Ir al contenido

¿Á ÍYO IIN NA̱ I̱XAVA̱ʼAÑA?

Ndíchiní íyo ñii̱ tí pepino de mar

Ndíchiní íyo ñii̱ tí pepino de mar

 Tí pepino de mar íyorí nu̱ú kúnuní tá mar á nu̱ú íyo arrecife ña̱ coral. Ñii̱rí kivi kuato kooña á nda̱a̱ íyo iñú sa̱tárí ta va̱ʼaní ndátaʼnu̱ña, kivi xa̱a̱ ñii̱rí kamaní kutéʼeña nda̱a̱ táki̱ʼva íyo iin yitu̱n. Soo saátu kivi xa̱a̱ña vitání kooña, chíndeétáʼanña xíʼinrí ña̱ va̱ʼa ki̱ʼvirí nu̱ú táñuní tasaá íxatéʼérí ñii̱rí ña̱ va̱ʼa kǒo tavá inka kití miírí ta va̱ása kaxirírí. Ña̱ chíndeétáʼan xíʼinrí kúú ñii̱rí.

 Nda̱kanixi̱ní xa̱ʼa̱ ña̱yóʼo: Ñii̱ tí pepino de mar u̱ni̱ ki̱ʼva kivi kooña, kivi téʼé kooña, kivi ndaku kooña ta saátu kivi vitání kooña. Proteína kúú ña̱ xíniñúʼu tí pepino de mar ña̱ ndasatéʼérí ñii̱rí. Soo tá kúni̱rí nduvitá ñii̱rí távárí inka proteína ña̱ ndásavií ñii̱rí.

 Ña̱ va̱ʼa ndutéʼé ñii̱rí ña̱ proteína yóʼo táváña inka ña̱ʼa ña̱ va̱ʼa ndutéʼé ñii̱rí. Soo ña̱ va̱ʼa nduvita ñii̱rí íyo inka proteína ña̱ ndásavitá miírí. Ñii̱ tí pepino de mar kivi xa̱a̱ña vitání kooña ta nda̱a̱ na̱ʼa̱ña ña̱ ndútaña.

 Na̱ cientifico xa̱a̱ kéʼéna sava ña̱ʼa ña̱ kivi koo nda̱a̱ táki̱ʼva íyo ñii̱ tí pepino de mar. Iin ña̱ kúni̱na keʼéna kúú electrodos ña̱ kivi kuniñúʼuna tá kéʼéna cirugía cerebral soo ña̱yóʼo xíniñúʼu téʼé kooña ña̱ va̱ʼa chika̱a̱naña mií nu̱ú kúni̱ miína soo tá ná ya̱ʼa loʼo tiempo kivi nduvitáña. Tá ña̱ electrodos ná keʼéña nda̱a̱ táki̱ʼva kéʼé ñii̱ tí pepino de mar va̱ʼaní chindeétáʼanña xíʼin na̱ yiví chi kamaka ndaʼa ku̱ñuna.

 ¿Ndáaña ndákanixi̱níún xa̱ʼa̱ ña̱yóʼo? Ña̱ ndíchiní íyo ñii̱ tí pepino de mar, ¿á ña̱ na̱ku̱va̱ʼa mií kúúña á íyo iin na̱ i̱xava̱ʼaña?