Ir al contenido

Tutu ña̱ káʼa̱n xíʼinyó nda̱saa koo reunión Ña̱ Kéʼé na̱ Ndásakáʼnu Ndióxi̱

Tutu ña̱ káʼa̱n xíʼinyó nda̱saa koo reunión Ña̱ Kéʼé na̱ Ndásakáʼnu Ndióxi̱

Ña̱ va̱xi nu̱ú tutu yóʼo

1. Reunión Ña̱ Kéʼé na̱ Ndásakáʼnu Ndióxi̱ kooña táki̱ʼva káʼa̱n Tutu nu̱ú va̱xi ña̱ keʼéyó reunión ta saátu nu̱ú ña̱ kaʼviún yóʼo va̱xi savaka ña̱ káʼa̱n xa̱ʼa̱ reunión yóʼo. Xíniñúʼu ka̱ʼa̱nna xíʼin ndiʼi na̱ publicador ña̱ ná chika̱a̱na ndee̱ ña̱ ya̱ʼana nu̱ú plataforma taxina discurso á demostración. Saátu na̱ xáʼa̱n ni̱ʼi reunión kivi ya̱ʼana tá kándíxa ndinuʼu-inina ña̱ sánáʼa̱ Biblia ta kéʼéna ña̱ káʼa̱nña (be-S pág. 282).

ÑA̱ KA̱ʼA̱NNA TÁ NÁ KIXÁʼA REUNIÓN

 2. Iin minuto. Tá ná ndiʼi katana yaa ta keʼéna oración, ta kúú presidente ña̱ reunión Ña̱ Kéʼé na̱ Ndásakáʼnu Ndióxi̱ ka̱ʼa̱nra xa̱ʼa̱ ña̱ sakuaʼana ki̱vi̱ saá. Ka̱ʼa̱nra xa̱ʼa̱ ña̱ chindeétáʼan xíʼin ña̱ congregación.

ÑA̱ KÁʼA̱N BIBLIA XA̱ʼA̱

  3. Discurso (10 minuto). Nu̱ú Tutu nu̱ú va̱xi ña̱ keʼéyó reunión vaxi ki̱vi̱ discurso ta va̱xitu u̱vi̱ á u̱ni̱ punto xíʼinña. Iin anciano á iin siervo ministerial ta̱ va̱ʼa káʼa̱nndosó taxiña. Tá iin libro xa̱á kixáʼayó kaʼviyó nu̱ú Biblia, discurso yóʼo kixáʼaña xíʼin iin video ña̱ ka̱ʼa̱n xa̱ʼa̱ libro yóʼo. Ta̱ ka̱ʼa̱nndosó kivi ka̱ʼa̱nra nda̱saa kítáʼan sava ña̱ ni̱ka̱ʼa̱nna nu̱ú video xíʼin discurso miíra, soo ña̱ ndáyáʼvika kúú ña̱ ka̱ʼa̱nra xa̱ʼa̱ ndiʼi punto ña̱ va̱xi nu̱ú Tutu nu̱ú va̱xi ña̱ keʼéyó reunión. Tá íyoka tiempo, kivi kuniñúʼura na̱ʼná ña̱ kítáʼan xíʼin ña̱ káʼa̱nra xa̱ʼa̱. Ta kivitu kuniñúʼura inkaka información tá kítáʼanña xíʼin ña̱ káʼa̱nra xa̱ʼa̱.

 4. Ná ndakanixi̱níyó xa̱ʼa̱ ña̱ kivi chindeé miíyó (10 minuto). Ña̱ ndáka̱tu̱ʼun xíʼin ña̱ ndákuiin kuitíva ka̱ʼa̱nna xa̱ʼa̱ ta va̱ása ka̱ʼa̱nna xa̱ʼa̱ inkaka ña̱ʼa tá ná kixáʼana ni tá ná sandiʼina. Iin anciano á iin siervo ministerial ta̱ va̱ʼa káʼa̱nndosó taxiña. Ta̱ taxiña xíniñúʼu keʼéra u̱vi̱ pregunta. Saátu ndaka̱xinra á kaʼvina texto ña̱ va̱xi kán. Na̱ ndakuiin xíniñúʼu 30 kuití segundo ka̱ʼa̱nna á loʼoka.

  5. Ña̱ kaʼviyó nu̱ú Biblia (4 minuto). Iin ta̱ hermano kúú ta̱ xíniñúʼu taxi ña̱yóʼo. Xíniñúʼu kaʼvi kuitíra ña̱ ni̱ka̱ʼyi̱ nu̱ú tutu ña̱ nda̱kiʼinra ta va̱ása ka̱ʼa̱nra xa̱ʼa inka ña̱ʼa tá ná kixáʼara ni tá ná sandíʼira. Ta̱ presidente kiʼinra kuenta ña̱ chindeétáʼanra xíʼin na̱yóʼo ña̱ vií ná kaʼvina, ná kunda̱a̱-inina xíʼin ña̱ káʼvina, ná va̱ása ti̱ví yuʼúna tá káʼvina, saátu kiʼinra kuenta xíʼin ña̱ ndáa míí xíniñúʼu sándaana ta̱chína ta ndáa míí sánuunaña, ta saátu ndáa míí chinúuna pausa. Xa̱ʼa̱ ña̱ ku̱a̱ʼáka versículo ña̱ Biblia kúú ña̱ xíniñúʼu kaʼvina sava yichi̱, ta̱ superintendente ña̱ reunión Ña̱ Kéʼé na̱ Ndásakáʼnu Ndióxi̱ ndakanixi̱níra xa̱ʼa̱ ña̱yóʼo tá ndáka̱xinra ndáana kúú na̱ kaʼvi ña̱yóʼo.

NÁ SANÁʼA̱ VIÍYÓ

 6. Xa̱ʼu̱n minuto. Táʼví yóʼo va̱xiña ña̱ chindeétáʼanña xíʼin ndiʼina ña̱ koo tu̱ʼvana ka̱ʼa̱nna ta sanáʼa̱na na̱ yiví xa̱ʼa̱ Ndióxi̱. Na̱ ya̱ʼa kivi kuniñúʼuna iin tutu á iin video ña̱ xíniñúʼuyó tá sánáʼa̱yó iin na̱ yiví ni va̱ása káʼa̱n káxina xíʼinyó ña̱ kuniñúʼuyó. Ña̱ kuchiñuyó vií natúʼunyó xíʼin na̱ yiví, nu̱ú Tutu nu̱ú va̱xi ña̱ keʼéyó reunión va̱xi ña̱ naní “Ndáa ki̱ʼva natúʼunyó xíʼin na̱ yiví” va̱xi inka recuadro ña̱ naní “¿Ndáa míí ndani̱ʼíyó texto ña̱ va̱xi nu̱ú tutu ña̱ xíniñúʼuyó ña̱ sánáʼa̱yó na̱ yiví?”. Mií na̱ ya̱ʼa taxi ña̱yóʼo ndaka̱xin á kuniñúʼunaña á va̱ása kuniñúʼunaña. Mií Tutu nu̱ú va̱xi ña̱ keʼéyó reunión káʼa̱n nda̱saa tiempo kuniñúʼu na̱ ya̱ʼa, ta sava yichi̱ káʼa̱ntuña á íyo inkaka ña̱ keʼéna. Tá íyoka tiempo nu̱ú na̱ ya̱ʼa, va̱ása xíniñúʼuví nandukúkana inkaka ña̱ ka̱ʼa̱nna xa̱ʼa̱ ña̱ va̱ʼa kuniñúʼuna ndiʼi tiempona. Sava na̱ xa̱a̱ íyo tu̱ʼva va̱ʼa xíʼin ña̱ ka̱ʼa̱nna, sana nda̱a̱ kindo̱o iin minuto nu̱úna á ku̱a̱ʼáka. Tá xíniñúʼuña, kivi taxituna ná ya̱ʼa iin na̱ anciano taxina ña̱yóʼo. Sava yichi̱ kotona iin video ña̱ va̱ása kítáʼan xíʼin, ndáa ki̱ʼva natúʼunyó xíʼin na̱ yiví. Iin anciano á iin siervo ministerial ta̱ va̱ʼa káʼa̱nndosó taxi ña̱yóʼo.

 7. Video nu̱ú sákuaʼayó nda̱saa ka̱ʼa̱nyó xíʼin na̱ yiví. Video ña̱ na̱ʼa̱ nu̱úyó ndáa ki̱ʼva ka̱ʼa̱nyó yichi̱ nu̱ú, ta saátu tá xa̱a̱ ná ndikóyó nu̱úna ya̱ʼaña nda̱a̱ ná ka̱ʼa̱nna, ta ndiʼina ka̱ʼa̱n xa̱ʼa̱ña. Ta̱ presidente reunión yóʼo kúú ta̱ taxi ña̱yóʼo.

 8. Ña̱ ka̱ʼún yichi̱ nu̱ú. Iin ta̱ hermano á iin ñá hermana taxi ña̱yóʼo. Tá ta̱a kúú ta̱ ya̱ʼa, iin ta̱a ya̱ʼa xíʼinra, tá ñaʼá kúú ñá ya̱ʼa, iin ñaʼá ya̱ʼa xíʼinñá, á kivitu ya̱ʼa iin na̱ veʼena xíʼinna. Kivi kundúʼuna á kundichina tá ná ya̱ʼana. Tá kixáʼana ka̱ʼa̱nna kuniñúʼuna iin saludo ña̱ xíniñúʼu na̱ ñuu nu̱ú íyona. Ña̱ ka̱ʼa̱nna xa̱ʼa̱ xíniñúʼu kanaña ti̱xin táʼví ña̱ naní “Ndáa ki̱ʼva natúʼunyó xíʼin na̱ yiví”.

 9. Tá xa̱a̱ ná ndikóún nu̱úna. Iin ta̱ hermano á iin ñá hermana taxi ña̱yóʼo. Tá ta̱a kúú ta̱ ya̱ʼa, iin ta̱a ya̱ʼa xíʼinra, tá ñaʼá kúú ñá ya̱ʼa, iin ñaʼá ya̱ʼa xíʼinñá (km-S 5/97 2). Kivi kundúʼúna á kundichina tá ná ya̱ʼana. Na̱ ya̱ʼa, xíniñúʼu na̱ʼa̱na nda̱saa ka̱ʼa̱nna tá ná ndikóna ka̱ʼa̱n tukuna xíʼin iin na̱ yiví na̱ kúni̱ sakuaʼa, na̱ ni̱ka̱ʼa̱nna xíʼin yichi̱ nu̱ú. Ña̱ ka̱ʼa̱nna xa̱ʼa̱ xíniñúʼu kanaña ti̱xin táʼví ña̱ naní “Ndáa ki̱ʼva natúʼunyó xíʼin na̱ yiví”.

 10. Tá xa̱a̱ kaʼviún xíʼinna. Iin ta̱ hermano á iin ñá hermana taxi ña̱yóʼo. Tá ta̱a kúú ta̱ ya̱ʼa, iin ta̱a ya̱ʼa xíʼinra, tá ñaʼá kúú ñá ya̱ʼa, iin ñaʼá ya̱ʼa xíʼinñá (km-S 5/97 2). Kivi kundúʼúna á kundichina tá ná ya̱ʼana. Na̱ʼa̱na ndáa ki̱ʼva natúʼunna xíʼin iin na̱ xa̱a̱ káʼvina xíʼin. Va̱ása xíniñúʼu na̱ʼa̱na ndiʼi ña̱ kéʼéna tá kíxáʼana sákuaʼana á tá sándiʼina sákuaʼana xíʼin iin na̱ yiví tá va̱ása káʼa̱n aspecto ña̱ káchíñuna xíʼin xa̱ʼa̱ña. Va̱ása xíniñúʼu kaʼvina iníísaá párrafo ña̱ sákuaʼana nu̱ú plataforma, soo kiviva kaʼvinaña tá kúni̱na. Na̱ ya̱ʼa xíniñúʼu sanáʼa̱ viína ta kuniñúʼuna ndiʼi ña̱ kúúmiína.

 11. Discurso. Iin ta̱ hermano taxi ña̱yóʼo, táki̱ʼva íyo iin discurso nu̱ú káʼa̱nna xíʼin ndiʼi na̱ congregación saá taxiraña.

ÑA̱ KÉʼÉYÓ NA̱ TESTIGO

 12. Xítana iin yaa, saá va̱xi 15 minuto ta kivi kuuña iin táʼví á u̱vi̱ña nu̱ú chindeéna na̱ auditorio ña̱ keʼéna ña̱ sánáʼa̱ Biblia. Taxinaña ndaʼa̱ iin anciano á iin siervo ministerial. Ña̱ xíniñúʼu na̱ congregación iin anciano taxiña.

  13. Estudio ña̱ congregación: (30 minuto). Iin ta̱ anciano ta̱ va̱ʼa káʼa̱nndosó taxiña (soo tá kǒo ku̱a̱ʼá na̱ anciano ti̱xin congregación kivi kuniñúʼuna na̱ siervo ministerial na̱ va̱ʼa káʼa̱nndosó). Ndiʼi na̱ anciano ndaka̱xin ndáana ya̱ʼa xíʼin ña̱yóʼo. Na̱ nda̱ka̱xinna va̱ása xíniñúʼu ya̱ʼana nu̱ú tiempo ña̱ ta̱xina ndaʼa̱na, kuniñúʼutuna texto tu̱ʼun Ndióxi̱ ña̱ ndáyáʼvika ta chindeéna na̱ auditorio ña̱ kundiku̱nna consejo ña̱ sakuaʼana. Kivi kuniñúʼuna consejo ña̱ káʼa̱n xa̱ʼa̱ nda̱saa ya̱ʼana xíʼin Tutu Ña̱ Nátúʼun xíʼinyó. Tá xa̱a̱ ni̱ka̱ʼún xa̱ʼa̱ ndiʼi ña̱ xíniñúʼu kaʼvina semana saá soo kíndo̱oka tiempo, va̱ása xíniñúʼu ka̱ʼún xa̱ʼa̱ inkaka ña̱ʼa nda̱a̱ ná xi̱nu 30 minuto. Tá kivi, xa̱a̱ síín síín na̱ taxiña xíʼin na̱ kaʼviña semana tá semana. Tá káʼa̱n ta̱ presidente xíʼin ta̱ ya̱ʼa ña̱ ná ndasaa loʼora ña̱ ka̱ʼa̱nra, mií ta̱ ya̱ʼa ndaka̱xin nda̱saa keʼéraña. Iin ña̱ kivi keʼéra kúú ña̱ va̱ása kaʼvina ndiʼi párrafo.

ÑA̱ KA̱ʼA̱NNA TÁ XA̱A̱ NDIʼI REUNIÓN

  14. U̱ni̱ minuto. Ta̱ presidente ka̱ʼa̱n loʼora xa̱ʼa̱ ña̱ ndáyáʼvika ña̱ ni̱ka̱ʼa̱nna xa̱ʼa̱ ti̱xin reunión. Ka̱ʼa̱ntura xa̱ʼa̱ ña̱ sakuaʼayó inka semana. Tá íyoka tiempo kivi ka̱ʼa̱nra ki̱vi̱ na̱ ya̱ʼa taxi iin discurso á demostración inka semana. Saátu kivi kuniñúʼura tiempo yóʼo ña̱ taxira anuncio á ña̱ kaʼvira iin carta. Sava anuncio, tá kúu hora ña̱ keena sanáʼa̱na na̱ yiví, á grupo na̱ keʼé limpieza va̱ása taxinaña nu̱ú tiempo yóʼo, nu̱ú tablero ña̱ anuncio chinúunaña. Tá va̱ása nani tiempo yóʼo ña̱ ka̱ʼa̱nna anuncio ña̱ ndáyáʼvi á ña̱ kaʼvina carta, ta̱ presidente ka̱ʼa̱n xíʼin na̱ ya̱ʼa nu̱ú ña̱ naní “Ña̱ kéʼéyó na̱ testigo” ná ndasaa loʼona ña̱ ka̱ʼa̱nna (koto  párr. 13 xíʼin  17). Reunión yóʼo ndiʼiña xíʼin iin yaa ta xíʼin iin oración.

SÁKUAʼAKA ÑA̱ VIÍ KAʼVIÚN TA SANÁʼÚN

 15. Ndiʼi na̱ yaʼa xíniñúʼu ku̱ʼu̱n folleto Na̱ sánáʼa̱ xíʼinna, kivi ku̱ʼu̱n ña̱ tutu xíʼinna á nu̱ú celular á tableta ña̱ kúúmiína. Ta̱ presidente ña̱ reunión kuniñúʼura folleto yóʼo ña̱ va̱ʼa taxira consejo ta chika̱a̱ra ndee̱ xíʼin na̱ yáʼa káʼvi á na̱ táxi demostración á discurso. Nu̱ú Tutu nu̱ú va̱xi ña̱ keʼéyó reunión va̱xi lección ña̱ sakuaʼana xíʼin tá ná ya̱ʼana. Táʼví tutu yóʼo ña̱ naní “Ña̱ xa̱a̱ ke̱ʼíi̱” mitúʼun na̱ yáʼa káʼvi á na̱ táxi demostración kuniñúʼuña. Va̱ása kaʼyí ta̱ presidente nu̱ú tutu na̱ yáʼa.

CONSEJO XÍʼIN TU̱ʼUN VA̱ʼA

  16. Tá ndi̱ʼi ña̱ ni̱ya̱ʼa iin iin na̱ kaʼvi, na̱ taxi demostración á discurso, ta̱ presidente kuniñúʼura iin minuto ña̱ taxira consejo ña̱ va̱xi nu̱ú tutu Na̱ sánáʼa̱ ndaʼa̱ na̱yóʼo. Tá ná ka̱ʼa̱nra ki̱vi̱ iin na̱ ya̱ʼa va̱ása ka̱ʼa̱nra ndáa lección ña̱ va̱xi nu̱ú tutu Na̱ sánáʼa̱ kúú ña̱ káchíñuna xíʼin. Tá xa̱a̱ ni̱ya̱ʼana, ta̱ presidente siʼna ka̱ʼa̱nra xíʼinna ña̱ va̱ʼaní ni̱ya̱ʼana, saáví ka̱ʼa̱nra xíʼinna xa̱ʼa̱ lección ña̱ ka̱chíñuna xíʼin, ta ka̱ʼa̱ntura xíʼinna nda̱chun va̱ʼaní xi̱niñúʼuna ña̱kán, ta kivitu vií ka̱ʼa̱nra xíʼinna ndáaña xíniñúʼuka keʼéna ña̱ va̱ʼa kundiku̱nna ña̱ káʼa̱n lección kán. Kivi ka̱ʼa̱ntura xa̱ʼa̱ ndáaka ña̱ va̱ʼa keʼéna ña̱ kivi chindeétáʼan xíʼin mií na̱ ni̱ya̱ʼa á xíʼin na̱ auditorio. Tá ná ndiʼi reunión á inkaka ki̱vi̱, kivi taxina consejo ndaʼa̱ na̱ ni̱ya̱ʼa xíʼin tutu Na̱ sánáʼa̱ á xíʼin libro Benefíciese xa̱ʼa̱ lección ña̱ ka̱chíñuna xíʼin á xa̱ʼa̱ inkakaña. (Koto  párrafo 17,  22 xíʼin  24 ña̱ va̱ʼa kunda̱a̱-iniún xa̱ʼa̱ chiñu ña̱ kúúmií ta̱ presidente ña̱ reunión Ña̱ Kéʼé na̱ Ndásakáʼnu Ndióxi̱ ta saátu xa̱ʼa̱ inkaka ta̱ táxi consejo).

TIEMPO

     17. Ni iin táʼví reunión (ni ña̱ ka̱ʼa̱n ta̱ presidente) ná va̱ása ya̱ʼaña nu̱ú tiempo ña̱ xíniñúʼu ya̱ʼana. Ni kǒoka tu̱ʼun ña̱ káʼa̱n “á loʼoka” va̱xi nu̱ú minuto ña̱ iin tá iin asignación, va̱ása kúni̱ kachiña ña̱ ku̱a̱ʼáka tiempo ka̱ʼa̱nna chi kiviva ka̱ʼa̱nna loʼoka tiempo. Tá iin na̱ káʼvi, na̱ táxi demostración á discurso ni̱ya̱ʼakana nu̱ú tiempona, kúeeva ka̱ʼa̱nna xíʼinna ña̱ xa̱a̱ ndi̱ʼi tiempona. Tá inka na̱ hermano na̱ ta̱xi inka táʼví kúú na̱ ni̱ya̱ʼa nu̱ú tiempo ña̱ xíniñúʼuna, saá inka ta̱ táxi consejo ka̱ʼa̱n xíʼinna tá ná ndiʼi reunión (koto  párrafo 24). Iníísaá reunión, 1 hora xíʼin 45 minutova kooña, ta tiempo ña̱ xítana xíʼin ña̱ oración ndíka̱a̱ña ti̱xin tiempo yóʼo.

VISITA TA̱ SUPERINTENDENTE ÑA̱ CIRCUITO

 18. Tá va̱xi ta̱ superintendente ña̱ circuito kotora congregación, reunión yóʼo kooña táki̱ʼva káʼa̱n Tutu nu̱ú va̱xi ña̱ keʼéyó reunión. Va̱ása koo “Estudio ña̱ congregación”, chi discurso ña̱ 30 minuto ña̱ taxi ta̱ superintente ña̱ circuito koo nu̱úña. Tá kúma̱níka kixáʼa discurso ña̱ servicio, ta̱ presidente ka̱ʼa̱n xa̱ʼa̱ ña̱ sa̱kuaʼana semana kán ta saátu ña̱ sakuaʼana inkaka semana, taxira anuncio á kaʼvira carta ña̱ ki̱xaa̱, ta saáví ka̱ʼa̱nra ña̱ ya̱ʼa ta̱ superintendente ña̱ circuito taxira discurso. Tándi̱ʼi discurso, mií ta̱ hermano ta̱ circuito ka̱ʼa̱n ki̱vi̱ yaa ña̱ katana saá ndiʼi reunión. Kivitu ndaka̱xinra iin ta̱ hermano ta̱ keʼé oración. Va̱ása koo inka sala nu̱ú ya̱ʼa na̱ kaʼvi, na̱ taxi discurso á demostración semana yóʼo. Grupo na̱ káʼa̱n inka tu̱ʼun kiviva koo reuniónna táki̱ʼva xíyoña ni ná koo visita ña̱ congregación ña̱ kíʼin kuenta xíʼinna. Soo na̱ xáʼa̱n xíʼin grupo yóʼo kuniso̱ʼona discurso ña̱ servicio ña̱ taxi ta̱ superintendente ña̱ circuito xíʼin na̱ congregación na̱ kíʼin kuenta xíʼinna.

SEMANA ÑA̱ KOO ASAMBLEA

 19. Va̱ása koo ni iin reunión ti̱xin semana ña̱ xíyo iin asamblea. Iin iinna á xíʼin na̱ veʼena kaʼvina ña̱ koo semana kán veʼena.

SEMANA ÑA̱ KOO CONMEMORACIÓN

 20. Tá ná ndakava ki̱vi̱ ña̱ koo conmemoración ma̱ʼñú semana va̱ása koo reunión Ña̱ Kéʼé na̱ Ndásakáʼnu Ndióxi̱. Koova reunión ña̱ keena sanáʼa̱na na̱ yiví ki̱vi̱ ña̱ koo conmemoración.

SUPERINTENDENTE ÑA̱ REUNIÓN ÑA̱ KÉʼÉ NA̱ NDÁSAKÁʼNU NDIÓXI̱

 21. Ndiʼi na̱ anciano kúú na̱ ndáka̱xin na̱ kuu superintendente ña̱ reunión yóʼo. Ta̱yóʼo kíʼin kuenta xíʼin reunión yóʼo ña̱ vií ná kanaña ta na̱ ya̱ʼa ná kundiku̱nna ña̱ káʼa̱n tutu yóʼo. Ta̱yóʼo xíniñúʼu natúʼunra xíʼin inka ta̱ táxi consejo xa̱ʼa̱ ndiʼi ña̱ yáʼa nu̱ú reunión yóʼo. Tá xa̱a̱ ka̱na Tutu nu̱ú va̱xi ña̱ kéʼéyó reunión ña̱ u̱vi̱ yo̱o̱, saá keʼéra tutu válí ña̱ taxira ndaʼa̱ na̱ kaʼvi nu̱ú Biblia, na̱ taxi demostración á discurso (koto  párrafo 5 nda̱a̱ 11). Kuniñúʼura Tutu ña̱ asignación ña̱ kéʼé na̱ ndásakáʼnu Ndióxi̱ (S-89) ña̱ kaʼyíra ki̱vi̱ na̱ ya̱ʼa ta taxiraña ndaʼa̱na tá kúma̱ní u̱ni̱ semana ña̱ ya̱ʼana.

PRESIDENTE ÑA̱ REUNIÓN ÑA̱ KÉʼÉ NA̱ NDÁSAKÁʼNU NDIÓXI̱

  22. Iin iin semana, iin anciano kuu presidente ña̱ reunión yóʼo. (Tá kǒo ku̱a̱ʼá na̱ anciano ná kuniñúʼuna na̱ siervo ministerial na̱ va̱ʼa káʼa̱nndosó). Mií ta̱ presidente kúú ta̱ ndaka̱xin ndáaña ka̱ʼa̱nra nu̱ú kíxáʼa reunión xíʼin nu̱ú ndíʼiña, natúʼunra xíʼin na̱ auditorio xa̱ʼa̱ video ña̱ náʼa̱ nu̱úyó nda̱saa sanáʼa̱yó na̱ yiví. Ka̱ʼa̱nra ki̱vi̱ iin iin na̱ ya̱ʼa ti̱xin reunión yóʼo ta sana nda̱a̱ miíra ya̱ʼa ka̱ʼa̱n xa̱ʼa̱ iin táʼví reunión yóʼo. Loʼova xíniñúʼu ka̱ʼa̱nra tá yáʼa iin iinna. Ndiʼi na̱ anciano ndaka̱xin ndáa na̱ anciano kivi kuu presidente. Koo iin programa ña̱ ka̱ʼa̱n xíʼin na̱ nda̱ka̱xinna ama kuuna presidente. Sana ta̱ superintendente ña̱ reunión Ña̱ Kéʼé na̱ Ndásakáʼnu Ndióxi̱ kivi ku̱a̱ʼáka yichi̱ kuura presidente nu̱ú na̱ inkaka anciano. Tá iin anciano va̱ʼava yáʼara xíʼin Estudio ña̱ congregación kiviva kuura presidente ña̱ reunión yóʼo. Soo ta̱ kuu presidente xíniñúʼu vií ka̱ʼa̱nra xíʼin na̱ ya̱ʼa kaʼvi, á na̱ taxi demostración xíʼin discurso, vií va̱ʼa ná taxira consejo ndaʼa̱na, va̱ása nda̱ʼyi̱ra nu̱úna. Saátu kiʼinra kuenta xíʼin reunión ña̱ ná ndiʼiña mií hora ña̱ xíniñúʼu ndiʼiña (koto  párrafo 14 xíʼin  17). Tá kivi, kundichi inka micrófono nu̱ú plataforma nu̱ú kundichi ta̱ presidente ta ka̱ʼa̱nra xa̱ʼa̱ na̱ ya̱ʼa ta saá na̱yóʼo kama kivi kundichina sii̱n tú atril. Saátu kivi kundúʼúra sii̱n tú mesa loʼo nu̱ú plataforma tá xa̱a̱ ya̱ʼa na̱ kaʼvi Biblia xíʼin na̱ ya̱ʼa ti̱xin táʼví ña̱ naní “Ná sanáʼa̱ viíyó”.

COORDINADOR NA̱ ANCIANO

 23. Ta̱yóʼo á inka anciano ta̱ chíndeétáʼan xíʼinra kúú ta̱ ka̱ʼa̱n ndáana ya̱ʼa iin iin táʼví reunión, su̱ví ta̱yóʼo ka̱ʼa̱n ndáana ya̱ʼa ti̱xin táʼví ña̱ naní “Ná sanáʼa̱ viíyó”. Miíra ka̱ʼa̱n ndáana xa̱a̱ nda̱kaxin na̱ anciano kúú na̱ kuu presidente iin iin semana. Ta̱ superintendente ña̱ reunión Ña̱ Kéʼé na̱ Ndásakáʼnu Ndióxi̱ taxira ki̱vi̱ na̱ ya̱ʼa ti̱xin reunión “Ná sanáʼa̱ viíyó” ndaʼa̱ ta̱ coordinador ña̱ va̱ʼa keʼéra programa ña̱ iníísaá reunión ta chinúuraña nu̱ú tablero.

INKA TA̱ TÁXI CONSEJO

   24. Tá kivi, va̱ʼa ndaka̱xinna iin anciano ta̱ va̱ʼa káʼa̱nndosó. Ta̱yóʼo taxi consejo ndaʼa̱ na̱ xíniñúʼuña tá xa̱a̱ ndi̱ʼi reunión, taxira consejo ndaʼa̱ na̱ anciano xíʼin na̱ siervo ministerial na̱ yáʼa reunión Ña̱ Kéʼé na̱ Ndásakáʼnu Ndióxi̱, na̱ táxi discurso público, na̱ yáʼa xíʼin Tutu Ña̱ Nátúʼun xíʼinyó xíʼin na̱ káʼviña á na̱ yáʼa xíʼin Estudio ña̱ congregación ta saátu na̱ káʼvi ti̱xin ña̱yóʼo (koto  párrafo 17). Tá íyo ku̱a̱ʼá na̱ anciano na̱ va̱ʼa sánáʼa̱ ta va̱ʼa káʼa̱nndosóna kivi nasa̱ma ta̱ táxi consejo ku̱i̱ya̱ tá ku̱i̱ya̱. Su̱ví ndiʼiví yichi̱ xíniñúʼu taxira consejo ndaʼa̱ iinna tá yáʼana iin iin asignación.

INKA CLASE

 25. Tá ku̱a̱ʼá kúú na̱ yáʼa, kivi koo inka clase nu̱ú ya̱ʼana. Iin iin clase yóʼo koo inka ta̱ táxi consejo kiʼin kuenta xíʼinña, tá íyo ku̱a̱ʼá na̱ anciano iin anciano ná kuu ta̱ táxi consejo á iin siervo ministerial ta̱ va̱ʼa káʼa̱nndosó. Ndiʼi na̱ anciano ka̱ʼa̱n ndáana kivi taxi consejo ta kivi ka̱ʼa̱nna á nasa̱ma na̱yóʼo ta ama. Ta̱ táxi consejo xíniñúʼu kundiku̱nra ña̱ va̱xi nu̱ú  párrafo 16. Tá ná ndiʼi ña̱ naní “Ná ndakanixi̱níyó xa̱ʼa̱ ña̱ chindeé miíyó” ña̱ va̱xi ti̱xin táʼví ña̱ naní “Ña̱ káʼa̱n Biblia xa̱ʼa̱”, saá ka̱ʼa̱nna xíʼin na̱ ya̱ʼa inka sala ná ya̱ʼana chí kán. Tá ná ndiʼi táʼví ña̱ naní “Ná sanáʼa̱ viíyó”, ndikóna chí sala nu̱ú ndóo na̱ ku̱a̱ʼá. Tá ná ya̱ʼa iin video, na̱ íyo ini inka sala, kán kotona video ta kuniso̱ʼona ña̱ ka̱ʼa̱nna xa̱ʼa̱ña tá kívi. Tá va̱ása kívi, ta̱ táxi consejo ka̱ʼa̱n xa̱ʼa̱ video ta kuniñúʼura teléfono miíra ña̱ ka̱ʼa̱nra xíʼinna ti̱xin sala kán.

VIDEO

 26. Ti̱xin reunión ña̱ xíyo ma̱ʼñú semana koo sava video ta ña̱yóʼo kivi kotonaña nu̱ú JW Library® xíʼin computadora á inkakaña. Video ña̱ náʼa̱ nu̱úyó nda̱saa sanáʼa̱yó na̱ yiví kivi kuniñúʼunaña reunión ña̱ xíyo tá kéeyó ña̱ ku̱ʼu̱nyó sanáʼa̱yó na̱ yiví, soo kotonaña tá xa̱a̱ ni̱ya̱ʼa video yóʼo nu̱ú reunión Ña̱ Kéʼé na̱ Ndásakáʼnu Ndióxi̱.