Ir al contenido

¿Á ÍYO IIN NA̱ I̱XAVA̱ʼAÑA?

Va̱ʼaní íyo si̱ti̱n tí ti̱na

Va̱ʼaní íyo si̱ti̱n tí ti̱na

 Na̱ xíni̱ va̱ʼa káʼa̱nna ña̱ tí ti̱na kivi kunda̱a̱-inirí xíʼin si̱ti̱nrí nda̱saa ku̱i̱ya̱ inka ti̱na á che̱e á síʼí kúúrí ta saátu ndáaña ndóʼorí. Ta saátu kivi sanáʼa̱na iin ti̱na ña̱ ndani̱ʼírí bomba ta saátu droga. Miíyó na̱ yiví xíniñúʼu kotoyó iin ña̱ʼa tasaá kunda̱a̱-iniyó ndáaña kúúña, soo tí ti̱na xíniñúʼurí si̱ti̱nrí. Ña̱kán kivi kachiyó ña̱ “xítorí” xíʼin si̱ti̱nrí.

 Ndakanixi̱ní xa̱ʼa̱ ña̱yóʼo: Si̱ti̱n tí ti̱na va̱ʼaníka íyoña nu̱ú si̱ti̱n miíyó na̱ yiví. Nda̱a̱ táki̱ʼva káchi ña̱ Instituto Nacional de Normalización y Tecnología ña̱ íyo chí Estados Unidos, iin tí ti̱na “kivi kiʼinrí xiko̱ iin ña̱ʼa ni ña̱yóʼo nda̱saka̱ña xíʼin ku̱a̱ʼání inka ña̱ʼa, ná kachiyó ña̱ chi̱ka̱a̱na iin sava loʼo cuchara ña̱ azúcar ti̱xin iin alberca káʼnu nu̱ú ñúʼu ti̱kui̱í ta kivi ndakuniyó ña̱ chi̱ka̱a̱na azúcar ni loʼoní kúúña, saá íyo ña̱ kéʼé si̱ti̱n tí ti̱na”.

 ¿Nda̱chun va̱ʼaní táʼmi tí ti̱na?

  •   Si̱ti̱n tí ti̱na ndiʼi tiempo vixáña, ña̱yóʼo chíndeétáʼanña xíʼinrí ña̱ va̱ʼa viíka kunda̱a̱-inirí ndáa siko̱ kúúña.

  •   Si̱ti̱n tí ti̱na kúúmiíña u̱vi̱ ya̱vi̱: iin ña̱yóʼo xíniñúʼurí ña̱ va̱ʼa ndakiʼinrí ta̱chírí ta inkaña ña̱ va̱ʼa taʼmirí. Ta xa̱a̱ táʼmi iin ti̱na, ña̱yóʼo kíʼviña si̱ti̱nrí nu̱ú íyo ña̱ chíndeétáʼan xíʼinrí ña̱ kunda̱a̱-inirí ndáa siko̱ kúúña.

  •   Nu̱ú íyo ña̱ chíndeétáʼan xíʼin tí ti̱na ña̱ kunda̱a̱-inirí xíʼin siko̱, ki̱ʼva 130 centímetro cuadrado ndíka̱ña (20 pulgada cuadrada) á sava yichi̱ ku̱a̱ʼá loʼoka, soo ña̱ chíndeétáʼan xíʼin miíyó na̱ yiví ña̱ va̱ʼa kunda̱a̱-iniyó xíʼin siko̱ ndíka̱ña ki̱ʼva 5 centímetro cuadrado (0,8 pulgada cuadrada).

  •   Tí ti̱na kivi xa̱a̱rí kúúmiírí 50 yichi̱ka célula ña̱ chíndeétáʼan xíʼinrí ña̱ va̱ʼa kunda̱a̱-inirí xíʼin siko̱ nu̱ú ña̱ kivi kuumií miíyó na̱ yiví.

 Tí ti̱na kivi kunda̱a̱-inirí xíʼin siko̱ iin iin ña̱ʼa ni ku̱a̱ʼání kúú ña̱yóʼo. Tá kúú miíyó kivi kunda̱a̱-iniyó xíʼin siko̱ ña̱ kúúmií iin sopa, soo na̱ xíni va̱ʼa káʼa̱nna, ña̱ tí ti̱na kivi kunda̱a̱-inirí xíʼin iin tá iin siko̱ ña̱ʼa ña̱ xi̱niñúʼuna ña̱ ke̱ʼéna sopa yóʼo.

 Na̱ nándukú va̱ʼa xa̱ʼa̱ iin ña̱ʼa na̱ káchíñu, ti̱xin ña̱ fundación Pine Street, instituto ña̱ nándukú va̱ʼa xa̱ʼa̱ ña̱ cancér, káʼa̱nna ña̱ meke (ximpeke) tí ti̱na inkáchi káchíñuña, “tasaá ña̱yóʼo xa̱a̱ña kúúña iin ña̱ʼa ña̱ va̱ʼaní kunda̱a̱-ini ndáa siko̱ kúúmií iin ña̱ʼa nu̱ú inkaka ña̱ʼa ña̱ íyo nu̱ú ñuyǐví yóʼo”. Na̱ científico kúni̱na keʼéna iin aparato ña̱ kivi keʼé nda̱a̱ táki̱ʼva kéʼé si̱ti̱n tí ti̱na ña̱ va̱ʼa ndani̱ʼína bomba á droga á nda̱a̱ kue̱ʼe̱ tá kúú ña̱ cáncer.

 ¿Ndáaña ndákanixi̱níún xa̱ʼa̱ ña̱yóʼo? ¿Ña̱ va̱ʼaní táʼmi tí ti̱na á ña̱ na̱kuva̱ʼa mií kúúña á íyo iin na̱ i̱xava̱ʼaña?