Ir al contenido

¿Á ÍYO IIN NA̱ I̱XAVA̱ʼAÑA?

Ña̱ kéʼé tí hormiga carpintera ña̱ va̱ʼa ndaya̱kúnrí miírí

Ña̱ kéʼé tí hormiga carpintera ña̱ va̱ʼa ndaya̱kúnrí miírí

 Kití válí xíniñúʼu limpio koorí ña̱ va̱ʼa ndachírí, ña̱ ndaarí sa̱tá iin ña̱ʼa ta saátu kunda̱a̱-inirí ndáaña íyo nu̱ú xíkarí. Tá kúú tá yaku̱a̱ ndiki̱ tí hormiga íxayo̱ʼvi̱ña xíʼinrí ña̱ kakarí ta saátu ña̱ kunda̱a̱-inirí ndáaña kéʼé inka tí hormiga á ña̱ taʼmirí xiko. Xa̱ʼa̱ ña̱kán ta̱ zoólogo Alexander Hackmann káchira: “Nda̱a̱ ni iin yichi̱ va̱ása kuniyó iin kití loʼo tí yaku̱a̱”. Ta káchikara, “ta saátu tí kití válí yóʼo xíni̱rí sandíʼi-xa̱ʼa̱rí ña̱ yaku̱a̱”.

 Ndakanixi̱ní xa̱ʼa̱ ña̱yóʼo: Ta̱ Hackmann xíʼin na̱ káchíñu xíʼinra ka̱ʼvi va̱ʼana xa̱ʼa̱ tí hormiga carpintera (Camponotus rufifemur) ta xi̱nina ndáaña kéʼérí ña̱ va̱ʼa limpio koo ndiki̱rí. Kiʼinna kuenta ña̱ xíniñúʼurí iin pinza loʼo ña̱ íyo xa̱ʼa̱rí ña̱ va̱ʼa ndaya̱kúnrí ndiki̱ loʼorí tasaá va̱ása yaku̱a̱ koo ndiki̱rí. Ta pinza loʼo ña̱ íyo xa̱ʼa̱rí kúúmiíña ña̱ʼa ña̱ kivi ya̱kún ña̱ʼa ña̱ náʼnu, ta xa̱ʼa̱rí kúúmiíña iin ña̱ʼa ña̱ íyo nda̱a̱ táki̱ʼva íyo iin cepillo ña̱ kivi ya̱kún ña̱ yaku̱a̱ ña̱ válíka, ta va̱ʼaní ndáya̱kún ña̱yóʼo saáchi nda̱a̱ táki̱ʼva íyo yixí ña̱ íyo ndiki̱rí saá íyoña. Ta ña̱ va̱ʼa sandíʼi-xa̱ʼa̱rí ña̱ yaku̱a̱ ña̱ válíka ki̱ʼva 80 yichi̱ válíña nu̱ú yixí xi̱ní iin na̱ yiví, ta xíniñúʼurí inka ña̱ íyo nda̱a̱ táki̱ʼva íyo “cepillo” ña̱ loʼoka ña̱ va̱ʼa ndaya̱kúnrí ña̱yóʼo.

 Koto ndáa ki̱ʼva ndáyakún tí hormiga carpintera ndiki̱rí.

 Ta̱ Hackmann xíʼin na̱ káchíñu xíʼinra ndákanixi̱nína ña̱ kivi sákuaʼana xíʼin ña̱ kéʼé tí hormiga ña̱ va̱ʼa ndayakúnna ña̱ʼa ña̱ válíní. Tá kúú nu̱ú íxava̱ʼana componentes xíʼin semiconductores microelectrónicos ña̱ xíniñúʼu computadora á inkaka ña̱ʼa saáchi ña̱yóʼo válíníña xa̱ʼa̱ ña̱kán xíniñúʼu limpioní kooña saáchi yi̱i̱níña chi tá ná kuyaku̱a̱ña va̱ása viíka kooña.

 ¿Ndáaña ndákanixi̱níún xa̱ʼa̱ ña̱yóʼo? Xa̱ʼa̱ ña̱ va̱ʼaní ndáya̱kún tí hormiga carpintera miírí, ¿á íyo iin na̱ i̱xava̱ʼa miírí á tí na̱kuva̱ʼa miíva kúúrí?