Ir al contenido

¿Ndáaña kivi keʼíi̱ ña̱ va̱ása kuni mitúʼíi̱n?

¿Ndáaña kivi keʼíi̱ ña̱ va̱ása kuni mitúʼíi̱n?

Ña̱ kivi keʼún

1. Ndakanixi̱ní xa̱ʼa̱ ña̱ va̱ʼa kéʼún (2 Corintios 11:6). Iin ña̱ va̱ʼaní kúú ña̱ kunda̱a̱-iniún xa̱ʼa̱ ña̱ va̱ása va̱ʼa kéʼún, soo saátu íyo ku̱a̱ʼáníka ña̱ kivi keʼún. Soo tá kíʼún kuenta xíʼin ña̱ va̱ʼa kéʼún, va̱ʼaníka kuniún saá, tasaá va̱ása ndakanikaxi̱níún xa̱ʼa̱ ña̱ va̱ása va̱ʼa kéʼún tasaá kǒo ndakanixi̱níún ña̱ íyo iinlá miíún. Nda̱ka̱tu̱ʼun miíún: “¿Ndáa ña̱ va̱ʼa kúú ña̱ kéʼíi̱?”. Ndakanixi̱ní xa̱ʼa̱ ña̱ va̱ʼa ña̱ kúúmiíún xíʼin xa̱ʼa̱ ña̱ xíni̱ún keʼún.

2. Kundi̱ʼi̱-iniún xa̱ʼa̱ inkana. Kivi kixáʼún kundi̱ʼi̱-iniún xa̱ʼa̱ sava na̱ yiví. Ta̱ Jorge káchira: “Ña̱ nda̱ka̱tu̱ʼún iin na̱ yiví á íyo va̱ʼana á ña̱ ka̱ʼún xíʼinna á vií íyona nu̱ú káchíñuna kivi chindeétáʼanña xíʼún ña̱ kuxini̱kaúnna”.

Miíún kivi kuyatiún nu̱ú na̱ yiví na̱ íyo xíka nu̱ún

Iin ña̱ kivi keʼún: Su̱ví xíʼin nda̱saa na̱ kúúmií kuití ku̱i̱ya̱ún xíniñúʼu ka̱ʼún xíʼin. Ña̱ Biblia káʼa̱nña xa̱ʼa̱ sava na̱ yiví na̱ va̱ʼaní xi̱kitáʼan ni xa̱a̱ síín síín ni̱xi̱yo ku̱i̱ya̱na, tá kúú ñá Rut xíʼin ñá Noemí, ta̱ David xíʼin ta̱ Jonatán saátu ta̱ Timoteo xíʼin ta̱ Pablo (Rut 1:16, 17; 1 Samuel 18:1; 1 Corintios 4:17). Ndakaʼún chi va̱ʼaníka tá nátúʼun u̱vi̱ na̱ yiví nu̱úka ña̱ ka̱ʼa̱n iin kuitína. Na̱ yiví kútóokana ña̱ ná kuniso̱ʼo inkana ña̱ káʼa̱nna. Tá kúkaʼan nu̱ún va̱ʼaníka saá, saáchi su̱ví miíún kúú na̱ xíniñúʼu kixáʼa natúʼun xíʼin inkana.

3. Sakuaʼa kunda̱a̱-iniún xíʼin ña̱ ndóʼo inkana (1 Pedro 3:8). Ni tá kǒo kútóún ña̱ káʼa̱n inkana, taxi ná ka̱ʼa̱nna xa̱ʼa̱ ña̱ ndákanixi̱nína. Kundi̱ʼi̱ka-iniún xa̱ʼa̱ ña̱ʼa ña̱ inkáchi ndákanixi̱níndó xa̱ʼa̱. Soo tá xa̱a̱ síín íyo ña̱ ndákanixi̱níún ta túviún ña̱ xíniñúʼu ka̱ʼún xa̱ʼa̱ ña̱yóʼo, viíní ka̱ʼún xa̱ʼa̱ ña̱yóʼo ta va̱ása sa̱ún ka̱ʼún.

Iin ña̱ kivi keʼún: Nda̱a̱ táki̱ʼva kútóún ña̱ ná ka̱ʼa̱n inkana xíʼún saá kúú ña̱ xíniñúʼu ka̱ʼún xíʼinna. Soo tá ndiʼi tiempo káʼa̱n kúáchiún xíʼin na̱ yiví á xáku̱ndaúnna ta saátu tá ndáʼyi̱ún nu̱úna nda̱a̱ ni iin na̱ yiví kǒo kútóo kitáʼan xíʼún. Va̱ʼaníka kuni̱na kutáʼanna xíʼún tá ná kundiku̱ún consejo ña̱ va̱xi nu̱ú Biblia yóʼo: “Tá káʼa̱nndó xíʼinna viíní ka̱ʼa̱nndó” (Colosenses 4:6).