Ku̱a̱ʼání na̱ yiví ndákanixi̱nína ña̱ xa̱a̱ yatání ña̱ káʼa̱n Biblia xa̱ʼa̱ ña̱ ku̱su̱n xíʼin táʼan na̱ yiví ta saátu ña̱ káʼa̱n xa̱ʼa̱ na̱ tíndaʼa̱, ta nda̱a̱ na̱ káʼa̱n ña̱ kúúna cristiano ndákanixi̱ní ña̱yóʼo. Tá yáʼa tiempo, sava na̱ veʼe-ñu̱ʼu násamana ña̱ sánáʼa̱na ta va̱ása sánáʼa̱kana na̱ yiví táʼan ña̱ xi̱sanáʼa̱nana tá ya̱chi̱ ña̱ káʼa̱n xa̱ʼa̱ ndáaña kúú ña̱ va̱ʼa ta ndáa kúú ña̱ va̱ása va̱ʼa. Tá saá, ¿á va̱ása ndáyáʼvika ña̱ káʼa̱n Biblia tiempo vitin? Ná kotoyó nda̱chun ndáyáʼvika ña̱yóʼo.

Xíniñúʼuvayó ña̱ kuniʼi Ndióxi̱ yichi̱ nu̱úyó

 Xíniñúʼuyó ña̱ kuniʼi Ndióxi̱ yichi̱ nu̱úyó ña̱ va̱ʼa kunda̱a̱-iniyó ndáaña kúú ña̱ va̱ʼa keʼéyó ta ndáaña kúú ña̱ va̱ása va̱ʼa keʼéyó, saáchi saá kúú ña̱ i̱xava̱ʼara miíyó. Biblia káchiña: “Na̱ yiví kǒo nda̱yí kúúmiína ña̱ kuniʼina yichi̱ nu̱ú miína” (Jeremías 10:23). Jehová a i̱xava̱ʼara miíyó ña̱ va̱ʼa ndaka̱xinyó ndáaña keʼéyó, soo va̱ása nítaxira nda̱yí ndaʼa̱yó ña̱ ka̱ʼa̱nyó ndáaña kúú ña̱ va̱ʼa á ña̱ va̱ása va̱ʼa. Saáchi Ndióxi̱ kúni̱ra ña̱ ná kundaa-iniyó miíra (Proverbios 3:5).

 Ña̱ káʼa̱n Ndióxi̱ xíʼinyó keʼéyó va̱xiña nu̱ú Biblia. Ná kotoyó nda̱chun ndáyáʼviní ña̱yóʼo.

•   Ndióxi̱ kúú ta̱ i̱xava̱ʼa miíyó (Salmo 100:3). Kúnda̱a̱-inira ndáaña kúú ña̱ xíniñúʼuyó ña̱ va̱ʼa si̱í kooyó, ña̱ va̱ʼa kuniyó ta saátu ña̱ va̱ása kundi̱ʼiní-iniyó. Saátu kúnda̱a̱-inira ndáaña kivi kundoʼoyó tá va̱ása xíniso̱ʼoyó ña̱ káʼa̱nra (Gálatas 6:7). Jehová kúni̱ra ña̱ si̱í ná kooyó. Biblia káʼa̱nña xa̱ʼa̱ra ña̱ kúúra ta̱ sánáʼa̱ miíyó xa̱ʼa̱ ña̱ va̱ʼa miíyó, ta níʼira yichi̱ nu̱úyó ña̱ va̱ʼa kunda̱a̱-iniyó ndáa yichi̱ kúú ña̱ xíniñúʼu ku̱ʼu̱nyó (Isaías 48:17).

•   Níma̱yó kivi sandáʼviña miíyó. Ku̱a̱ʼání na̱ yiví ndákanixi̱nína ña̱ níma̱yó kúú ña̱ kivi ka̱ʼa̱n xíʼinyó ndáaña kúú ña̱ va̱ʼa keʼéyó ta ndáaña kúú ña̱ va̱ása va̱ʼa keʼéyó. Soo Biblia káʼa̱nña ña̱yóʼo xa̱ʼa̱ níma̱yó: “Níma̱ na̱ yiví va̱ʼaníka sándaʼviña nu̱ú inkaka ña̱ʼa ta nda̱a̱ kivi chikaa̱ñana nu̱ú tu̱ndóʼo” (Jeremías 17:9). Tá va̱ása táxiyó ña̱ kuniʼi Ndióxi̱ yichi̱ nu̱úyó tá ndáka̱xinyó ña̱ keʼéyó, kivi xa̱a̱yó keʼéyó iin ña̱ʼa ña̱ va̱ása va̱ʼa ta tá ná ya̱ʼa tiempo kivi ndandikó-iniyó xa̱ʼa̱ ña̱yóʼo (Proverbios 28:26; Eclesiastés 10:2).

¿Á xíniñúʼu sandákoo na̱ níʼi yichi̱ nu̱ú na̱ veʼe-ñu̱ʼu ña̱ sanáʼa̱na xa̱ʼa̱ ña̱ káʼa̱n Biblia?

 Va̱ásaví. Biblia káʼa̱nña xíʼinyó ña̱ nda̱a̱ xa̱ʼa̱ Ndióxi̱ ta sánáʼa̱ña miíyó ndáaña kúni̱ra ná keʼéyó (1 Corintios 6:9-11; Gálatas 5:19-23). Ndióxi̱ kúni̱ra ña̱ ná kunda̱a̱-ini na̱ yiví xa̱ʼa̱ ña̱ nda̱a̱ yóʼo (1 Timoteo 2:3, 4). Xa̱ʼa̱ ña̱kán na̱ sánáʼa̱ xa̱ʼa̱ Ndióxi̱ xíniñúʼu sanáʼa̱na ña̱ va̱xi nu̱ú tu̱ʼunra (Tito 1:7-9).

 Ku̱a̱ʼání na̱ yiví va̱ása kúni̱na kundiku̱nna ña̱ káʼa̱n Biblia, xa̱ʼa̱ ña̱kán ndúkúna iin religión nu̱ú sánáʼa̱na ña̱ kúni̱ miína kuniso̱ʼona (2 Timoteo 4:3). Ña̱kán Biblia káxiní káʼa̱nña ña̱yóʼo xíʼinna: “Ndáʼviní na̱ káʼa̱n ña̱ va̱ʼa kúú ña̱ va̱ása va̱ʼa, ta ña̱ va̱ása va̱ʼa kúú ña̱ va̱ʼa” (Isaías 5:20). Ndióxi̱ ndatiinra ku̱a̱chi xíʼin na̱ níʼi yichi̱ nu̱ú na̱ veʼe-ñu̱ʼu na̱ va̱ása sánáʼa̱ na̱ yiví xa̱ʼa̱ ña̱ káʼa̱nra xa̱ʼa̱ ndáaña kúú ña̱ va̱ʼa ta ndáaña kúú ña̱ va̱ása va̱ʼa keʼéna.

Na̱ yiví na̱ ndíku̱n ña̱ káʼa̱n Biblia, ¿á káʼa̱nkúáchina xa̱ʼa̱ ña̱ kéʼé inkana?

 Va̱ásaví. Na̱ kéʼé ña̱ kútóo Ndióxi̱, ndíku̱nna yichi̱ ta̱ Jesús ta saátu ña̱ sa̱náʼa̱ra. Ta̱ Jesús sa̱náʼa̱ra na̱ discípulora ña̱ va̱ása ka̱ʼa̱nkúáchina xa̱ʼa̱ ña̱ kéʼé inkana, chi sa̱náʼa̱rana ña̱ kuʼvi̱-inina kunina ndiʼi na̱ yiví ta ixato̱ʼónana (Mateo 5:43, 44; 7:1).

 Na̱ xi̱ndiku̱n ta̱ Jesús xi̱keʼévana ña̱ xi̱kaʼa̱n Ndióxi̱ soo saátu xi̱kunda̱a̱-inina ña̱ kivi ndaka̱xin inka na̱ yiví ndáaña kúni̱na keʼéna (Mateo 10:14). Ta̱ Jesús va̱ása níka̱ʼa̱nra xíʼinna ña̱ kivi kuniñúʼuna ña̱ política á inkaka ña̱ʼa ña̱ ixandúxana xíʼin na̱ yiví ña̱ kundiku̱nna ña̱ káʼa̱n Ndióxi̱ (Juan 17:14, 16; 18:36).

¿Ndáaña va̱ʼa ndakiʼinyó tá ndíku̱nyó ña̱ káʼa̱n Biblia?

 Tá ná chikaa̱yó ndee̱ ña̱ keʼéyó ña̱ káʼa̱n Ndióxi̱, kivi ndakiʼinyó ña̱ va̱ʼa tá ná ya̱ʼa tiempo (Salmo 19:8, 11). Ña̱yóʼo kúú sava ña̱ va̱ʼa ña̱ kivi ndakiʼinyó:

•   Kusi̱íka-iniyó (Proverbios 29:6).

•   Vií kutáʼanyó xíʼin Ndióxi̱ (Proverbios 3:32).

•   Chindeétáʼan Ndióxi̱ xíʼinyó tá ná ya̱ʼayó nu̱ú tu̱ndóʼo (Proverbios 11:8).

•   Kivi kooyó ndiʼi tiempo nu̱ú ñuʼú yóʼo (Salmo 37:29).