Nda̱a̱ vitin sa̱ndákoo ta̱ Elifaz, ta̱ Bildad xíʼin ta̱ Zofar ña̱ ka̱ʼa̱nna. Ndáa ña̱ táku̱ kuití kúú ta̱chí ña̱ va̱xi chí nu̱ú ñuʼú yi̱chí ña̱ Arabia. Tá sa̱ndíʼina ni̱ka̱ʼa̱nnína xíʼin ta̱ Job, kǒoka nda̱a̱ ni iin ña̱ʼa níka̱ʼa̱nra. Kivi ndakanixi̱níyó ña̱ xíto káxira nu̱ú na̱ xi̱kaʼa̱n ña̱ kúúna migora. ¿Á ndakundeéna ka̱ʼa̱nna inkaka ña̱ʼa xíʼinra? Va̱ásaví. Chi sáa̱nína ta ni va̱ása kúni̱kana kotona nu̱úra. Ni ni̱ka̱ʼa̱nna tu̱ʼun ña̱ va̱ása ndáyáʼvi xíʼin ta̱ Job, soo va̱ása níkuchiñu ña̱yóʼo sandákavaña-inira (Job 16:3). Chi ña̱ ke̱ʼé ta̱ Job kúú ña̱ chi̱kaa̱níka-inira ña̱ nda̱kú koo inira xíʼin Ndióxi̱.

 Ndi̱ʼi-xa̱ʼa̱ ndiʼi ña̱ ku̱i̱ká ña̱ xi̱kuumiíra, ni̱xi̱ʼi̱ u̱xu̱ saá na̱ se̱ʼera, va̱ása ní ixato̱ʼóka na̱ migorara ni na̱ xi̱ndoo yatin xíʼinra ta nda̱a̱ ki̱ʼinra kue̱ʼe̱. Ku̱ndáá ndiʼi ku̱ñura, ka̱na ndiʼi ta̱ʼyi̱ á chompi ñii̱ra ta ni̱xi̱na̱ ndiʼi ti̱kuxí nu̱ú ña̱yóʼo ta saátu nda̱a̱ yuʼúra kininí xi̱xaʼa̱n. Nda̱kanixi̱níra ña̱ si̱í kuití ña̱ kivi keʼéra kúú ña̱ nda̱kú koo inira xíʼin Ndióxi̱ (Job 7:5; 19:17; 30:30). Ni̱sa̱a̱níra xíʼin ña̱ ni̱ka̱ʼa̱n ta̱ Elifaz, ta̱ Bildad xíʼin ta̱ Zofar xíʼinra. Ta̱ Job chi̱kaa̱-inira ña̱ na̱ʼa̱ra ña̱ kǒo ku̱a̱chi kúúmiíra saáchi na̱yóʼo xi̱kaʼa̱nna ña̱ kúúmiíra ku̱a̱chi. Xíʼin ña̱ ni̱ka̱ʼa̱n ta̱ Job, kǒoka nda̱a̱ ni iin ña̱ʼa níka̱ʼa̱n na̱ ta̱a kán tasaá va̱ása nísaxóʼvi̱kana-inira xíʼin ña̱ xi̱kaʼa̱nna. Soo ni saá, ni̱xo̱ʼvi̱níkava-ini ta̱ Job. Xi̱xiniñúʼuvara ña̱ chindeétáʼan inkana xíʼinra xa̱ʼa̱ ña̱ xi̱yaʼara nu̱ú tu̱ndóʼo yóʼo.

 Kúnda̱a̱va-iniyó nda̱chun va̱ása káxi níxi̱yo ña̱ xi̱ndakanixi̱ní ta̱ Job xa̱ʼa̱ ña̱ xi̱ndoʼora. Xi̱xiniñúʼura ña̱ chindeétáʼanna xíʼinra ña̱ nasamara ki̱ʼva ña̱ xi̱ndakanixi̱níra ta saátu xi̱xiniñúʼura ña̱ sandíkona-inira, saáchi na̱ xi̱kaʼa̱n ña̱ xi̱kuuna migora va̱ása níkeʼéna ña̱yóʼo. ¿Á xa̱a̱ ndóʼún saá sava yichi̱? ¿Á xa̱a̱ sava yichi̱ sándakoo na̱ xi̱ndakanixi̱níún ña̱ kúúna migoún yóʼó? Tá ná kunda̱a̱-iniyó xa̱ʼa̱ ña̱ ke̱ʼé Jehová ña̱ chi̱ndeétáʼanra xíʼin ta̱ Job ta saátu xa̱ʼa̱ ña̱ ke̱ʼé ta̱ Job, ña̱yóʼo kivi chindeétáʼanña xíʼinyó ña̱ va̱ása ndakavaka-iniyó ta chikaa̱yó ndee̱ ña̱ nda̱kú koo iniyó xíʼin Ndióxi̱.

 Nani tá ki̱xáʼa ta̱ Elifaz, ta̱ Bildad xíʼin ta̱ Zofar káʼa̱nna xíʼin ta̱ Job saátu ni̱xi̱yo inka ta̱a ta̱ xi̱naní Elihú yatin xíʼinna. Ni kǒo ña̱ níka̱ʼa̱nra soo xi̱niso̱ʼovara ña̱ ni̱ka̱ʼa̱n na̱ ta̱a na̱ xi̱kuaʼa̱ kán ni kǒo níxi̱kindo̱o-inira xíʼin ña̱ xi̱kaʼa̱nna.

 Ta̱ Elihú kǒo níkutóora ña̱ ke̱ʼé ta̱ Job, ni xi̱kuura iin ta̱a ta̱ kǒo ku̱a̱chi kúúmií soo xa̱ʼa̱ ña̱ ni̱ka̱ʼa̱nna ku̱a̱ʼání ña̱ʼa xíʼinra nda̱a̱ xi̱kuni̱ra na̱ʼa̱ra ña̱ va̱ʼaníva íyo ña̱ kéʼéra. Soo ta̱ Elihú ki̱ʼinra kuenta xíʼin ña̱ ndóʼo ta̱ Job ta ku̱ndaa̱-inira ña̱ xóʼvi̱nívara. Saátu ki̱ʼinra kuenta ña̱ va̱ása sándaʼvi ta̱ Job, ta xi̱xiniñúʼura ña̱ ná chindeétáʼanna xíʼinra ta sandíkona-inira. Xa̱a̱ kúnda̱a̱va-iniyó nda̱chun va̱ása níkundeéka-ini ta̱ Job xíʼin ña̱ ni̱ka̱ʼa̱n u̱ni̱ saá na̱ ta̱a kán xíʼinra. Ta̱ Elihú xi̱nira ndiʼi ña̱ ni̱ka̱ʼa̱n u̱ni̱ saá na̱ ta̱a kán xíʼin ta̱ Job ña̱ va̱ʼa sandákavana-inira, tasaá sandákoora ña̱ kandíxara Ndióxi̱ ta va̱ása nda̱kúka koo inira. Ta saátu xíʼin ña̱ ni̱ka̱ʼa̱nna xíʼinra ni̱na̱ʼa̱na ña̱ ndi̱va̱ʼaní-ini Ndióxi̱, xa̱ʼa̱ ña̱yóʼo kúú ña̱ va̱ʼaka ki̱xáʼa ta̱ Elihú ni̱ka̱ʼa̱nra xíʼin ta̱ Job (Job 32:2-4, 18).

 Ta̱ Elihú ki̱xáʼara ni̱ka̱ʼa̱nra, ka̱chira: “Yi̱ʼi̱ loʼokavai̱ ta ndóʼó na̱ xa̱a̱ chéeva kúúndó. Xa̱ʼa̱ ña̱ íxato̱ʼíi̱ ndóʼó va̱ása níka̱ʼi̱n nda̱a̱ ni iin ña̱ʼa ta ni va̱ása níka̱ʼi̱n xíʼinndó xa̱ʼa̱ ña̱ xíni̱i̱”. Ta ni̱ka̱ʼa̱nkara: “Ni xa̱a̱ ku̱a̱ʼá ku̱i̱ya̱ kúúmií iin na̱ yiví va̱ása kúni̱ kachiña ña̱ na̱ ndíchi kúúna, ni su̱ví nda̱saa na̱ yiví na̱ xa̱a̱ chée kúú na̱ kúnda̱a̱-ini ndáaña kúú ña̱ va̱ʼa” (Job 32:6, 9). Tasaá naʼá va̱ʼa ni̱ka̱ʼa̱n ta̱ Elihú ta ni̱na̱ʼa̱ra ña̱ nina ña̱ nda̱a̱va kúú ña̱ ni̱ka̱ʼa̱nra. Síínníva íyo ña̱ ni̱ka̱ʼa̱nra xíʼin ta̱ Job nu̱úka ña̱ ni̱ka̱ʼa̱n ta̱ Elifaz, ta̱ Bildad xíʼin ta̱ Zofar. Ni̱ka̱ʼa̱nra xíʼin ta̱ Job ña̱ va̱ása ka̱ʼa̱n-ndi̱va̱ʼara xíʼinra ta ni va̱ása sandákavara-inira. Xa̱ʼa̱ ña̱ xi̱niñúʼura ki̱vi̱ ta̱ Job ña̱ ni̱ka̱ʼa̱nra xíʼinra, ni̱na̱ʼa̱ra ña̱ íxato̱ʼónírara. a Xa̱ʼa̱ ña̱ ki̱ʼinra kuenta ña̱ sa̱ndákavaní na̱ inka ta̱a kán ini ta̱ Job xíʼin ña̱ ni̱ka̱ʼa̱nna xíʼinra, ka̱chira: “Soo vitin, Job ixaún ña̱ ma̱ní kuniso̱ʼo ndiʼi ña̱ káʼi̱n xíʼún” (Job 33:1, 7; 34:7).

 Tá ta̱xi ta̱ Elihú consejo ndaʼa̱ ta̱ Job, káxiní ni̱ka̱ʼa̱nra xíʼinra ta ka̱chira: “Miíún ka̱chiún [...] ‘Ta̱ ndiiva kúi̱, kǒo ku̱a̱chi kúúmiíi̱; ta̱ ndiiva kúi̱, kǒo ña̱ va̱ása va̱ʼa níkeʼíi̱. Soo Ndióxi̱ ndúkúra ki̱ʼva ña̱ koora contra xíʼi̱n’”. Xa̱ʼa̱ ña̱kán, ta̱ Elihú ki̱ʼinra kuenta nda̱chun ndákanixi̱ní ta̱ Job saá, ña̱kán ni̱nda̱ka̱tu̱ʼunrara: “¿Á va̱ʼaní ña̱ ndákanixi̱níún túviún chi káchiún ‘Va̱ʼaníka íyo ña̱ kéʼé yi̱ʼi̱ nu̱úka ña̱ kéʼé Ndióxi̱’?”. Ta̱ Elihú ki̱ʼinra kuenta ña̱ xi̱niñúʼu nasama ta̱ Job ña̱ ndákanixi̱níra, xa̱ʼa̱ ña̱kán ni̱ka̱ʼa̱nkara xíʼinra: “Va̱ása va̱ʼa íyo ña̱ káʼún” (Job 33:8-12; 35:2). Xi̱kunda̱a̱va-inira ña̱ xi̱saa̱ní ta̱ Job xa̱ʼa̱ ndiʼi ña̱ ndo̱ʼora ta saátu xa̱ʼa̱ ndiʼi tu̱ʼun ña̱ va̱ása va̱ʼa ña̱ ni̱ka̱ʼa̱n na̱ xi̱kaʼa̱n ña̱ xi̱kuuna migora. Ña̱kán ni̱ka̱ʼa̱nra ña̱yóʼo xíʼinra: “Kuenta koún, chi xa̱ʼa̱ ña̱ sáa̱níún kivi xa̱ún sa̱a̱ní-iniún kuniúnna” (Job 36:18).

 Ta̱ Elihú nda̱kiʼinra tu̱ʼun Jehová. Viíní íyo tu̱ʼun ña̱ xi̱niñúʼura ña̱ ni̱ka̱ʼa̱nra xíʼin ta̱ Job, ka̱chira: “Nda̱a̱ ni loʼo va̱ása xíniñúʼu ndakanixi̱níyó ña̱ kéʼé Ndióxi̱ ta̱ nda̱a̱ ña̱ va̱ása va̱ʼa, ni ña̱ ndakanixi̱níyó xa̱ʼa̱ ta̱ íyo ndiʼi ndee̱ ña̱ kéʼéra ña̱ va̱ása nda̱kú. Ña̱ nda̱a̱ kúúña, Ndióxi̱ ta̱ kúúmií ndiʼi ndee̱ nina ña̱ nda̱kú kúú ña̱ kéʼéra” (Job 34:10, 12). Ña̱ va̱ʼa na̱ʼa̱ ta̱ Elihú ña̱ kúndáʼviní-ini Jehová xínira miíyó ta nda̱kúní íyo ña̱ kéʼéra, sa̱ndákaʼánra ta̱ Job ña̱ kiviva taxi Ndióxi̱ castigo ndaʼa̱ra xa̱ʼa̱ ña̱ kǒo ní ixato̱ʼórara xíʼin ña̱ ni̱ka̱ʼa̱nra. Soo kǒo níkeʼé Ndióxi̱ ña̱yóʼo (Job 35:13-15). Ta̱ Elihú kǒo níxi̱kunda̱a̱ví-inira xa̱ʼa̱ ndiʼi ña̱ʼa, soo vitá ni̱xi̱yo inira ta ka̱chira: “Va̱ása kivi xa̱a̱yó kunda̱a̱-iniyó xa̱ʼa̱ ndiʼi ndee̱ ña̱ kúúmií Ndióxi̱” (Job 36:26).

 Káxiní ni̱xi̱yo consejo ña̱ ni̱ka̱ʼa̱n ta̱ Elihú xíʼin ta̱ Job, soo viíníva ni̱ka̱ʼa̱nra xíʼinra. Ni̱ka̱ʼa̱nra xíʼin ta̱ Job ña̱ chí nu̱únínu, Jehová sandáʼavarara ta ka̱ʼa̱nra ña̱yóʼo xa̱ʼa̱ra: “Ná nduyúta̱ka ku̱ñura nu̱úka ki̱ʼva ña̱ ni̱xi̱yoña tá xi̱kuura iin ta̱ loʼo, ná ndikó tuku ndee̱ ña̱ xi̱kuumiíra tá ni̱xi̱yo loʼora”. Va̱ʼaní ni̱xi̱yo ini ta̱ Elihú xíʼinra, chi va̱ása níka̱ʼa̱nra ku̱a̱ʼání tu̱ʼun xíʼinra. Chi ña̱ ke̱ʼéra kúú ña̱ ni̱ka̱ʼa̱nra xíʼinra ná ka̱ʼa̱nra xa̱ʼa̱ ña̱ ndákanixi̱níra. Ka̱chira: “Ka̱ʼa̱n chi kúni̱i̱ na̱ʼi̱ ña̱ kǒo ku̱a̱chi kúúmiíún” (Job 33:25, 32). Xa̱ʼa̱ ña̱ kǒo níka̱ʼa̱n-ndi̱va̱ʼa ta̱ Elihú xíʼin ta̱ Job, ña̱kán kǒo nda̱a̱ ni iin ña̱ʼa níka̱ʼa̱nra ña̱ ndakiʼinra tu̱ʼunra. Sana nda̱a̱ xa̱kura chi ki̱ʼinra kuenta ña̱ ndixa ni̱ndi̱ʼi-ini ta̱ Elihú xa̱ʼa̱ra.

 Ku̱a̱ʼání ña̱ʼa kivi sakúaʼayó xa̱ʼa̱ ta̱ Job xíʼin ta̱ Elihú. Xíʼin ña̱ ke̱ʼé ta̱ Elihú, sákuaʼayó ndáa ki̱ʼva taxiyó consejo ndaʼa̱ inkana ta sandíkoyó-inina. Na̱ ndixa kúú migo táxina consejo ndaʼa̱ na̱ kúú migona tá xítona ña̱ xíniñúʼu nasamana ña̱ kéʼéna á tá xítona ña̱ va̱ása va̱ʼa íyo ña̱ ndáka̱xinna keʼéna (Proverbios 27:6). Saá xíniñúʼu keʼé miíyó xíʼin inkana. Tá iinna ku̱a̱yaʼana nu̱ú iin tu̱ndóʼo ña̱ yo̱ʼvi̱ní ta káʼa̱nna ña̱ va̱ása va̱ʼa, viíní ná chindeétáʼanyó xíʼinna. Ta xíʼin ña̱ ke̱ʼé ta̱ Job sákuaʼayó ña̱ xíniñúʼu vitá koo iniyó ta kuniso̱ʼoyó consejo ña̱ táxina ndaʼa̱yó. Ndiʼivayó xíniñúʼu ña̱ taxina consejo ndaʼa̱yó xa̱ʼa̱ ña̱kán ná kuniso̱ʼoyó tá káʼa̱nna xíʼinyó, chi ña̱yóʼo nda̱a̱ kivi sakǎkuña miíyó (Proverbios 4:13).

 Ku̱a̱ʼá yichi̱ ni̱ka̱ʼa̱n ta̱ Elihú xa̱ʼa̱ ta̱chí, vi̱kó, taxa xíʼin ña̱ ndáʼyi̱ sa̱vi̱. Ña̱yóʼo ni̱ka̱ʼa̱nra xa̱ʼa̱ Jehová: “Viíní kuniso̱ʼondó ña̱ káʼa̱n Ndióxi̱, chi íyoní ndee̱ tu̱ʼunra”. Ta tándi̱ʼi ni̱ka̱ʼa̱nra xa̱ʼa̱ iin ta̱chí ña̱ ndeéní káni (Job 37:2, 9). Sana tá káʼa̱nkara ndeéníka ki̱xáʼa káni ta̱chí ta ndáʼyi̱ sa̱vi̱. Tasaá ku̱u iin ña̱ʼa ña̱ nda̱kanda̱ní-inina xíʼin, chi ni̱ka̱ʼa̱n Jehová (Job 38:1).

 Tá káʼviyó ña̱ táʼví yóʼo, xítoyó ña̱ liviní tu̱ʼun ni̱ka̱ʼa̱n Jehová xíʼin ta̱ Job. Tu̱ʼun ña̱ ni̱ka̱ʼa̱n Jehová xíʼinra íyoña nda̱a̱ táki̱ʼva íyo ta̱chí ña̱ nda̱kiʼin ndiʼi ña̱ vatá ña̱ ni̱ka̱ʼa̱n ta̱ Elifaz, ta̱ Bildad xíʼin ta̱ Zofar. Nda̱a̱ loʼo va̱ása ni̱ka̱ʼa̱n Jehová xíʼin na̱yóʼo tá xa̱ʼa̱. Iinlá xíʼin ta̱ Job kuití ni̱ka̱ʼa̱nra ta ta̱xira consejo ndaʼa̱ra nda̱a̱ táki̱ʼva táxi iin ta̱a consejo ndaʼa̱ se̱ʼera.

 Xi̱kunda̱a̱va-ini Jehová ña̱ xi̱xoʼvi̱ní ta̱ Job. Xi̱kundáʼvi-inira xi̱xinirara nda̱a̱ táki̱ʼva kéʼéra tá xítora ña̱ xóʼvi̱ inkaka na̱ se̱ʼera (Isaías 63:9; Zacarías 2:8). Saátu xi̱kunda̱a̱-inira ña̱ va̱ása níxi̱kunda̱a̱ va̱ʼa ini ta̱ Job xa̱ʼa̱ ña̱ xi̱kaʼa̱nra ta xa̱ʼa̱ ña̱yóʼo ni̱xo̱ʼvi̱kavara. Ña̱kán ke̱ʼé Jehová sava pregunta yóʼo xíʼinra ña̱ va̱ʼa kixáʼara vií ndakanixi̱níra. Ni̱nda̱ka̱tu̱ʼunrara: “Ka̱ʼa̱n xíʼi̱n, ¿á kúnda̱a̱-iniún ndáa ki̱ʼva chi̱ndúi̱ xa̱ʼa̱ ñuʼú yóʼo? Ka̱ʼa̱n xíʼi̱n, ¿á kúnda̱a̱-iniún ndáa ki̱ʼva ke̱ʼíi̱ ña̱yóʼo?”. Tá xa̱ʼa̱, tá i̱xava̱ʼa Ndióxi̱ ndiʼi ña̱ʼa, na̱ ángel ni̱nda̱ʼyi̱ kóʼóna ña̱ va̱ʼa ndasakáʼnuna Ndióxi̱ chi nda̱kanda̱ní-inina xa̱ʼa̱ ña̱ i̱xava̱ʼa Ndióxi̱ (Job 38:2, 4, 7). Va̱ása níxi̱kunda̱a̱ví-ini ta̱ Job xa̱ʼa̱ ña̱yóʼo, ña̱kán kǒo nda̱a̱ ni iin ña̱ʼa níka̱ʼa̱nra.

 Tasaá ki̱xáʼa Jehová ni̱ka̱ʼa̱nra xíʼin ta̱ Job xa̱ʼa̱ ndiʼi ña̱ʼa ña̱ i̱xava̱ʼara. Ni̱ka̱ʼa̱nra xíʼinra xa̱ʼa̱ sava ña̱ʼa ña̱ íyo chí ndiví, xa̱ʼa̱ kití xíʼin xa̱ʼa̱ yitu̱n, xa̱ʼa̱ ki̱ʼva ña̱ ku̱vaʼa ñuʼú ta saátu xa̱ʼa̱ inkaka ña̱ʼa. Ni̱ka̱ʼa̱nra xa̱ʼa̱ sava kití tí xíni̱ ta̱ Job, tá kúú tí ndikaʼa, tí saa ndáá, tí ti̱xúʼú yukú, tí burro yukú, tí si̱ndi̱ki̱ yukú, tí avestruz, tí kuáyi̱, tí halcón xíʼin tí ta̱sú. Saátu ni̱ka̱ʼa̱nra xa̱ʼa̱ tí Behemot (sana tí hipopótamo kúú tíyóʼo) ta ni̱ka̱ʼa̱ntura xa̱ʼa̱ tí Leviatán (sana tí cocodrilo kúú tíyóʼo). ¿Á ndákanixi̱níún ndáa ki̱ʼva sa̱náʼa̱ Jehová ta̱ Job xa̱ʼa̱ ndiʼi ña̱ʼa ña̱ i̱xava̱ʼara? b

 ¿Ndáaña xi̱kuni̱ Jehová sanáʼa̱ra ta̱ Job? Xi̱kuni̱ra sanáʼa̱rara ña̱ vitá koo inira. Tá xi̱kaʼa̱n ta̱ Job ña̱ xi̱keʼé Jehová ña̱ va̱ása va̱ʼa xíʼinra, xi̱xoʼvi̱kavara xa̱ʼa̱ ña̱yóʼo ta xi̱kuxíkákara nu̱ú Jehová. Ña̱kán ku̱a̱ʼá yichi̱ ni̱nda̱ka̱tu̱ʼun Jehová ta̱ Job ndáa míí ndíkaa̱ra tá i̱xava̱ʼara ndiʼi ña̱ʼa. Saátu ni̱nda̱ka̱tu̱ʼunra ta̱ Job á kuchiñura taxira ña̱ kuxu ndiʼi kití tí i̱xava̱ʼara. Va̱ása kuchiñuví ta̱ Job keʼéra ña̱yóʼo, ña̱kán va̱ása níxiniñúʼu ka̱ʼa̱nra xíʼin Jehová ndáaña xíniñúʼu keʼéra. Xi̱xini̱níkava Jehová ndáaña keʼéra ta ndáa ki̱ʼva keʼéraña, soo ta̱ Job va̱ása níxi̱kunda̱a̱ káxi inira xa̱ʼa̱ ña̱yóʼo.

 Ña̱ ni̱ka̱ʼa̱n Jehová xíʼin ta̱ Job ni̱na̱ʼa̱ña ña̱ kúʼvi̱ní-inira xínirara. Nda̱a̱ táki̱ʼva íyo ta̱ ni̱ka̱ʼa̱n ña̱yóʼo xíʼinra saá ni̱xi̱yora: “Se̱ʼe miíi̱, tá va̱ʼa i̱xava̱ʼi̱ ña̱yóʼo ta ndái̱ña, ¿á va̱ása kivi kundai̱ yóʼó? ¿Á sandákoondaʼíi̱ yóʼó, á kindai̱ se̱ʼún ndaʼún, á taxii̱ ña̱ kiʼún kue̱ʼe̱ ta á taxii̱ xo̱ʼvi̱ún? ¿Á su̱ví yi̱ʼi̱ kúú ta̱ kivi ndataxi ndiʼi ña̱ xi̱kuumiíún ta sandíkoi̱-iniún?”.

 Ña̱ ni̱nda̱ka̱tu̱ʼun Jehová ta̱ Job chi̱ndeétáʼanña xíʼinra ña̱ vií ndakanixi̱níra. Ta xa̱ʼa̱ ña̱yóʼo, u̱vi̱ kuití yichi̱ nda̱kuiinra yuʼú Jehová. Va̱ása níka̱ʼa̱nkúáchira xa̱ʼa̱ Jehová. Vitá ni̱xi̱yo inira ta nda̱kunira ña̱ loʼova kúú ña̱ kúnda̱a̱-inira xa̱ʼa̱ ta saátu nda̱ndikóní-inira xa̱ʼa̱ ña̱ ni̱ka̱ʼa̱nra chi va̱ása vií níndakanixi̱níra (Job 40:4, 5; 42:1-6). Xíʼin ña̱yóʼo kúnda̱a̱-iniyó ña̱ xi̱kandíxaní ta̱ Job Jehová. Ni ni̱xo̱ʼvi̱níra, kǒo nísandákoora ña̱ kandíxara Jehová. Ta̱xira ña̱ ná chindeétáʼan Jehová xíʼinra ta na̱samara ña̱ ndákanixi̱níra. Ta miíyó, ¿á vitá íyo iniyó tá táxina consejo ndaʼa̱yó? Ndiʼivayó xíniñúʼu ndakiʼin consejo. Ta tá xíniso̱ʼoyó ña̱ káʼa̱nna xíʼinyó, saá kundiku̱nyó yichi̱ ta̱ Job.

 Tándi̱ʼi, ndu̱kú Jehová ki̱ʼva ña̱ sandíkora-ini ta̱ Job. Ni̱ka̱ʼa̱nra ña̱yóʼo xíʼin ta̱ Elifaz chi ta̱yóʼo kúú ta̱ káʼnuka nu̱ú na̱ inka, ka̱chira: “Sáa̱níi̱ xíʼún saátu xíʼin inka u̱vi̱ na̱ kítáʼan xíʼún, saáchi va̱ása níka̱ʼa̱nndó ña̱ nda̱a̱ xa̱ʼíi̱ nda̱a̱ táki̱ʼva ke̱ʼé ta̱ Job ta̱ káchíñu nu̱úi̱” (Job 42:7). ¿Á ña̱yóʼo kúni̱ kachiña ña̱ ndiʼi ña̱ ni̱ka̱ʼa̱n u̱ni̱ saá na̱ ta̱a kán ña̱ vatá xi̱kuuña ta ndiʼi ña̱ ni̱ka̱ʼa̱n ta̱ Job ña̱ nda̱a̱ xi̱kuuña? Va̱ásaví. c Saáchi va̱ása inkáchi ni̱xi̱yo ña̱ xi̱ndoʼo ta̱ Job xíʼin ta̱ Elifaz, ta̱ Bildad xíʼin ta̱ Zofar. Ta̱ Job xa̱a̱ xi̱xoʼvi̱nívara ta xi̱ndakavaní-inira, ta ña̱ ke̱ʼé na̱ ta̱a kán kúú ña̱ sa̱xóʼvi̱kana-inira xíʼin tu̱ʼun ña̱ ni̱ka̱ʼa̱nna xíʼinra. Xa̱ʼa̱ ña̱kán sava yichi̱ va̱ása níxi̱ndakani va̱ʼa xi̱ní ta̱ Job xa̱ʼa̱ ña̱ xi̱kaʼa̱nra. Soo ta̱ Elifaz xíʼin inka u̱vi̱ na̱ migora kǒo níndoʼona táʼan ña̱ ndo̱ʼo ta̱ Job, ña̱kán xi̱kunda̱a̱ va̱ʼava inina xa̱ʼa̱ ña̱ xi̱kaʼa̱nna xíʼinra. Ni̱nuní xi̱kuni̱na ta ni̱na̱ʼa̱na ña̱ loʼoní kándíxana Ndióxi̱. Kǒo níka̱ʼa̱n kuitína ña̱ va̱ása va̱ʼa xíʼin ta̱ Job, saáchi xíʼin ña̱ ni̱ka̱ʼa̱nna ni̱na̱ʼa̱na ña̱ kúú Jehová iin Ndióxi̱ ta̱ ndi̱va̱ʼaní-ini.

 Xa̱ʼa̱ ña̱ xi̱ni Jehová ña̱ ke̱ʼé na̱ ta̱kán kán, ni̱ka̱ʼa̱nra xíʼinna na̱ chaʼvina xa̱ʼa̱ ña̱ ke̱ʼéna: xi̱niñúʼu so̱kóna u̱xa̱ si̱ndi̱ki̱ che̱e xíʼin u̱xa̱ ti̱xúʼú che̱e. Su̱ví ña̱ núu níxikuu ña̱yóʼo. Tá xa̱a̱ ni̱xi̱yo Ley ta̱ Moisés, xi̱kaʼa̱nña ña̱ tá iin ta̱ su̱tu̱ káʼnu xi̱kiʼvira ku̱a̱chi ta nda̱a̱ na̱ ñuu xi̱sakíʼvira ku̱a̱chi xi̱xiniñúʼu so̱kóra si̱ndi̱ki̱ che̱e xa̱ʼa̱ ña̱yóʼo (Levítico 4:3). Si̱ndi̱ki̱ kúú tí yaʼvika xi̱sokóna. Saátu ni̱ka̱ʼa̱n Jehová ña̱ ndakiʼinvara ña̱ so̱kó u̱ni̱ saá na̱ ta̱a kán ta ná ka̱ʼa̱n ta̱ Job xíʼinra xa̱ʼa̱na (Job 42:8). d Ni̱ndi̱koníva-ini ta̱ Job tá xi̱nira ña̱ nda̱kiʼin Jehová tu̱ʼunra ta saátu xa̱ʼa̱ ña̱ xi̱nira ña̱ nina ña̱ nda̱kú kúú ña̱ kéʼé Jehová.

 Jehová xi̱kandíxavara ña̱ ixakáʼnu-ini ta̱ Job xa̱ʼa̱ ta̱ Elifaz, ta̱ Bildad xíʼin ta̱ Zofar, ni sa̱xóʼvi̱nínara. Tasaá ke̱ʼéva ta̱ Job (Job 42:9). Kiviva ka̱ʼa̱n ta̱ Job ku̱a̱ʼání ña̱ʼa, soo xíʼin ña̱ ke̱ʼéra ni̱na̱ʼa̱ra ña̱ kúúra iin ta̱a ta̱ nda̱kúní-ini. Ta xa̱ʼa̱ ña̱ va̱ʼaní xi̱niso̱ʼora ña̱ ni̱ka̱ʼa̱n Jehová, nda̱kiʼinra ku̱a̱ʼání bendición.

 Xi̱kuni̱ní Jehová xi̱xinira ta̱ Job ta saátu xi̱kundáʼviní-inira xi̱xinirara (Santiago 5:11). ¿Ndáaña ke̱ʼéra xa̱ʼa̱ra? Sa̱ndáʼarara. Ndakanixi̱níndó ndáaña ndo̱ʼo ta̱ Job tá xi̱nira ña̱ ndu̱yúta̱ ku̱ñura, nda̱a̱ táki̱ʼva ni̱ka̱ʼa̱n ta̱ Elihú. Na̱ veʼera ta saátu na̱ migora ndi̱kóna nu̱úra, ni̱ka̱ʼa̱nna tu̱ʼun va̱ʼa xíʼinra ta ta̱xina ña̱ʼa ndaʼa̱ra. Saátu ta̱xi Jehová ku̱a̱ʼání ña̱ ku̱i̱ká ndaʼa̱ra ta ku̱a̱ʼákaña ta̱xira ndaʼa̱ra nu̱úka ña̱ xi̱kuumiíra tá ya̱chi̱. ¿Ta ndáaña ke̱ʼé Jehová ña̱ va̱ʼa sandíkora-inira xa̱ʼa̱ ña̱ ni̱xi̱ʼi̱ se̱ʼera? Jehová ta̱xira ña̱ koo inka u̱xu̱ se̱ʼe ta̱ Job xíʼin ñá síʼira, ta ña̱yóʼo sa̱ndíko loʼoña inina. Saátu ta̱xi Jehová ña̱ ku̱a̱ʼáníka ku̱i̱ya̱ ná kutaku ta̱ Job, 140 ku̱i̱ya̱ka xi̱takura. Saátu ta̱xi Jehová ña̱ ná kunira koo ku̱a̱ʼá se̱ʼeñánira xíʼin se̱ʼexíkúára. Biblia káʼa̱nña ña̱ ku̱si̱íní-ini ta̱ Job xa̱ʼa̱ ña̱ ku̱a̱ʼání ku̱i̱ya̱ xi̱takura ta ni̱xi̱ʼi̱ra tá xa̱a̱ ku̱chéeníra (Job 42:10-17). Ta nu̱ú ñuyǐví xa̱á, ta̱ Job xíʼin ñá síʼira ndakutáʼanna xíʼin ndiʼi na̱ veʼena, ta saátu ndakutáʼanna xíʼin u̱xu̱ saá se̱ʼena na̱ xa̱ʼní ta̱ Ndi̱va̱ʼa (Juan 5:28, 29).

 ¿Nda̱chun va̱ʼa ta̱xi Jehová ku̱a̱ʼání ña̱ va̱ʼa ndaʼa̱ ta̱ Job? Biblia káchiña: “Ndóʼó xa̱a̱ xi̱niso̱ʼondó ña̱ ndakúní ni̱xi̱yo ini ta̱ Job” (Santiago 5:11). Ku̱a̱ʼáníva tu̱ndóʼo ku̱ndeé-ini ta̱ Job nu̱ú. Tá káʼa̱n Biblia ña̱ ndakúní ni̱xi̱yo ini ta̱ Job, kúni̱ kachiña ña̱ va̱ása níkundeé kuití inira xíʼin tu̱ndóʼo ña̱ ni̱ya̱ʼara nu̱ú saáchi tá ni̱ya̱ʼara nu̱ú tu̱ndóʼo yóʼo, ka̱ndíxaníkara Jehová ta xi̱kuʼvi̱níka-inira xi̱xinirara. Nu̱úka ña̱ sa̱a̱-inira kunira na̱ sa̱xóʼvi̱-inira, i̱xakáʼnuva-inira xa̱ʼa̱na. Va̱ása nínandóso-inira xa̱ʼa̱ ña̱ ndátura ndakiʼinra chí nu̱únínu ta ndiʼi tiempo nda̱kú ni̱xi̱yo inira xíʼin Jehová (Job 27:5).

 Ndiʼiyó xíniñúʼu kundeé-ini. Ta̱ Ndi̱va̱ʼa kuni̱ra sandákavara-iniyó nda̱a̱ táki̱ʼva ke̱ʼéra xíʼin ta̱ Job. Soo tá kándíxaníyó Ndióxi̱, vitá íyo iniyó, íxakáʼnu-iniyó xa̱ʼa̱ inkana ta nda̱kú íyo iniyó ku̱a̱ʼání ña̱ va̱ʼa ndakiʼinyó chí nu̱únínu (Hebreos 10:36). Saátu tá kándíxaníyó Ndióxi̱ nda̱a̱ táki̱ʼva ke̱ʼé ta̱ Job, sasáa̱níyó ta̱ Ndi̱va̱ʼa soo sakúsi̱íníyó-ini yiváyó Jehová.