Ir al contenido

Ir al índice

 ARTÍCULO ÑA̱ KAʼVIYÓ 35

Na̱ ndásakáʼnu Jehová xíʼin ña̱ vitá-ini ndáyáʼvinína nu̱úra

Na̱ ndásakáʼnu Jehová xíʼin ña̱ vitá-ini ndáyáʼvinína nu̱úra

“Jehová [...] xítora na̱ vitá íyo ini” (SAL. 138:6).

YAA 48 Ndiʼi ki̱vi̱ ná kutáʼanyó xíʼin Jehová

ÑA̱ KA̱ʼA̱NYÓ XA̱ʼA̱ *

1. Ka̱ʼa̱n nda̱saa kúni Jehová xíʼin na̱ vitá íyo ini.

JEHOVÁ kúʼvi̱ní-inira xínira na̱ vitá íyo ini. Ta nda̱saa na̱ vitá íyo ini kúú na̱ kivi xa̱a̱ koo migora. Ta na̱ “ni̱nu kúni xíkaní íyora nu̱úna” (Sal. 138:6). Ndiʼiyó kúni̱yó sakusi̱íyó-ini Jehová ta kuni̱yó yatin ná koora xíʼinyó, xa̱ʼa̱ ña̱kán xíniñúʼu sakuaʼayó vitá koo iniyó.

2. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

2 Nu̱ú ña̱ artículo yóʼo ndakuiinyó u̱ni̱ pregunta. 1) ¿Ndáaña kúú ña̱ vitá koo iniyó? 2) ¿Nda̱chun xíniñúʼu kuumiíyó ña̱yóʼo? 3) ¿Ndáaña kivi ixayo̱ʼvi̱ xíʼinyó ña̱ vitá koo iniyó? Kunda̱a̱-iniyó, ña̱ tá vitá íyo iniyó sákusi̱íyó-ini Jehová ta ña̱ va̱ʼa miíyó kúúña (Prov. 27:11; Is. 48:17).

¿NDÁAÑA KÚÚ ÑA̱ VITÁ KOO INIYÓ?

3. ¿Ndáa ki̱ʼva íyo na̱ vitá-ini?

3 Na̱ vitá íyo ini va̱ása ndákanixi̱nína ña̱ ndáyáʼvika miína nu̱ú inkana ta ni va̱ása ni̱nu kúnina. Ña̱ Biblia káchiña ña̱ ná vitá-ini kúnda̱a̱-inina ña̱ káʼnuka Jehová nu̱úna, ta saátu kúnda̱a̱-inina ña̱ íyo na̱ yiví na̱ xíni̱ka nu̱ú miína (Filip. 2:3, 4).

4, 5. ¿Nda̱saa kivi náʼa̱ iin na̱ yiví ña̱ vitá íyo inina soo su̱ví ña̱ nda̱a̱ kúúña?

4 Sava na̱ yiví náʼa̱na ña̱ kúúna na̱ vitá íyo ini. Ta sana to̱ʼó íyona á vií kéʼéna xíʼin inkana xa̱ʼa̱ ña̱ saá sa̱náʼa̱ na̱ yivánana, soo chí inina ni̱nu kúnina. Kúee á ya̱chi̱ náʼa̱ miívana ndáa ki̱ʼva íyona (Luc. 6:45).

 5 Soo na̱ yiví na̱ va̱ása xíka-ini xa̱ʼa̱ ña̱ kúni̱na á na̱ káxiní káʼa̱n va̱ása kúni kachiña ña̱ kúúna na̱ ni̱nu kúni (Juan 1:46, 47). Soo ni saá, na̱yóʼo xíniñúʼu kiʼinna kuenta ña̱ va̱ása ndakanixi̱nína ña̱ xa̱a̱ xíni̱nína. Ni xa̱a̱ síín íyo iin iinyó, ndiʼiyó xíniñúʼu chika̱a̱yó ndee̱ ña̱ vitá koo iniyó.

Ta̱ apóstol Pablo va̱ása níxindakanixi̱níra ña̱ ndáyáʼvikara nu̱ú inkana. (Koto párrafo 6). *

6. Nda̱a̱ táki̱ʼva káchi 1 Corintios 15:10, ¿ndáaña sákuaʼayó xíʼin ejemplo ta̱ Pablo?

6 Ná kotoyó ejemplo ta̱ apóstol Pablo. Jehová xi̱niñúʼurara ña̱ chi̱ndúʼúra xa̱ʼa̱ ku̱a̱ʼání congregación xa̱a̱ síín síín ñuu. Sana loʼokava chiñu ke̱ʼé inka na̱ apóstol ta̱ Jesús nu̱ú ña̱ ke̱ʼé ta̱ Pablo. Soo ni saá, ta̱ Pablo va̱ása níndakanixi̱níra ña̱ ndáyáʼvikara nu̱ú inka na̱ hermano, chi xíʼin ña̱ vitá-ini ni̱ka̱ʼa̱nra: “Saáchi yi̱ʼi̱ kúú mií ta̱ va̱ása ndáyáʼvika nu̱ú na̱ apóstol, ta va̱ása xíniñúʼu kui̱ apóstol, chi i̱xandi̱va̱ʼi̱ xíʼin na̱ ñuu Ndióxi̱” (1 Cor. 15:9). Tándi̱ʼi, ni̱ka̱ʼa̱nra ña̱ va̱ʼaní kítáʼanra xíʼin Jehová, ta su̱ví xa̱ʼa̱ ña̱ ndáyáʼvikara á ña̱ ku̱a̱ʼá ña̱ʼa ke̱ʼéra kúúña, saáchi Jehová kúú ta̱ ni̱na̱ʼa̱ ña̱ va̱ʼa-inira xíʼinra (kaʼvi 1 Corintios 15:10). * Ta̱ Pablo ni̱na̱ʼa̱ra ña̱ vitá íyo inira tá ka̱yíra carta ña̱ ku̱a̱ʼa̱n nu̱ú na̱ ñuu Corinto, ni savana xi̱ka̱ʼa̱n kúáchina xa̱ʼa̱ra (2 Cor. 10:10).

Vitání ni̱xi̱yo ini ta̱ hermano Karl Klein ta̱ xi̱kuu Cuerpo Gobernante. (Koto párrafo 7).

7. ¿Ndáa ki̱ʼva ni̱na̱ʼa̱ iin ta̱ hermano ña̱ vitá ni̱xi̱yo inira?

7 Ku̱a̱ʼání na̱ testigo tá káʼvina ña̱ nátúʼun xa̱ʼa̱ ta̱ hermano ta̱ xi̱kuu Cuerpo Gobernante ta̱ xi̱naní Karl Klein chíka̱a̱níña ndee̱ xíʼinna. Nu̱ú ña̱yóʼo ta̱ hermano Klein xíʼin ña̱ vitá-ini ni̱ka̱ʼa̱nra xa̱ʼa̱ tu̱ndóʼo ña̱ ndo̱ʼora, xíʼin sava ña̱ i̱xayo̱ʼvi̱ xíʼinra ku̱a̱ʼání ku̱i̱ya̱. Ná kotoyó sava  ejemplo. Nani tá ki̱xáʼa ku̱i̱ya̱ 1920 ta chí nu̱ú, ki̱tara na̱túʼunra xa̱ʼa̱ Ndióxi̱ veʼe tá veʼe ña̱ yichi̱ nu̱ú, ta xa̱ʼa̱ ña̱ yo̱ʼvi̱níña túvira va̱ása níkeʼékaraña ki̱ʼva u̱vi̱ ku̱i̱ya̱. Tá xa̱a̱ ndíka̱a̱ra Betel ku̱a̱ʼá tiempo ni̱sa̱a̱ra xíʼin iin ta̱ hermano xa̱ʼa̱ ña̱ ta̱xira sava consejo ndaʼa̱ra. Ta saátu ki̱ʼinra kue̱ʼe̱ ña̱ naní depresión nerviosa, soo tá ni̱ya̱ʼa loʼo nda̱ʼara. Ta xi̱kusi̱íní-inira xa̱ʼa̱ ndiʼi chiñu ña̱ xi̱kuumiíra. Ta̱ hermano yóʼo vitání ni̱xi̱yo inira chi nda̱kunira ña̱ xíniñúʼu nasamara sava ña̱ kéʼéra. Ku̱a̱ʼání na̱ ndásakáʼnu Jehová ndákaʼánna xa̱ʼa̱ ta̱ hermano Klein ta saátu kútóonína kaʼvina ña̱ nátúʼun xa̱ʼa̱ra. *

¿NDA̱CHUN XÍNIÑÚʼU VITÁ KOO INIYÓ?

8. ¿Nda̱saa chíndeétáʼan ña̱ káʼa̱n 1 Pedro 5:6 xíʼinyó ña̱ tá vitá íyo iniyó sákusi̱íyó-ini Jehová?

8 Ndáyáʼviní vitá koo iniyó chi saá kúú ña̱ sákusi̱íyó-ini Jehová, nda̱a̱ táki̱ʼva ni̱ka̱ʼa̱n ta̱ apóstol Pedro (kaʼvi 1 Pedro 5:6). * Nu̱ú libro ña̱ naní “Ven, sé mi seguidor” káchiña: “Ña̱ ni̱nu kúni̱yó nda̱a̱ táki̱ʼva íyo iin veneno saá íyoña ta kivi sandiʼi-xa̱ʼa̱ña miíyó. Chi xíʼin ña̱yóʼo nda̱a̱ na̱ yiví na̱ ndíchiní kivi xa̱a̱na va̱ása kundayáʼvikana nu̱ú Jehová. Soo na̱ vitá-ini ni kǒo xíni̱nína kivi xa̱a̱na kundayáʼvina nu̱úra”. Ta saátu káʼa̱nkaña, tá vitá íyo iniyó taxira ku̱a̱ʼání ña̱ va̱ʼa ndaʼa̱yó. * Kúnda̱a̱-iniyó ña̱ kǒoka inka ña̱ kivi sakusi̱í-ini Jehová (Prov. 23:15).

9. ¿Nda̱chun kutóoyó kutáʼanyó xíʼin na̱ vitá íyo ini?

9 Sákusi̱íyó-ini Jehová tá vitá íyo iniyó, ta saátu ku̱a̱ʼá ña̱ va̱ʼa ndákiʼinyó. Tá vitá íyo iniyó na̱ yiví kuni̱na koo yatinna xíʼinyó. Ña̱ va̱ʼa kunda̱a̱-iniyó xa̱ʼa̱ ña̱yóʼo, ná ndakanixi̱níyó ndáa na̱ yiví kúú na̱ kutóoyó kutáʼanyó xíʼin (Mat. 7:12). Ña̱ nda̱a̱ kúú ña̱ va̱ása kutóoyó kutáʼanyó xíʼin na̱ yiví na̱ kúni̱ keʼé ña̱ kúni̱ miína, ta va̱ása xíniso̱ʼona ña̱ káʼa̱n inkana. Soo ki̱vi̱ kítáʼanyó xíʼin na̱ hermano na̱ vitá íyo ini ta náʼa̱na ña̱ ndíʼi-inina xa̱ʼa̱yó ta kúʼvi̱-inina xínina miíyó va̱ʼaní kúniyó (1 Ped. 3:8). Ña̱kán tá saá ndóʼoyó, saátu va̱ʼa kúni inkana xíʼinyó tá vitá íyo iniyó xíʼinna.

10. ¿Nda̱saa chíndeétáʼan ña̱ vitá-ini xíʼinyó ña̱ ya̱ʼayó nu̱ú ña̱ íxayo̱ʼvi̱ xíʼinyó?

10 Ña̱ vitá íyo iniyó chíndeétáʼanña xíʼinyó ña̱ ya̱ʼayó nu̱ú ña̱ íxayo̱ʼvi̱ xíʼinyó. Sava yichi̱ kivi ndakanixi̱níyó ña̱ va̱ása va̱ʼa íyo ña̱ yáʼayó  nu̱ú. Tá kúú, ta̱ rey Salomón ni̱ka̱ʼa̱nra: “Xa̱a̱ xínii̱ na̱ káchíñu ndáʼvi yósóna tí kuáyi̱, soo na̱ príncipe xíka xáʼana nda̱a̱ táki̱ʼva íyo na̱ káchíñu ndáʼvi” (Ecl. 10:7). Su̱ví ndiʼi tiempo ndáyáʼvi na̱ yiví na̱ xíni̱ní, chi sava yichi̱ na̱ ndáyáʼvika kúú na̱ kǒo xíni̱ va̱ʼa. Soo ta̱ Salomón na̱kunda̱a̱-inira ña̱ va̱ʼaníka kúú ña̱ ná kǒo ndakanixi̱níyó ña̱ kéʼéna ña̱ va̱ása va̱ʼa xíʼinyó (Ecl. 6:9). Tá vitá íyo iniyó kusi̱í-iniyó xíʼin ña̱ xa̱a̱ kúúmiíyó ta kǒo kundi̱ʼi̱ní-iniyó xa̱ʼa̱ ña̱ʼa ña̱ túviyó xíniñúʼu kuumiíyó.

ÑA̱ KIVI IXAYO̱ʼVI̱ XÍʼINYÓ ÑA̱ VITÁ KOO INIYÓ

¿Nda̱chun kivi ixayo̱ʼvi̱ña xíʼinyó ña̱ vitá koo iniyó tá ná yáʼayó nu̱ú táʼan ña̱yóʼo? (Koto párrafo 11 xíʼin 12). *

11. ¿Nda̱chun xíniñúʼu vitá koo iniyó tá táxina consejo ndaʼa̱yó?

11 Ndiʼi ki̱vi̱ kúú ña̱ kivi na̱ʼa̱yó ña̱ vitá íyo iniyó. Tá kúú, tá táxina consejo ndaʼa̱yó. Xíniñúʼu ndakaʼányó, chi tá iinna távána tiempo ña̱ taxina consejo ndaʼa̱yó, kúúña xa̱ʼa̱ ña̱ ni̱ki̱ʼviyó iin ku̱a̱chi ña̱ ndeé. Ta sana nda̱a̱ va̱ása kandíxayó taxiyó ña̱ chindeétáʼanna xíʼinyó, á nda̱a̱ kivi ka̱ʼa̱n kúáchiyó xa̱ʼa̱na á xa̱ʼa̱ ndáa ki̱ʼva ni̱ka̱ʼa̱nna xíʼinyó. Soo tá vitá íyo iniyó nasamavayó ña̱ kéʼéyó.

12. Nda̱a̱ táki̱ʼva káchi Proverbios 27:5, 6, ¿nda̱chun xíniñúʼu taxiyó tíxa̱ʼvi xa̱ʼa̱ consejo ña̱ táxina ndaʼa̱yó? Ka̱ʼa̱n xa̱ʼa̱ iin ejemplo.

12 Na̱ yiví na̱ vitá-ini táxina tíxa̱ʼvi xa̱ʼa̱ consejo ña̱ ndákiʼinna. Ná ka̱ʼa̱nyó xa̱ʼa̱ iin ejemplo. Ná ndakanixi̱níyó ña̱ íyoyó ti̱xin salón ta nátúʼunyó xíʼin inkaka na̱ hermano. Tasaá, iin na̱yóʼo kánana miíyó ta káʼa̱n se̱ʼéna xíʼinyó ña̱ ndíka̱a̱ iin ña̱ʼa xa̱ʼa̱ nu̱ʼuyó. Ña̱ nda̱a̱ kúkaʼanva nu̱úyó. Soo táxiyó tíxa̱ʼvi ndaʼa̱na xa̱ʼa̱ ña̱ ni̱ka̱ʼa̱nna xíʼinyó, á nda̱a̱ ndakanixi̱níyó ña̱ xi̱niñúʼu ya̱chi̱ka ka̱ʼa̱nna xíʼinyó xa̱ʼa̱ña. Ki̱ʼva saá xíniñúʼu taxiyó tíxa̱ʼvi ndaʼa̱ iin na̱ hermano na̱ ndakúní-ini tá táxina consejo ndaʼa̱yó. Ta ná va̱ása ndakanixi̱níyó ña̱ sáa̱-inina xínina miíyó, ná kotoyóna nda̱a̱ táki̱ʼva íyo iin migoyó na̱ kúʼvi̱ní-ini xíni miíyó (kaʼvi Proverbios 27:5, 6; * Gál. 4:16).

¿Nda̱chun xíniñúʼu vitá koo iniyó tá ndákiʼin inkana ku̱a̱ʼáka chiñu? (Koto párrafo 13 xíʼin 14). *

13. ¿Nda̱saa náʼa̱yó ña̱ vitá íyo iniyó ki̱vi̱ inka na̱ hermano ndákiʼinna inkaka chiñu?

13 Tá inka na̱ hermano ndákiʼinna inkaka chiñu. Iin ta̱ anciano ta̱ naní Jason káchira: “Ki̱vi̱ xítoi̱ ña̱ táxina inkaka chiñu ndaʼa̱ inkana, sava yichi̱ ndáka̱tu̱ʼun xíʼin miíi̱ nda̱chun ni̱taxinaña ndaʼa̱ yi̱ʼi̱”. ¿Á xa̱a̱ saá ndóʼoyó sava yichi̱? Iin ña̱ va̱ʼava kúú ña̱ kúni̱yó keʼéyó ku̱a̱ʼáka chiñu nu̱ú Jehová (1 Tim. 3:1). Soo xíniñúʼu kiʼinyó kuenta xíʼin ña̱ ndákanixi̱níyó chi nda̱a̱ kivi kixáʼayó ni̱nu kuniyó. Tá kúú,  iin na̱ hermano kivi kixáʼana ndakanixi̱nína ña̱ xíni̱kana keʼéna iin chiñu. Á nda̱a̱ iin ñá hermana kivi ndakanixi̱níñá ña̱ xíni̱ka yiíñá keʼéra iin chiñu nu̱ú inka na̱ hermano. Tá ndixa vitá íyo iniyó va̱ása ndakanixi̱níyó saá.

14. ¿Ndáaña sákuaʼayó xíʼin ña̱ ke̱ʼé ta̱ Moisés tá nda̱kiʼin inkana chiñu?

14 Ná kotoyó ndáaña ke̱ʼé ta̱ Moisés tá xi̱nira ña̱ nda̱kiʼin inka na̱ yiví sava chiñu, ta ndáaña sákuaʼayó xíʼinña. Nu̱ú ta̱kán xi̱ndayáʼviní chiñu ña̱ xi̱kuumiíra ña̱ xi̱niʼira yichi̱ nu̱ú na̱ ñuu Israel. Soo ¿ndáaña ke̱ʼéra tá ta̱xi Jehová ña̱ ná chindeétáʼan inkaka na̱ israelita xíʼinra ña̱ va̱ʼa keʼéra chiñura? Va̱ása nísa̱a̱ra (Núm. 11:24-29). Saátu ni̱na̱ʼa̱ra ña̱ vitá íyo inira, tá ta̱xira ña̱ chindeétáʼan inkana xíʼinra ña̱ tiinna ku̱a̱chi xíʼin na̱ ñuu Israel (Éx. 18:13-24). Xa̱ʼa̱ ña̱ ni̱xi̱yo ku̱a̱ʼáka na̱ juez, kamaka xi̱tiinna ku̱a̱chi xíʼin na̱ israelita. Nu̱ú ta̱ Moisés xi̱ndayáʼvika ña̱ vií koo na̱ ñuu Israel nu̱úka chiñu ña̱ xi̱kuumiíra. ¿A su̱ví ña̱ ndixa kúú ña̱ va̱ʼaní yichi̱ sa̱ndákoora nu̱úyó? Ná ndakaʼányó ña̱ tá kúni̱yó ná kuniñúʼu Jehová miíyó ña̱ kachíñuyó nu̱úra, ña̱ ndáyáʼvika kúú ña̱ vitá koo iniyó ta su̱ví ña̱ xíni̱yó keʼéyó ku̱a̱ʼá ña̱ʼa. Nda̱a̱ táki̱ʼva káchi Salmo 138:6, “Jehová káʼnuníra, ta ni saá xítora na̱ vitá íyo ini”.

15. ¿Ndáaña yáʼa ku̱a̱ʼání na̱ hermano nu̱ú?

15 Ki̱vi̱ nása̱ma chiñu ña̱ kúúmiíyó. Sa̱kán vitin ku̱a̱ʼání na̱ hermano na̱ xa̱a̱ ku̱a̱ʼání ku̱i̱ya̱ káchíñu nu̱ú Jehová na̱sama chiñu ña̱ kúúmiína. Tá kúú, tá ku̱i̱ya̱ 2014 na̱ superintendente ña̱ distrito xíʼin ñá síʼína ta̱xina inka chiñu ndaʼa̱na. Ta nda̱a̱ tá ku̱i̱ya̱ saá, tá ndákiʼin na̱ superintendente ña̱ circuito 70 ku̱i̱ya̱ sándakoona chiñuna. Ta saátu na̱ hermano na̱ kúúmií yáʼaka 80 ku̱i̱ya̱ va̱ása kívika koona coordinador nu̱ú na̱ anciano. Ta saátu ku̱a̱ʼání na̱ xi̱ñuʼu Betel nda̱kiʼinna chiñu ña̱ koona  precursor. Inkatu na̱ xi̱kachíñu ku̱a̱ʼá tiempo xi̱niñúʼu sandákoona chiñuna xa̱ʼa̱ ña̱ ndeé ndóʼona, á ña̱ kundaana na̱ veʼena á xa̱ʼa̱ inkaka ña̱ʼa.

16. ¿Nda̱saa náʼa̱ sava na̱ hermano ña̱ vitá íyo inina?

16 I̱xayo̱ʼvi̱níña xíʼin na̱ hermano yóʼo tá na̱sama chiñuna, chi na̱yóʼo xi̱kutóonína chiñu ña̱ xi̱keʼéna. Ku̱a̱ʼánína xa̱a̱ ku̱a̱ʼá ku̱i̱ya̱ xi̱keʼéna ña̱ chiñu yóʼo, ta savana ku̱suchíní-inina, soo tá ni̱ya̱ʼa tiempo ni̱ka̱anvana. ¿Nda̱chun? Xa̱ʼa̱ ña̱ kúʼvi̱-inina xínina Jehová kúúña. Xi̱kunda̱a̱-inina ña̱ nda̱taxi xíʼin miína ndaʼa̱ Jehová, ta su̱ví xa̱ʼa̱ iin chiñu níkeʼénaña (Col. 3:23). Kúsi̱íní-inina kéʼéna nda̱a̱ ndáaka chiñuna nu̱ú Jehová xíʼin ña̱ vitá-ini. Na̱ hermano yóʼo sándakoona ndiʼi ña̱ sándi̱ʼi̱-inina ndaʼa̱ra chi kúnda̱a̱-inina ña̱ ndíʼi̱-inira xa̱ʼa̱na (1 Ped. 5:6, 7).

17. ¿Nda̱chun táxiyó tíxa̱ʼvi xa̱ʼa̱ ña̱ káʼa̱n tu̱ʼun Ndióxi̱ xíʼinyó ña̱ vitá ná koo iniyó?

17 Kúsi̱íní-iniyó xa̱ʼa̱ ña̱ káʼa̱n tu̱ʼun Ndióxi̱ xíʼinyó ña̱ vitá ná koo iniyó. Saáchi xíʼin ña̱yóʼo ndákiʼinyó ña̱ va̱ʼa ta saátu inkana. Tíxa̱ʼvi ña̱yóʼo, va̱ʼa yáʼayó nu̱ú sava ña̱ íxayo̱ʼvi̱ xíʼinyó, ta saátu va̱ʼaka kúyatinyó nu̱ú yiváyó Jehová. Kúsi̱íní-iniyó tá kúnda̱a̱-iniyó ña̱ kúʼvi̱ní-ini Jehová xínira na̱ ndásakáʼnu-ñaʼá xíʼin ña̱ vitá-ini (Is. 57:15).

YAA 45 “Ña̱ ndákani-inii̱ xa̱ʼa”

^ párr. 5 Ña̱ vitá koo iniyó iin ña̱ ndáyáʼviní kúú ña̱yóʼo, ta ndiʼi miíyó na̱ ndásakáʼnu Ndióxi̱ xíniñúʼu kuumiíña. Soo ¿ndáaña kúú ña̱ vitá koo iniyó? ¿Nda̱chun xíniñúʼu kuumiíyóña? Ta ¿nda̱chun kivi ixayo̱ʼvi̱ña xíʼinyó ña̱ vitá koo iniyó tá ná nasa̱ma chiñu ña̱ kúúmiíyó? Nu̱ú ña̱ artículo yóʼo ka̱ʼa̱nyó xa̱ʼa̱ ña̱yóʼo.

^ párr. 6 1 Corintios 15:10: “Xa̱ʼa̱ ña̱ ni̱na̱ʼa̱ Ndióxi̱ ña̱ va̱ʼa-inira xíʼi̱n ni kúi̱ ta̱ ku̱a̱chi, xa̱ʼa̱ ña̱yóʼo kúú ña̱ ta̱xira chiñu yóʼo ndaʼíi̱. Soo su̱ví ña̱ níkeʼé miíra kúú ña̱yóʼo, chi yi̱ʼi̱ ku̱a̱ʼáníka chiñu ke̱ʼíi̱ nu̱ú inkana, soo su̱ví miíi̱ kúú ta̱ níkeʼéña, chi xa̱ʼa̱ ña̱ ni̱na̱ʼa̱ Ndióxi̱ ña̱ va̱ʼa-inira xíʼinvai̱ kúúña”.

^ párr. 7 Koto ña̱ artículo “Jehová me ha tratado recompensadoramente”, nu̱ú ña̱ La Atalaya 1 tí marzo ña̱ ku̱i̱ya̱ 1985.

^ párr. 8 1 Pedro 5:6: “Va̱ása ndasakáʼnundó miíndó nu̱ú Ndióxi̱ ña̱ va̱ʼa kixa̱a̱ ki̱vi̱ ña̱ ndasakáʼnura ndóʼó”.

^ párr. 8 Koto ña̱ capítulo 3, párrafo 23.

^ párr. 12 Proverbios 27:5, 6: “Va̱ʼaníka ña̱ ná taxina consejo ndaʼa̱yó, nu̱úka ña̱ va̱ása na̱ʼa̱na ña̱ kúni̱na xínina miíyó. Va̱ʼaníka tá iin na̱ kúʼvi̱-ini xíni miíyó ná sátukue̱ʼe̱na miíyó, nu̱úka ña̱ chítú iin na̱ sáa̱-ini xíni miíyó nu̱úyó”.

^ párr. 56 ÑA̱ KÁʼA̱N XA̱ʼA̱ NA̱ʼNÁ: Ta̱ apóstol Pablo íyora veʼe iin ta̱ kúú cristiano xíʼin inkaka na̱ hermano. Náʼa̱ra ña̱ va̱ása ni̱nu kúnira chi távára tiempo ña̱ íyora xíʼin na̱ hermano ta saátu xíʼin na̱ va̱lí.

^ párr. 60 ÑA̱ KÁʼA̱N XA̱ʼA̱ NA̱ʼNÁ: Iin ta̱ hermano xíniso̱ʼora consejo ña̱ va̱xi nu̱ú Biblia ña̱ táxi iin ta̱ hermano ta̱ loʼoka ndaʼa̱ra.

^ párr. 62 ÑA̱ KÁʼA̱N XA̱ʼA̱ NA̱ʼNÁ: Ta̱ hermano ta̱ xa̱a̱ chée va̱ása sáa̱ra xa̱ʼa̱ ña̱ kúúmiíka ta̱ hermano ta̱ loʼoka ku̱a̱ʼá chiñu ti̱xin congregación.