Ir al contenido

Ir al índice

Nu̱ú Jehová ndáyáʼviní ña̱ ná ka̱ʼa̱nyó “saá ná koo”

Nu̱ú Jehová ndáyáʼviní ña̱ ná ka̱ʼa̱nyó “saá ná koo”

NU̱Ú Jehová ndáyáʼviní ña̱ ndásakáʼnuyóra. Kíʼinra kuenta xíʼin ña̱ kéʼéyó, xíniso̱ʼora ña̱ káʼa̱nyó xíʼinra ta saátu xítora ndiʼi ña̱ kéʼéyó ña̱ ndásakáʼnuyóra, ni kǒo ndáyáʼvi ña̱ kéʼéyó túviyó (Mal. 3:16). Tá kúú, ¿xa̱a̱ nda̱saa yichi̱ káʼa̱nyó tu̱ʼun saá ná koo? Sana ku̱a̱ʼání yichi̱ kúúña. ¿Á ndáyáʼvi ña̱ káʼa̱nyó tu̱ʼun loʼo yóʼo nu̱ú Jehová? Ndáyáʼvinívaña. Ña̱ va̱ʼa kunda̱a̱-iniyó nda̱chun ndáyáʼviña, ná kotoyó ndáaña kúni̱ kachiña ta nda̱saa xíniñúʼunaña nu̱ú Biblia.

“NDIʼI NA̱ ÑUU XÍNIÑÚʼU KA̱ʼA̱NNA: ʻSAÁ NÁ KOOʼ”

Tu̱ʼun amén kúni̱ kachiña “saá ná koo”. Ka̱naña ti̱xin tu̱ʼun hebreo ta kúni̱ kachiña “nda̱kú-ini” á “ña̱ kandíxayó”. Sava xi̱niñúʼunaña tá tíinna ku̱a̱chi xa̱ʼa̱ iin ña̱ʼa. Tá kúú na̱ yiví, xi̱ka̱ʼa̱nna “saá ná koo” ña̱ kunda̱a̱-ini inkana, ña̱ ndixa kúú ña̱ ni̱ka̱ʼa̱nna ta miína kúú na̱ ndíso ku̱a̱chi xa̱ʼa̱ ña̱yóʼo (Núm. 5:22). Tá ni̱ka̱ʼa̱nna ña̱yóʼo nu̱ú ku̱a̱ʼá na̱ yiví, ndeéka ndi̱ʼi̱-inina ña̱ saxi̱nuna ña̱ ni̱ka̱ʼa̱nna (Neh. 5:13).

Nu̱ú capítulo 27 ña̱ Deuteronomio, va̱xi nda̱saa xi̱niñúʼuna tu̱ʼun “saá ná koo”. Tá ni̱ki̱ʼvi na̱ ñuu Israel nu̱ú ñuʼú ña̱ ta̱xi Ndióxi̱ ndaʼa̱na, nda̱kutáʼanna nu̱ú íyo yukú Ebal xíʼin yukú Guerizim, ña̱ kuniso̱ʼona ña̱ káʼa̱n ley Ndióxi̱, ta saá ka̱ʼa̱nna á kúni̱na saxi̱nunaña. Tándi̱ʼi ña̱ ni̱ka̱ʼa̱nna xa̱ʼa̱ iin iin ña̱ʼa, xi̱niñúʼuna tu̱ʼun “saá ná koo” tá xi̱niso̱ʼona ndáaña kuu tá ná va̱ása saxi̱nuna ña̱ káʼa̱n ley (Deut. 27:15-26). ¿Á kivi ndakanixi̱níyó nda̱saa ku̱a̱ʼá na̱ ta̱a xíʼin ná ñaʼá xíʼin na̱ va̱lí ni̱ka̱ʼa̱n ña̱yóʼo? (Jos. 8:30-35). Sana ni va̱ása níndandosóna xa̱ʼa̱ tu̱ʼun ña̱ ni̱ka̱ʼa̱nna ki̱vi̱ kán. Xíni̱yó ña̱ sa̱xínuvanaña chi ña̱ Biblia káchiña: “Na̱ ñuu Israel, nda̱kundeéna ka̱chíñuna nu̱ú Jehová ndiʼi ki̱vi̱ ña̱ xi̱taku ta̱ Josué, ta ndiʼi ki̱vi̱ ña̱ ni̱xi̱yo na̱ xi̱ku̱a̱ʼa̱, na̱ xi̱taku tá ni̱xi̱ʼi̱ ta̱ Josué, na̱ xi̱xini ndiʼi ña̱ ke̱ʼé Jehová xíʼin na̱ ñuu Israel” (Jos 24:31).

Saátu ta̱ Jesús xi̱niñúʼura ña̱ tu̱ʼun “saá ná koo”, ña̱ va̱ʼa kunda̱a̱-ini na̱ xi̱ndiku̱nñaʼá ña̱ nina ña̱ nda̱a̱ kúú ña̱ káʼa̱nra, soo síínva xi̱niñúʼuraña. Va̱ása níxiniñúʼuraña tá ndi̱ʼi ni̱ka̱ʼa̱nna iin tu̱ʼun, chi xi̱xiniñúʼuraña tá kúma̱níka ka̱ʼa̱nra xa̱ʼa̱ iin ña̱ʼa ña̱ va̱ʼa kunda̱a̱-inina ña̱ kúúña ña̱ nda̱a̱. Ña̱kán tu̱ʼun ña̱ xi̱niñúʼura, kúni̱ kachiña “ña̱ nda̱a̱”.  Sava nda̱a̱ u̱vi̱ yichi̱ xi̱xiniñúʼura, “saá ná koo, saá ná koo” (Mat. 5:18; Juan 1:51). Xíʼin ña̱yóʼo ni̱na̱ʼa̱ra nu̱ú inkana ña̱ mií ña̱ nda̱a̱ kúú ña̱ káʼa̱nra. Va̱ʼava ni̱ka̱ʼa̱nra ña̱ kúúña ña̱ nda̱a̱ saáchi miíra ta̱xi Ndióxi̱ ndee̱ ndaʼa̱ ña̱ saxi̱nura ndiʼi ña̱ kúni̱ Jehová (2 Cor. 1:20; Rev. 3:14).

“TASAÁ NDIʼI NA̱ ÑUU NI̱KA̱ʼA̱NNA: ʻSAÁ NÁ KOOʼ, TA XI̱TANA NU̱Ú JEHOVÁ”

Saátu xi̱ka̱ʼa̱n na̱ ñuu Israel “saá ná koo” tá xi̱xitana ta xi̱ka̱ʼa̱nna xíʼin Jehová (Neh. 8:6; Sal. 41:13). Tá xi̱ka̱ʼa̱nna tu̱ʼun yóʼo tá ndi̱ʼi ña̱ xi̱ka̱ʼa̱nna xíʼin Ndióxi̱, kúni̱ kachiña ña̱ ku̱tóona ña̱ ni̱ka̱ʼa̱nna xíʼinra. Xa̱ʼa̱ ña̱ ndiʼina inkáchi xi̱ka̱ʼa̱n tu̱ʼun yóʼo tá xi̱ka̱ʼa̱n iinna xíʼin Ndióxi̱ va̱ʼaníka xi̱kitáʼanna xíʼinra. Saá kúú ña̱ ku̱u tá xi̱niʼi ta̱ rey David arca Jehová ni̱xa̱ʼa̱nra chí ñuu Jerusalén. Ke̱ʼéna iin vikó, ta ndiʼina xi̱ta iin yaa ña̱ ka̱ʼyí ta̱ David ta tá íyo ña̱ ni̱ka̱ʼa̱nna xíʼin Jehová saá ni̱xi̱yoña (1 Crón. 16:8-36). Liviní ni̱xi̱yo ña̱ xi̱tana kán, ña̱kán “ndiʼi na̱ ñuu ni̱ka̱ʼa̱nna: ʻSaá ná kooʼ, ta xi̱tana nu̱ú Jehová”. Xa̱ʼa̱ ña̱ inkáchi nda̱kuiin ndiʼina ni̱kusi̱íní-inina.

Ki̱ʼva saá ni̱xi̱yo ña̱ ke̱ʼé na̱ cristiano tá siglo nu̱ú, chi xi̱ka̱ʼa̱nna tu̱ʼun “saá ná koo” tá xi̱ndasakáʼnuna Jehová. Nda̱a̱ sava na̱ ka̱ʼyí tu̱ʼun Ndióxi̱, xi̱niñúʼuna tu̱ʼun yóʼo (Rom. 1:25; 16:27; 1 Ped. 4:11). Nda̱a̱ nu̱ú tutu Revelación káʼa̱nña xa̱ʼa̱ sava na̱ ángel na̱ íyo chí ndiví ña̱ ndásakáʼnuna Jehová ta káchina: “Saá ná koo” (Rev. 19:1, 4). Na̱ cristiano na̱ xi̱ndoo tá siglo nu̱ú xi̱ka̱ʼa̱nna “saá ná koo” tá ndíʼi káʼa̱n iinna xíʼin Ndióxi̱ tá xi̱ndatakana (1 Cor. 14:16). Soo su̱ví iin sana xíniñúʼu ka̱ʼa̱nna tu̱ʼun yóʼo.

¿NDA̱CHUN NDÁYÁʼVINÍ ÑA̱ KA̱ʼA̱NYÓ “SAÁ NÁ KOO”?

Xa̱ʼa̱ ña̱ xa̱a̱ sa̱kuaʼayó yóʼo, vitin kúnda̱a̱-iniyó nda̱chun ndáyáʼviní ña̱ ka̱ʼa̱nyó “saá ná koo”. Tá káʼa̱n miíyó xíʼin Ndióxi̱ ta xíniñúʼuyó tu̱ʼun yóʼo, náʼa̱yó ña̱ káʼa̱nyó xíʼin ndiʼi níma̱yó. Ta, tá káʼa̱nyóña, tá xa̱a̱ ndi̱ʼi ni̱ka̱ʼa̱n inkana xíʼin Ndióxi̱,  náʼa̱yó ña̱ va̱ʼava kúniyó xíʼin ña̱ ni̱ka̱ʼa̱nna. Ná ka̱ʼa̱nyó vitin xa̱ʼa̱ nda̱chunka ndáyáʼviní ka̱ʼa̱nyó “saá ná koo”.

Saáchi saá náʼa̱yó ña̱ ndítoyó ta kúsi̱í-iniyó ña̱ ndásakáʼnuyó Jehová. Ndásakáʼnuyó Jehová xíʼin ña̱ káʼa̱nyó “saá ná koo”, soo saátu ndásakáʼnuyóra tá to̱ʼó íyoyó tá xa̱a̱ káʼa̱nna xíʼinra. Tá kúni̱yó ndinuʼu koo iniyó xíʼin Ndióxi̱ ña̱ ka̱ʼa̱nyó “saá ná koo”, ña̱yóʼo chindeétáʼan xíʼinyó ña̱ táxin kooyó ta kuniso̱ʼo va̱ʼayó tá xa̱a̱ káʼa̱nna xíʼinra.

Saáchi saá náʼa̱yó ña̱ inkáchi kítáʼanyó xíʼin na̱ hermanoyó. Tá xa̱a̱ káʼa̱nna xíʼin Jehová, ndiʼiyó na̱ congregación xíniso̱ʼo va̱ʼayó ña̱ káʼa̱nna (Hech. 1:14; 12:5). Tá ni̱xa̱a̱ña-iniyó ta kúni̱yó ka̱ʼa̱nyó “saá ná koo”, saá va̱ʼaníka kítáʼanyó xíʼin táʼanyó. Ni ndeé ná ka̱ʼa̱nyó “saá ná koo” á kúee ná ka̱ʼa̱nyó, Jehová xíniso̱ʼovara ta kúni̱ra taxira ndaʼa̱yó ña̱ ndu̱kúyó nu̱úra.

Tá káʼa̱nyó “saá ná koo”, ndásakáʼnuyó Jehová.

Saáchi saá ndásakáʼnuyó Jehová. Kíʼinra kuenta xíʼin ndiʼi ña̱ kéʼéyó ña̱ va̱ʼa ndásakáʼnuyóra, ni loʼova kúú ña̱ kéʼéyó nu̱úra (Luc. 21:2, 3). Kúnda̱a̱-inira nda̱chun ndásakáʼnuyóra ta xítora ña̱ íyo níma̱yó. Ni xíʼin teléfono kúú ña̱ xíniso̱ʼoyó ña̱ yáʼa reunión, Ndióxi̱ xíniso̱ʼovara tá káʼa̱nyó “saá ná koo”. Tá káʼa̱nyó ña̱yóʼo, inkáchi ndásakáʼnuyóra xíʼin na̱ congregación.

Táki̱ʼva xa̱a̱ ku̱nda̱a̱-iniyó, tá ka̱ʼa̱nyó “saá ná koo” sana iin ña̱ va̱ása ndáyáʼvi kúúña túviyó, soo su̱ví saá íyoña. Nu̱ú libro ña̱ Perspicacia káchiña chi tu̱ʼun yóʼo, kivi kuniñúʼuyóña ña̱ na̱ʼa̱yó ña̱ kándíxayó ña̱ saxi̱nuna ña̱ ndúkúyó nu̱ú iinna. Ña̱kán ndiʼi yichi̱ ña̱ ná káʼa̱nyó “saá ná koo”, kusi̱íníka-ini Jehová xíʼinyó (Sal. 19:14).