Ir al contenido

¿Á ÍYO IIN NA̱ I̱XAVA̱ʼAÑA?

Ña̱ so̱nda’a ña̱ kéʼé tí delfín

Ña̱ so̱nda’a ña̱ kéʼé tí delfín

 Tí delfín ku̱a̱ʼání ki̱ʼva káʼa yuʼúrí á túturí, tá ndíʼi xíniso̱ʼorí so̱nda’a á xi̱ndaʼa ña̱ távarí ña̱ va̱ʼa kotorí ña̱ íyo nu̱ú xíkarí. Na̱ científico xítondaana ña̱ so̱nda’a ña̱ kéʼé tí delfín mular á nariz de botella (Tursiops truncatus) ña̱ va̱ʼa keʼéna iin ña̱ʼa ña̱ kivi kuniñúʼuna ti̱xin ti̱kui̱í ña̱ va̱ʼa chindeétáʼanña xíʼinna saáchi tecnología ña̱ kúúmiína vitin va̱ása kivi keʼéña ña̱yóʼo.

 Ndakanixi̱ní xa̱ʼa̱ ña̱yóʼo: So̱nda’a á xi̱ndaʼa ña̱ kéʼé tí delfín chíndeétáʼanña xíʼinrí ña̱ va̱ʼa ndani̱ʼírí ti̱a̱ká tí ñúʼu ti̱xin yu̱tí ña̱ íyo ti̱xin mar, ta saátu ña̱yóʼo chíndeétáʼanña xíʼinrí ña̱ kunda̱a̱-inirí xíʼin iin ña̱ʼa, á yu̱u̱ kúúña á ti̱a̱ká kúúrí. Ta̱ Keith Brown profesor adjunto ña̱ Universidad Heriot Watt ña̱ íyo Edimburgo (Escocia), káchira: “Ta saátu tí delfín kivi kunda̱a̱-inirí ndáaña ñúʼu ti̱xin iin ña̱ʼa, á ti̱kui̱í o̱ʼva̱ á ti̱kui̱í vi̱si̱ kúúrá á petróleo kúúrá ni 10 metro (32,8 pies) xíká íyo tíyóʼo”. Na̱ científico kúni̱na keʼéna iin ña̱ʼa ña̱ va̱ʼa keʼéña nda̱a̱ táki̱ʼva kéʼé tíyóʼo.

Tí delfín kivi kunda̱a̱-inirí ndáaña ñúʼu ti̱xin iin ña̱ʼa, ni 10 metro xíká íyorí.

 Sava na̱ káʼvi va̱ʼa ki̱ʼinna kuenta xíʼin ña̱ so̱nda’a ña̱ kéʼé tí delfín ta saátu ña̱ xíniso̱ʼorí. Tasaá ke̱ʼéna iin cilindro ña̱ káni ki̱ʼva iin metro (3,3 pies) ña̱ va̱ʼa keʼéña so̱nda’a nda̱a̱ táki̱ʼva kéʼé tí delfín. Ta ña̱yóʼo chi̱ka̱a̱naña ti̱xin iin robot ña̱ va̱ʼa kíʼvi ti̱xin ti̱kui̱í ña̱ íyo nda̱a̱ táki̱ʼva íyo iin torpedo, ta i̱xava̱ʼana ña̱yóʼo ña̱ va̱ʼa kotona ndáa ki̱ʼva káa ti̱xin ti̱kui̱í, tá kúú ña̱ va̱ʼa nandukúna cable á tubo ña̱ ta̱ánna ti̱xin mar ña̱ va̱ʼa kiʼinna kuenta xíʼin ña̱yóʼo ni xíkání ndóona. Na̱ káchíñu xíʼin ña̱ʼa yóʼo káʼa̱nna ña̱ kivi kuniñúʼuna ña̱yóʼo nu̱ú távana gas ta saátu nu̱ú távana petróleo. Ña̱ʼa ña̱ ke̱ʼéna ña̱ kéʼé so̱nda’a nda̱a̱ táki̱ʼva kéʼé tí delfín chíndeétáʼanña xíʼinna ña̱ viíka koo aparato ña̱ xíniñúʼuna tiempo vitin. Ña̱yóʼo chindeétáʼanña xíʼin na̱ técnico ña̱ va̱ʼa chika̱a̱na aparato ña̱ xíniñúʼuna ti̱xin ti̱kui̱í mií nu̱ú xíniñúʼunaña, kivi kuniñúʼuna ña̱yóʼo ña̱ va̱ʼa kotona á vií íyo columna ña̱ plataforma nu̱ú távana petróleo á ku̱a̱ʼa̱n ndáta̱ña ta saátu ña̱yóʼo chindeétáʼanña xíʼinna ña̱ va̱ʼa kotona á kǒo ña̱ sási ti̱xin tubo nu̱ú távana petróleo.

 ¿Ndáaña ndákanixi̱níún xa̱ʼa̱ ña̱yóʼo? ¿So̱ndaʼa á xi̱ndaʼa ña̱ kéʼé tí delfín mular á ña̱ na̱kuva̱ʼa mií kúúña? ¿Á íyo na̱ i̱xava̱ʼaña?