Ir al contenido

Ir al índice

 CAPÍTULO 10

¿Ndáaña káʼa̱n Biblia xa̱ʼa na̱ ángel xíʼin na̱ ta̱chí ndi̱va̱ʼa?

¿Ndáaña káʼa̱n Biblia xa̱ʼa na̱ ángel xíʼin na̱ ta̱chí ndi̱va̱ʼa?
  • ¿Á chíndeé na̱ ángel na̱ yiví?

  • ¿Ndáaña kéʼé na̱ ta̱chí ndi̱va̱ʼa xíʼin na̱ yiví?

  • ¿Á xíniñúʼu yi̱ʼvíyó na̱ ta̱chí ndi̱va̱ʼa?

1. ¿Nda̱chun kúú ña̱ xíniñúʼu sakuaʼayó xa̱ʼa na̱ ángel?

TÁ XÍNI̱YÓ iin na̱ yiví, xíni̱tuyó xa̱ʼa na̱ veʼevana. Saá íyo Jehová, tá xíni̱yóra xíniñúʼu kuxini̱yó xa̱ʼa se̱ʼera na̱ íyo xíʼinra chí ndiví. Na̱yóʼo kúú na̱ ángel, ña̱ Biblia káʼa̱n xa̱ʼana ña̱ kúúna “se̱ʼe Ndióxi̱” (Job 38:7). Soo ¿ndáa ki̱ʼva xíniñúʼu Jehová na̱yóʼo ña̱ va̱ʼa kéʼéra ña̱ kúni̱ra? ¿Á xa̱a̱ chi̱ndeéna na̱ yiví tiempo xi̱naʼá? ¿Á chíndeé na̱ ángel miíyó? Tá chíndeéna miíyó, ¿ndáa ki̱ʼva kéʼénaña?

2. ¿Ndáana i̱xava̱ʼa na̱ ángel, ta nda̱saana íyo?

2 Ña̱ Biblia ku̱a̱ʼání yichi̱ káʼa̱nña xa̱ʼa na̱ ángel. Ná kotoyó sava nu̱ú káʼa̱nña xa̱ʼana, ña̱ va̱ʼa kunda̱a̱-iniyó xa̱ʼana. ¿Ndáana i̱xava̱ʼa na̱ ángel? Colosenses 1:16 káchiña: “Saáchi sa̱tá ta̱yóʼo na̱kuva̱ʼa ndiʼi ña̱ʼa chí ndiví xíʼin ña̱ íyo nu̱ú ñuʼú”. Jehová xi̱niñúʼura se̱ʼera ta̱ Jesús ña̱ i̱xava̱ʼara na̱ ángel. ¿Nda̱saa na̱ ángel íyo? Ña̱ Biblia káchiña íyo millón na̱ ángel ta ndiʼina íyo ndée (Salmo 103:20). *

3. ¿Ndáaña sánáʼa̱ Job 38:4-7 miíyó xa̱ʼa na̱ ángel?

 3 Ña̱ Biblia káchiña, tá ki̱vi̱ ke̱ʼé Jehová ñuʼú yóʼo, ndiʼi na̱ se̱ʼera ki̱xaʼána ndeéní xítana nu̱úra (Job 38:4-7). Ña̱ texto yóʼo táxiña kúnda̱a̱-iniyó siʼnaka na̱ ángel na̱kuva̱ʼa nu̱ú na̱ yiví xíʼin ñuʼú. Saátu káchiña na̱ ángel íyona táki̱ʼva íyo miíyó chi ni̱kusi̱í-inina, ndiʼina inkáchi ni̱kusi̱í-ini. Ña̱yóʼo kúni̱ kachiña tá tiempo xi̱naʼá, na̱ ángel inkáchi xi̱táʼan ndiʼina ta inkáchi xi̱kachíñuna nu̱ú Jehová.

NA̱ ÁNGEL CHÍNDEÉNA MIÍYÓ

4. ¿Nda̱saa náʼa̱ Biblia ña̱ ndíʼi̱ní-ini na̱ ángel xa̱ʼa ña̱ kéʼé na̱ yiví?

4 Tá xi̱ni na̱ ángel na̱kuva̱ʼa ta̱ Adán xíʼin ñá Eva, tiempo saáví ki̱xaʼá ndíʼi̱ní-inina xa̱ʼa na̱ yiví, saátu ndíʼi̱ní-inina xa̱ʼa ña̱ xi̱nu ña̱ kúni̱ Ndióxi̱ (Proverbios 8:30, 31; 1 Pedro 1:11, 12). Soo, ña̱ xítona ku̱a̱ʼá na̱ yiví sándákoo Jehová, sákusuchíníña-inina. Tá ki̱vi̱ ndíkó iinlá na̱ yiví ndásakáʼnuna Jehová, kúsi̱íní-ini na̱ ángel (Lucas 15:10). Táki̱ʼva sákuaʼayó yóʼo, na̱ ángel ndíʼi̱ní-inina xa̱ʼa na̱ ndásakáʼnu Jehová. Xa̱ʼa ña̱yóʼo xa̱a̱ tiempo xi̱naʼá xi̱niñúʼu Jehová na̱ ángel ña̱ xi̱ndaara na̱ xi̱ndasakáʼnu-ñaʼá xíʼin ndinuʼu-inina ta saátu ña̱ chi̱ndeénana (kaʼvi Hebreos 1:7, 14). Ná sákuaʼayó xa̱ʼa savana.

“Ndióxi̱ miíi̱ chi̱ndaʼára iin ángel ki̱xi nda̱sira yuʼú tí león.” (Daniel 6:22)

5. ¿Ndáana chi̱ndeé táʼan na̱ ángel xíʼin káchi Biblia?

5 Tá sa̱ndíʼi-xa̱ʼa Jehová ñuu Sodoma xíʼin ñuu Gomorra xa̱ʼa ña̱ ni̱xi̱yoní ña̱ kini, ta̱ Lot xíʼin ná síʼí se̱ʼera ni̱ka̱kuna saáchi u̱vi̱ na̱ ángel ta̱váñaʼá (Génesis 19:15, 16). Ni̱ya̱ʼa ku̱a̱ʼá ku̱i̱ya̱, saá chi̱ka̱a̱na ta̱ profeta Daniel ya̱vi̱ nu̱ú ñúʼu tí león, soo kǒo ña̱ níndoʼora. Ta̱ Daniel ni̱ka̱ʼa̱nra: “Ndióxi̱ miíi̱ chi̱ndaʼára iin ángel ki̱xi nda̱sira yuʼú tí león” (Daniel 6:22). Tá siglo nu̱ú ña̱ tiempo ndóoyó vitin, iin ángel ta̱vá ta̱ apóstol Pedro  veʼeka̱a (Hechos 12:6-11). Saátu ta̱ Jesús chi̱ndeéñaʼá na̱ ángel tá ni̱xi̱yora nu̱ú ñuʼú yóʼo (Marcos 1:13). Tá kúma̱ní loʼoka kuvira, ki̱ta iin ángel nu̱úra ta chi̱ndeérara (Lucas 22:43). Ndu̱ndakúkaví-ini ta̱ Jesús ña̱ chi̱ndeé na̱ ángel miíra tá xi̱ndika̱a̱ra tu̱ndóʼo.

6. a) ¿Ndáa ki̱ʼva ndáa na̱ ángel na̱ ñuu Ndióxi̱ tiempo vitin? b) ¿Ndáa pregunta kúú ña̱ kunda̱a̱-iniyó xa̱ʼa?

6 Tiempo vitin kǒoka na̱ ángel xíniyó, saáchi kǒokana kíxi ña̱ kuniyóna nu̱ú ñuʼú yóʼo. Soo ndáava na̱ ángel na̱ ñuu Ndióxi̱ ña̱ va̱ʼa ná kǒo sandákoona ña̱ ndásakáʼnunara. Ña̱ Biblia káchiña: “Ta̱ ángel Jehová íyora xíʼin na̱ yíʼví xíniñaʼá, ta sáka̱kurana” (Salmo 34:7). ¿Nda̱chun kúsi̱í-iniyó xíʼin tu̱ʼun yóʼo? Saáchi íyo na̱ ángel ndi̱va̱ʼa, ta kúni̱na sandiʼi-xa̱ʼana miíyó. ¿Ndáana kúúna? ¿Ndáa míí ke̱ena? ¿Ndáaña kúni̱na keʼéna xíʼinyó? Ña̱ va̱ʼa kunda̱a̱-iniyó ná kotoyó ña̱ ku̱u tá xa̱ʼa.

NA̱ SÁA̱-INI XÍNI MIÍYÓ

7. ¿Nda̱saa na̱ yiví sa̱kúxika ta̱ Ndi̱va̱ʼa nu̱ú Ndióxi̱?

7 Táki̱ʼva sa̱kuaʼayó nu̱ú capítulo 3, ni̱xi̱yo iin ángel ta̱ nda̱kanixi̱ní ña̱ kaʼndachíñura nu̱ú na̱ yiví, xa̱ʼa ña̱ nda̱kanixi̱níra saá ndu̱ura contra Ndióxi̱. Tasaá nda̱kunaníra ta̱ Ndi̱va̱ʼa (Revelación 12:9). Tándi̱ʼi sa̱ndáʼvira ñá Eva, ti̱xin 1,600 ku̱i̱ya̱ na̱kuchiñura sa̱kúxikara ku̱a̱ʼání na̱ yiví nu̱ú Ndióxi̱. Ndáa si̱lóʼo kúú na̱ xi̱ndasakáʼnu Ndióxi̱; tá kúú ta̱ Abel, ta̱ Enoc xíʼin ta̱ Noé (Hebreos 11:4, 5, 7).

8. a) ¿Nda̱chun ni̱xa̱a̱ sava na̱ ángel ndu̱una ta̱chí ndi̱va̱ʼa? b) ¿Ndáaña ke̱ʼé na̱ ta̱chí ndi̱va̱ʼa ña̱ va̱ʼa ni̱ka̱kuna tá ko̱on sa̱vi̱ kini?

8 Tá tiempo ta̱ Noé ni̱xi̱yo savaka na̱ ángel na̱ kǒo níxiinka kachíñu nu̱ú Ndióxi̱, sa̱ndákoona chí ndiví ta ki̱xina nu̱ú ñuʼú ta ndu̱una nda̱a̱ táki̱ʼva íyo na̱ yiví. ¿Nda̱chun ki̱xina? Génesis 6:2 káchiña xíʼinyó: “Na̱ ángel se̱ʼe Ndióxi̱ ki̱xaʼána xítona ná se̱ʼe na̱ ta̱a, chi  va̱ʼaní náʼa̱ná, ta ki̱xaʼána ndáka̱xinnaná ña̱ tindaʼa̱ná xíʼinná, tasaá ku̱a̱ʼáná nda̱ka̱xinna”. Na̱ ta̱chí ndi̱va̱ʼa, chi̱núuna yichi̱ nu̱ú na̱ yiví ña̱ keʼéna ña̱ kini. Soo, Jehová kǒo nítaxikara keʼéna ña̱yóʼo ndiʼi tiempo. Xa̱ʼa ña̱yóʼo Jehová sa̱kóonra sa̱vi̱ kini ta ni̱xi̱ʼi̱ ndiʼi na̱ yiví na̱ xi̱keʼé ña̱ kini; ndáa na̱ yiví va̱ʼa kuití ni̱ka̱ku (Génesis 7:17, 23). Ña̱ va̱ʼa ka̱ku na̱ ta̱chí ndi̱va̱ʼa, á na̱ demonio, sa̱ndákoona ku̱ñu ña̱ xi̱kuumiína ta ndi̱kóna chí ndiví. Xa̱ʼa ña̱ ke̱ʼéna ni̱na̱ʼa̱na ña̱ nda̱kutáʼanna xíʼin ta̱ Ndi̱va̱ʼa, ña̱kán ndu̱ura iin ta̱ xáʼndachíñu nu̱úna (Mateo 9:34).

9. a) ¿Ndáaña ndo̱ʼo na̱ ta̱chí ndi̱va̱ʼa tá ndi̱kóna chí ndiví? b) ¿Ndáaña sákuaʼayó xa̱ʼa na̱ ta̱chí ndi̱va̱ʼa?

 9 Tá ki̱vi̱ ndi̱kó na̱ ángel yóʼo chí ndiví, va̱ása níxiinka Ndióxi̱ taxira koona xíʼinra, nda̱a̱ táki̱ʼva ke̱ʼéra xíʼin ta̱ Ndi̱va̱ʼa saátu i̱xaara xíʼin na̱yóʼova (2 Pedro 2:4). Ña̱ tiempo vitin va̱ása kúchiñukana xa̱a̱ tukuna nduuna nda̱a̱ táki̱ʼva íyo na̱ yiví, soo íyova ndéena ña̱ íxandi̱va̱ʼana xíʼin na̱ yiví. Ta̱ Ndi̱va̱ʼa chíndeérana ña̱ sándáʼvina na̱ yiví (Revelación 12:9; 1 Juan 5:19). ¿Nda̱saa sándáʼvinana? Ku̱a̱ʼá ña̱ʼa xíniñúʼuna ña̱ sándáʼvinana (kaʼvi 2 Corintios 2:11). Ná kotoyó sava ña̱ xíniñúʼuna.

¿NDA̱SAA SÁNDÁʼVI NA̱ TA̱CHÍ NDI̱VA̱ʼA NA̱ YIVÍ?

10. ¿Ndáa ña̱ʼa xíniñúʼu na̱ ta̱chí ndi̱va̱ʼa ña̱ sándáʼvina na̱ yiví?

10 Tiempo vitin, ku̱a̱ʼání na̱ yiví ñúʼuna ndaʼa̱ na̱ ta̱chí ndi̱va̱ʼa chi kéʼéna ña̱ tási, ña̱ magia, ña̱ adivinación, ku̱a̱ʼa̱nna nu̱ú na̱ ndákuati ta nátúʼunna xíʼin na̱ ni̱xi̱ʼi̱. Ña̱ Biblia káʼa̱nña xíʼinyó ña̱ va̱ása va̱ʼa keʼéyó ndiʼi ña̱yóʼo (Deuteronomio 18:10-12; Gálatas 5:19-21). Ndiʼi ña̱yóʼo xíniñúʼu na̱ ta̱chí ndi̱va̱ʼa ña̱ sándáʼvina na̱ yiví. Táki̱ʼva íxaa iin na̱ tíin ti̱a̱ká ku̱a̱ʼání ña̱ʼa xíniñúʼuna ña̱ va̱ʼa tiinnarí, saátu kéʼé na̱ ta̱chí ndi̱va̱ʼa xíʼinyó, ku̱a̱ʼá ña̱ʼa xíniñúʼuna ña̱ sándáʼvina miíyó.

11. ¿Ndáaña kúú adivinación, ta nda̱chun kúú ña̱ va̱ása va̱ʼa keʼéyóña?

11 Iin ña̱ xíniñúʼuna kúú ña̱ adivinación. ¿Ndáaña kúú adivinación? Ña̱yóʼo kúú ña̱ xíniñúʼuna ña̱ kunda̱a̱-inina xa̱ʼa ndáaña ndoʼo iin na̱ yiví chí nu̱únínu. Tá kúú tá xítona tu̱ni̱ ndaʼa̱, á xítonaña xíʼin baraja á xíniñúʼutuna saa válí tí tává suerte, saátu tá káʼa̱nna xíʼin na̱ ni̱xi̱ʼi̱. Saátu ña̱ kúni̱na kunda̱a̱-inina xa̱ʼa xa̱ni ña̱ ni̱xa̱nina. Ku̱a̱ʼánína ndákanixi̱nína ña̱ va̱ʼava keʼéyóña chi su̱ví ku̱a̱chiví kúúña káchina, soo Biblia káchiña  ndiʼi na̱ kéʼé ña̱yóʼo kítáʼanna xíʼin na̱ ta̱chí ndi̱va̱ʼa. Ña̱ Hechos 16:16-18 káchiña iin ta̱chí ndi̱va̱ʼa xi̱kuumií iin ñá loʼo, ña̱kán va̱ʼa xi̱ka̱ʼa̱nñá xa̱ʼa ña̱ kuu chí nu̱únínu. Tá ki̱vi̱ ki̱ta ña̱ ta̱chí ndi̱va̱ʼa yóʼo iniñá kǒo níkivika kunda̱a̱-iniñá xa̱ʼa ña̱ kuu chí nu̱únínu.

Na̱ ta̱chí ndi̱va̱ʼa ku̱a̱ʼání ña̱ʼa xíniñúʼuna ña̱ sándáʼvina na̱ yiví

12. ¿Nda̱chun va̱ása va̱ʼa ka̱ʼa̱nyó xíʼin na̱ ni̱xi̱ʼi̱?

12 Inka ña̱ kéʼé na̱ ta̱chí ndi̱va̱ʼa kúú ña̱ sándáʼvina na̱ yiví ña̱ ná ka̱ʼa̱nna xíʼin na̱ ni̱xi̱ʼi̱. Na̱ xákuní xa̱ʼa táʼan, ku̱a̱ʼá ña̱ʼa káʼa̱nna xíʼinna xa̱ʼa na̱yóʼo, soo su̱ví ña̱ ndixa kúúña. Sava xáʼa̱nna nu̱ú na̱ ndákuati, ta na̱yóʼo káʼa̱nna xíʼinna xa̱ʼa na̱ ni̱xi̱ʼi̱ soo su̱ví ña̱ ndixa kúú ndiʼivíña á savatu ndákiʼinna tu̱ʼun na̱ ni̱xi̱ʼi̱ yóʼo. Xa̱ʼa ña̱yóʼo ku̱a̱ʼána ndákanixi̱ní ña̱ kíndo̱o níma̱ na̱ ni̱xi̱ʼi̱ ta kivi chindeʼé táʼanña xíʼinna. Soo su̱ví ña̱ ndixa kúú ña̱yóʼo, saáchi na̱ ta̱chí ndi̱va̱ʼa kivi ndakiʼinna tu̱ʼun na̱ ni̱xi̱ʼi̱ yóʼo ta kivi natúʼunna xa̱ʼana xíʼin na̱ ndákuati (1 Samuel 28:3-19). Táki̱ʼva sa̱kuaʼayó nu̱ú capítulo 6 tá xíʼi̱  iin na̱ yiví kǒoka ña̱ kivi keʼéna (Salmo 115:17). Ña̱kán na̱ káʼa̱n xíʼin na̱ ni̱xi̱ʼi̱ na̱ xa̱a̱ sa̱ndáʼvi na̱ ta̱chí ndi̱va̱ʼa kúúna, ta ña̱ kéʼéna kǒo kúni̱ Ndióxi̱ xíniraña (kaʼvi Deuteronomio 18:10, 11; Isaías 8:19). Ná chika̱a̱yó ndée ña̱ kǒo keʼéyó ña̱ kúni̱ na̱ ta̱chí ndi̱va̱ʼa.

13. ¿Ndáaña ke̱ʼé sava na̱ xi̱yi̱ʼví nu̱ú na̱ ta̱chí ndi̱va̱ʼa?

13 Na̱ ta̱chí ndi̱va̱ʼa su̱ví na̱ sándáʼvi kuití kuuna, chi sáyi̱ʼvítuna na̱ yiví. Ta̱ Ndi̱va̱ʼa xíʼin na̱ ta̱chí ndi̱va̱ʼa xíni̱na si̱lóʼo tiempo kíndo̱o ta ndiʼi-xa̱ʼana, ña̱kán íxandi̱va̱ʼanína xíʼin na̱ yiví (Revelación 12:12, 17). Ku̱a̱ʼání na̱ yiví na̱ xi̱yi̱ʼví na̱ ta̱chí ndi̱va̱ʼa, va̱ása yíʼvikana xíninana vitin. ¿Nda̱chun va̱ása yíʼvikana xíninana? ¿Ndáaña keʼéyó ña̱ va̱ʼa ná kǒo sándáʼvikana miíyó?

¿NDÁAÑA KEʼÚN ÑA̱ VA̱ʼA NÁ KǑO NDAKAVAÚN NDAʼA̱ TA̱ NDI̱VA̱ʼA?

14. ¿Ndáa ki̱ʼva kuxíkayó nu̱ú na̱ ta̱chí ndi̱va̱ʼa nda̱a̱ táki̱ʼva ke̱ʼé na̱ cristiano ñuu Éfeso na̱ xi̱ndoo siglo nu̱ú?

14 Ña̱ Biblia káʼa̱nña xíʼinyó ndáa ki̱ʼva kuxíkayó nu̱ú na̱ ta̱chí ndi̱va̱ʼa. Ná kotoyó ndáaña ke̱ʼé na̱ cristiano na̱ xi̱ndoo ñuu Éfeso tá siglo nu̱ú. Tá kúma̱ní kuuna cristiano, savana xi̱keʼéna ña̱ magia. Tá sa̱ndákoonaña, ¿ndáaña ke̱ʼékana? Ña̱ Biblia kachiña: “Ku̱a̱ʼání na̱ xi̱keʼé ña̱ magia nda̱kayana librona ta xa̱ʼminaña nu̱ú ndiʼina” (Hechos 19:19). Na̱ cristiano na̱ xi̱ndoo tiempo saá xa̱ʼmina librona ña̱ magia, tasaá sa̱ndákoona iin yichi̱ nu̱ú na̱ yiví na̱ ndóo tiempo vitin ndáaña keʼéna ña̱ va̱ʼa ná kǒo ndakavana ndaʼa̱ ta̱ Ndi̱va̱ʼa. Ndiʼi na̱ kúni̱ ndasakáʼnu Jehová xíniñúʼu sandiʼi-xa̱ʼana ndiʼi ña̱ʼa ña̱ kítáʼan xíʼin ña̱ adivinación á ña̱ magia. Tá kúú libro, revista, película xíʼin yaa ña̱ káʼa̱n xa̱ʼa magia. Saátu va̱ása va̱ʼa kuniñúʼuna amuleto á inkaka ña̱ʼa ña̱ ndáa miína (1 Corintios 10:21).

15. ¿Ndáaña xíniñúʼu keʼéyó ña̱ va̱ʼa ná kǒo sándáʼvi ta̱ Ndi̱va̱ʼa miíyó?

 15 Ni̱ya̱ʼa loʼo ku̱i̱ya̱ tá xa̱ʼmi na̱ cristiano ñuu Éfeso librona ña̱ magia, ta̱ apóstol Pablo ni̱ka̱ʼa̱nra xíʼinna: ʻKáni táʼanyó xíʼin na̱ ta̱chí ndi̱va̱ʼaʼ (Efesios 6:12). Ña̱yóʼo kúni̱ kachiña na̱ ta̱chí ndi̱va̱ʼa sándáʼvikavana na̱ yiví, ta xi̱kuni̱kana kundi̱va̱ʼana xíʼin na̱ cristiano. Ña̱kán, ¿ndáaña xi̱niñúʼu ke̱ʼékana? Ta̱ Pablo ni̱ka̱ʼa̱nra xíʼinna, ndakú va̱ʼa ná koo ña̱ kándíxana Ndióxi̱ ña̱ va̱ʼa ná kǒo keʼéna ña̱ kúni̱ ta̱ Ndi̱va̱ʼa (Efesios 6:16). Tá ndakú ná koo iniyó, kǒo kandíxayó keʼéyó ña̱ kúni̱ ta̱ Ndi̱va̱ʼa (Mateo 17:20).

16. ¿Ndáaña keʼéyó ña̱ va̱ʼa kandíxakayó Ndióxi̱?

16 Tá saá, ¿ndáaña xíniñúʼu keʼéyó ña̱ va̱ʼa kandíxakáyó Ndióxi̱? Xíniñúʼu kaʼviyó Biblia. Ña̱ va̱ʼa ná kǒo nduva iin nama̱, xíniñúʼu kúnu kundika̱a̱ xa̱ʼaña. Táki̱ʼva saá íyoyó, ña̱ va̱ʼa kandíxakáyó Ndióxi̱ xíniñúʼu kuxini̱ va̱ʼakayó xa̱ʼa tu̱ʼunra. Tá káʼviyó Biblia ndiʼi ki̱vi̱ saá kúú ña̱ kandíxakayóra. Nda̱a̱ táki̱ʼva íyo iin nama̱ ña̱ va̱ʼaní na̱kuva̱ʼa saá koo ña̱ kandíxayó Ndióxi̱, chindeéña miíyó ña̱ va̱ʼa ya̱ʼayó nu̱ú ndiʼi trampa ta̱ Ndi̱va̱ʼa (1 Juan 5:5).

17. ¿Ndáaña xíniñúʼu keʼéyó ña̱ va̱ʼa kundaayó miíyó nu̱ú na̱ ta̱chí ndi̱va̱ʼa?

17 ¿Ndáaña ke̱ʼéka na̱ cristiano na̱ ñuu Éfeso? Xa̱ʼa ña̱ xi̱ndoona iin ñuu nu̱ú ni̱xi̱yoní na̱ ta̱chí ndi̱va̱ʼa, xi̱niñúʼu kundaanína miína. Ña̱kán ni̱ka̱ʼa̱n ta̱ Pablo xíʼinna ndiʼi yichi̱ ná ka̱ʼa̱nnína xíʼin Ndióxi̱ (Efesios 6:18). Saátu miíyó ndóoyó iin ñuyǐví nu̱ú íyoní na̱ ta̱chí ndi̱va̱ʼa, ña̱ va̱ʼa ya̱ʼayó nu̱ú ndiʼi ña̱ kúni̱ ta̱ Ndi̱va̱ʼa keʼéyó xíniñúʼu ka̱ʼa̱nyó xíʼin Jehová ña̱ ná kundaara miíyó. Iin ña̱ xíniñúʼu keʼéyó kúúña ná kuniñúʼuyó ki̱vi̱ Jehová tá káʼa̱nyó xíʼinra (kaʼvi Proverbios 18:10). Xíniñúʼu ka̱ʼa̱n ni̱ʼiyó xíʼinra ña̱ ná kundaara miíyó nu̱ú ta̱ Ndi̱va̱ʼa (Mateo  6:13). Tá káʼa̱nyó xíʼinra, taxivara ña̱ ndúkúyó nu̱úra (Salmo 145:19).

18, 19. a) ¿Nda̱chun va̱ʼa xíni̱yó ña̱ kuchiñuyó xíʼin na̱ ta̱chí ndi̱va̱ʼa? b) ¿Ndáaña sakuaʼayó nu̱ú inka capítulo?

18 Ña̱ nda̱a̱ kúúña na̱ ta̱chí ndi̱va̱ʼa íyoka ndéena nu̱ú miíyó, soo va̱ása yi̱ʼvíyó nu̱úna. Tá kéʼéyó ña̱ kúni̱ Ndióxi̱ ta̱ Ndi̱va̱ʼa kǒo keʼékara miíyó (kaʼvi Santiago 4:7, 8). Ndée ña̱ kúúmií na̱ ta̱chí ndi̱va̱ʼa loʼova kúúña. Tá tiempo ta̱ Noé, Ndióxi̱ ta̱xira castigo ndaʼa̱ na̱ ta̱chí ndi̱va̱ʼa, ta chí nu̱únínu ndatiinra ku̱a̱chi xíʼinna (Judas 6). Saátu xíniñúʼu ndakaʼányó ña̱ ndáa na̱ ángel Jehová miíyó (2 Reyes 6:15-17). Na̱ ángel Jehová xíto va̱ʼana ña̱ kéʼéyó ta chíka̱a̱na ndée miíyó ña̱ va̱ʼa kuchiñuyó xíʼin ta̱ Ndi̱va̱ʼa. Ná kǒo sandákooyó ña̱ kutáʼanyó xíʼin Jehová ta saátu xíʼin na̱ ángel. Saátu ná kǒo keʼéyó ña̱ adivinación, ña̱ magia xíʼin ndiʼika ña̱ ítáʼan xíʼin ña̱yóʼo, va̱ʼaka ná keʼéyó ña̱ káʼa̱n tu̱ʼun Ndióxi̱ (1 Pedro 5:6, 7; 2 Pedro 2:9). Tasaá kuchiñuyó xíʼinna.

19 Soo, ¿nda̱chun kúú ña̱ táxi Ndióxi̱ ña̱ íyo na̱ ta̱chí Ndi̱va̱ʼa xíʼin tu̱ndóʼo? Nu̱ú inka capítulo ka̱ʼa̱nyó xa̱ʼa ña̱yóʼo.

^ párr. 2 Revelación 5:11 káchiña xa̱ʼa na̱ ángel va̱ʼa: Ku̱a̱ʼání na̱ íyo, yáʼa millón ta millón na̱ íyo (táki̱ʼva káchi nota). Ña̱ Biblia káchiña Ndióxi̱ ke̱ʼéra millón na̱ ángel.