မာတိကာဆီ ကျော်သွား

မာတိကာဆီ ကျော်သွား

စာရှုသူများထံမှ မေးခွန်းလွှာ

စာရှုသူများထံမှ မေးခွန်းလွှာ

 စာရှုသူများထံမှ မေးခွန်းလွှာ

ခရစ်ယာန်အသင်းတော်မှ အကူအညီရထိုက်သူဖြစ်နိုင်ရန် မုဆိုးမတစ်ဦးသည် “လင်တစ်ယောက်တည်းရှိဖူးသောသူ” ဖြစ်ရမည်ဟူသော ပေါလု၏စကားများကို ကျွန်ုပ်တို့မည်သို့နားလည်ရမည်နည်း။—⁠၁ တိမောသေ ၅:⁠၉

မုဆိုးမတစ်ဦးနှင့်ပတ်သက်၍ တမန်တော်ပေါလုပြောနေခြင်းဖြစ်သောကြောင့် “လင်တစ်ယောက်တည်းရှိဖူးသောသူ” ဟူသောဖော်ပြချက်သည် မုဆိုးမ,မဖြစ်မီက သူ၏အခြေအနေကို ထင်ရှားစွာရည်ညွှန်းနေခြင်းဖြစ်ရမည်။ ယင်းက မုဆိုးမသည် တစ်ကြိမ်သာအိမ်ထောင်ပြုဖူးသူဖြစ်ရမည်ကို ဆိုလိုနိုင်ပါသလော။ သို့မဟုတ် ပေါလု၏စကားများသည် အခြားအရာတစ်ခုခုကို ဆိုလိုခြင်းဖြစ်နိုင်ပါသလော။ *

အချို့က တစ်ကြိမ်သာ အိမ်ထောင်ပြုခဲ့ဖူးသူမုဆိုးမများကို ပေါလု ပြောနေခြင်းဖြစ်သည်ဟု ဆိုကြသည်။ ယဉ်ကျေးမှုနှင့်အဖွဲ့အစည်းအများစုတွင် ပြန်ပြီးလက်မထပ်သော မုဆိုးမတစ်ဦးအား အထူးသဖြင့် ကိုယ်ကျင့်တရားကောင်းမွန်သူအဖြစ်ရှုမြင်ခဲ့ကြသည်မှာ မှန်ပါသည်။ သို့သော် ထိုရှုမြင်ချက်သည် ပေါလု၏အခြားစာစောင်များရှိ စကားများနှင့်မကိုက်ညီချေ။ ဥပမာ၊ ပြန်ပြီးလက်မထပ်သောမုဆိုးမတစ်ဦးသည် ပိုပျော်ရွှင်မည်ဟု ပေါလု သဘောထားရှိသော်လည်း ကောရိန္သုခရစ်ယာန်များထံရေးသောစာတွင် “သူမသည်သခင်ဘုရား၌သာ သူမနှစ်သက်သူကို လက်ထပ်ရန်လွတ်လပ်ခွင့်ရှိသည်” ဟု သူရှင်းလင်းစွာဖော်ပြခဲ့သည်။ (၁ ကောရိန္သု ၇:၃၉၊ ၄၀ကဘ; ရောမ ၇:၂၊ ၃) ထပ်ဆင့်၍ တိမောသေထံရေးသောစာတွင်လည်း ပေါလုဤသို့ပြော၏– “အသက်အရွယ်ငယ်သေးသည့် မုဆိုးမတို့သည် အိမ်ထောင်သားမွေးမှုကိုပြု . . . ကြသည်ကို ငါလိုလား၏။” (၁ တိမောသေ ၅:၁၄ခမ) ထို့ကြောင့် မုဆိုးမတစ်ဦးသည် ပြန်ပြီးလက်ထပ်ရန်ရွေးချယ်ပါက သူ့ကို အပြစ်တင်စရာမလိုပါ။

သို့ဖြစ်လျှင် တိမောသေကိုပြောသော ပေါလု၏စကားများကို မည်သို့သဘောပေါက်သင့်သနည်း။ “လင်တစ်ယောက်တည်းရှိဖူးသောသူ” ဟူသောဖော်ပြချက်သည် ဤအခန်းငယ်တစ်ခုတည်း၌ တွေ့ရသည်။ မူရင်းဘာသာစကား၌ ယင်း၏စာသားအတိုင်းအဓိပ္ပာယ်မှာ “ယောက်ျားတစ်ယောက်တည်းရှိသောမိန်းမ” ဖြစ်သည်။ စိတ်ဝင်စားဖွယ်ရာကား ယင်းဖော်ပြချက်သည် ပေါလု၏စာများတွင် သူအကြိမ်ကြိမ်အသုံးပြခဲ့သော “မယားတစ်ယောက်တည်းရှိသောသူ” သို့မဟုတ် မူရင်းဘာသာစကားတွင် “မိန်းမတစ်ယောက်တည်းရှိသောယောက်ျား” နှင့်အတူတူပင်ဖြစ်သည်။ (၁ တိမောသေ ၃:၂၊ ၁၂; တိတု ၁:⁠၆) ခရစ်ယာန်ကြီးကြပ်မှူးများနှင့် ဓမ္မအမှုထမ်းများအတွက် တောင်းဆိုသောအရည်အချင်းများကို ဖော်ပြသောအခါ “မယားတစ်ယောက်တည်းရှိသောသူ” ဟုပေါလုအသုံးပြုခဲ့သည်။ ယင်း၏ရှေ့နောက်စကားစဉ်တွင် အဓိကဆိုလိုသည်မှာ ခရစ်ယာန်အသင်းတော်တွင် တာဝန်ထမ်းဆောင်ဖို့အတွက် အရည်အချင်းရှိရန် အမျိုးသားတစ်ဦးသည် အိမ်ထောင်ရှိသူဖြစ်လျှင် မိမိဇနီးအပေါ်သစ္စာရှိသူဖြစ်ရမည်၊ ကျင့်ဝတ်တရားဘက်တွင် အပြစ်တင်ခွင့်နှင့်ကင်းလွတ်သူဖြစ်ရမည်။ * ထို့အတွက်ကြောင့် ၁ တိမောသေ ၅:၉ ပါဖော်ပြချက်သည် ထပ်တူအချက်ကိုပင် အာရုံစိုက်စေပုံပေါက်သည်– မုဆိုးမတစ်ဦး အသင်းတော်မှအကူအညီရထိုက်သူဖြစ်နိုင်ရန် သူသည် မိမိခင်ပွန်းအသက်ရှင်စဉ် ခင်ပွန်းကိုချစ်ခင်မြတ်နိုးကာ သစ္စာရှိသူတစ်ဦးဖြစ်ပြီး မည်သည့်အကျင့်ပျက်ပြားခြင်းနှင့်မဆို ကင်းရှင်းသူဖြစ်ရမည်။ ပေါလု ဖော်ပြထားသောထပ်ဆင့်လိုအပ်ချက်အားလုံးသည် ယင်းသို့သောသူမျိုးကိုသာ ရည်ညွှန်းနေခြင်းဖြစ်သည်။—⁠၁ တိမောသေ ၅:⁠၁၀

[အောက်ခြေမှတ်ချက်များ]

^ အပိုဒ်၊ 3 တမန်တော်ခေတ်၌ အမျိုးသမီးတစ်ဦးသည် တစ်ချိန်တည်းတွင် ခင်ပွန်းအများယူခြင်းဖြစ်သော လင်ပြိုင်ဓလေ့ကို ဂရိ-ရောမလောကတွင် လက်မခံခဲ့ချေ။ ထို့ကြောင့် ပေါလုသည် တိမောသေထံသို့ ယင်းအကြောင်း သို့မဟုတ် ယင်းသို့ပြုကျင့်နေသူအား အပြစ်တင်ရေးသားနေခြင်းဖြစ်နိုင်ပုံမရချေ။

^ အပိုဒ်၊ 5 ဤအချက်နှင့်ပတ်သက်၍ဆွေးနွေးထားချက်ကို ကင်းမျှော်စင် ၁၉၉၆၊ အောက်တိုဘာ ၁၅၊ စာမျက်နှာ ၁၇ နှင့် ၁၉၈၀၊ စက်တင်ဘာ ၁၅၊ စာမျက်နှာ ၃၁ [လိပ်] မှ “စာရှုသူများထံမှမေးခွန်းလွှာ” ကိုရှု။