း​စကား​ရဲ့ အဓိပ္ပာယ်​ကို​သာ နား​လည်​ခဲ့ရင် အပြစ်​မရှိ​သူ​တွေ​ကို ခင်​ဗျား​တို့ အပြစ်​တင်​မှာ မဟုတ်​ဘူး။ ၈  လူ​သား​ဟာ ဥ​ပုသ်​နေ့​ရဲ့​သခင်​ပဲ”+ လို့ ပြန်​ပြော​တယ်။ ၉  အဲဒီ​က​နေ သူတို့ ထွက်​လာ​ပြီး​နောက် တ​ရား​ဇ​ရပ်​ထဲ ဝင်​သွား​တဲ့​အ​ခါ၊ ၁၀  လက်​တစ်​ဖက်​သေနေ​သူ​ကို တွေ့​တယ်။+ ဖာ​ရိ​ရှဲ​တွေ​က ယေရှု​ကို အပြစ်​ရှာ​ချင်​တာ​နဲ့ “ဥ​ပုသ်​နေ့​မှာ ရောဂါ ကု​ပေး​သင့်​သလား” ဆို​ပြီး မေး​တယ်။+ ၁၁  ယေရှု​က “ခင်​ဗျား​တို့​မှာ​ သိုး​တစ်​ကောင် ရှိ​တယ် ဆို​ပါ​စို့။ အဲဒီ​သိုး​က ဥ​ပုသ်​နေ့​မှာ တွင်း​ထဲ ကျ​သွား​ရင် မဆွဲ​တင်​ဘဲ​နေ​တဲ့​သူ ရှိ​သလား။+ ၁၂  လူ​ဟာ သိုး​ထက် အများ​ကြီး တန်​ဖိုး​ရှိ​တယ်။ ဒါ​ကြောင့် ဥ​ပုသ်​နေ့​မှာ ကောင်း​မှု​ပြု​သင့်​တယ်” လို့ ပြန်​ပြော​တယ်။ ၁၃  အဲဒီ​နောက် လက်​တစ်​ဖက်​သေနေ​သူ​ကို “လက်​ဆန့်​လိုက်​ပါ” လို့ ပြော​တော့​ အဲ​ဒီ​လူ လက်​ဆန့်​လိုက်​တဲ့​အခါ ကျန်​လက်​တစ်​ဖက်​လို​ပဲ ပြန်​ကောင်း​သွား​တယ်။ ၁၄  အဲဒီ​အခါ ဖာ​ရိ​ရှဲ​တွေ ထွက်​သွား​ပြီး ယေရှု​ကို သတ်​ဖို့ ပူး​ပေါင်း​ကြံ​စည်​ကြ​တယ်။ ၁၅  ဒါ​ကို ယေရှု သိ​တော့​ အဲ​ဒီ​က​နေ ထွက်​သွား​တယ်။ လူ​အများ​ကြီး လိုက်​လာ​တဲ့​အခါ+ လူ​နာ​ရှိ​သမျှ​ကို ကု​သပေး​တယ်။ ၁၆  ဒါ​ပေမဲ့ သူ့​အကြောင်း​ကို မပေါက်​ကြား​စေ​နဲ့ ဆို​ပြီး အသေအချာ မှာ​တယ်။+ ၁၇  ဒါ​ကြောင့် ပရော​ဖက် ဟေရှာယ​က​တစ်ဆင့် ပြော​ခဲ့​တဲ့ ဒီ​စကား​တွေ ပြည့်​စုံ​လာ​တယ်– ၁၈  “ငါ့​ကျွန်၊+ ငါ​ရွေး​ချယ်​တဲ့​သူ၊ ငါ​ချစ်မြတ်​နိုး​တဲ့​သူ​ကို+ ကြည့်​ပါ။ သူ့​အပေါ်​ ငါ့​ရဲ့​စွမ်းအား​တော် သက်​ရောက်​စေ​မယ်။+ လူမျိုး​တွေ​ကို တ​ရား​မျှ​တ​ခြင်း​အကြောင်း သူ​ကြား​သိ​စေ​မယ်။ ၁၉  သူ​ဟာ ငြင်း​ခုံ​တာ၊ အော်​ဟစ်​တာ​တွေ လုပ်​မှာ မဟုတ်​ဘူး။+ လမ်း​မတွေ​မှာ သူ့​အသံ​ကို ဘယ်​သူ​မှ ကြား​မှာ မဟုတ်​ဘူး။ ၂၀  နင်း​ခြေ​ခံ​ရ​တဲ့ ကျူ​ပင်​ကို ချိုး​မှာ မဟုတ်​ဘူး။ ငြိမ်း​ခါ​နီး မီး​စာ​ကို​လည်း ငြိမ်း​သတ်​မှာ မဟုတ်​ဘူး။+ တ​ရား​မျှ​တ​ခြင်း​ကို သူ​အောင်​ပွဲ​ခံ​စေ​မယ့်​အချိန် မရောက်​မချင်း​ပေါ့။ ၂၁  သူ့​နာ​မည်​ဟာ လူမျိုး​တွေ​ကို မျှော်​လင့်​ချက် ပေး​လိမ့်​မယ်။”+ ၂၂  အဲဒီ​နောက် နတ်​ဆိုး​စွဲ​နေ​လို့ မျက်​စိ​မမြင်၊ စကား​အနေ​သူ​တစ်​ယောက်​ကို ခေါ်​လာ​တဲ့​အခါ ယေရှု ကုသ​ပေး​လိုက်​လို့ စကား​ပြော​နိုင်​ပြီး မျက်​စိ​ပြန်​မြင်​လာ​တယ်။ ၂၃  လူ​အုပ်​က တအံ့​တ​သြ ဖြစ်​ပြီး “ဒီ​လူ​ဟာ ဒါဝိဒ်ရဲ့ သား ဖြစ်​နိုင်​တယ်​နော်” လို့ ပြော​ကြ​တယ်။ ၂၄  ဒါ​ကို ဖာ​ရိ​ရှဲ​တွေ ကြား​တော့ “ဒီ​လူ​ဟာ နတ်​ဆိုး​မင်း ဗေလ​ဇေ​ဗု​လ* အကူ​အညီ​နဲ့ နတ်​ဆိုး​တွေ​ကို နှင်​ထုတ်​နေ​တာ” လို့ ပြော​ကြ​တယ်။+ ၂၅  သူတို့ ဘာ​တွေး​နေ​မှန်း သိ​လို့ ယေရှု​က “နိုင်​ငံ​တစ်​ခု​မှာ ပြည်​သူ​တွေ စိတ်​ဝမ်း​ကွဲ​နေ​ရင် အဲဒီ​နိုင်​ငံ ပျက်​စီး​မှာ​ပဲ။ ဘယ်​မြို့​မဆို၊ ဘယ်​မိသား​စု​မဆို စိတ်​ဝမ်း​ကွဲ​နေ​ရင် တည်​မြဲနိုင်​မှာ မဟုတ်​ဘူး။ ၂၆  အဲဒီ​လို​ပဲ စာ​တန်​က စာ​တန်​ကို နှင်​ထုတ်​တယ်​ဆို​ရင် ဒါ​ဟာ စိတ်​ဝမ်း​ကွဲ​နေ​လို့​ပေါ့။ အဲဒီ​လို ဖြစ်​နေ​ရင် သူ့​နိုင်​ငံ ဘယ်​လို​လုပ် တည်​မြဲမှာ​လဲ။ ၂၇  ကျွန်​တော်​က ဗေ​လ​ဇေ​ဗု​လ​အကူ​အညီ​နဲ့ နတ်​ဆိုး​တွေ​ကို နှင်​ထုတ်​တယ်​ဆို​ရင် ခင်​ဗျား​တို့​ရဲ့ တ​ပည့်တွေ​က​ရော ဘယ်​သူ့​အကူ​အညီ​နဲ့ နတ်​ဆိုး​တွေ​ကို နှင်​ထုတ်​တာ​လဲ။ ဒီ​တော့ ခင်​ဗျား​တို့ မှား​နေ​မှန်း ခင်ဗျား​တို့​ရဲ့ တ​ပည့်တွေ ထောက်​ပြနေ​တာ​ပဲ။ ၂၈  ဘု​ရား​သခင့် စွမ်းအား​တော် အကူ​အညီ​နဲ့ နတ်​ဆိုး​တွေ​ကို ကျွန်​တော် နှင်​ထုတ်​တာ​ဆို​ရင်​တော့ ခင်ဗျား​တို့ ဘု​ရား​သခင့်​နိုင်​ငံ​တော်​နဲ့ လွဲ​သွား​ပြီ။+ ၂၉  ခွန်​အား​ကြီး​သူ​ကို အရင် မချည်​နှောင်​ဘဲ သူ့​အိမ်​ထဲ ဝင်​ပြီး ပစ္စည်း​ဥစ္စာတွေ လုယူ​လို့ ရ​မလား။ သူ့​ကို အရင် ချည်​နှောင်​ပြီး​မှ​ပဲ လုယူ​လို့ ရ​မှာ​ပေါ့။ ၃၀  ကျွန်​တော့်​ဘက်​မှာ မရပ်​တည်​သူ​ဟာ ကျွန်​တော့်ရန်​သူ​ပဲ။ ကျွန်​တော်​နဲ့​အတူ မစု​သိမ်း​သူ​ဟာ​လည်း ကွဲ​လွင့်​စေ​သူ​ပဲ။+ ၃၁  “ဒါ​ကြောင့် ကျွန်​တော် ပြော​မယ်။ အပြစ်​မှန်​သမျှ၊ ဘု​ရား​ကို စော်​ကား​ပြော​ဆို​တာ မှန်​သမျှ ခွင့်​လွှတ်​ခံ​ရ​လိမ့်​မယ်။ စွမ်းအား​တော်​ကို စော်​ကား​ပြော​ဆို​ရင်​တော့ ခွင့်​လွှတ်​ခံ​ရ​မှာ မဟုတ်​ဘူး။+ ၃၂  လူ​သား​ကို ဆန့်​ကျင်​ပြော​ဆို​ရင် ခွင့်​လွှတ်​ခံ​ရ​မယ်။+ သန့်​ရှင်း​သော စွမ်းအား​တော်​ကို ဆန့်​ကျင်​ပြော​ဆို​ရင်​တော့ ဒီ​လော​က​စ​နစ်* မှာ​ရော အနာ​ဂတ်​မှာ​ပါ ခွင့်​လွှတ်​ခံ​ရ​မှာ မဟုတ်​ဘူး။+ ၃၃  “ခင်​ဗျား​တို့​သာ ကောင်း​တဲ့ အပင်​ဆို​ရင် ကောင်း​တဲ့ အသီး သီး​မှာ​ပဲ။ မကောင်း​တဲ့ အပင်​ဆို​ရင်​တော့ မကောင်း​တဲ့ အသီး သီး​မှာ​ပဲ။ အသီး​ကို ကြည့်​တာ​နဲ့ အပင်​ကောင်း​မကောင်း သိ​နိုင်​တယ်။+ ၃၄  မြွေဆိုး​အမျိုး​တို့၊+ ခင်​ဗျား​တို့​ဟာ ဆိုး​ညစ်​သူ​တွေ ဖြစ်​နေ​တော့ ဘယ်​လို​လုပ်​ပြီး ကောင်း​တဲ့ စကား ပြော​နိုင်​မှာ​လဲ။ စိတ်​ထဲ ရှိ​တာ​တွေ​ပဲ နှုတ်​က ထွက်​တတ်​တယ်။+ ၃၅  လူ​ကောင်း​တစ်​ယောက်​ဟာ စိတ်​ထဲ​မှာ ကောင်း​တာ​တွေ ပြည့်​နေ​လို့ ကောင်း​တာ​တွေ​ပဲ ပြော​တတ်​တယ်။ ဆိုး​ညစ်​သူ​က​တော့ စိတ်​ထဲ​မှာ ဆိုး​ညစ်​တာ​တွေ ပြည့်​နေ​လို့ ဆိုး​ညစ်​တာ​တွေ​ပဲ ပြော​တတ်​တယ်။+ ၃၆  ကျွန်​တော် ပြော​မယ်။ လူ​တိုင်း​ဟာ ကိုယ်​ပြော​ခဲ့​သမျှ အကျိုး​မရှိ​တဲ့ စကား​တွေ​အတွက် တ​ရား​စီ​ရင်ရာ​နေ့​မှာ ဖြေရှင်း​ချက် ပေး​ရ​လိမ့်​မယ်။+ ၃၇  ကိုယ်​ပြော​တဲ့ စကား​ကြောင့် ဖြောင့်​မတ်​သူ​လို့ သတ်​မှတ်​ခံ​ရ​မှာ ဖြစ်​သလို ကိုယ်​ပြော​တဲ့ စကား​ကြောင့်​ပဲ အပြစ်​ရှိ​သူ​လို့ သတ်​မှတ်​ခံ​ရ​လိမ့်​မယ်” လို့ ပြော​လိုက်​တယ်။ ၃၈  အဲဒီ​အခါ ကျမ်း​တတ်​နဲ့ ဖာရိရှဲ​တချို့​က ယေရှု​ကို “ဆ​ရာ၊ ဆ​ရာ ပြတဲ့ အံ့​ဖွယ်​အမှု​ တစ်​ခု​လောက် မြင်​ချင်​ပါ​တယ်”+ လို့ ပြော​တော့၊ ၃၉  ယေရှု​က “ဆိုး​ညစ်​ဖောက်​ပြန်​တဲ့ လူမျိုး​ဆက်​က* အံ့​ဖွယ်​အမှု​ကို မြင်​ချင်​ကြ​တယ်။ ဒါ​ပေမဲ့ ပရော​ဖက်​ယောန​ရဲ့ အံ့ဖွယ်​အမှု​က​လွဲ​လို့ ဘယ်​အံ့​ဖွယ်​အမှုကိုမှ သူတို့ မြင်​ရ​မှာ မဟုတ်​ဘူး။+ ၄၀  ယောန​က ငါး​ကြီး​ဝမ်း​ထဲ​မှာ သုံး​ရက် နေ​ခဲ့ရ​သလို+ လူ​သား​က​လည်း မြေကြီး​ထဲ​မှာ သုံး​ရက်​ နေ​ရ​လိမ့်​မယ်။+ ၄၁  တ​ရား​စီ​ရင်​ချိန်​မှာ နိန​ဝေ​မြို့​သား​တွေ​က ဒီ​လူမျိုး​ဆက်​နဲ့​အတူ အသက်​ပြန်​ရှင်​လာ​ပြီး ဒီ​လူမျိုး​ဆက်​ဟာ အပြစ်​ရှိ​သူ​တွေ ဖြစ်​မှန်း ထောက်​ပြလိမ့်​မယ်။ သူတို့​က ယောန ဟော​တဲ့ စကား​ကြောင့် နောင်​တ​ရခဲ့​ကြ​လို့​ပဲ။+ အခု ဒီ​နေ​ရာ​မှာ ယောန​ထက် ပို​ကြီးမြတ်​တဲ့​သူ ရှိ​နေ​တယ်။+ ၄၂  တရား​စီ​ရင်​ချိန်​မှာ တောင်​ပြည်​ရဲ့ ဘုရင်​မက ဒီ​လူ​မျိုး​ဆက်​နဲ့​အတူ အသက်​ပြန်​ရှင်​လာ​ပြီး ဒီ​လူမျိုး​ဆက်​ဟာ အပြစ်​ရှိ​သူ​တွေ ဖြစ်​မှန်း ထောက်​ပြလိမ့်​မယ်။ သူ​က ရှော​လ​မုန်​မင်း​ကြီး​ရဲ့ ပညာ​ရှိ​စကား​ကို ကြား​နာ​ဖို့ အဝေး​ကြီး​က​နေ လာခဲ့လို့​ပဲ။+ အခု ဒီ​နေ​ရာ​မှာ ရှော​လ​မုန်​ထက် ပို​ကြီးမြတ်​တဲ့​သူ ရှိ​နေ​တယ်။+ ၄၃  “နတ်​ဆိုး​တစ်​ကောင်​ဟာ* လူ​ထဲ​က ထွက်​ပြီး ခြောက်​သွေ့​တဲ့ အရပ်တွေ​မှာ နား​စ​ရာ​နေ​ရာ ရှာ​တယ်။ ရှာ​မတွေ့​တဲ့​အခါ၊+ ၄၄  ‘ငါ​ထွက်​ခဲ့​တဲ့ အိမ်​ကို​ပဲ သွား​မယ်’ ဆို​ပြီး ပြန်​ရောက်​လာ​တယ်။ အဲဒီ​အခါ အိမ်​က လစ်​လပ်​နေ​တာ၊ လှည်း​ကျင်း​ပြီး ပြင်​ဆင်​ထား​တာ​ကို သူ​တွေ့​တော့၊ ၄၅  သူ့​ထက်​ဆိုး​တဲ့ နတ်​ဆိုး​ခုနစ်​ကောင်​ကို သွား​ခေါ်​လာ​ပြီး အဲဒီ​မှာ ဝင်​နေ​ကြ​တယ်။ နောက်​ဆုံး​တော့ အဲဒီ​လူ​ရဲ့ အခြေ​အနေ​ဟာ အရင်​က​ထက် ပို​ဆိုး​သွား​တယ်။+ ဆိုး​ညစ်​တဲ့ ဒီ​လူမျိုး​ဆက်​လည်း အဲဒီ​အတိုင်း​ပဲ ဖြစ်​လိမ့်​မယ်” လို့ ပြော​တယ်။ ၄၆  လူ​အုပ်​ကို ဟော​ပြော​နေ​တုန်း​မှာ​ပဲ မိ​ခင်​နဲ့ ညီ​တွေ ရောက်​လာ​ပြီး+ ယေရှု​နဲ့ စကား​ပြော​ချင်​လို့ အပြင်​မှာ ရပ်​နေ​ကြ​တယ်။+ ၄၇  အဲဒီ​အခါ လူ​တစ်​ယောက်​က “ဆ​ရာ့​အမေနဲ့ ညီ​တွေ စကား​ပြော​ချင်​လို့ အပြင်​မှာ ရပ်​စောင့်​နေ​တယ်” လို့ ပြော​တော့၊ ၄၈  ယေရှု​က “ကျွန်​တော့်​အမေ၊ ကျွန်​တော့်​ညီ​တွေ​ဆို​တာ ဘယ်​သူ​တွေ​လဲ” လို့ သူ့​ကို ပြော​တယ်။ ၄၉  အဲဒီ​နောက် တ​ပည့်တွေ​ဘက်​ကို ညွှန်​ပြပြီး “သူတို့​ဟာ ကျွန်​တော့်​အမေ၊ ကျွန်​တော့်​ညီ​အစ်​ကို​တွေ​ပဲ။+ ၅၀  ကောင်း​ကင်​မှာ စံ​မြန်း​တဲ့ အဖဘုရား​ရဲ့ အလို​တော်​ကို ဆောင်​တဲ့​သူ​တိုင်း​ဟာ ကျွန်​တော့်​အမေ၊ ကျွန်​တော့် ညီ​အစ်​ကို​မောင်​နှ​မတွေ​ပဲ”+ လို့ ဖြေတယ်။

အောက်ခြေမှတ်ချက်များ

^ စာ​တန်​ကို ရည်​ညွှန်း​တဲ့ နာ​မည်။
^ ခက်​ဆစ်​ကို​ကြည့်။
^ ခက်​ဆစ်​ကို​ကြည့်။
^ ခက်​ဆစ် “စွမ်းအား” ကို​ကြည့်။
ကမ္ဘာသစ်ဘာသာပြန်ကျမ်း
မဿဲ ၁၂
မြန်မာ
အွန်လိုင်းမှာ ကျမ်းစာဖတ်ပါ
https://assetsnffrgf-a.akamaihd.net/assets/m/1001061103/univ/art/1001061103_univ_sqr_xl.jpg
nwt စာ. ၄၀

ဒီစာစောင်အတွက် မူပိုင်ခွင့်