Na̱ ti̱ndaʼa̱ xíʼún káʼa̱nna á kéʼéna iin ña̱ʼa ña̱ sása̱a̱ miíún, soo va̱ása xíún na̱ʼún ña̱ ni̱sa̱ún. Soo tá yii̱ún á ñá síʼún kíʼinna kuenta ña̱ íyo iin ña̱ ndóʼún, kíxáʼana ndáka̱tu̱ʼúnna yóʼó ña̱ va̱ʼa kunda̱a̱-inina ndáaña ndóʼún. Ta ña̱yóʼo sása̱a̱níkaña yóʼó. ¿Ndáaña kivi keʼún ña̱ kǒo sa̱a̱níkaún tá yáʼún nu̱ú táʼan ña̱yóʼo?

•  Ña̱ xíniñúʼu kunda̱a̱-iniún xa̱ʼa̱

•  Ña̱ kivi keʼún

•   Tá kamaní kíxáʼún sáún kivi kiʼin kue̱ʼe̱ miíún. Sava estudio káʼa̱nña ña̱ tá iin na̱ yiví sáa̱nína kivi kamaní ndaa presiónna, kivi kiʼin kue̱ʼe̱ níma̱na, kivi kiʼin depresiónna á ndiʼi ña̱ xíxina kixáʼaña keʼéña kue̱ʼe̱ xíʼinna. Ta saátu tá sáa̱nína kǒo kivi ku̱su̱nna, kivi xa̱a̱na kuumiína kue̱ʼe̱ ña̱ nani ansiedad, kivi kixáʼa kiʼin kue̱ʼe̱ ku̱ñuna á kivi kiʼin kue̱ʼe̱ xi̱nína. Xa̱ʼa̱ ña̱kán Biblia káʼa̱nña: “Va̱ása sa̱a̱kaún, ndakoo ña̱ sáa̱ún; chí tá ná sa̱ún, keʼún ña̱ va̱ása va̱ʼa” (Salmo 37:8).

•   Tá va̱ása táváún ña̱ sáa̱ún kivi kiʼin kue̱ʼe̱ yóʼó. Tá íyo iin kue̱ʼe̱ ña̱ ndíkaa̱ se̱ʼé inina saá íyo ña̱ sáa̱na tá va̱ása náʼa̱naña. Tá kúú kivi xa̱ún koún iin na̱ yiví vatá á na̱ káʼa̱n nina ña̱ʼa kini xa̱ʼa̱ inkana ta kǒo kúkaʼan nu̱úna. Tá íyoún saá kǒo na̱ kuni̱ kitáʼan xíʼún ta saátu kooní tu̱ndóʼo nu̱ún xíʼin na̱ ti̱ndaʼa̱ xíʼún.

•   Koto cualidad ña̱ va̱ʼa ña̱ kúúmií na̱ ti̱ndaʼa̱ xíʼún. Kaʼyí u̱ni̱ cualidad ña̱ kútóún ña̱ kúúmií na̱ ti̱ndaʼa̱ xíʼún, tá ná sa̱ún inka yichi̱ xa̱ʼa̱ iin ña̱ ke̱ʼéna xíʼún ndakanixi̱ní xa̱ʼa̱ cualidad ña̱ kúúmií na̱ ti̱ndaʼa̱ xíʼún ña̱ ka̱ʼyíún. Ña̱yóʼo chindeétáʼan xíʼún ña̱ kǒo sa̱a̱níkaún.

   Texto ña̱ káxiní káʼa̱n: “Taxindó tíxa̱ʼvi” (Colosenses 3:15).

•   Sákuaʼa ixakáʼnu-iniún xa̱ʼa̱na. Ña̱ siʼna keʼún kúú ña̱ ndakanixi̱níún nda̱a̱ táki̱ʼva ndákanixi̱ní na̱ ti̱ndaʼa̱ xíʼún. Tá saá ná keʼún, ña̱yóʼo chindeétáʼan xíʼún ña̱ kunda̱a̱-iniún xíʼin ña̱ ndóʼo inkana (1 Pedro 3:8). Tándi̱ʼi kivi nda̱ka̱tu̱ʼún miíún ña̱yóʼo: “¿Á iin ña̱ ndeéníví kúú ña̱ ke̱ʼéna xíʼi̱n ta kǒo kívi ixakáʼnu-inii̱ xa̱ʼa̱na?”.

   Texto ña̱ káxiní káʼa̱n: “Iin ña̱ va̱ʼaní kúú ña̱ ixakáʼnu-inina xa̱ʼa̱ ku̱a̱chi inkana” (Proverbios 19:11).

•   To̱ʼóní ka̱ʼún xa̱ʼa̱ ña̱ ndóʼún. Viíní ka̱ʼún xíʼin na̱ ti̱ndaʼa̱ xíʼún. Tá kúú nu̱úka ña̱ ka̱ʼún: “Yóʼó va̱ása ndíʼi̱-iniún xa̱ʼíi̱ chi kǒo káʼún xíʼi̱n ndáa míí ndíka̱ún”, va̱ʼaka ña̱yóʼo ka̱ʼún: “Ndíʼi̱ní-inii̱ xa̱ʼún tá xa̱a̱ kúñuú chi kǒo kúnda̱a̱-inii̱ á sana íyo ña̱ ndo̱ʼún”. Tá vií ndákanixi̱níún xa̱ʼa̱ ña̱ ka̱ʼún, ña̱yóʼo chindeétáʼan xíʼún ña̱ va̱ása sa̱a̱níún.

   Texto ña̱ káxiní káʼa̱n: “Tu̱ʼun ña̱ ka̱ʼa̱nndó, viíní ná kooña” (Colosenses 4:6).

•   Viíní kuniso̱ʼún. Tá xa̱a̱ ndi̱ʼi ni̱ka̱ʼún taxi ná ka̱ʼa̱n na̱ ti̱ndaʼa̱ xíʼún ta viíní kuniso̱ʼúnna. Tá xa̱a̱ ndi̱ʼi ni̱ka̱ʼa̱n na̱ ti̱ndaʼa̱ xíʼún, ka̱ʼa̱n xíʼinna xa̱ʼa̱ ña̱ ku̱ndaa̱-iniún. Ña̱ kuniso̱ʼo va̱ʼún ña̱ ni̱ka̱ʼa̱nna xíʼún chindeétáʼanña xíʼún ña̱ kǒo sa̱a̱níún.

   Texto ña̱ káxiní káʼa̱n: “Xíniñúʼu koo tu̱ʼvandó ña̱ kuniso̱ʼondó ña̱ káʼa̱n inkana, kúee koo inindó ka̱ʼa̱nndó” (Santiago 1:19).