Sana ndóʼún nda̱a̱ táki̱ʼva ndóʼo ñá hermana yóʼo, xa̱ʼa̱ ña̱ xa̱a̱ ku̱chéún va̱ása kívi keʼún ku̱a̱ʼáka ña̱ʼa nda̱a̱ táki̱ʼva xi̱keʼúnña tá ya̱chi̱. Sana xa̱a̱ ku̱a̱ʼá ku̱i̱ya̱ xa̱a̱ káchíñún nu̱ú Jehová ta sana chítáʼún ña̱ xi̱keʼún tá ya̱chi̱ xíʼin ña̱ kéʼún vitin ta ña̱yóʼo sándakavaña-iniún. ¿Ndáaña kivi chindeétáʼan xíʼún?

NDÁAÑA KÚNI̱ JEHOVÁ NÁ KEʼÚN

Nda̱ka̱tu̱ʼun ña̱yóʼo miíún: “¿Ndáaña kúni̱ Jehová ná keʼíi̱?”. Deuteronomio 6:5 káchiña: “Kuʼvi̱-inindó kunindó Jehová Ndióxi̱ndó xíʼin ndiʼi níma̱ndó, xíʼin ndiʼi ña̱ tákundó ta saátu xíʼin ndiʼi ndee̱ndó”. Texto yóʼo va̱ʼaní sándi̱koña-iniyó. ¿Nda̱chun?

Saáchi texto yóʼo náʼa̱ña nu̱úyó Jehová kúni̱ra ña̱ ná keʼéyó nda̱saa ña̱ kuchiñuyó keʼévayó. Ña̱yóʼo chindeétáʼanña xíʼún ña̱ kǒo chitáʼún miíún xíʼin inkana ni ña̱ chitáʼún ña̱ xi̱keʼún tá ya̱chi̱ xíʼin ña̱ kéʼún vitin.

Ndakanixi̱ní xa̱ʼa̱ ña̱yóʼo: Tá ni̱xi̱yo loʼún, ¿á ku̱a̱ʼá chiñu xi̱keʼún nu̱ú Jehová? Sana saá xi̱keʼévaún, ta tiempo saá xi̱chikanívaún ndee̱ ña̱ xi̱keʼún ku̱a̱ʼá chiñu nu̱ú Jehová. Ta vitin, ¿á xa̱a̱ ku̱a̱ʼá chiñu kéʼún nu̱ú Jehová? Sana chíka̱ún ndee̱ ña̱ keʼún ku̱a̱ʼá chiñu nu̱úra vitin. Nda̱a̱ táki̱ʼva xa̱a̱ chi̱kaún ndee̱ tá ya̱chi̱ ña̱ ka̱chíñún nu̱úra saátu chíka̱ún ndee̱ vitin.

KIVIVA CHINDEÉTÁʼÚN XÍʼIN INKANA

Ndakanixi̱ní xa̱ʼa̱ ña̱yóʼo: nu̱úka ña̱  ndakanixi̱níún ña̱ va̱ása kívi keʼé ku̱a̱ʼákaún chiñu xa̱ʼa̱ ña̱ xa̱a̱ ku̱chéún. Va̱ʼaka ndakanixi̱ní ndáa ki̱ʼva chindeétáʼún xíʼin inkana. Xa̱ʼa̱ ña̱ xa̱a̱ ku̱chéún kivi keʼún sava ña̱ʼa ña̱ kǒo níkivi keʼún tá ni̱xi̱yo loʼún. Ná ka̱ʼa̱nyó xa̱ʼa̱ sava ña̱yóʼo.

Ka̱ʼa̱n xíʼin inkana xa̱ʼa̱ ña̱ xi̱keʼún tá ni̱xi̱yo loʼún. Koto ña̱ ni̱ka̱ʼa̱n sava na̱ káʼa̱n Biblia xa̱ʼa̱:

Ta̱ rey David: “Ta̱ loʼova xi̱kui̱ ta vitin xa̱a̱ ku̱chéi̱, soo ta̱ʼán kunii̱ sandákoondaʼa̱ Ndióxi̱ na̱ kéʼé ña̱ nda̱kú ta ni ta̱ʼán kunii̱ kaka se̱ʼena ndukúna ña̱ kuxuna” (Sal. 37:25).

Ta̱ Josué: “Ta vitin xa̱a̱ ku̱nu̱mí kuvii̱, ta ndóʼó kúnda̱a̱ va̱ʼa inindó xíʼin ndiʼi níma̱ndó ta saátu xíʼin ndiʼi ña̱ tákundó ña̱ ndiʼi ña̱ ni̱ka̱ʼa̱n Jehová taxira ndaʼa̱ndó, ni̱xi̱nuvaña. Ndiʼi ña̱ va̱ʼa ña̱ ni̱ka̱ʼa̱nra keʼéra xa̱ʼa̱ndó, ni̱xi̱nu ndiʼivaña. Ta kǒo nda̱a̱ ni iinña níkuma̱ní” (Jos. 23:14).

Ta̱ David xíʼin ta̱ Josué xi̱kunda̱a̱-inina xa̱ʼa̱ ña̱ xi̱ka̱ʼa̱nna, saáchi ku̱a̱ʼání ku̱i̱ya̱ nda̱kú ni̱xi̱yo inina ka̱chíñuna nu̱ú Jehová ta saátu xi̱nina ku̱a̱ʼání ña̱ʼa ña̱ ku̱u. Xa̱ʼa̱ ña̱kán xi̱ndayáʼviní ña̱ xi̱ka̱ʼa̱nna. Saátu kivi keʼé miíún xa̱ʼa̱ ña̱ xa̱a̱ ku̱a̱ʼá ku̱i̱ya̱ tákún xíni̱ún xa̱ʼa̱ ku̱a̱ʼání ña̱ʼa ta ndáyáʼviní ña̱ káʼún.

Tá xa̱a̱ ku̱a̱ʼá ku̱i̱ya̱ káchíñún nu̱ú Jehová, kivi ka̱ʼún xíʼin inkana xa̱ʼa̱ ña̱ va̱ʼa ña̱ xa̱a̱ ndákiʼún. ¿Á ndákaʼún xa̱ʼa̱ sava ña̱ʼa nu̱ú ni̱na̱ʼa̱ Jehová ña̱ ta̱xira ña̱ va̱ʼa nda̱ʼa na̱ ñuura? Natúʼun xa̱ʼa̱ ña̱yóʼo xíʼin inkana, ta na̱ kuniso̱ʼo miíún va̱ʼaníva chikaa̱ña ndee̱ xíʼinna, ta saátu miíún kusi̱íníva-iniún (Rom. 1:11, 12).

Inka ña̱ kivi keʼún ña̱ va̱ʼa chika̱ún ndee̱ xíʼin inkana, kúú ña̱ ku̱ʼún reunión tá kivi keʼún ña̱yóʼo. Ña̱yóʼo va̱ʼaníva chindeétáʼanña xíʼin na̱ hermano, ta saátu kusi̱íníva-iniún. Ñá Connie, ñá xa̱a̱ ni̱ka̱ʼa̱nyó xa̱ʼa̱, káchiñá: “Ña̱ chíkaa̱ ndee̱ xíʼi̱n ña̱ kǒo ndakava-inii̱ kúú ña̱ xáʼi̱n reunión. Saáchi ti̱xin Salón ña̱ Reino na̱ hermano ndixa náʼa̱na ña̱ kúni̱na xínina miíi̱. Saátu miíi̱ náʼi̱ ña̱ kúnii̱ xínii̱ miína ta táxii̱ regalo ndaʼa̱na sava yichi̱. Ta saátu chíka̱i̱ ndee̱ ña̱ inkáchi kéʼéndi̱ chiñu nu̱ú Ndióxi̱”.

NDÁYÁʼVINÍÚN NU̱Ú JEHOVÁ XA̱ʼA̱ ÑA̱ NDA̱KÚ ÍYO INIÚN

Biblia káʼa̱nña xa̱ʼa̱ ku̱a̱ʼá na̱ yiví na̱ kǒo níxi̱kivi keʼé ku̱a̱ʼá chiñu nu̱ú Jehová xa̱ʼa̱ ña̱ xi̱ndoʼona, soo xi̱na̱ʼa̱vara ña̱ xi̱kuʼvi̱-inira xi̱xinirana. Iin ta̱yóʼo xi̱kuu ta̱ Simeón, iin ta̱ israelita iin ta̱ xa̱a̱ chéení tiempo ña̱ ka̱ku ta̱ Jesús. Tá xi̱xa̱ʼa̱nra templo, sana xi̱xitora ta̱ va̱lí ta̱ kúa̱an ña̱ xi̱keʼéna chiñu ña̱ ndáyáʼviní. ¿Ndáaña xi̱ndakanixi̱ní ta̱ Simeón? Sana xi̱ndakanixi̱níra xa̱ʼa̱ ña̱ xa̱a̱ chéera va̱ása ndáyáʼvikara nu̱ú Jehová. Soo su̱ví saá níxi̱yoña, chi Jehová ni̱ka̱ʼa̱nra xa̱ʼa̱ra ña̱ xi̱kuura “iin ta̱a ta̱ kǒo ku̱a̱chi” ta xi̱kandíxaníra Ndióxi̱ ta nda̱a̱ ta̱xira ña̱ ná kunira ta̱ Jesús tá sa̱kán ka̱kura. Xi̱niñúʼura ta̱yóʼo ña̱ ni̱ka̱ʼa̱nra ta̱ Jesús xa̱a̱ra koora ta̱ Mesías (Luc. 2:25-35). Relato yóʼo náʼa̱ña nu̱úyó ni xa̱a̱ ku̱chée ta̱ Simeón, Jehová ki̱ʼinkavara kuenta xíʼinra saáchi xi̱kandíxanívara miíra. Ta ni̱xi̱yo “espíritu santo xíʼinra”.

Saátu miíún ndáyáʼviníún nu̱ú Jehová ta chíndayáʼvira ndiʼi ña̱ kéʼún ni kǒo kívi keʼún ku̱a̱ʼá ña̱ʼa. Ta̱yóʼo kúsi̱íníva-inira xa̱ʼa̱ ndiʼi chiñu ña̱ kéʼé na̱ ndásakáʼnu miíra “saáchi táxina ña̱ kúúmiína ta su̱ví ña̱ kǒo kúúmiína” (2 Cor. 8:12).

Chikaa̱ ndee̱ ña̱ keʼún nda̱saa ña̱ kivi keʼévaún. Tá kúú, ndakanixi̱ní ndáa ki̱ʼva kivi natúʼún xíʼin na̱ yiví xa̱ʼa̱ Ndióxi̱, ni loʼo tiempo ná keʼún ña̱yóʼo. Saátu kivi chika̱ún ndee̱ ña̱ ka̱ʼún xíʼin na̱ hermano xíʼin teléfono á ña̱ kaʼyíún carta nu̱úna. Ña̱ keʼún ña̱yóʼo xa̱ʼa̱na va̱ʼaníva chikaa̱ña ndee̱ xíʼinna, saáchi xa̱a̱ ku̱a̱ʼá ku̱i̱ya̱ káchíñún nu̱ú Jehová.

Ni kǒo kívi keʼún ku̱a̱ʼá ña̱ʼa xa̱ʼa̱ Jehová soo kiviva keʼún sava ña̱ʼa. Tá kúú, nu̱ú recuadro ña̱ naní “ Iin ñaʼá xi̱kuni̱ñá kaʼníñá  miíñá” ndani̱ʼún ña̱ káʼa̱n xa̱ʼa̱ iin ñá hermana ñá xa̱a̱ chée ñá ñuu África oriental.

Ndakaʼán, ndiʼi ña̱ xa̱a̱ kéʼún xíʼin ña̱ nda̱kú íyo iniún xíʼin Jehová kivi chikaa̱ña ndee̱ xíʼin inkana. Va̱ʼaní yichi̱ chínún nu̱ú inkana. Ndakaʼán ña̱ káʼa̱n Hebreos 6:10: “Saáchi Ndióxi̱ nda̱kúní-inira, va̱ása nándósó-inira xa̱ʼa̱ ndiʼi chiñu ña̱ ke̱ʼéndó, saátu ña̱ ni̱na̱ʼa̱ndó ña̱ kúʼvi̱ní-inindó xínindó ki̱vi̱ra xa̱ʼa̱ ña̱ ka̱chíñundó nu̱ú na̱ nda̱kaxinra ta ndákundeéndó káchíñundó nu̱úna”.

NDAKUNDEÉ CHINDEÉTÁʼAN XÍʼIN INKANA

Íyo sava ña̱ káʼa̱n xa̱ʼa̱ na̱ yiví na̱ xa̱a̱ chée ña̱ tá chíndeétáʼanna xíʼin inkana, va̱ʼaní kúnina, ta va̱ʼaní ndákaʼánna xa̱ʼa̱ sava ña̱ʼa ta saátu ku̱a̱ʼáka tiempo tákuna.

Ña̱ keʼéyó ña̱ʼa xa̱ʼa̱ inkana va̱ása sandíʼi-xa̱ʼa̱ña ndiʼi ña̱ ndóʼoyó tá xa̱a̱ kúchéeyó. Iinlá Reino Ndióxi̱ kúú ña̱ kivi sandíʼi-xa̱ʼa̱ ku̱a̱chi ña̱ kúúmiíyó, ña̱ kúchéeyó xíʼin ña̱ xíʼi̱yó (Rom. 5:12).

Ndiʼi ña̱ kéʼún xa̱ʼa̱ ña̱ káchíñún nu̱ú Jehová ta saátu ña̱ chíndeétáʼún xíʼin inkana ña̱ kunda̱a̱-inina xa̱ʼa̱ra ña̱yóʼo chindeétáʼankaña xíʼún ña̱ kandíxakaún ña̱ koo chí nu̱únínu ta nda̱a̱ chindeétáʼanña xíʼún ña̱ va̱ʼa kuniún nda̱a̱ tiempo vitin. Ndóʼó na̱ hermano na̱ xa̱a̱ chée kǒo nandósondó chi nu̱ú Jehová ndáyáʼviní ndiʼi ña̱ kéʼéndó xa̱ʼa̱ra ta saátu ndáyáʼviníndó nu̱ú na̱ hermano na̱ ñúʼu ti̱xin congregación xa̱ʼa̱ ña̱ va̱ʼaní kándíxandó Ndióxi̱.