Su̱ví Ndióxi̱ kúú ta̱ táxi tu̱ndóʼo ña̱ ndóʼoyó. Ta̱yóʼo ndíʼiní-inira xa̱ʼa̱ na̱ ku̱a̱yaʼa nu̱ú tu̱ndóʼo. Ndiʼi tu̱ndóʼo ña̱ kúú nu̱ú ñuʼú yóʼo sáxo̱ʼviña miíyó soo si̱loʼo kúma̱ní ta sandíʼi-xa̱ʼa̱ Reino Ndióxi̱ ndiʼi ña̱yóʼo. Nani kíxaa̱ ki̱vi̱ yóʼo, Ndióxi̱ sándikora-ini na̱ ku̱a̱yaʼa nu̱ú tu̱ndóʼo yóʼo (2 Corintios 1:3).

•  ¿Nda̱chun kivi kandixayó ña̱ su̱ví iin castigo Ndióxi̱ kúú tu̱ndóʼo ña̱ ku̱a̱yaʼayó nu̱ú?

•  ¿Á náʼa̱ tu̱ndóʼo ña̱ ku̱a̱yaʼayó nu̱ú ña̱ ndóoyó ki̱vi̱ nu̱ú ndíʼi?

•  ¿Ndáa ki̱ʼva chíndeétáʼan Ndióxi̱ xíʼin na̱ ku̱a̱yaʼa nu̱ú tu̱ndóʼo?

•  ¿Á kivi chindeétáʼan Biblia xíʼinyó ña̱ koo tu̱ʼvayó tá ná kixi tu̱ndóʼo ña̱ yo̱ʼvi̱ní nu̱úyó?

•  Texto ña̱ kivi kuniñúʼuyó ña̱ sandíkoyó-ini na̱ ku̱a̱yaʼa nu̱ú tu̱ndóʼo

 Biblia káʼa̱nña ña̱ xi̱niñúʼu Ndióxi̱ sava ña̱ʼa ña̱ i̱xava̱ʼara ña̱ va̱ʼa sa̱xínura ña̱ kúni̱ra keʼéra, soo su̱ví inkáchi kúú ña̱yóʼo xíʼin ña̱ kininí kúun sa̱vi̱ á inkaka tu̱ndóʼo. ¿Nda̱chun?

•   Tá kúu iin tu̱ndóʼo ndiʼi na̱ yiví xóʼvi̱. Nu̱ú Biblia káʼa̱nña ña̱ va̱ʼaníva ndátiin Ndióxi̱ ku̱a̱chi xíʼin na̱ yiví. Tá kúú, tá sa̱ndíʼi-xa̱ʼa̱ Ndióxi̱ ñuu Sodoma xíʼin Gomorra sa̱kǎkura ta̱ Lot xíʼin u̱vi̱ saá ná se̱ʼe-síʼira, saáchi na̱ yiví va̱ʼa xi̱kuu na̱yóʼo (Génesis 19:29, 30). Jehová xi̱kuunda̱a̱-inira ndáaña xi̱ndika̱a̱ níma̱ iin tá iin na̱ yiví na̱ ni̱xi̱yo tiempo saá, ña̱kán sa̱ndíʼi-xa̱ʼa̱ra ndiʼi na̱ xi̱keʼé ña̱ kini (Génesis 18:23-32; 1 Samuel 16:7).

•   Iin kama kuití kivi yaʼayó nu̱ú tu̱ndóʼo. Tá kuma̱níka ndatiin Ndióxi̱ ku̱a̱chi xíʼin na̱ yiví siʼnaka ni̱ka̱ʼa̱nra xíʼinna ndáaña xíniñúʼu keʼéna ña̱ va̱ʼa ka̱kuna. Na̱ xi̱niso̱ʼo ña̱ ni̱ka̱ʼa̱nra ni̱ka̱kuvana (Génesis 7:1-5; Mateo 24:38, 39).

•   Saátu na̱ yiví kúúmiína ku̱a̱chi xa̱ʼa̱ tu̱ndóʼo ña̱ kúu. ¿Nda̱chun? Saáchi kéʼéna ña̱ʼa ña̱ sándiʼi-xa̱ʼa̱ ñuʼú yóʼo ta íxava̱ʼana veʼe nu̱ú ndeéní kúun sa̱vi̱, nu̱ú ndeéní táan á nu̱ú vi̱xinní á niʼníní (Apocalipsis 11:18). Ña̱kán, Ndióxi̱ kǒo kúúmiíra ku̱a̱chi xa̱ʼa̱ ña̱ ndákaxi̱nyó keʼéyó (Proverbios 19:3).

 Profecía ña̱ va̱xi nu̱ú Biblia káʼa̱nña ña̱ kooní tu̱ndóʼo nu̱ú ñuʼú yóʼo tá xa̱a̱ ná “ku̱yatin ndiʼi-xa̱ʼa̱ ñuyǐví yóʼo”, á ña̱ ki̱xaa “ki̱vi̱ nu̱ú ndíʼi” (Mateo 24:3; 2 Timoteo 3:1). Tá kúú, ta̱ Jesús ni̱ka̱ʼa̱nra ña̱ tiempo ña̱ ndóoyó vitin: “Koo so̱ko ta ndeéní ta̱an” (Mateo 24:7) Soo si̱lóʼoní kúma̱ní ta sandíʼi-xa̱ʼa̱ Ndióxi̱ ndiʼi ña̱ʼa ña̱ sáxo̱ʼvi̱ miíyó, tá kúú ña̱ ndeéní kúun sa̱vi̱, ña̱ táan xíʼin inkaka tu̱ndóʼo (Apocalipsis 21:3, 4).

•   Ndióxi̱ sándi̱kora-ini na̱ yáʼa nu̱ú tu̱ndóʼo xíʼin tu̱ʼunra ña Biblia. Nu̱ú Biblia káʼa̱nña xíʼinyó ña̱ ndíʼi̱ní-ini Ndióxi̱ xa̱ʼa̱yó ta kúsuchí-inira tá yáʼayó nu̱ú tu̱ndóʼo (Isaías 63:9; 1 Pedro 5:6, 7). Saátu káʼa̱nña xíʼinyó ña̱ sandíʼi-xa̱ʼa̱ Ndióxi̱ ndiʼi tu̱ndóʼo yóʼo (koto recuadro “ Texto ña̱ kivi kuniñúʼuyó ña̱ sandíkoyó-ini na̱ ku̱a̱yaʼa nu̱ú tu̱ndóʼo”).

•   Ndióxi̱ xíniñúʼura na̱ ndásakáʼnu miíra ña̱ va̱ʼa sandíkora-ini na̱ yáʼa nu̱ú tu̱ndóʼo. Sava profecía ni̱ka̱ʼa̱nña xa̱ʼa̱ ta̱ Jesús ña̱ sandíkora-ini na̱ ku̱a̱yaʼa nu̱ú tu̱ndóʼo xíʼin “na̱ kúsuchíní-ini” (Isaías 61:1, 2). Tiempo vitin ndiʼi na̱ ndásakáʼnu Jehová chíkaa̱nína ndee̱ ña̱ kundiku̱nna yichi̱ ta̱ Jesús (Juan 13:15).

   Ndióxi̱ xíniñúʼura na̱ ndásakáʼnu miíra ña̱ chindeétáʼanna xíʼin na̱ ku̱a̱yaʼa nu̱ú tundóʼo tá kininí kúun sa̱vi̱, tá ndeéní táan á tá kúu inkaka tu̱ndóʼo (Hechos 11:28-30; Gálatas 6:10).

 Kiviva chindeétáʼanña xíʼinyó. Nu̱ú Biblia va̱ása va̱xiví iin lista ña̱ káʼa̱n xíʼinyó ndáa ki̱ʼva koo tu̱ʼvayó nu̱ú iin tu̱ndóʼo, soo íyo sava texto ña̱ kivi chindeétáʼan xíʼinyó. Tá kúú:

•   Xa̱a̱ ya̱chi̱ka ndakanixi̱níún ndáaña keʼún tá ná kuu iin tu̱ndóʼo. Ña̱ Biblia kachiña: “Na̱ ndíchi kúnda̱a̱-inina ndáaña kúú ña̱ va̱ása va̱ʼa ta kúxíkána nu̱úña” (Proverbios 22:3). Xa̱ʼa̱ ña̱kán xíniñúʼu koo tu̱ʼvayó. Kivi kuumiíyó iin mochila ña̱ emergencia ta kivi taányó ña̱ʼa ña̱ kuniñúʼuyó iniña, ta saátu xa̱a̱ xíniñúʼu kunda̱a̱-iniyó ndáa lugar kivi ku̱ʼu̱nyó ña̱ va̱ʼa ka̱kuyo. Tándi̱ʼi, kivi chikaa̱yó ndee̱ ña̱ keʼéyó ña̱ nda̱kanixi̱níyó.

•   Ndáyáʼviníka ña̱ tákuyó nu̱ú ña̱ʼa ña̱ kúúmiíyó. Biblia kachiña: “Saáchi tá ka̱kuyó ñuyǐví yóʼo kǒo ña̱ʼaví níkixaa̱ xíʼinyó, ta tá ná kuviyó kǒo nda̱a̱ ni iin ña̱ʼa ku̱ʼu̱n xíʼinvíyó” (1 Timoteo 6:7, 8). Xa̱ʼa̱ ña̱kán xíniñúʼu koo tu̱ʼvayó ña̱ sandákooyó veʼeyó xíʼin ña̱ʼa ña̱ kúúmiíyó ña̱ va̱ʼa sakǎkuyó miíyó. Ná ndakaʼányó chi ndáyáʼviníka ña̱ tákuyó nu̱ú ña̱ʼa ña̱ kúúmiíyó (Mateo 6:25).