Ir al contenido

¿Nda̱chun kúú ta̱ Jesús se̱ʼe Ndióxi̱?

¿Nda̱chun kúú ta̱ Jesús se̱ʼe Ndióxi̱?

Ña̱ káʼa̱n Biblia xa̱ʼa̱ ña̱yóʼo

 Ku̱a̱ʼání yichi̱, Biblia káʼa̱nña xa̱ʼa̱ ta̱ Jesús ña̱ “kúúra se̱ʼe Ndióxi̱” (Juan 1:49). Ña̱ tu̱ʼun “se̱ʼe Ndióxi̱” kúni̱ kachiña ña̱ mií Ndióxi̱ kúú ta̱ i̱xava̱ʼa ndiʼi ña̱ʼa ta miíra ta̱xi ña̱ tákuña, ña̱yóʼo kúni̱ kachiña ña̱ miíra i̱xava̱ʼa ta̱ Jesús (Salmo 36:9; Apocalipsis 4:11). Soo Biblia va̱ása káʼa̱nña ña̱ ni̱xa̱a̱ Ndióxi̱ ku̱ura yivá iin ña̱ loʼo nda̱a̱ táki̱ʼva káku se̱ʼe na̱ yiví.

 Saátu káʼa̱n Biblia ña̱ kúú na̱ ángel “se̱ʼe Ndióxi̱ ta̱ nda̱a̱” (Job 1:6). Ta saátu káʼa̱nña xa̱ʼa̱ ta̱a nu̱ú ta̱ Adán, ña̱ kúúra “se̱ʼe Ndióxi̱” (Lucas 3:38). Biblia káʼa̱nña xa̱ʼa̱ ta̱ Jesús ña̱ kúúra se̱ʼe Ndióxi̱ ta̱ ndáyáʼvika saáchi ta̱yóʼo kúú ta̱ nu̱ú na̱kuva̱ʼa ta saátu mií Ndióxi̱ kúú ta̱ i̱xava̱ʼa ta̱yóʼo.

 ¿Á ni̱xi̱yo ta̱ Jesús chí ndiví tá kúma̱níka kakura nu̱ú ñuʼú yóʼo?

 Ni̱xi̱yovara chí ndiví. Tá kúma̱níka kakura nu̱ú ñuʼú yóʼo ña̱ koora iin na̱ yiví, ta̱ Jesús ni̱xi̱yora iin espíritu chí ndiví. Saáchi miíra ni̱ka̱ʼa̱n ña̱ ke̱era chí ndiví (Juan 6:38; 8:23).

 Ta̱ Jesús kúú ta̱ nu̱ú va̱ʼa i̱xava̱ʼa Ndióxi̱. Biblia káʼa̱nña ña̱yóʼo xa̱ʼa̱ ta̱ Jesús:

  •   Ta̱yóʼo kúú “ta̱ nu̱ú va̱ʼa na̱kuva̱ʼa nu̱ú ndiʼika ña̱ʼa” (Colosenses 1:15).

  •   Ta̱yóʼo kúú “ta̱ nu̱ú va̱ʼa i̱xava̱ʼa Ndióxi̱” (Apocalipsis 3:14).

 Ta̱ Jesús sa̱xínura iin profecía ña̱ káʼa̱n xa̱ʼa̱ iin ta̱ xa̱a̱ ku̱a̱ʼání ku̱i̱ya̱ chí sa̱tá íyo (Miqueas 5:2; Mateo 2:4-6).

 ¿Ndáaña xi̱keʼé ta̱ Jesús tá ni̱xi̱yora chí ndiví?

 Xi̱kuumiíra iin chiñu ña̱ ndáyáʼvi chí ndiví. Ta̱ Jesús ni̱ka̱ʼa̱nra xa̱ʼa̱ chiñu yóʼo tá ni̱ka̱ʼa̱nra xíʼin Ndióxi̱: “Yivá, taxi ná koi̱ yatin xíʼún ta ndukáʼnu tukui̱ nda̱a̱ táki̱ʼva ni̱xi̱yoi̱ xíʼún tá kúma̱níka kuva̱ʼa ña̱ ñuyǐví yóʼo” (Juan 17:5).

 Chi̱ndeétáʼanra xíʼin yivára tá i̱xava̱ʼara ndiʼi ña̱ʼa. Ta̱ Jesús va̱ʼaní xi̱kachíñura xíʼin Ndióxi̱ (Proverbios 8:30). Biblia káʼa̱nña ña̱yóʼo xa̱ʼa̱ ta̱ Jesús: “Ta̱yóʼo kúú ta̱ xi̱niñúʼu Ndióxi̱ ña̱ ke̱ʼéra ndiʼika ña̱ʼa ña̱ íyo chí ndiví ta saátu ña̱ íyo nu̱ú ñuʼú” (Colosenses 1:16).

 Ndióxi̱ xi̱niñúʼura ta̱ Jesús ña̱ ke̱ʼéra ndiʼika ña̱ʼa, tá kúúna̱ ángel ta saátu ndiʼi ña̱ʼa ña̱ íyo chí ndiví (Apocalipsis 5:11). Ña̱ inkáchi ka̱chíñu ta̱ Jesús xíʼin Ndióxi̱ íyoña nda̱a̱ táki̱ʼva íyo iin tá káʼa̱n ndáa ki̱ʼva kuva̱ʼa iin veʼe xíʼin ta̱ íxava̱ʼaña. Ndióxi̱ kúú ta̱ ni̱ka̱ʼa̱n ndáa ki̱ʼva koo ndiʼi ña̱ʼa ta ta̱ Jesús kúú ta̱ ke̱ʼéña.

 Ta̱ kúú tu̱ʼun. Tá káʼa̱n Biblia xa̱ʼa̱ ta̱ Jesús tá kúma̱níka kixira nu̱ú ñuʼú káʼa̱nña ña̱ naníra “tu̱ʼun” (Juan 1:1). Ña̱yóʼo kúni̱ kachiña ña̱ xi̱niñúʼu Ndióxi̱ se̱ʼera ña̱ va̱ʼa ka̱ʼa̱nra xíʼin na̱ ángel ndáaña keʼéna.

 Ta saátu sana xi̱niñúʼu Ndióxi̱ ta̱ Jesús ña̱ va̱ʼa ka̱ʼa̱nra xíʼin na̱ yiví. Sana xi̱niñúʼu Jehová ta̱ Jesús ta̱ kúú tu̱ʼun, ña̱ va̱ʼa ka̱ʼa̱nra xíʼin ta̱ Adán ta saátu ñá Eva tá ni̱xi̱yona nu̱ú jardín ña̱ Edén (Génesis 2:16, 17). Sana ta̱ Jesús kúú ta̱ xi̱niʼi yichi̱ nu̱ú na̱ ñuu Israel tá ni̱ya̱ʼana chí nu̱ú ñuʼú yi̱chí ta saátu sana miíra kúú ta̱ ni̱ka̱ʼa̱n xíʼinna ndáaña kúú ña̱ xíniñúʼu keʼéna (Éxodo 23:20-23). *

^ Ta̱ kúú tu̱ʼun su̱ví iinlá ta̱yóʼo kúú ta̱ níxiniñúʼu Ndióxi̱ ña̱ va̱ʼa ka̱ʼa̱nra xíʼin na̱ yiví. Tá kúú Jehová xi̱niñúʼura inka na̱ ángel, su̱ví iinlá se̱ʼera ta̱ nu̱ú, ña̱ va̱ʼa taxira ley ndaʼa̱ na̱ ñuu Israel (Hechos 7:53; Gálatas 3:19; Hebreos 2:2, 3).