Ir al contenido

Ir al índice

 ARTÍCULO ÑA̱ KAʼVIYÓ 41

¿Ndáa ki̱ʼva chindeétáʼanyó xíʼin na̱ káʼviyó xíʼin ña̱ xa̱a̱na ndakuchina? (táʼví 1)

¿Ndáa ki̱ʼva chindeétáʼanyó xíʼin na̱ káʼviyó xíʼin ña̱ xa̱a̱na ndakuchina? (táʼví 1)

“Náʼa̱ káxiña ña̱ ndóʼó kúúndó carta ta̱ Cristo ña̱ ka̱ʼyí ndi̱ʼi̱ na̱ káchíñu nu̱úra” (2 COR. 3:3).

YAA 78 Ná sanáʼa̱yó tu̱ʼun Ndióxi̱

ÑA̱ KA̱ʼA̱NYÓ XA̱ʼA̱ *

Kúsi̱íní-ini na̱ congregación tá xítona ña̱ ndákuchi iin na̱ yiví na̱ kúʼvi̱ní-ini ndiʼina xínina. (Koto párrafo 1).

1. ¿Ndáa ki̱ʼva chíndeétáʼan 2 Corintios 3:1-3 xíʼinyó ña̱ kotoyó ña̱ ndáyáʼviní chindeétáʼanyó xíʼin na̱ sánáʼa̱yó xa̱ʼa̱ Biblia ña̱ xa̱a̱na ndakuchina? (Koto na̱ʼná ña̱ va̱xi chí sa̱tá tutu yóʼo).

¿NDÁAÑA ndóʼoyó ki̱vi̱ ndákuchi iin na̱ sákuaʼa xa̱ʼa̱ Biblia na̱ íyo ti̱xin territorio ña̱ congregación? Kúsi̱íní-iniyó (Mat. 28:19). Soo tá miíyó kúú na̱ sa̱náʼa̱na xa̱ʼa̱ Biblia, kúsi̱íníka-iniyó saá (1 Tes. 2:19, 20). Na̱ sa̱kán nda̱kuchi chíndeétáʼanna xíʼin na̱ sa̱náʼa̱-ñaʼá ña̱ ná ka̱ʼa̱n va̱ʼa inkana xa̱ʼa̱na, ta saátu ña̱ ná ka̱ʼa̱n va̱ʼana xa̱ʼa̱ ndiʼi na̱ congregación (kaʼvi 2 Corintios 3:1-3). *

2. a) ¿Ndáaña kúú ña̱ xíniñúʼu nda̱ka̱tu̱ʼunyó miíyó ta nda̱chun? b) ¿Ndáa ki̱ʼva íyo ña̱ káʼviyó xíʼin na̱ yiví? (Koto nota).

2 Kúsi̱íní-iniyó saáchi ku̱mí ku̱i̱ya̱ ña̱ xa̱a̱ ni̱ya̱ʼa, yo̱o̱ tá yo̱o̱ na̱ hermano ka̱ʼvina xíʼin 10,000,000 na̱ yiví iníísaá nu̱ú ñuʼú. * Ti̱xin ku̱mí ku̱i̱ya̱ yóʼo 280,000 na̱ yiví nda̱kuchi iin tá iin ku̱i̱ya̱. Ña̱yóʼo náʼa̱ña nu̱úyó ña̱ íyoka ku̱a̱ʼání na̱ sákuaʼa xa̱ʼa̱ Biblia na̱ kivi xa̱a̱ ndakuchi. ¿Ndáa ki̱ʼva kivi chindeétáʼanyó xíʼinna? Xa̱ʼa̱ ña̱ kúee íyo ini Jehová táxikara tiempo ndaʼa̱ na̱ yiví yóʼo ña̱  va̱ʼa xa̱a̱na koona discípulo ta̱ Cristo. Kúnda̱a̱-iniyó ña̱ si̱lóʼoní tiempo kíndo̱o ña̱kán kúni̱yó chika̱a̱níyó ndee̱ ña̱ va̱ʼa chindeétáʼanyó xíʼinna ña̱ kuaʼnukana xíʼin tu̱ʼun Ndióxi̱ ta xa̱a̱na ndakuchina (1 Cor. 7:29a; 1 Ped. 4:7).

3. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

3 Na̱ Cuerpo Gobernante kúnda̱a̱-inina ña̱ ndáyáʼviní chindeétáʼanyó xíʼin na̱ káʼviyó xíʼin xa̱ʼa̱ Biblia ña̱ xa̱a̱na ndakuchina. Xa̱ʼa̱ ña̱yóʼo ni̱nda̱ka̱tu̱ʼunna Betel ña̱ íyo inka país ndáa ki̱ʼva kivi chindeétáʼanyó xíʼin na̱ káʼviyó xíʼin. Nu̱ú artículo yóʼo xíʼin ña̱ inka, kotoyó ndáaña kivi sakuaʼayó xíʼin ña̱ kéʼé na̱ superintendente ña̱ circuito, na̱ misionero xíʼin na̱ xa̱a̱ ku̱a̱ʼání ku̱i̱ya̱ kúú precursor (Prov. 11:14; 15:22). * Ña̱ ni̱ka̱ʼa̱nna náʼa̱ña nu̱úyó ndáaña kivi keʼéyó ña̱ viíka sanáʼa̱yó na̱ yiví, ta saátu kivi chindeétáʼanña xíʼin na̱ xa̱a̱ sákuaʼa xa̱ʼa̱ Biblia. Ña̱ artículo yóʼo ka̱ʼa̱nña xa̱ʼa̱ u̱ʼu̱n ña̱ʼa ña̱ xíniñúʼu keʼé ndiʼi na̱ káʼviyó xíʼin xa̱ʼa̱ Biblia ña̱ va̱ʼa xa̱a̱na ndakuchina, ta ndáa ki̱ʼva kivi chindeétáʼanyó xíʼinna.

NDIʼI SEMANA NÁ KAʼVIYÓ XÍʼINNA

Ná nda̱ka̱tu̱ʼunyó na̱ káʼviyó xíʼin á kivi kooyó iin lugar ña̱ va̱ʼa natúʼunkayó xa̱ʼa̱ Biblia. (Koto párrafo 4 nda̱a̱ 6).

4. ¿Ndáaña xíniñúʼu ndakaʼányó xa̱ʼa̱ na̱ yiví na̱ va̱ása naʼá káʼviyó xíʼin?

4 Ku̱a̱ʼání na̱ hermano chí yéʼé na̱ yiví kúú nu̱ú káʼvina xíʼinna, ni chíndeétáʼanva ña̱yóʼo xíʼinna ña̱ kutóokana sakuaʼana soo va̱ása naʼá káʼvina xíʼinna ta ni su̱ví ndiʼi semana káʼvina. Xa̱ʼa̱ ña̱ kúni̱ sava na̱ hermano chindeétáʼanna xíʼin na̱yóʼo ña̱ ndakundeéna sakuaʼakana xa̱ʼa̱ Ndióxi̱, káʼa̱nna xíʼinna ña̱ ná taxina número teléfono ña̱ kúúmiína ndaʼa̱na, tasaá tá kúma̱níka ku̱ʼu̱nna kotonana káʼa̱nna xíʼinna á chíndaʼána iin mensaje ndaʼa̱na. * Sana ku̱a̱ʼá yo̱o̱ kivi keʼéna ña̱yóʼo soo na̱ káʼvina xíʼin va̱ása kama kuaʼnuna xíʼin tu̱ʼun Ndióxi̱. Tá loʼoní tiempo távána ña̱ va̱ʼa kaʼvina tu̱ʼun Ndióxi̱ ta va̱ása chíka̱a̱na ndee̱ ña̱ keʼéna ña̱yóʼo, sana va̱ása xa̱a̱vína ndataxina miína ndaʼa̱ Ndióxi̱ ta ndakuchina.

5. Ña̱ ni̱ka̱ʼa̱n ta̱ Jesús nu̱ú Lucas 14:27-33, ¿ndáa ki̱ʼva kuniñúʼuyó ña̱yóʼo ña̱ va̱ʼa chindeétáʼanyó xíʼin na̱ káʼviyó xíʼin?

5 Iin yichi̱, ta̱ Jesús ni̱ka̱ʼa̱nra xa̱ʼa̱ u̱vi̱ ejemplo ña̱ va̱ʼa sanáʼa̱ra miíyó ndáaña xíniñúʼu keʼé iinna ña̱ va̱ʼa xa̱a̱na koona discípulora. Ni̱ka̱ʼa̱nra xa̱ʼa̱ iin ta̱ ta̱a, ta̱ kúni̱ ixava̱ʼa iin veʼe xíʼin xa̱ʼa̱ iin ta̱ rey ta̱ kúni̱ ku̱ʼu̱n kanitáʼan xíʼin inkara. Ni̱ka̱ʼa̱nra xa̱ʼa̱ ta̱ kúni̱ ixava̱ʼa iin veʼe ña̱ siʼna xíniñúʼu kotora ta tavára ki̱ʼva á kita xu̱ʼúnra ña̱ saxínuraña, ta ni̱ka̱ʼa̱nra xa̱ʼa̱ ta̱ rey ña̱ siʼna xíniñúʼu kotora á kuchiñu na̱ soldado  kanitáʼanna (kaʼvi Lucas 14:27-33). * Ta̱ Jesús xi̱kunda̱a̱-inira ña̱ ndiʼi na̱ kúni̱ xa̱a̱ koo discípulora, siʼna xíniñúʼu ndakani vií xi̱nína, ndáaña xíniñúʼu keʼéna ña̱ va̱ʼa xa̱a̱na koona discípulora, nda̱a̱ táki̱ʼva ke̱ʼé u̱vi̱ na̱ ta̱a na̱ ni̱ka̱ʼa̱nra xa̱ʼa̱. Ña̱ va̱ʼa kuchiñu iin na̱ yiví keʼéna ña̱ ni̱ka̱ʼa̱n ta̱ Jesús xíniñúʼu ka̱ʼa̱nyó xíʼinna ña̱ ná kaʼvina ndiʼi semana. ¿Ndáa ki̱ʼva kivi keʼéyó ña̱yóʼo?

6. ¿Ndáaña kivi keʼéyó ña̱ va̱ʼa chindeétáʼanyó xíʼin na̱ káʼviyó xíʼin ña̱ kuaʼnuna xíʼin tu̱ʼun Ndióxi̱?

6 Tá yéʼé na̱ yiví kúú nu̱ú káʼviyó xíʼinna, ña̱ siʼna xíniñúʼu keʼéyó kúú ña̱ ku̱a̱ʼáka tiempo ná kaʼviyó xíʼinna. Tá kúú tá ku̱a̱ʼa̱nyó kotoyóna, su̱ví iin versículo kuití ná kaʼviyó xíʼinna. Tá ná ka̱an na̱ yiví yóʼo ña̱ xa̱a̱ ku̱a̱ʼáka tiempo káʼviyó xíʼinna, ná nda̱ka̱tu̱ʼunyóna á íyo iin lugar nu̱ú kivi kooyó ña̱ va̱ʼa kaʼviyó xíʼinna. Ña̱ ndakuiinna na̱ʼa̱ña nu̱úyó á chíndayáʼvina ña̱ sákuaʼana xa̱ʼa̱ Biblia. Ta saátu, tá ná ya̱ʼa tiempo kivi nda̱ka̱tu̱ʼunyóna á kúni̱na kaʼvina u̱vi̱ yichi̱ nu̱ú semana, chi ña̱yóʼo chindeétáʼanña xíʼinna ña̱ kuaʼnukana xíʼin tu̱ʼun Ndióxi̱. Ná ka̱ʼa̱nyó xa̱ʼa̱ inka ña̱ xíniñúʼu keʼéna.

XA̱A̱ NÁ KAʼVI KÚEEYÓ ÑA̱ KAʼVIYÓ XÍʼINNA

Ná kaʼvi kúeeyó xa̱ʼa̱ ña̱ sanáʼa̱yóna ta saátu ná sanáʼa̱yóna ndáa ki̱ʼva kivi keʼéna ña̱yóʼo. (Koto párrafo 7 nda̱a̱ 9).

7. ¿Ndáa ki̱ʼva xíniñúʼu kaʼvi kúeeyó tá kúma̱níka ku̱ʼu̱nyó sanáʼa̱yó na̱ yiví xa̱ʼa̱ Biblia?

7 Tá kúma̱níka ku̱ʼu̱nyó kaʼviyó xíʼin iin na̱ yiví, miíyó na̱ sánáʼa̱ xa̱ʼa̱ Biblia siʼna xíniñúʼu kaʼvi kúeeyó. Kivi kixáʼayó kaʼviyó tutu ña̱ xíniñúʼuyó ña̱ va̱ʼa sanáʼa̱yóna, ta nandukúyó texto ña̱ va̱xi nu̱úña. Ná kotoyó ndáaña kúú ña̱ ndáyáʼvi va̱ʼaka káʼa̱nña xa̱ʼa̱. Ná ndakanixi̱níyó xa̱ʼa̱ título ña̱ kúúmiíña, subtítulo xíʼin pregunta, ta saátu texto ña̱ “kaʼviyó”, ta ná kotoyó na̱ʼná xíʼin video ña̱ kivi chindeétáʼan xíʼinyó ña̱ viíka ka̱ʼa̱nyó xa̱ʼa̱ña xíʼinna. Tándi̱ʼi ná ndakanixi̱níyó xa̱ʼa̱ na̱ káʼviyó xíʼin, ta saátu ndáa ki̱ʼva káxi ka̱ʼa̱nyó xa̱ʼa̱ ña̱ sanáʼa̱yóna tasaá va̱ása ixayo̱ʼvi̱ña xíʼinna kunda̱a̱-inina ta kivi keʼéna ña̱ sákuaʼana (Neh. 8:8; Prov. 15:28a).

8. Nda̱a̱ táki̱ʼva káchi ña̱ ni̱ka̱ʼa̱n ta̱ Pablo nu̱ú Colosenses 1:9, 10, ¿ndáaña xíniñúʼu keʼéyó xa̱ʼa̱ na̱ káʼviyó xíʼin?

8 Ta saátu tá káʼvi kúeeyó ná ka̱ʼa̱nyó xíʼin Jehová xa̱ʼa̱ na̱ káʼviyó xíʼin, xíʼin xa̱ʼa̱ ña̱ xíniñúʼuna.  Ná ka̱ʼa̱nyó xíʼinra ña̱ chindeétáʼanra xíʼinyó ña̱ viíní kuniñúʼuyó Biblia ña̱ va̱ʼa ná xa̱a̱ ña̱yóʼo nda̱a̱ níma̱na (kaʼvi Colosenses 1:9, 10). * Ná ndakanixi̱níyó xa̱ʼa̱ ña̱ kivi ixayo̱ʼvi̱ xíʼinna kunda̱a̱-inina á kandíxana. Ta ná va̱ása nandósóyó chi ña̱ kúni̱yó keʼéyó kúú ña̱ chindeétáʼanyó xíʼinna ña̱ xa̱a̱na ndakuchina.

9. ¿Ndáa ki̱ʼva chindeétáʼanyó xíʼin na̱ káʼviyó xíʼin ña̱ kaʼvi kúeena?

9 Ña̱ kaʼvi ni̱ʼiyó xíʼinna kúú ña̱ chindeétáʼan xíʼinna ña̱ chindayáʼvikana ña̱ ke̱ʼé Jehová xíʼin ta̱ Jesús ta kuni̱kana sakuaʼana (Mat. 5:3, 6). Ña̱ va̱ʼa sakuaʼaka na̱ káʼviyó xíʼin xíniñúʼu viíní kuniso̱ʼona. Xa̱ʼa̱ ña̱yóʼo ndáyáʼviní ka̱ʼa̱nyó xíʼinna ña̱ ná kaʼvi kúeena tutu ña̱ káʼviyó xíʼinna, ta ná ndakanixi̱nína ndáa ki̱ʼva keʼéna ña̱ káʼa̱nña. Kivi chindeétáʼanyó xíʼinna tá ná na̱ʼa̱yó nu̱úna ndáa ki̱ʼva kúú ña̱ kivi kaʼvi kúeenaña. * Ná sanáʼa̱yóna ndáa ki̱ʼva nandukúna ña̱ ndakuiinna tá ná nda̱ka̱tu̱ʼunyóna, ta saátu tá ná kaʼyína nu̱ú tutuna chindeétáʼanña xíʼinna ña̱ va̱ʼa ndakaʼánna xa̱ʼa̱ña. Tándi̱ʼi ná ka̱ʼa̱nyó xíʼinna ña̱ ná ndakuiinna xíʼin tu̱ʼun miína. Tasaá kiʼinyó kuenta á ku̱nda̱a̱-inina xíʼin ña̱ ka̱ʼvina. Ná ka̱ʼa̱nyó xa̱ʼa̱ inka ña̱ xíniñúʼu keʼé na̱ káʼviyó xíʼin.

NDIʼI KI̱VI̱ NÁ KA̱ʼA̱NNA XÍʼIN JEHOVÁ

Ná sanáʼa̱yó na̱ káʼviyó xíʼin ña̱ ka̱ʼa̱nna xíʼin Jehová. (Koto párrafo 10 xíʼin 11).

10. Na̱ káʼviyó xíʼin xa̱ʼa̱ Biblia, ¿nda̱chun xíniñúʼu kaʼvinaña ndiʼi ki̱vi̱, ta ndáaña xíniñúʼu keʼéna tá kúni̱na ndakiʼinna ña̱ va̱ʼa xa̱ʼa̱ ña̱yóʼo?

10 Ni xa̱a̱ káʼvivayó xíʼinna ndiʼi semana íyo inkaka ña̱ xíniñúʼu keʼé miína ki̱vi̱ tá ki̱vi̱. Xíniñúʼu kuniso̱ʼona ña̱ káʼa̱n Jehová ta natúʼunna xíʼinra. Iin ki̱ʼva ña̱ kuniso̱ʼona ña̱ káʼa̱nra kúú ña̱ kaʼvina Biblia ndiʼi ki̱vi̱ (Jos. 1:8; Sal. 1:1-3). Ná sanáʼa̱yóna kuniñúʼuna programa ña̱ kaʼviyó nu̱ú Biblia ña̱ va̱xi nu̱ú jw.org, ta ná ka̱ʼa̱nyó xíʼinna ndáa ki̱ʼva tavánaña. * Tá kúni̱na ndakiʼinna ña̱ va̱ʼa xa̱ʼa̱ ña̱ káʼvina Biblia, ná ka̱ʼa̱nyó xíʼinna ña̱ ndakanixi̱nína xa̱ʼa̱ ña̱ sánáʼa̱ Biblia xa̱ʼa̱ Jehová, ta saátu ndáa ki̱ʼva keʼéna ña̱ sákuaʼana (Hech. 17:11; Sant. 1:25).

11. ¿Ndáa ki̱ʼva kivi sakuaʼa na̱ káʼviyó xíʼin ña̱ ka̱ʼa̱nna xíʼin Ndióxi̱, ta nda̱chun ndáyáʼviní keʼéna ña̱yóʼo ndiʼi ki̱vi̱?

11 Ná chika̱a̱yó ndee̱ xíʼin na̱ sánáʼa̱yó xa̱ʼa̱ Biblia ña̱ ka̱ʼa̱nna xíʼin Jehová ndiʼi ki̱vi̱. Xíʼin ndiʼi níma̱yó ná ka̱ʼa̱nyó xíʼin Jehová tá kíxáʼayó káʼviyó xíʼinna ta saátu tá xa̱a̱ ndi̱ʼi ka̱ʼviyó, ta ná ka̱ʼa̱nyó xa̱ʼa̱na xíʼinra. Saá kúú ña̱ sakuaʼana ka̱ʼa̱nna xíʼin Jehová xíʼin ndiʼi níma̱na,  ta kuniñúʼuna ki̱vi̱ ta̱ Jesucristo ña̱ va̱ʼa ka̱ʼa̱nna xíʼinra (Mat. 6:9; Juan 15:16). Na̱yóʼo kuyatinkana nu̱ú Ndióxi̱ tá ná kaʼvina Biblia ndiʼi ki̱vi̱ ta ka̱ʼa̱nna xíʼinra (Sant. 4:8). Tá ná ka̱anna keʼéna ña̱yóʼo ndiʼi ki̱vi̱, xa̱a̱na ndataxina miína ndaʼa̱ Ndióxi̱ ta ndakuchina. ¿Ndáaña chindeétáʼan xíʼinna keʼéna ña̱yóʼo? Ná ka̱ʼa̱nyó ndáaña kúúña.

NÁ XA̱A̱NA KOONA MIGO JEHOVÁ

12. ¿Ndáa ki̱ʼva kivi chindeétáʼanyó xíʼin na̱ káʼviyó xíʼin ña̱ va̱ʼa xa̱a̱na koona migo Jehová?

12 Va̱ása xíniñúʼu kunda̱a̱ kuití inina xíʼin ña̱ sánáʼa̱yó chi saátu xíniñúʼu xa̱a̱ña nda̱a̱ níma̱na. ¿Nda̱chun? Saáchi níma̱na kúú ña̱ chindaʼá miína ña̱ xa̱a̱na keʼéna ña̱ sákuaʼana. Ku̱a̱ʼání ña̱ʼa xi̱sanáʼa̱ ta̱ Jesús na̱ yiví, ta xi̱kutóona sakuaʼana xa̱ʼa̱ra. Soo xi̱ndiku̱nnara saáchi ña̱ xi̱sanáʼa̱rana ni̱xa̱a̱ña nda̱a̱ níma̱na (Luc. 24:15, 27, 32). Xíniñúʼu kandíxa na̱ káʼviyó xíʼin ña̱ ndixa íyo Jehová ta kotonara nda̱a̱ táki̱ʼva íyo yivána, Ndióxi̱na xíʼin migona (Sal. 25:4, 5). Tá káʼviyó xíʼinna, ná ka̱ʼa̱nyó xa̱ʼa̱ ña̱ va̱ʼa ña̱ kúúmií Ndióxi̱yó (Éx. 34:5, 6; 1 Ped. 5:6, 7). Ni nda̱a̱ ndáaka ña̱ káʼviyó xíʼinna, ná ka̱ʼa̱nyó xíʼinna ndáa ki̱ʼva íyo Jehová. Ná chindeétáʼanyó xíʼinna ña̱ kotona ña̱ ndáyáʼviní ña̱ kúʼvi̱-inira xínirana, ña̱ va̱ʼa-inira xíʼinna ta saátu ña̱ kúndáʼvi-inira xínirana. Ta̱ Jesús ni̱ka̱ʼa̱nra ña̱ ley ña̱ ndáyáʼvika kúú ña̱ kuʼvi̱-iniyó kuniyó Jehová (Mat. 22:37, 38). Ná chindeétáʼanyó xíʼin na̱ káʼviyó xíʼin ña̱ kuʼvi̱ní-inina kunina Ndióxi̱.

13. Ka̱ʼa̱n xa̱ʼa̱ iin ejemplo ña̱ náʼa̱ ndáa ki̱ʼva kivi chindeétáʼanyó xíʼin na̱ káʼviyó xíʼin ña̱ kunda̱a̱-inina ndáa ki̱ʼva íyo Jehová.

13 Tá nátúʼunyó xíʼin na̱ sánáʼa̱yó ná ka̱ʼa̱nyó xíʼinna xa̱ʼa̱ ña̱ kúʼvi̱-iniyó xíniyó Jehová. Ña̱yóʼo chindeétáʼan xíʼinna ña̱ kuni̱na kutáʼan viína xíʼin Ndióxi̱ ta xa̱a̱na kuʼvi̱-inina kuninara (Sal. 73:28). Tá kúú, tá káʼviyó iin tutu á iin texto ña̱ káʼa̱n xa̱ʼa̱ ña̱ kúʼvi̱-ini Jehová xínira miíyó, ña̱ ndíchi kúúmiíra, ña̱ nda̱kúní ndátiinra ku̱a̱chi á ndee̱ ña̱ kúúmiíra, ta ña̱yóʼo xáa̱ña nda̱a̱ níma̱yó, saá kúú ña̱ kivi ka̱ʼa̱nyó xíʼinna ña̱ kúʼvi̱-iniyó xíniyó yiváyó ta̱ íyo chí ndiví xa̱ʼa̱ ña̱yóʼo. Ná ka̱ʼa̱nyó xa̱ʼa̱ inka ña̱ xíniñúʼu keʼé na̱ káʼviyó xíʼin ña̱ va̱ʼa xa̱a̱na ndakuchina.

NÁ KU̱ʼU̱NNA NDIʼI REUNIÓN

Ná chika̱a̱yó ndee̱ xíʼin na̱ káʼviyó xíʼin ña̱ ku̱ʼu̱nna ndiʼi reunión. (Koto párrafo 14 xíʼin 15).

14. Nda̱a̱ táki̱ʼva káchi Hebreos 10:24, 25, ¿ndáaña chindeétáʼan xíʼin na̱ káʼviyó xíʼin ña̱ xa̱a̱na ndakuchina?

14 Ndiʼiyó kúni̱yó ña̱ ná ndakuchi na̱ káʼviyó xíʼin. Ta kivi xa̱a̱na keʼéna ña̱yóʼo tá ná ka̱ʼa̱nyó xíʼinna ña̱ ku̱ʼu̱nna reunión. Sava na̱ hermano káʼa̱nna ña̱ tá kíxáʼa na̱ káʼviyó xíʼin xáʼa̱nna reunión, saá kúú ña̱ kamaka xáa̱na ndákuchina (Sal. 111:1). Savana káʼa̱nna xíʼin na̱ káʼvina xíʼin ña̱, tá ná ku̱ʼu̱nna reunión kán kúú nu̱ú  kivi sakuaʼakana xa̱ʼa̱ ña̱ sánáʼa̱ Biblia. Ná káʼviyó ña̱ káʼa̱n Hebreos 10:24, 25 * xíʼinna, ta ná ka̱ʼa̱nyó xíʼinna ndáaña kúú ña̱ va̱ʼa ndakiʼinna tá ná ku̱ʼu̱nna reunión (kaʼviña). Ná na̱ʼa̱yó nu̱úna video ña̱ naní ¿Ndáaña kéʼé na̱ testigo Jehová nu̱ú ndátakana? * Ta ná chindeétáʼanyó xíʼinna ña̱ chika̱a̱-inina ku̱ʼu̱nna ndiʼi reunión.

15. ¿Ndáaña kivi keʼéyó ña̱ va̱ʼa chika̱a̱yó ndee̱ xíʼin na̱ káʼviyó xíʼin ña̱ ku̱ʼu̱nna ndiʼi reunión?

15 ¿Ndáaña kivi keʼéyó tá na̱ káʼviyó xíʼin, ta̱ʼán ku̱ʼu̱nna nda̱a̱ ni iin reunión á sava yichi̱ kuitíví xáʼa̱nna? Xíʼin ña̱ si̱í-ini ná natúʼunyó xíʼinna xa̱ʼa̱ ña̱ sa̱kuaʼayó ti̱xin iin reunión ña̱ sa̱kán ni̱xa̱ʼa̱nyó. Ta va̱ʼaníka tá ná keʼéyó ña̱yóʼo nu̱úka ña̱ ka̱ʼa̱n kuitíyó xíʼinna ña̱ ku̱ʼu̱nna reunión. Ná taxiyó iin Tutu Ña̱ Nátúʼun xíʼinyó ndaʼa̱na á Tutu nu̱ú Va̱xi ña̱ Keʼéyó Reunión ña̱ káʼviyó mií semana saá. Ná na̱ʼa̱yó nu̱úna ndáaña sakuaʼayó ti̱xin inka reunión, ta ná nda̱ka̱tu̱ʼunyóna ndáaña kúú ña̱ kútóokana sakuaʼana xa̱ʼa̱. Ta ña̱ sakuaʼana ti̱xin reunión yóʼo síínníva kooña nu̱ú ña̱ sana xa̱a̱ xi̱nina á xi̱niso̱ʼona ti̱xin reunión ña̱ kúúmií inka veʼe-ñu̱ʼu (1 Cor. 14:24, 25). Kuxini̱na inka na̱ hermano ta ña̱ kéʼé na̱yóʼo chindeétáʼanña xíʼinna ña̱ xa̱a̱na ndakuchina.

16. a) ¿Ndáaña xíniñúʼu keʼéyó ña̱ va̱ʼa chindeétáʼanyó xíʼin na̱ káʼviyó xíʼin ña̱ xa̱a̱na ndakuchina? b) ¿Ndáaña sakuaʼayó nu̱ú inka artículo?

16 Tá saá, ¿ndáaña kivi keʼéyó ña̱ va̱ʼa chindeétáʼanyó xíʼin na̱ káʼviyó xíʼin ña̱ xa̱a̱na ndakuchina? Kivi chindeétáʼanyó xíʼinna tá ná ka̱ʼa̱nyó xíʼinna ña̱ ná kaʼvina ndiʼi semana, ta xa̱a̱ ná kaʼvi kúeena. Ná sanáʼa̱yóna ña̱ ka̱ʼa̱nna xíʼin Jehová ndiʼi ki̱vi̱, ta vií kutáʼanna xíʼinra. Ta saátu ná ka̱ʼa̱nyó xíʼinna ña̱ ku̱ʼu̱nna ndiʼi reunión. (Koto recuadro “ Ña̱ xíniñúʼu keʼé na̱ káʼviyó xíʼin”). Nda̱a̱ táki̱ʼva kotoyó nu̱ú inka artículo, íyo u̱ʼu̱n ña̱ʼa ña̱ xíniñúʼu keʼé miíyó na̱ sánáʼa̱ na̱ yiví xa̱ʼa̱ Biblia ña̱ va̱ʼa chindeétáʼanyó xíʼinna ña̱ xa̱a̱na ndakuchina.

YAA 76 ¿Á kúsi̱í-iniún kéʼún chiñu Ndióxi̱?

^ párr. 5 Ña̱ sanáʼa̱yó iin na̱ yiví kúni̱ kachiña ña̱ chindeétáʼanyó xíʼinna ña̱ nasamana ki̱ʼva ña̱ ndákanixi̱nína, ña̱ ndóʼona xíʼin ña̱ kéʼéna. Mateo 28:19 ña̱ kúú texto ña̱ ku̱i̱ya̱ 2020 sa̱ndákaʼánña miíyó ña̱ ndáyáʼviní sanáʼa̱yó na̱ yiví xa̱ʼa̱ Biblia, ta saátu ña̱ sanáʼa̱yóna ndáaña kivi keʼéna ña̱ va̱ʼa xa̱a̱na koona discípulo ta̱ Jesucristo. Nu̱ú artículo yóʼo xíʼin ña̱ inka kotoyó ndáa ki̱ʼva viíka keʼéyó chiñu ña̱ ndáyáʼviní yóʼo.

^ párr. 1 2 Corintios 3:1-3: “¿Á ki̱xáʼa tukuyó káʼa̱n va̱ʼayó xa̱ʼa̱yó nu̱ú inkana? ¿Á xíniñúʼuyó iin na̱ yiví ña̱ ka̱ʼa̱n va̱ʼana xa̱ʼa̱yó xíʼin inkana? Ndóʼó kúú tutundi̱, ta nda̱a̱ táki̱ʼva íyo ña̱ ni̱ka̱ʼyi̱ níma̱ndi̱ saá íyoña, ta ndiʼi na̱ yiví xíni̱ña ta káʼvinaña. Saáchi náʼa̱ káxiña ña̱ ndóʼó kúúndó carta ta̱ Cristo ña̱ ka̱ʼyí ndi̱ʼi̱ na̱ káchíñu nu̱úra. Va̱ása níka̱ʼyi̱ña xíʼin tinta chi xíʼin espíritu Ndióxi̱ ta̱ táku ni̱ka̱ʼyi̱ña, su̱ví nu̱ú yu̱u̱ níka̱ʼyi̱ña, saáchi nu̱ú níma̱ndó ni̱ka̱ʼyi̱ña”.

^ párr. 2 ÑA̱ KÚNI̱ KACHIÑA: Tá xa̱a̱ ku̱a̱ʼá yichi̱ nátúʼunyó xíʼin iin na̱ yiví xa̱ʼa̱ Biblia ta xíniñúʼuyó iin tutu ña̱ tává na̱ ñuu Ndióxi̱ ña̱ va̱ʼa natúʼunyó xíʼinna, xa̱a̱ na̱ káʼviyó xíʼin kúúna. Tá xa̱a̱ ni̱na̱ʼa̱yó nu̱úna ndáa ki̱ʼva íyo ña̱ káʼviyó xíʼin na̱ yiví, ta náʼa̱na ña̱ ndixa kúni̱na sakuaʼakana ta xa̱a̱ u̱vi̱ yichi̱ ka̱ʼviyó xíʼinna, saá kúú ña̱ kivi kaʼyíyó nu̱ú informe ña̱ ndátaxiyó yo̱o̱ tá yo̱o̱ ña̱ kúúna iin na̱ káʼviyó xíʼin.

^ párr. 3 U̱vi̱ saá artículo yóʼo káʼa̱nña xa̱ʼa̱ ña̱ xa̱a̱ ka̱na nu̱ú serie “Dirijamos estudios bíblicos progresivos” ña̱ ka̱na tá julio ña̱ ku̱i̱ya̱ 2004 nda̱a̱ mayo ña̱ ku̱i̱ya̱ 2005 nu̱ú ña̱ Nuestro Ministerio del Reino.

^ párr. 4 Ni nda̱a̱ ndáaka ña̱ kéʼéyó ña̱ natúʼunyó xíʼin na̱ yiví, ndiʼi miíyó na̱ publicador xíniñúʼu kiʼinyó kuenta ña̱ va̱ása ya̱ʼandosóyó ley ña̱ káʼa̱n xa̱ʼa̱ na̱ yiví, tá kúú ña̱ va̱ása kivi natúʼunyó xíʼin inkana xa̱ʼa̱ ki̱vi̱na, número teléfonona, direcciónna á inkaka ña̱ʼa.

^ párr. 5 Lucas 14:27-33: “Na̱ va̱ása ndíso yitu̱n tú sáxo̱ʼvi̱ miína ta ndíku̱nna yi̱ʼi̱ va̱ása kivi xa̱a̱na koona discípuloi̱. 28 ¿Ndáa ndóʼó kúni̱ keʼé iin veʼe á va̱ása siʼna kundoondó ta tavándó ki̱ʼva á kita xu̱ʼúnndó ña̱ saxínundóña? 29 Chi sana kixáʼandó tavándó xa̱ʼa̱ña soo kǒo kuchiñundó saxínundóña, ta ndiʼi na̱ ná kuniña kixáʼana ku̱a̱kundaana ndóʼó 30 ta kachina: ‘Ta̱ ta̱a yóʼo ki̱xáʼara íxava̱ʼara veʼe, soo kǒo níkuchiñura saxínurañaʼ. 31 Tá iin rey kúúmiíra 10,000 soldado ta kúni̱ra ku̱ʼu̱nra kanitáʼanra xíʼin inka rey ta̱ kúúmií 20,000 soldado, ¿á su̱ví siʼna koora ta ndukúra consejo nu̱ú inkana á kuchiñura, á va̱ása kuchiñura? 32 Soo tá kíʼinra kuenta ña̱ va̱ása kuchiñura, va̱ʼaka chindaʼára na̱ kuniʼi tu̱ʼunra ña̱ ná ku̱ʼu̱nna kindo̱o va̱ʼana xíʼin inka ta̱ rey tá xíkáka va̱xira. 33 Ña̱kán, ndakaʼánndó tá iin ndóʼó va̱ása sándakoondo ndiʼi ña̱ kúúmiíndó, va̱ása kivi koondó discípuloi̱”.

^ párr. 8 Colosenses 1:9, 10: “Xa̱ʼa̱ ña̱yóʼo nda̱a̱ tá ki̱vi̱ xi̱niso̱ʼondi̱ xa̱ʼa̱ndó, ndákundeéndi̱ káʼa̱nndi̱ xa̱ʼa̱ndó xíʼin Ndióxi̱, ña̱ va̱ʼa ná sakuaʼakandó ndiʼi ña̱ kúni̱ra xíʼin ndiʼi ña̱ ndíchi kúúmiíra ta kunda̱a̱-inindó xíʼinña, 10 ña̱ va̱ʼa keʼéndó ña̱ kúni̱ Jehová ta sakusi̱índó-inira xíʼin ndiʼi ña̱ va̱ʼa kéʼéndó, ta ndakundeékandó sakuaʼandó xa̱ʼa̱ Ndióxi̱”.

^ párr. 9 Koto video ña̱ ku̱mí minuto ña̱ naní Ka̱ʼa̱n xíʼin na̱ káʼviún xíʼin ná kaʼyína nu̱ú tutuna. Nu̱ú JW Library®, ki̱ʼvi nu̱ú MULTIMEDIA > NUESTRAS REUNIONES Y MINISTERIO > MEJORE SUS HABILIDADES EN EL MINISTERIO.

^ párr. 10 Ki̱ʼvi NU̱Ú ÑÚʼU NDIʼIÑA > LIBRO XÍʼIN FOLLETO.

^ párr. 14 Hebreos 10:24, 25: “Ná kundi̱ʼi̱-iniyó xa̱ʼa̱ táʼanyó ta ná kuʼvi̱ka-iniyó kuni táʼanyó ta keʼéyó ña̱ va̱ʼa xíʼin táʼanyó, 25 ta kǒo sandákooyó ña̱ ndatakayó nda̱a̱ táki̱ʼva kéʼé inkana. Va̱ʼaka ná chika̱a̱yó ndee̱ xíʼin táʼanyó, saáchi kúnda̱a̱-iniyó ña̱ xa̱a̱ ku̱yatin kixaa̱ ki̱vi̱”.

^ párr. 14 Nu̱ú JW Library®, ki̱ʼvi nu̱ú MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.