Ir al contenido

Ir al índice

 HISTORIA 39

Tú vara ta̱ Aarón ka̱na yita ndaʼa̱nú

Tú vara ta̱ Aarón ka̱na yita ndaʼa̱nú

KOTO tú vara yóʼo íyo yita xíʼin ku̱i̱ʼi ndaʼa̱nú. Vara ta̱ Aarón kúúnú. Yita xíʼin ku̱i̱ʼi yóʼo iin ñu̱ú ka̱naña ndaʼa̱nú. Ná kotoyó ndachun ka̱naña.

Xa̱ku̱a̱ʼání tiempo ndóo na̱ ñuu Israel nu̱ú ñuʼú yi̱chí. Savana kǒo kándíxa-inina ta̱ Moisés ña̱ níʼira yichi̱ nu̱úna ni ta̱ Aarón ña̱ kúúra su̱tu̱ káʼnu. Ta̱ Coré kúú ta̱ kǒo kándíxa-ini, saátu ta̱ Datán, ta̱ Abiram xíʼin inkaka 250 na̱ xi̱ku̱aʼa na̱ ñuu Israel. Nda̱kutáʼan ndiʼi na̱yóʼo ta va̱xina nu̱ú ta̱ Moisés ta káchina xíʼinra: ʼ¿Ndachun kúni̱ iinlá yóʼó kuniʼún yichi̱ nu̱úndi̱?ʼ

Ta nda̱kuiinra yu̱ʼu̱ ta̱ Coré xíʼin na̱ ítáʼan xíʼinra: ʼXi̱ta̱a̱n naʼa ndakiʼinndó ka̱a ña̱ kuniñúʼundó chiʼmandó ta taánndó ña̱ʼa ña̱ chiʼmandó iniña. Ta kixindó tabernáculo Jehová. Saá kunda̱a̱-iniyó yukú na̱ ndaka̱xinraʼ.

Inka ki̱vi̱, ta̱ Coré xíʼin na̱ 250 ta̱a na̱ ítáʼan xíʼinra ki̱xa̱a̱na tabernáculo. Ki̱xa̱a̱ ku̱a̱ʼákana sa̱tára. Ta ni̱sa̱a̱ní Jehová. Ta̱ Moisés káchira: ʼKǒo kunditandó nu̱ú íyo veʼe na̱yóʼo, kǒo tiinndó ni iin ña̱ʼa ña̱ kúúmiínaʼ. Na̱ yiví yóʼo xi̱niso̱ʼona ña̱ ni̱ka̱ʼa̱n ta̱ Moisés ta xi̱kutaʼana nu̱ú íyo veʼe ta̱ Coré, ta̱ Datán xíʼin ta̱ Abiram.

Tasaá ta̱ Moisés káchira: ʼXíʼin ña̱yóʼo kunda̱a̱-inindó na̱ kǒo níndaka̱xin Jehová, nda̱tá ñuʼú ta kokóña na̱yóʼoʼ.

Tándi̱ʼi ni̱ka̱ʼa̱n ta̱ Moisés ña̱yóʼo, ni̱nda̱tá ñuʼú. Veʼe ta̱ Coré xíʼin ña̱ʼara, ta̱ Datán, ta̱ Abiram xíʼin ndiʼika na̱ ndóo xíʼinna ni̱ko̱yona nu̱ú ni̱nda̱tá ñuʼú yóʼo ta ni̱ndu̱xu̱nna xíʼinña. Tá xi̱niso̱ʼo inkaka na̱ yiví ña̱ ni̱nda̱ʼyi̱-koʼó na̱ ko̱kó ñuʼú yóʼo, ki̱xaʼána káʼa̱nna: ʼKunundó chi ñuʼú yóʼo kokóña miíyóʼ.

Ta̱ Coré xíʼin na̱ 250 na̱ ítáʼan xíʼinra tá ndíta yatinkana nu̱ú níndichi tabernáculo Jehová. Xa̱ʼa ña̱yóʼo chi̱ndaʼá Jehová ñuʼu̱ ta ni̱xi̱xi̱ ndiʼina. Tasaá Jehová ni̱ka̱ʼa̱nra xíʼin ta̱ Eleazar se̱ʼe ta̱ Aarón ña̱ ná ndakiʼinra ka̱a nu̱ú ni̱chiʼma na̱ ni̱xi̱ʼi̱ yóʼo, ta xíʼin ña̱yóʼo keʼéra iin ka̱a yaxin ña̱ sakundixira chí sa̱tá ña̱ altar. Ña̱ ka̱a yaxin yóʼo chindeéña na̱ ñuu Israel ña̱ ndakaʼánna iinlá ta̱ Aarón xíʼin se̱ʼera kúú na̱ kúú su̱tu̱ nu̱ú Jehová.

Soo Jehová kúni̱ra ná kunda̱a̱ va̱ʼa inina, ta̱ Aarón xíʼin se̱ʼera kúú na̱ nda̱kaxinra kuu su̱tu̱. Xa̱ʼa ña̱yóʼo ni̱ka̱ʼa̱nra xíʼin ta̱ Moisés: ʼTá iin iin na̱ kúúmií chiñu iin iin ñuu na̱ íyo ñuu Israel ná kixi varana xíʼinna. Na̱ veʼe ta̱ Leví kúú ta̱ Aarón ná kixi varara xíʼinra. Ta iin iin varana taúnnú ini tabernáculo nu̱ú níndichi caja ña̱ trato. Tú vara ta̱ ndaka̱xíi̱n kuu su̱tu̱, kana yita ndaʼa̱núʼ.

Tá inka ki̱vi̱ xi̱ni ta̱ Moisés tú vara ta̱ Aarón kana yita xíʼin ku̱i̱ʼi ndaʼa̱nú. ¿Á kúnda̱a̱-iniún vitin ndachun ka̱na yita ndaʼa̱nú i̱xaa Jehová?