¿Á xa̱a̱ ka̱ʼviún ndiʼi Tutu Ña̱ Nátúʼun xíʼinyó ña̱ sa̱kán ni̱ya̱ʼa? Koto á kuchiñún ndakuiún ndiʼi pregunta yóʼo:

¿Ndáa xa̱ʼa̱ kúú ña̱ xíniñúʼu ndasakáʼnuyó Jehová?

Ndásakáʼnuyó Jehová saáchi íxato̱ʼóyóra ta kúʼvi̱ní-iniyó xíniyóra. Saátu ndásakáʼnuyóra saáchi kúni̱yó ña̱ ná kunda̱a̱-ini na̱ yiví xa̱ʼa̱ra (w25.01, página 3).

Tá iinna ke̱ʼéna ña̱ va̱ása va̱ʼa xíʼinyó, ¿ndáaña chindeétáʼan xíʼinyó ña̱ ixakáʼnu-iniyó xa̱ʼa̱na?

Ña̱ kǒo nandóso-iniyó xa̱ʼa̱ ña̱ ke̱ʼéna iin ña̱ va̱ása va̱ʼa xíʼinyó, sana kivi ndiʼi tiempo saáyó xíʼinna soo va̱ʼaka ná chikaa̱yó ndee̱ ña̱ ixakáʼnu-iniyó xa̱ʼa̱na chi saá kúú ña̱ ndi̱ko-iniyó ta kǒo sa̱a̱kayó (w25.02, página 15 xíʼin 16).

Ña̱ ke̱ʼé ta̱ discípulo Marcos, ¿ndáa yichi̱ va̱ʼa chi̱núura nu̱ú ta̱ va̱lí kúa̱an?

Ta̱ Marcos va̱ʼaní chi̱ndeétáʼanra xíʼin inkana, sana va̱ása va̱ʼa níkunira xa̱ʼa̱ iin ña̱ ku̱u, soo kǒo níndakava-inira. Chi̱kaa̱níra ndee̱ ña̱ va̱ʼa ki̱táʼanra xíʼin ta̱ Pablo ta saátu xíʼin inkaka na̱ cristiano na̱ xu̱xa-ini (w25.04, página 27).

¿Ndáaña xi̱kuni̱ kachi ta̱ Jesús tá ni̱ka̱ʼa̱nra xíʼin Jehová ti̱xin oración: “Na̱túʼi̱n xa̱ʼa̱ ki̱vi̱ún xíʼinna”? (Juan 17:26).

Na̱ discípulo xi̱xini̱vana ki̱vi̱ Jehová, ña̱ xi̱kuni kachi ta̱ Jesús kúú, ndáa ki̱ʼva íyo Jehová, ndáaña kúni̱ra keʼéra ta ndáaña va̱ʼa kúúmiíra (w25.05, página 20 xíʼin 21).

Tá ndákuniyó ña̱ íyo sava ña̱ kǒo xíni̱yó xa̱ʼa̱, ¿ndáaña keʼéyó?

Ná ndakuniyó ña̱ íyo sava ña̱ kǒo xíni̱yó xa̱ʼa̱. Tá kúú, kǒo xíni̱yó ama ndiʼi-xa̱ʼa̱ ñuyǐví ta ndáaña keʼé Jehová ña̱ va̱ʼa chindeétáʼanra xíʼinyó. Ta saátu kǒo xíniyó ndáaña kuu inka ki̱vi̱ ta ni kǒo kúnda̱a̱-iniyó ña̱ xíni̱va̱ʼa Jehová miíyó (w25.06, página 15 nda̱a̱ 18).

¿Ndáaña chindeétáʼan xíʼinyó ña̱ viíní kunda̱a̱-iniyó xíʼin iin artículo á xíʼin iin discurso?

Kivi nda̱ka̱tu̱ʼúnyó ña̱yóʼo miíyó: “¿Ndáaña xa̱a̱ xíniñúʼuna ña̱ va̱ʼa chindeétáʼanna xíʼin na̱ yiví? ¿Á xíniñúʼuna sava ejemplo ña̱ kivi kuniñúʼi̱ ña̱ va̱ʼa sanáʼi̱ na̱ yiví? ¿Ndáana kivi chindeétáʼan tema yóʼo xíʼin?” (w25.07, página 19).

Xa̱ʼa̱ ña̱ i̱xakáʼnu-ini Jehová xa̱ʼa̱ ta̱ David, ¿ndáaña sákuaʼayó xíʼin ña̱yóʼo?

Ni ni̱ki̱ʼvi ta̱ David ku̱a̱chi ndeé soo tá nda̱ndikó-inira, Jehová i̱xakáʼnuva-inira xa̱ʼa̱ra (1 Rey. 9:4, 5). Tá íxakáʼnu-ini Jehová xa̱ʼa̱ ku̱a̱chiyó va̱ása ndákaʼánra xa̱ʼa̱ ña̱yóʼo ña̱ va̱ʼa taxira castigo ndaʼa̱yó chí nu̱únínu ta ni kǒo káʼa̱nra xíʼinyó xa̱ʼa̱ ña̱yóʼo (w25.08, página 17).

Tá iin na̱ káʼviyó xíʼin íxayo̱ʼvi̱ña xíʼinna ña̱ kunda̱a̱-inina xa̱ʼa̱ iin ña̱ʼa, ¿ndáaña kivi keʼéyó?

Tá xa̱a̱ nda̱kaniyó xa̱ʼa̱ ña̱ káʼa̱n Biblia xa̱ʼa̱ iin ña̱ʼa ta kíʼinyó kuenta ña̱ íxayo̱ʼvi̱ña xíʼinna kunda̱a̱-inina xíʼinña, tá xa̱a̱ sa̱ndíʼiyó saá kivi ndikóyó ka̱ʼa̱nyó xíʼinna xa̱ʼa̱ ña̱yóʼo (w25.09, página 24).

¿Ndáaña kúni̱ kachi Biblia tá káʼa̱nña “ndee̱ ña̱ kúúmií ku̱a̱chi”? (Heb. 3:13).

Xa̱ʼa̱ ña̱ kúúyó na̱ yiví ku̱a̱chi kúni̱yó keʼéyó sava ña̱ va̱ása va̱ʼa. Ta saátu xíka-iniyó xa̱ʼa̱ sava ña̱ʼa, tá kúú ña̱ ndákanixi̱níyó ña̱ va̱ása kúʼvi̱-ini Jehová xínira miíyó (w25.10, página 16).

¿Ndáaña chindeétáʼan xíʼinyó ña̱ ka̱ʼa̱nyó xíʼin Jehová xa̱ʼa̱ ndiʼi ña̱ ndóʼoyó?

1) Ná ndakanixi̱níyó xa̱ʼa̱ ña̱ va̱ʼa ña̱ kúúmií Jehová. 2) Ná ndakanixi̱níyó xa̱ʼa̱ ndáa tu̱ndóʼo kúúmiíyó ta ná ka̱ʼa̱nyó xíʼin Jehová xa̱ʼa̱ ña̱yóʼo. Tá kúú ña̱ táʼa̱n ixakáʼnu-iniyó xa̱ʼa̱ iin na̱ ke̱ʼé ña̱ va̱ása va̱ʼa xíʼinyó. 3) Ná taváyó tiempo ña̱ keʼéyó oración. Saá kúú ña̱ kivi ka̱ʼa̱nyó xíʼin Ndióxi̱ xa̱ʼa̱ ndiʼi ña̱ ndóʼoyó (w25.10, página 19 xíʼin 20).

¿Ndáa ki̱ʼva chindeétáʼanyó xíʼin na̱ xa̱a̱ chée?

Ná ku̱ʼu̱nyó nu̱úna ta saátu ná ka̱ʼa̱nyó xíʼinna xíʼin teléfono. Ná ku̱ʼu̱nyó xíʼinna nu̱ú doctor ta saátu ná ku̱ʼu̱nyó xíʼinna ña̱ natúʼunyó xa̱ʼa̱ Ndióxi̱ (w25.11, página 6 xíʼin 7).

¿Ndáaña xíniñúʼu keʼé na̱ tíndaʼa̱ ña̱ va̱ʼa vií kana vikó ña̱ tíndaʼa̱na tasaá ixato̱ʼóna Jehová?

Kundiku̱nndó ña̱ káʼa̱n ley ta kiʼinndó kuenta ña̱ vií koo vikó ña̱ tindaʼa̱ndó ta saátu ná na̱ʼa̱ña ña̱ ndásakáʼnundó Ndióxi̱, vií ná koo ña̱ kundixindó ta vií ná koo ki̱ʼva ña̱ ndasaviíndó miíndó, kǒo kundiku̱nndó costumbre ña̱ yáʼandosó ña̱ káʼa̱n Biblia ta káxi ka̱ʼa̱nndó ndáa ki̱ʼva koo vikó ña̱ tindaʼa̱ndó ta xíʼin ña̱ to̱ʼó ná kooña (w25.12, página 21 nda̱a̱ 24).