ဂျေရုဆလင်မြို့အနီး ဗေသနိရွာကို ယေရှု ရောက်တော့ မိတ်ဆွေ လာဇရု ဆုံးသွားတာ လေးရက်ရှိနေပြီ။ ဒါနဲ့ ယေရှုဟာ သေလွန်သူရဲ့ အစ်မ နှစ်ယောက် မာသ၊ မာရိတို့နဲ့အတူ သင်္ချိုင်းကို သွားခဲ့တယ်။ မကြာပါဘူး၊ လူအုပ်တစ်အုပ်လည်း ရောက်လာတယ်။ လာဇရု အသက်ပြန်ရှင်လာအောင် ယေရှု လုပ်ပေးတဲ့အခါ မာသနဲ့ မာရိတို့ ဝမ်းသာအားရဖြစ်သွားတာကို မြင်ယောင်ကြည့်နိုင်ပါတယ်။​—ယောဟန် ၁၁:၂၁-၂၄၊ ၃၈-၄၄ ကိုဖတ်ပါ။

 သေလွန်သူတွေနဲ့ပတ်သက်တဲ့ သတင်းကောင်းကို မာသ သိရှိပြီးသားပါ။ ယေဟောဝါဘုရားက သေလွန်သူတွေကို မြေကြီးပေါ်မှာ အသက်ပြန်ရှင်ခွင့် ပေးမယ်ဆိုတာ မာသ သိထားတယ်။​—ယောဘ ၁၄:၁၄၊ ၁၅ ကိုဖတ်ပါ။

 လူသားတွေဟာ မြေမှုန့်နဲ့ ဖန်ဆင်းခံရတာ ဖြစ်ပါတယ်။ (ကမ္ဘာဦး ၂:၇။ ၃:၁၉) ကျွန်တော်တို့ရဲ့ကိုယ်ခန္ဓာထဲမှာ မမြင်နိုင်တဲ့ ဝိညာဉ်ဆိုတာ မရှိပါဘူး။ သေပြီးတဲ့နောက် ဘာအစိတ်အပိုင်းမှ အသက်ရှင်ကျန်ရစ်တာမျိုးလည်း မရှိဘူး။ လူသေသွားတဲ့အခါ ဦးနှောက်ရဲ့လုပ်ဆောင်မှုပါ ရပ်ဆိုင်းသွားတာမို့ ဘာကြံစည်တွေးတောနိုင်စွမ်းမှ မရှိတော့ပါဘူး။ ဒါကြောင့်လည်း လာဇရုဟာ သေဆုံးတုန်းက ဘာမှမတွေ့ကြုံခဲ့ရတဲ့အတွက် ဘာမှပြောပြစရာ မရှိခဲ့ပါဘူး။ ဘာဖြစ်လို့လဲဆိုတော့ သေလွန်သူတွေဟာ ဘာကိုမှ မသိတော့လို့ပါပဲ။​—ဆာလံ ၁၄၆:၄။ ဒေသနာ ၉:၅၊ ၆၊ ၁၀ တို့ကိုဖတ်ပါ။

 လူတွေဟာ သေပြီးတဲ့နောက် မီးငရဲမှာ နှိပ်စက်ညှဉ်းပန်းခံရပါသလား။ သေလွန်သူတွေ ဘာမှ မသိတော့ဘူးလို့ ကျမ်းစာမှာ ဖော်ပြထားတဲ့အတွက် မီးငရဲမှာ ညှဉ်းဆဲခံရတယ်ဆိုတာက ဘုရားသခင်ကို ရှုတ်ချတဲ့ သွန်သင်ချက်ဖြစ်တယ်။ လူတွေကို မီးနဲ့ နှိပ်စက်ညှဉ်းပန်းတယ်ဆိုတဲ့ အယူအဆကို ဘုရားသခင် လုံးဝမနှစ်သက်ပါဘူး။​—ယေရမိ ၇:၃၁ ကိုဖတ်ပါ။

 သေလွန်သူတွေရဲ့ အခြေအနေက ဘယ်လိုရှိသလဲ ဗီဒီယိုကိုကြည့်ပါ။

 သေလွန်သူတွေဟာ စကားလည်း မပြောနိုင်သလို ကြားလည်း မကြားနိုင်ပါဘူး။ (ဆာလံ ၁၁၅:၁၇) ဒါပေမဲ့ တချို့ကောင်းကင်တမန်ဆိုးတွေက သေလွန်သူအယောင်ဆောင်ပြီး လူတွေနဲ့ စကားပြောဆိုနိုင်ပါတယ်။ (၂ ပေတရု ၂:၄) သေလွန်သူတွေနဲ့ စကားမပြောဖို့ ယေဟောဝါဘုရား တားမြစ်ထားပါတယ်။​—တရားဟောရာ ၁၈:၁၀၊ ၁၁ ကိုဖတ်ပါ။

 သေလွန်သူ သန်းပေါင်းများစွာ ဒီကမ္ဘာပေါ်မှာ အသက်ပြန်ရှင်လာကြပါလိမ့်မယ်။ ဘုရားသခင်အကြောင်း မသိလိုက်ရဘဲ မကောင်းမှုတွေ လုပ်ခဲ့တဲ့ သေလွန်သူတချို့တောင် အသက်ပြန်ရှင်လာကြမှာဖြစ်တယ်။​—လုကာ ၂၃:၄၃။ တမန်တော် ၂၄:၁၅ တို့ကိုဖတ်ပါ။

 အသက်ပြန်ရှင်လာတဲ့သူတွေဟာ ဘုရားသခင်နဲ့ဆိုင်တဲ့ အမှန်တရားတွေကို သင်ယူပြီး ယေရှုရဲ့စကားကို နာခံခြင်းအားဖြင့် ယေရှုကို ယုံကြည်ကြောင်း တင်ပြခွင့်ရကြပါမယ်။ (ဗျာဒိတ် ၂၀:၁၁-၁၃) ဘုရားသခင် နှစ်သက်တဲ့အရာတွေကို ပြုလုပ်မယ်ဆိုရင် ကမ္ဘာပေါ်မှာ ထာဝစဉ် အသက်ရှင်နိုင်ကြပါလိမ့်မယ်။​—ယောဟန် ၅:၂၈၊ ၂၉ ကိုဖတ်ပါ။

 ဘုရားသခင်ဟာ သားတော်ကို အသေခံဖို့ စေလွှတ်ခြင်းအားဖြင့် သေလွန်သူ တွေကို အသက်ပြန်ရှင်ခွင့် မျှော်လင့်ချက်ပေးခဲ့တယ်။ ဒါကြောင့် ရှင်ပြန်ထမြောက်ခြင်း မျှော်လင့်ချက်ကနေ ယေဟောဝါဘုရားရဲ့ မေတ္တာနဲ့ သနားကြင်နာမှုအကြောင်း သိရှိခွင့်ရတယ်။ သေလွန်သူတွေ အသက်ပြန်ရှင်လာတဲ့အခါ အထူးသဖြင့် ဘယ်သူ့ကို သင်တွေ့ချင်ပါသလဲ။​—ယောဟန် ၃:၁၆။ ရောမ ၆:၂၃ တို့ကိုဖတ်ပါ။