လုကာ ၁၆:၁-၃၁

၁၆  ထို့နောက် တပည့်တော်တို့အား မိန့်တော်မူသည်မှာ၊ “သူဌေးတစ်ဦး၌ ဘဏ္ဍာစိုးရှိ၏။ ထိုဘဏ္ဍာစိုးသည် သခင်၏ ဥစ္စာများကို ဖြုန်းတီးသည်ဟု စွပ်စွဲခံရသော်၊ ၂  သခင်သည် ဘဏ္ဍာစိုးကို ခေါ်၍ ‘သင်၏အကြောင်း ငါကြားရသည်မှာ အသို့နည်း။ ဘဏ္ဍာစိုးအရာနှင့် ဆိုင်သော ငွေစာရင်းကို တင်ပြလော့။ ယခုမှစ၍ ဘဏ္ဍာစိုး မလုပ်ရ’ ဟုဆို၏။ ၃  ထိုအခါ ဘဏ္ဍာစိုးက ‘ငါသည် အဘယ်သို့ ပြုရမည်နည်း။ ငါ၏သခင်သည် ဘဏ္ဍာစိုးအရာကို နုတ်ယူလိမ့်မည်။ ငါသည် မြေကိုတူးဆွရန် မစွမ်း။ တောင်းစားရန်လည်း ရှက်၏။ ၄  ဘဏ္ဍာစိုးအရာမှ အထုတ်ခံရပြီးနောက် လူတို့သည် ငါ့ကို သူတို့၏အိမ်တွင် လက်ခံကြစေရန် မည်သို့ပြုရမည်ကို အကြံရပြီ’ ဟု ဆင်ခြင်၏။ ၅  ထို့နောက် သခင်၏မြီစား တစ်ဦးစီကို ခေါ်၍ ‘ငါ့သခင်အား သင်မည်မျှ အကြွေးတင်သနည်း’ ဟု ပထမလူကို မေးလျှင်၊ ၆  ထိုသူက ‘သံလွင်ဆီ ဗတ်*တစ်ရာ အကြွေးရှိပါသည်’ ဟု ဆို၏။ ဘဏ္ဍာစိုးကလည်း ‘သင်၏ စာချုပ်ကိုယူ၍ ထိုင်ပြီးလျှင် ဗတ်ငါးဆယ်ဟု အမြန်ရေးမှတ်လော့’ ဟူ၍ဆို၏။ ၇  ထို့နောက် အခြားသူ တစ်ဦးအား ‘သင်ကော မည်မျှအကြွေးတင်သနည်း’ ဟုမေးလျှင်၊ ထိုသူက ‘ဂျုံစပါး ကောရ*တစ်ရာ အကြွေးရှိပါသည်’ ဟုဆို၏။ ဘဏ္ဍာစိုးကလည်း ‘သင်၏ စာချုပ်ကိုယူ၍ ကောရရှစ်ဆယ်ဟု ရေးမှတ်လော့’ ဟူ၍ဆို၏။ ၈  မဖြောင့်မတ်သော်လည်း အမြော်အမြင်ရှိစွာ ပြုမူသောကြောင့် ထိုဘဏ္ဍာစိုးကို သခင်ချီးမွမ်းလေ၏။ အကြောင်းမူကား မိမိတို့လူမျိုးဆက်နှင့် ပတ်သက်လျှင် ဤလောက*သားတို့သည် အလင်း၏သားတို့ထက် သာ၍ပညာရှိကြ၏။ ၉  “တစ်ဖန် ငါဆိုသည်ကား၊ ဤမဖြောင့်မတ်သောလောက၏ စည်းစိမ်ဖြင့် မိတ်ဆွေဖွဲ့ကြလော့။ သို့မှသာ၊ ထိုစည်းစိမ်ကုန်ခန်းသောအခါ ထာဝရစံအိမ်၌ သင်တို့ကို လက်ခံကြလိမ့်မည်။ ၁၀  အနည်းငယ်သော အမှု၌ သစ္စာရှိသူသည် ကြီးသော အမှု၌လည်း သစ္စာရှိတတ်၏။ အနည်းငယ်သော အမှု၌ မဖြောင့်မတ်သူသည် ကြီးသော အမှု၌လည်း ဖြောင့်မတ်မည် မဟုတ်။ ၁၁  ထို့ကြောင့် သင်တို့သည် လောကစည်းစိမ်နှင့် ပတ်သက်၍ သစ္စာမရှိလျှင် မှန်သောစည်းစိမ်ကို သင်တို့၌ မည်သူအပ်မည်နည်း။ ၁၂  သင်တို့သည် သူတစ်ပါး၏ စည်းစိမ်နှင့်ပတ်သက်၍ သစ္စာမရှိလျှင် သင်တို့ ပိုင်ထိုက်ရာကို မည်သူပေးမည်နည်း။ ၁၃  မည်သည့်အိမ်စေမျှ သခင်နှစ်ဦးအစေကို မခံနိုင်။ တစ်ဦးကို မုန်း၍ တစ်ဦးကို ချစ်မည်။ သို့မဟုတ် တစ်ဦးကို မှီခို၍ တစ်ဦးကို မခန့်လေးစားပြုမည်။ သင်တို့သည် ဘုရားသခင်၏အစေ နှင့် စည်းစိမ်ချမ်းသာ၏အစေ နှစ်ရပ်ကို မခံနိုင်ကြ။” ၁၄  ငွေမက်သူများဖြစ်သော ဖာရိရှဲတို့သည် ထိုစကားအလုံးစုံကိုကြားလျှင် ကိုယ်တော်ကို ကဲ့ရဲ့ကြ၏။ ၁၅  ထိုအခါ ကိုယ်တော်က ဤသို့မိန့်တော်မူ၏။ “သင်တို့သည် လူတို့ရှေ့တွင် ကိုယ့်ကိုယ်ကိုယ် ဖြောင့်မတ်သည်ဟု ဆိုကြသော်လည်း ဘုရားသခင်သည် သင်တို့၏ စိတ်နှလုံးကို သိတော်မူ၏။ လူတို့အမြင်တွင် မြင့်မြတ်သောအရာသည် ဘုရားသခင့်မျက်မှောက်တော်၌ စက်ဆုပ်ရွံရှာဖွယ်ဖြစ်၏။ ၁၆  “ယောဟန်လက်ထက် အထိပညတ်ကျမ်းနှင့် ပရောဖက်ကျမ်း*တို့ရှိ၏။ ထိုအချိန်မှစ၍ ဘုရားသခင်၏နိုင်ငံတော် သတင်းကောင်းကို ကြေညာလျက်ရှိ၏။ လူအမျိုးမျိုးတို့သည်လည်း နိုင်ငံတော်သို့ဝင်ရန် အားသွန်ခွန်စိုက် ကြိုးစားကြ၏။ ၁၇  အကယ်စင်စစ်၊ ပညတ်ကျမ်းမှ ဝစ္စတစ်လုံး မပြည့်စုံဘဲနေသည်ထက် ကောင်းကင်နှင့်မြေကြီး ကွယ်ပျောက်ရန် ပို၍လွယ်ကူ၏။ ၁၈  “မိမိ၏မယားကို ကွာရှင်း၍ အခြားသောမိန်းမနှင့် ထိမ်းမြားသူတိုင်း အိမ်ထောင်ရေးဖောက်ပြန်သူဖြစ်၏။ ကွာရှင်းထားသောမိန်းမကို ထိမ်းမြားသူသည်လည်း အိမ်ထောင်ရေးဖောက်ပြန်သူဖြစ်၏။ ၁၉  “သူဌေးတစ်ဦးသည် ခရမ်းရောင်ဝတ်ရုံနှင့် ပိတ်ချောကိုဝတ်ဆင်၍ နေ့စဉ် စည်းစိမ်ယစ်လျက်နေ၏။ ၂၀  သူဌေး၏တံခါးဝတွင် လာဇရု အမည်ရှိသည့် တစ်ကိုယ်လုံး အနာစိမ်းပေါက်သော သူတောင်းစားတစ်ဦးကို ချထားလေ့ရှိကြ၏။ ၂၁  ထိုသူသည် သူဌေး၏ စားပွဲမှကျသော စားနုပ်စားပေါက်ကို စားရန် တောင့်တလျက်နေ၏။ ခွေးတို့သည်လည်း လာ၍ သူ၏အနာစိမ်းများကို လျက်ကြ၏။ ၂၂  တစ်နေ့တွင် ထိုသူတောင်းစားသည် သေဆုံး၍ ကောင်းကင်တမန်တို့သည် သူ့ကို အာဗြဟံ၏ရင်ခွင်သို့ ပို့ဆောင်ကြ၏။ “သူဌေးသည်လည်း သေလွန်၍ သင်္ဂြိုဟ်ခြင်းကို ခံရ၏။ ၂၃  သင်္ချိုင်း*၌ ဝေဒနာပြင်းစွာခံနေရစဉ် မျှော်ကြည့်သော် အဝေးတွင် အာဗြဟံကို မြင်လေ၏။ အာဗြဟံ၏ ရင်ခွင်ရှိ လာဇရုကိုလည်း မြင်၏။ ၂၄  ထိုအခါ သူသည် ‘အဖအာဗြဟံ၊ ကျွန်တော့်ကို သနားတော်မူပါ။ ကျွန်တော်သည် ဤမီးလျှံထဲတွင် ဝေဒနာပြင်းစွာ ခံနေရပါသည်။ လာဇရုသည် လက်ဖျားကို ရေ၌နှစ်၍ ကျွန်တော့်လျှာကို အေးစေရန် သူ့အား ကျွန်တော်ရှိရာသို့ စေလွှတ်တော်မူပါ’ ဟုလျှောက်သော်၊ ၂၅  အာဗြဟံက ‘ငါ့သား၊ သင်သည် အသက်ရှင်စဉ်အခါ ကောင်းမွန်ရာများကို အပြည့်အဝခံစားခဲ့၍၊ လာဇရုမူကား ဆင်းရဲခက်ခဲစွာ နေခဲ့ရသည်ကို အောက်မေ့လော့။ ယခု သူသည် ဤအရပ်တွင် သက်သာခြင်းရှိ၏။ သင်မူကား ဝေဒနာပြင်းစွာခံရ၏။ ၂၆  ထို့ပြင် ငါတို့နှင့် သင်တို့စပ်ကြား၌ အလွန်နက်သော ချောက်ကြီး ရှိ၏။ ထို့ကြောင့် ဤအရပ်မှ သင်တို့ ရှိရာသို့ ကူးချင်သောသူတို့သည် မကူးနိုင်ကြ။ သင်တို့ ရှိရာအရပ်မှ ဤအရပ်သို့ ကူးချင်သော သူတို့လည်း မကူးနိုင်ကြ’ ဟုပြော၏။ ၂၇  ထိုအခါ သူဌေးက ‘အိုအဖ၊ ထိုသို့မှန်လျှင် ကျွန်တော့်အဖ၏ အိမ်သို့ သူ့ကို စေလွှတ်တော်မူပါ။ ၂၈  ကျွန်တော့်မှာ ညီအစ်ကို ငါးယောက်ရှိပါ၏။ သူတို့သည် ဤဝေဒနာခံရာအရပ်သို့ မရောက်မည်အကြောင်း သူ့ကို အသေအချာ ပြောပြစေတော်မူပါ’ ဟု ပြန်လျှောက်၏။ ၂၉  အာဗြဟံကလည်း ‘သူတို့၌ မောရှေနှင့် ပရောဖက်တို့၏ ကျမ်းများရှိ၏။ ထိုကျမ်းများကို နာယူကြစေ’ ဟုဆို၏။ ၃၀  သူဌေးကလည်း ‘မဟုတ်ပါ၊ အဖ အာဗြဟံ။ လူသေတို့ထဲမှ တစ်စုံတစ်ဦးသည် ထမြောက်၍ သူတို့ ရှိရာသို့သွားလျှင် နောင်တရကြပါလိမ့်မည်’ ဟုဆိုသော်၊ ၃၁  အာဗြဟံကလည်း ‘သူတို့သည် မောရှေနှင့် ပရောဖက်တို့၏ ကျမ်းစကားကို မနာယူလျှင် လူသေတို့ထဲမှ တစ်စုံတစ်ဦး ထမြောက်သော်လည်း ယုံကြမည်မဟုတ်’ ဟုဆိုလေ၏။”

အောက်ခြေမှတ်ချက်များ

နောက်ဆက်တွဲ ၁၁ ရှု။
နောက်ဆက်တွဲ ၁၁ ရှု။
မူရင်း၊ “ဤလောကစနစ်။”
‘ပညတ်ကျမ်းနှင့် ပရောဖက်ကျမ်း’ ဟူသော အသုံးအနှုန်းသည် ဟေဗြဲကျမ်း တစ်ကျမ်းလုံးကို ရည်ညွှန်းသည်။
ဂရိ၊ “ဟေဒီးစ်။” နောက်ဆက်တွဲ ၉ ရှု။