Ir al contenido

Ir al índice

 HISTORIA 79

Tañu tí león ndíka̱a̱ ta̱ Daniel

Tañu tí león ndíka̱a̱ ta̱ Daniel

KOTO ndaʼa̱ tu̱ndóʼo káʼnu ndíka̱a̱ ta̱ Daniel. Soo tí león yóʼo kǒo ña̱ íxaarí xíʼinra. ¿Á xíni̱ún ndachun kǒo ña̱ íxaarí xíʼinra? ¿Ndáana chi̱ka̱a̱ ta̱ Daniel nu̱ú ñúʼu tí león yóʼo? Yóʼo sakuaʼayó xa̱ʼaña.

Ta̱ Darío kúú rey ñuu Babilonia vitin ta kúsi̱íní-inira xíʼin ta̱ Daniel, saáchi ta̱ Daniel yóʼo va̱ʼaní ta̱a kúúra ta ndíchiníra. Ña̱kán ta̱xira iin chiñu káʼnu ndaʼa̱ra ña̱ kaʼndachíñura xíʼinra. Xa̱ʼa ña̱yóʼo savana sáa̱-inina xínina ta̱ Daniel, ña̱kán ke̱ʼéna ña̱yóʼo:

Ku̱a̱ʼa̱nna nu̱ú ta̱ Darío ta káchina xíʼinra: ʼNdiʼindi̱ kúni̱ndi̱ táta rey ná keʼún iin ley ña̱ ka̱ʼa̱n, nda̱a̱ ni iinna kǒo kivi ka̱ʼa̱nna xíʼin ndióxi̱na ti̱xin ña̱ 30 ki̱vi̱, iinlá miíún kúú ta̱ ka̱ʼa̱nna xíʼin. Tá iinna kǒo kándíxa ña̱yóʼo chika̱únna ya̱vi̱ nu̱ú ñúʼu tí leónʼ. Ta̱ Darío kǒo xíni̱ra ndáa xa̱ʼa kúú ña̱ kúni̱na keʼéna ley yóʼo. Soo, va̱ʼava ña̱ káʼa̱nna túvira ta saá i̱xaara. Ta vitin kǒo kivi nasamara ley yóʼo.

Tá na̱kunda̱a̱-ini ta̱ Daniel xa̱ʼa ña̱yóʼo, ku̱a̱ʼa̱nra chí veʼera ta káʼa̱n tá káʼa̱nkavara xíʼin Ndióxi̱. Na̱ ndi̱va̱ʼa-ini yóʼo xíni̱na kǒo ndakoo ta̱ Daniel ña̱ ka̱ʼa̱nra xíʼin Jehová. Kúsi̱í-inina chi ña̱ túvi miína kuchiñuna sandiʼi-xa̱ʼana ta̱ Daniel.

Tá na̱kunda̱a̱-ini ta̱ Darío xa̱ʼa ña̱yóʼo ni̱kusuchíní-inira. Soo kǒo kívi nasamara ley, tasaá xa̱ʼndara chiñu ña̱ ná chika̱a̱na ta̱ Daniel ya̱vi̱ nu̱ú ñúʼu tí león. Soo ta̱ Darío káʼa̱nra xíʼin ta̱ Daniel: ʼMiíka Ndióxi̱ ta̱ ndásakáʼnún ná chindeé yóʼóʼ.

Ni̱ndi̱ʼi̱kaví-ini ta̱ Darío ni loʼo kǒo níxiinña ku̱su̱nra ñu̱ú saá. Tá ni̱tu̱vi inka ki̱vi̱ xínura ku̱a̱ʼa̱nra nu̱ú ñúʼu tí león. Koto nu̱ú na̱ʼná yóʼo va̱xira. Ta kánara ta̱ Daniel: ʼDaniel, ¿á ni̱kuchiñu Ndióxi̱ ta̱ ndásakáʼnún sa̱kákura yóʼó?ʼ

Ta̱ Daniel nda̱kuiinra: ʼNdióxi̱ chi̱ndaʼára iin ángel ki̱xira nda̱sira yu̱ʼu̱ tí león ta kǒo níxaxírí yi̱ʼi̱ʼ.

Ni̱kusi̱íkaví-ini ta̱ rey Darío. Xa̱ʼndara chiñu ná tavána ta̱ Daniel ya̱vi̱ nu̱ú ñúʼu tí león. Tasaá chi̱ka̱a̱ra na̱ ndi̱va̱ʼa-ini yóʼo ini ya̱vi̱ tí yóʼo. Kúma̱níka ndakavana ini ya̱vi̱ ña̱ xa̱a̱na nu̱úrí ndi̱ku̱n ti̱inrína ta xa̱xírína.

Tasaá chi̱ndaʼá ta̱ rey Darío iin tutu ku̱a̱ʼa̱n nu̱ú ndiʼi na̱ ñuura ta káchiña: ʼNdiʼindó xíniñúʼu to̱ʼó koondó xíʼin Ndióxi̱ ta̱ Daniel. Chi ku̱a̱ʼání milagro kéʼéra. Sa̱kákura ta̱ Daniel ña̱ kǒo níxaxí tí león ta̱yóʼoʼ.