မာတိကာဆီ ကျော်သွား

မာတိကာဆီ ကျော်သွား

ကျမ်းစာကြိုပြောချက်က ခေတ်သစ်အစ္စရေးနိုင်ငံကို ညွှန်ပြသလား

ကျမ်းစာကြိုပြောချက်က ခေတ်သစ်အစ္စရေးနိုင်ငံကို ညွှန်ပြသလား

ကနေ့ခေတ် အရှေ့အလယ်ပိုင်းဒေသမှာ ဖြစ်ပျက်နေတဲ့ အရာတွေကို ကမ္ဘာတစ်ဝန်းက စောင့်ကြည့်နေကြပါတယ်။ ဒုံးကျည်လက်နက်တွေနဲ့ ပစ်ခတ်မှုတွေ၊ လက်နက်ကိုင်တပ်ဖွဲ့တွေရဲ့ တိုက်ပွဲတွေ၊ အကြမ်းဖက်သမားတွေရဲ့ ဗုံးခွဲတိုက်ခိုက်မှုတွေက မကြာခဏဆိုသလို ဖြစ်ပွားနေတယ်။ သည့်အပြင် နျူကလီးယားလက်နက်တွေ အသုံးပြုလာမှာကိုလည်း စိုးရိမ်နေကြတယ်။ ဒါကြောင့် လူတွေ ရတက်မအေးဖြစ်နေကြတာ အံ့ဩစရာ မဟုတ်ပါဘူး။

၁၉၄၈ ခုနှစ် မေလတုန်းကလည်း အရှေ့အလယ်ပိုင်းဒေသကို ကမ္ဘာက စိုးရိမ်တကြီးနဲ့ စောင့်ကြည့်ခဲ့ကြပါသေးတယ်။ အဲဒီအချိန်တုန်းက ပါလက်စတိုင်းဒေသကို အင်္ဂလိပ်တွေ အုပ်ချုပ်ထားတဲ့ကာလ ကုန်ဆုံးတော့မှာဖြစ်ပြီး စစ်မီးကလည်း တောက်လောင်တော့မယ်။ အဲဒီနှစ်မတိုင်ခင်မှာ သိမ်းပိုက်ထားတဲ့ နယ်မြေတွေထဲက အစိတ်အပိုင်းတစ်ခုမှာ လွတ်လပ်တဲ့ ဂျူးနိုင်ငံထူထောင်ဖို့ ကုလသမဂ္ဂက တရားဝင်ခွင့်ပြုပြီးသားပါ။ ဒါကို အိမ်နီးချင်းအာရပ်နိုင်ငံတွေက ဘယ်လိုနည်းနဲ့မဆို ဆန့်ကျင်တားဆီးဖို့ အဓိဋ္ဌာန်ပြုထားကြတယ်။ “နယ်နိမိတ် လုံးဝမသတ်မှတ်ရ။ သတ်မှတ်ရင် သွေးချောင်းစီးလိမ့်မယ်” ဆိုပြီးတော့ အာရပ်နိုင်ငံများ အဖွဲ့ချုပ်က သတိပေးလိုက်တယ်။

အချိန်ကတော့ ၁၉၄၈ ခုနှစ်၊ မေလ ၁၄ ရက်၊ သောကြာနေ့ ညနေ ၄:၀၀ နာရီပါ။ အင်္ဂလိပ်တွေရဲ့ အုပ်ချုပ်ခွင့်အာဏာက အချိန်အနည်းငယ်အတွင်းမှာ တရွေ့ရွေ့ ကုန်ဆုံးပါတော့မယ်။ တယ်လဗီ ပြတိုက်မှာ လူအယောက် ၃၅၀ ဟာ လျှို့ဝှက်ဖိတ်ခေါ်ချက်အရ ရောက်ရှိနေကြပါတယ်။ သူတို့ဟာ ခေတ်သစ်အစ္စရေးနိုင်ငံ ထူထောင်လိုက်ပြီဆိုတဲ့ တရားဝင်ကြေညာချက်အတွက် စိတ်ထက်သန်စွာ စောင့်ဆိုင်းနေကြတာပါ။ အခမ်းအနား အစီအစဉ်ကို ရန်သူတွေလာပြီး အနှောင့်အယှက် မပေးနိုင်အောင် လုံခြုံရေးတွေကိုလည်း တင်းကျပ်စွာ ချထားကြပါတယ်။

၁၉၄၈ ခုနှစ်၊ မေလ ၁၄ ရက် နေ့က ဒေးဗစ် ဘင်-ဂူရီယွန်

အစ္စရေးအမျိုးသားကောင်စီရဲ့ ခေါင်းဆောင် ဒေးဗစ် ဘင်-ဂူရီယွန်က ကြေညာချက်တစ်ခု (The Declaration of the Establishment of the State of Israel) ဖတ်ပြခဲ့တယ်။ အဲဒီကြေညာချက်မှာ တစ်စိတ်တစ်ပိုင်းအနေနဲ့ ဒီလိုဖော်ပြထားတယ်– “ကျွန်ုပ်တို့ ပြည်သူ့ကောင်စီ အဖွဲ့ဝင်တွေဟာ အစ္စရေးနယ်မြေက ဂျူးအသိုင်းအဝိုင်းရဲ့ ကိုယ်စားလှယ်တွေ ဖြစ်ပါတယ်။ . . . ကျွန်ုပ်တို့ရဲ့ မွေးရာပါ အခွင့်အရေးနဲ့ သမိုင်းဝင် အခွင့်အရေးကြောင့်၊ ကုလသမဂ္ဂ အထွေထွေညီလာခံရဲ့ ဆုံးဖြတ်ချက်ကြောင့် ဂျူးတွေနေထိုင်မယ့်နိုင်ငံကို အစ္စရေးနိုင်ငံအဖြစ် ထူထောင်လိုက်ကြောင်း ကြေညာအပ်ပါတယ်။”

ကျမ်းစာပရောဖက်ပြုချက် ပြည့်စုံမှုလား

ခေတ်သစ် အစ္စရေးနိုင်ငံက ကျမ်းစာပရောဖက်ပြုချက်တစ်ခုကို ပြည့်စုံစေတယ်လို့ ဧဝံဂေလိခရစ်ယာန် တချို့က ယူဆကြတယ်။ ဥပမာ၊ ခရစ်ယာန်ဓမ္မဆရာ ဂျွန် ဟေဂီက သူ့ရဲ့စာအုပ် (Jerusalem Countdown) မှာ ဒီလိုဖော်ပြထားတယ်– “‘တိုင်းနိုင်ငံကို တစ်နေ့ချင်းတွင် ဖွားမြင်မည်’ ဆိုပြီး ပြောခဲ့တဲ့ ပရောဖက်ဟေရှာယရဲ့ စကားက အလွန်အရေးပါတဲ့ ဒီအချိန်အခါအကြောင်းကို ဖော်ပြနေတာပါ။ (ဟေရှာယ ၆၆:၈ ကိုဖတ်ကြည့်ပါ။) . . . နှစ်ဆယ်ရာစုသမိုင်းမှာ ဒါဟာ ကြိုပြောချက်နဲ့ဆိုင်တဲ့ အရေးကြီးဆုံး အခါသမယ ဖြစ်ပါတယ်။ အစ္စရေးတွေရဲ့ ဘုရားသခင် တည်ရှိနေဆဲဖြစ်တယ်ဆိုတာ လူအားလုံး သိမြင်ဖို့အတွက် ဒါက စစ်မှန်တဲ့ အထောက်အထားဖြစ်တယ်။”

အဲဒီဖော်ပြချက်က မှန်ပါသလား။ ဟေရှာယ ၆၆:၈ မှာဖော်ပြထားတဲ့စကားက ခေတ်သစ်အစ္စရေးနိုင်ငံ ထူထောင်ခြင်းကို ကြိုပြောတာလား။ ၁၉၄၈ ခုနှစ်၊ မေလ ၁၄ ရက်နေ့က “နှစ်ဆယ်ရာစုသမိုင်းမှာ ကြိုပြောချက်နဲ့ဆိုင်တဲ့ အရေးကြီးဆုံး အခါသမယ” လား။ ခေတ်သစ်အစ္စရေးနိုင်ငံဟာ ဘုရားသခင် ရွေးချယ်ထားတဲ့နိုင်ငံ ဖြစ်နေတုန်းပဲဆိုရင်၊ ကျမ်းစာကြိုပြောချက်တွေကို ပြည့်စုံစေဖို့ အစ္စရေးနိုင်ငံကို ဘုရားသခင် အသုံးပြုနေတယ်ဆိုရင် အရပ်ရပ်က ကျမ်းစာလေ့လာသူတွေအတွက် စိတ်ဝင်စားဖို့ကောင်းမယ့် အချက်ဖြစ်မှာ ကျိန်းသေပြီ။

ဟေရှာယပရောဖက်ပြုချက်က ဒီလိုဆိုပါတယ်– “ထိုသို့သောအမှုကို အဘယ်သူသည် ကြားဖူးသနည်း။ ထိုသို့သောအမှုကို အဘယ်သူသည် မြင်ဖူးသနည်း။ တိုင်းနိုင်ငံကို တစ်နေ့ချင်းတွင် ဖွားတတ်သလော။ ပြည်သူပြည်သားအပေါင်းတို့ကို တစ်ပြိုင်နက် ဖွားတတ်သလော။ ဇိအုန်သတို့သမီးသည် သားဖွားခြင်းဝေဒနာကို ခံအံ့ဆဲဆဲတွင် သားများကို ဖွားမြင်ပါသည်တကား။” (ဟေရှာယ ၆၆:၈) တိုင်းနိုင်ငံတစ်ခုဟာ တစ်နေ့တည်းမှာ ဖွားမြင်တဲ့အလား ရုတ်တရက် ဖွားမြင်လာတဲ့အကြောင်း ကြိုပြောထားတာ ရှင်းနေပါတယ်။ ဒါပေမဲ့ အဲဒီဖွားမြင်ခြင်းကို ဘယ်သူက ဖြစ်စေမှာလဲ။ သဲလွန်စကို အခန်းငယ် ၉ မှာ ဒီလိုပေးထားပါတယ်– ‘“သားဖွားမည်အကြောင်းကို ငါသည် စီရင်ပြီးမှ မဖွားစေဘဲ နေရမည်လော” ဟု ထာဝရဘုရားသခင် မေးတော်မူ၏။ “ငါသည် ကိုယ်ဝန်ဆောင်ခွင့်ပေးပြီးမှ မဖွားနိုင်အောင် ချုပ်ထားရမည်လော” ဟု သင်၏ဘုရားသခင် မေးတော်မူ၏။’ တိုင်းနိုင်ငံရဲ့ အံ့ဖွယ်ဖွားမြင်ခြင်းကို ယေဟောဝါဘုရားသခင် လုပ်ဆောင်မယ်ဆိုတာ ရှင်းပါတယ်။

ခေတ်သစ်အစ္စရေးနိုင်ငံကို ဒီမိုကရေစီစနစ်နဲ့ အုပ်ချုပ်ပြီး ဘုရားသခင်ကို မှီခိုအားထားတယ်ဆိုတဲ့စကား တရားဝင်ပြောဆိုတာမျိုး မရှိပါဘူး။ ၁၉၄၈ ခုနှစ်က တည်ထောင်လိုက်တဲ့ အစ္စရေးနိုင်ငံဟာ ယေဟောဝါဘုရားသခင်ကို နိုင်ငံတော်တည်ထောင်ခြင်း ကြေညာချက်ရဲ့ တာဝန်ရှိပုဂ္ဂိုလ်အဖြစ် အသိအမှတ်ပြုခဲ့သလား။ အသိအမှတ် မပြုခဲ့ကြပါဘူး။ ဘုရားသခင့်နာမတော် မပြောနဲ့၊ “ဘုရားသခင်” ဆိုတဲ့စကားလုံးကိုတောင် ကြေညာချက်ထဲမှာ ဘယ်နေရာမှာမှ ဖော်ပြမထားဘူး။ ဒါနဲ့ပတ်သက်ပြီး စာအုပ်တစ်အုပ် (Great Moments in Jewish History) ရဲ့နောက်ဆုံးပိုင်းမှာ ဒီလိုဖော်ပြထားပါတယ်– “အမျိုးသားကောင်စီ အစည်းအဝေး လုပ်နေချိန် မွန်းလွဲ ၁:၀၀ မှာတောင် အဖွဲ့ဝင်တွေဟာ နိုင်ငံတော်ထူထောင်ခြင်း ကြေညာချက်အတွက် စကားအသုံးအနှုန်းနဲ့ပတ်သက်ပြီး သဘောတူညီချက် မရနိုင်ဘဲ ဖြစ်နေကြတယ်။ . . . ဘာသာတရားကိုင်းရှိုင်းတဲ့ ဂျူးတွေက ‘အစ္စရေးလူမျိုး၏ ဘုရားသခင်’ လို့ အသုံးပြုချင်ကြတယ်။ ဒါကို ဘာသာတရား မကိုင်းရှိုင်းတဲ့ ဂျူးတွေက အပြင်းအထန် ကန့်ကွက်ကြတယ်။ ဘင်-ဂူရီယွန်က လိုက်လျောပေးတဲ့အနေနဲ့ ‘ဘုရားသခင်’ အစား ‘ကျောက်’ ဆိုပြီး သုံးနှုန်းပြောဆိုဖို့ ဆုံးဖြတ်လိုက်တယ်။”

အဲဒီအချိန်ကစပြီး ကနေ့အချိန်အထိ ခေတ်သစ်အစ္စရေးနိုင်ငံကို ကုလသမဂ္ဂရဲ့ ဆုံးဖြတ်ချက်အပေါ်၊ ဂျူးတွေရဲ့ မွေးရာပါ အခွင့်အရေးနဲ့ သမိုင်းဝင် အခွင့်အရေးတွေ (ဘိုးဘေးတို့ နှစ်ပေါင်းများစွာ နေထိုင်ခဲ့ရာနယ်မြေ အမွေအနှစ်) အပေါ် အခြေပြုပြီး တည်ထောင်ခဲ့တယ်။ ဘုရားသခင်ဟာ မိမိကို ဂုဏ်တင်ချီးမွမ်းခြင်းမပြုတဲ့ ဂျူးတွေအတွက် ၂၀ ရာစုမှာ ကြိုပြောချက်ဆိုင်ရာ အံ့ဖွယ်အမှုကြီးကို လုပ်ဆောင်လိမ့်မယ်လို့ မျှော်လင့်တာက ကျိုးကြောင်းညီညွတ်ပါသလား။

ခေတ်သစ်အစ္စရေးနိုင်ငံနဲ့ ရှေးခေတ်အစ္စရေးနိုင်ငံတို့ရဲ့ နှိုင်းယှဉ်ချက်

ခေတ်သစ် အစ္စရေးနိုင်ငံရဲ့ အခြေအနေက ဘီစီအီး ၅၃၇ ကအခြေအနေနဲ့ အရမ်းကွာတယ်။ ရှေးခေတ်အစ္စရေးနိုင်ငံဟာ ဘေဘီလုန်လူမျိုးကြောင့် ဖျက်ဆီးခံလိုက်ရပြီး အနှစ် ၇၀ ကြာ လူသူကင်းမဲ့တဲ့အရပ် ဖြစ်ခဲ့ရတယ်။ အဲဒီလိုဖြစ်ပြီးတဲ့နောက် အစ္စရေးနိုင်ငံဟာ တစ်ရက်တည်းနဲ့ ‘ပြန်ဖွားမြင်’ လာသလို ဖြစ်ခဲ့တယ်။ ဘေဘီလုန်ကို အနိုင်ရလိုက်တဲ့ ပါရှန်းဘုရင် မဟာကုရုက ဂျူးတွေကို ပြည်တော်ပြန်ဖို့ အခွင့်ပေးလိုက်တဲ့အချိန်မှာ ဟေရှာယ ၆၆:၈ မှာဖော်ပြထားတဲ့စကားက သိသိသာသာ ပြည့်စုံသွားခဲ့တယ်။—ဧဇရ ၁:၂

ဘီစီအီး ၅၃၇ မှာ ဂျူးတွေကို ပြည်တော်ပြန်ခွင့်ပြုဖို့ ယေဟောဝါဘုရားသခင် ညွှန်ကြားခဲ့တယ်ဆိုတာကို ပါရှန်းဘုရင် မဟာကုရုက အသိအမှတ်ပြုခဲ့တယ်။ ဂျူးတွေကလည်း ယေဟောဝါဘုရားသခင်ကို ပြန်လည်ဝတ်ပြုဖို့၊ ဝတ်ပြုရာအိမ်တော်ကို ပြန်လည်တည်ဆောက်ဖို့ဆိုတဲ့ ရည်ရွယ်ချက်နဲ့ ဂျေရုဆလင်ကို ပြန်လာခဲ့ကြတာပါ။ ဒါပေမဲ့ ခေတ်သစ်အစ္စရေးနိုင်ငံရဲ့ အာဏာပိုင်တွေကတော့ အဲလိုဆန္ဒမျိုး ဘာတစ်စုံတစ်ရာမှ တရားဝင်ပြောကြားတာမျိုး မရှိခဲ့ပါဘူး။

ဘုရားသခင် ရွေးချယ်ထားတဲ့လူမျိုး ဖြစ်နေတုန်းပဲလား

စီအီး ၃၃ မှာ ဇာတိဂျူးတွေနဲ့ ဖွဲ့စည်းထားတဲ့ အစ္စရေးနိုင်ငံဟာ ယေဟောဝါဘုရားသခင်ရဲ့ သားတော် မေရှိယကို ငြင်းပယ်လိုက်တဲ့အခါ ဘုရားသခင် ရွေးချယ်ထားတဲ့ လူမျိုးအဖြစ်ကို လက်လွှတ်ဆုံးရှုံးလိုက်ရတယ်။ ဒါကို မေရှိယကိုယ်တိုင် ဒီလိုပြောခဲ့တယ်– ‘ဂျေရုဆလင်မြို့၊ ဂျေရုဆလင်မြို့၊ ပရောဖက်များကို သတ်သည့်မြို့၊ သင့်ထံစေလွှတ်သောသူတို့ကို ခဲနှင့်ပေါက်သည့်မြို့၊ သင်တို့၏အိမ်တော်သည် စွန့်ပစ်ခံရလေပြီ။’ (မဿဲ ၂၃:၃၇၊ ၃၈) ယေရှုပြောခဲ့တဲ့စကားအတိုင်း စီအီး ၇၀ မှာ ဖြစ်ပျက်လာခဲ့ပါတယ်။ ရောမစစ်တပ်ဟာ ဂျူးတွေရဲ့ ဝတ်ပြုရာအိမ်တော်၊ ယဇ်ပုရောဟိတ် အတန်းအစားနဲ့အတူ ဂျေရုဆလင်မြို့ကို ဖျက်ဆီးလိုက်ကြတယ်။ ဒါပေမဲ့ “အခြားသော လူမျိုးတကာတို့ထက် . . . ဘဏ္ဍာတော် . . . မင်းစည်းစိမ်ရှိသော ယဇ်ပုရောဟိတ်မျိုး၊ သန့်ရှင်းသောလူမျိုး” ဖြစ်ရမယ်ဆိုတဲ့ ဘုရားသခင့်ရည်ရွယ်ချက်က ဘယ်လို ပြည့်စုံလာမလဲ။—ထွက်မြောက်ရာ ၁၉:၅၊ ၆

ဂျူးလူမျိုးဖြစ်တဲ့ တမန်တော်ပေတရုက ဂျူးနဲ့ လူမျိုးခြား ခရစ်ယာန်တွေဆီ ရေးခဲ့တဲ့ စာထဲမှာ ဖော်ပြပါ မေးခွန်းကို ဖြေဆိုထားတယ်။ သူဒီလိုရေးခဲ့တယ်– “သင်တို့မူကား . . . ရွေးချယ်ခံရသောအမျိုး၊ တော်ဝင်ယဇ်ပုရောဟိတ်အဖွဲ့၊ သန့်ရှင်းသောလူမျိုး၊ အထူးပိုင်ဆိုင်ရာလူစု ဖြစ်ကြ၏။ သင်တို့သည် တစ်ချိန်က ထိုလူစုအဝင် မဟုတ်။ ယခုမူကား ဘုရားသခင်၏လူမျိုး ဖြစ်ကြ၏။ သနားကြင်နာခြင်း မခံခဲ့ရသော်လည်း ယခုမူကား သနားကြင်နာတော်မူခြင်း ခံရ၏။”—၁ ပေတရု ၂:၇-၁၀

ဒါကြောင့် သန့်ရှင်းသောစွမ်းအားတော်နဲ့ ရွေးချယ်ခံထားရတဲ့ ခရစ်ယာန်တွေဟာ ဘုရားသခင် ရွေးချယ်ထားတဲ့ လူမျိုးအဝင် ဖြစ်သွားတယ်။ သူတို့ဟာ မွေးကတည်းက ဒါမှမဟုတ် တည်နေရာဒေသကြောင့် ဖြစ်သွားတာ မဟုတ်ပါဘူး။ ဒါကို တမန်တော်ပေါလုက ဒီလိုဖော်ပြခဲ့တယ်– “အရေဖျားလှီးခြင်း ခံသည်ဖြစ်စေ၊ မခံသည်ဖြစ်စေ အရေးပါသည် မဟုတ်။ အသစ်သောဖန်ဆင်းရာသာ အရေးပါ၏။ ဤကျင့်ဝတ်အတိုင်း စနစ်တကျ လိုက်လျှောက်သူအားလုံးနှင့် ဘုရားသခင်၏ အစ္စရေးလူမျိုးအပေါ်တွင် ငြိမ်သက်ခြင်း၊ သနားကြင်နာခြင်းတို့ ရှိပါစေ။”—ဂလာတိ ၆:၁၅၊ ၁၆

ခေတ်သစ်အစ္စရေးနိုင်ငံဟာ ဇာတိဂျူး ဒါမှမဟုတ် ဂျူးဘာသာပြောင်းဝင်လာသူ မည်သူကိုမဆို နိုင်ငံသားဖြစ်ခွင့်ပေးတယ်။ သမ္မာကျမ်းစာအရ “ဘုရားသခင်၏ အစ္စရေးလူမျိုး” ဖြစ်ခွင့်ကိုတော့ ‘နာခံမှုရှိ၍ ယေရှုခရစ်၏ အသွေးတော်နှင့် ဖျန်းခြင်းခံရ’ တဲ့သူတွေကိုပဲ ပေးပါတယ်။ (၁ ပေတရု ၁:၁၊ ၂) ဘုရားသခင်၏ အစ္စရေးလူမျိုးအဝင်တွေအကြောင်း တမန်တော်ပေါလု ဒီလိုဖော်ပြခဲ့တယ်– “အပြင်ပန်းအားဖြင့် ဂျူးလူမျိုးဖြစ်သူသည် ဂျူးလူမျိုးအမှန် မဟုတ်။ အပြင်ပန်းအားဖြင့် ကိုယ့်အသား၌ အရေဖျားလှီးခြင်းသည်လည်း အရေဖျားလှီးခြင်းအမှန် မဟုတ်။ အတွင်းအားဖြင့် ဂျူးလူမျိုးဖြစ်သူသည် ဂျူးလူမျိုး မှန်၏။ အရေဖျားလှီးခြင်းသည်လည်း ပညတ်တရားအားဖြင့် မဟုတ်ဘဲ စွမ်းအားတော်အားဖြင့် စိတ်နှလုံးနှင့်စပ်ဆိုင်၏။ ထိုသို့သောသူကို လူတို့ ချီးမွမ်းသည်မဟုတ်၊ ဘုရားသခင် ချီးမွမ်းတော်မူ၏။”—ရောမ ၂:၂၈၊ ၂၉

ဖော်ပြပါကျမ်းစကားက တမန်တော်ပေါလု နောက်တစ်နေရာမှာ ဖော်ပြထားတဲ့စကားကို သဘောပေါက်အောင် ကူညီပေးနိုင်ပါတယ်။ ပုံဆောင်သံလွင်ပင်က အကိုင်းအခက်တွေနဲ့တူတဲ့ မယုံကြည်သူ ဇာတိဂျူးတွေဟာ ချိုးဖြတ်ခံလိုက်ရပြီး အဲဒီနေရာမှာ “အရိုင်း” ဖြစ်တဲ့ လူမျိုးခြား “အကိုင်းအခက်” တွေနဲ့ ကိုင်းဆက်မယ်လို့ ရောမမြို့သားတွေဆီရေးတဲ့ စာထဲမှာ တမန်တော်ပေါလု ရှင်းပြထားတယ်။ (ရောမ ၁၁:၁၇-၂၁) ဒီပုံဥပမာကို တမန်တော်ပေါလုက ဒီလိုနိဂုံးချုပ်တယ်– “လူမျိုးခြားတို့ အရေအတွက် ပြည့်စုံလာသည်တိုင်အောင် အစ္စရေးလူအချို့သည် စိတ်နှလုံး ထိုင်းမှိုင်းလျက်နေပြီ။ ထိုအတိုင်းပင် အစ္စရေးလူ အပေါင်းတို့သည် ကယ်တင်ခြင်းသို့ ရောက်ကြလိမ့်မည်။” (ရောမ ၁၁:၂၅၊ ၂၆) တစ်ချိန်ချိန်မှာ ဂျူးအားလုံး ခရစ်ယာန်ဘာသာကို ပြောင်းဝင်လာကြမယ်လို့ တမန်တော်ပေါလု ကြိုပြောနေတာလား။ အဲလိုပြောင်းလဲမှုမျိုးကို ဒီနေ့အချိန်ထိ မတွေ့ခဲ့ရပါဘူး။

တမန်တော်ပေါလုရဲ့ သံလွင်ပင် ပုံဥပမာက ဘာကိုဆိုလိုသလဲ

“အစ္စရေးလူအပေါင်း” ဆိုတဲ့ အသုံးအနှုန်းအရ တမန်တော်ပေါလုဟာ ဘုရားသခင့်သန့်ရှင်းသော စွမ်းအားတော်နဲ့ ရွေးချယ်ခံထားရတဲ့ ခရစ်ယာန်အားလုံးကို ပြောနေတာပါ။ မေရှိယကို ဇာတိဂျူးတွေ လက်မခံခြင်းက အသီးသီးတဲ့ အကိုင်းအခက်တွေနဲ့ ပြည့်နေတဲ့ ပုံဆောင် ‘သံလွင်ပင်’ ဖြစ်စေမယ်ဆိုတဲ့ ဘုရားသခင့် ရည်ရွယ်ချက်ကို မပျက်ပြားစေဘူးလို့ တမန်တော်ပေါလု ပြောနေခြင်း ဖြစ်ပါတယ်။ ဒီအချက်က မိမိကိုယ်ကို စပျစ်နွယ်ပင်နဲ့ နှိုင်းယှဉ်ခဲ့တဲ့ ယေရှုရဲ့ပုံဥပမာနဲ့ သွားကိုက်ညီနေတယ်။ အဲဒီစပျစ်နွယ်ပင်ရဲ့ အသီးမသီးတဲ့ အကိုင်းအခက်တွေဟာ ချိုးဖြတ်ခံရပါလိမ့်မယ်။ ယေရှုဒီလို မိန့်ဆိုခဲ့တယ်– “ငါသည် မှန်သောစပျစ်နွယ်ပင် ဖြစ်၏။ ငါ့ခမည်းတော်သည် ဥယျာဉ်မှူးဖြစ်၏။ ငါ၌အသီးမသီးသော အခက်ရှိသမျှကို ခုတ်ပစ်တော်မူ၏။ အသီးသီးသော အခက်ရှိသမျှ သာ၍ အသီးသီးစေရန် ခုတ်ထွင်ရှင်းလင်းတော်မူ၏။”—ယောဟန် ၁၅:၁၊ ၂

ခေတ်သစ်အစ္စရေးနိုင်ငံ ထူထောင်ခြင်းအကြောင်းကို သမ္မာကျမ်းစာထဲမှာ ကြိုပြောမထားပေမဲ့ ဘုရားသခင့်အစ္စရေးလူမျိုး ဖွဲ့စည်းခြင်းအကြောင်းကိုတော့ အသေအချာ ကြိုပြောထားပါတယ်။ ကနေ့ အဲဒီဘုရားသခင့် အစ္စရေးလူမျိုးက ဘယ်သူလဲဆိုတာ ခွဲခြားသိမြင်ပြီး သူတို့နဲ့ ပေါင်းသင်းမယ်ဆိုရင် ထာဝရကောင်းချီး ခံစားရမှာဖြစ်ပါတယ်။—ကမ္ဘာဦး ၂၂:၁၅-၁၈။ ဂလာတိ ၃:၈၊ ၉