Xa̱a̱ ku̱a̱ʼání na̱ yiví ndákanixi̱ní tá kánitáʼanna saá kúú ña̱ ndásaviína ndiʼi tu̱ndóʼo ña̱ kúúmiína. Soo su̱ví ña̱yóʼo kúú ña̱ sa̱náʼa̱ ta̱ Jesús miíyó ta kǒo níkeʼéraña tá ni̱xi̱yora nu̱ú ñuʼú yóʼo. Koto ndáaña ke̱ʼéra ta ndáaña ni̱ka̱ʼa̱nra.

Ña̱ ni̱ka̱ʼa̱n ta̱ Jesús

 Tá ni̱ka̱ʼa̱nndosó ta̱ Jesús chí yuku̱ sa̱náʼa̱rana ña̱ kǒo ni iin ku̱a̱chi ndúvií tá kánitáʼanna á tá sáa̱nína. Ná kotoyó sava ejemplo.

•   “Keʼéndó xíʼin inkana ndiʼi ña̱ kúni̱ndó keʼéna xíʼinndó” (Mateo 7:12; Lucas 6:31). Consejo ña̱ ta̱xi ta̱ Jesús yóʼo savana káʼa̱nna xíʼinña Regla de Oro, a ta ña̱ kúni̱ kachi ña̱yóʼo kúú ña̱ ná keʼéyó xíʼin inkana ña̱ kúni̱yó ná keʼéna xíʼinyó. Ni iinna kǒo kúni̱na ña̱ ná ixandi̱va̱ʼana xíʼinna, xa̱ʼa̱ ña̱kán to̱ʼó ná kooyó xíʼin ndiʼina ta va̱ʼa ná koo iniyó xíʼin ndiʼina, ni sava yichi̱ kǒo kíndo̱o-iniyó xíʼinna.

•   “Tá iinna kánina xa̱ʼnda̱ iin xiyo kúaʼa nu̱úndó ta taxindó inka xiyo nu̱úndó ná kanina” (Mateo 5:38, 39; Lucas 6:29). Tu̱ʼun ña̱ ni̱ka̱ʼa̱n ta̱ Jesús kǒo kúni̱ kachiña ña̱ xíniñúʼu taxiyó ña̱ ixandi̱va̱ʼana xíʼinyó. Na̱ su̱tu̱ na̱ ni̱xi̱yo tá ya̱chi̱ xi̱sanáʼa̱na na̱ yiví ña̱ xíniñúʼu ixandi̱va̱ʼana xíʼin na̱ íxandi̱va̱ʼa xíʼinna. Ña̱kán sa̱náʼa̱ ta̱ Jesús na̱ discípulora ña̱ ná kǒo sa̱a̱ kamana, ta ni ná kǒo ixandi̱va̱ʼana xíʼin na̱ íxandi̱va̱ʼa xíʼinna. b

•   “Kuʼvi̱-inindó kunindó na̱ sáa̱-ini xíni ndóʼó” (Mateo 5:43, 44; Lucas 6:27). Ta̱ Jesús sa̱náʼa̱ra miíyó ña̱ xíniñúʼu vií keʼéyó xíʼin na̱ íxandi̱va̱ʼa xíʼinyó á na̱ sáa̱-ini xíni miíyó, soo ña̱yóʼo kǒo kúni̱ kachiña ña̱ kíndo̱o-iniyó xíʼin ña̱ kini ña̱ kéʼéna. c Tá va̱ʼa iniyó xíʼin na̱ sáa̱-ini xíni miíyó sana ña̱yóʼo kivi chindeétáʼanña xíʼinna ña̱ vií keʼéna xíʼinyó.

Ña̱ ke̱ʼé ta̱ Jesús xíʼin ña̱ keʼéra chí nu̱únínu

 Ta Jesús ni̱ka̱ʼa̱nra ña̱ kǒo ni iin ku̱a̱chi ndúvií tá kánitáʼanna, ña̱kán kǒo níxi̱kanitáʼanra xíʼin ni iinna. Tá kúú, ñuú tá ti̱innara iin ta̱ discípulo ta̱ Jesús ka̱nitáʼanra xíʼin na̱kán ña̱ va̱ʼa ndakiʼinra tu̱ʼunra. Soo ta̱ Jesús ni̱ka̱ʼa̱nra xíʼinra: “Taxiva̱ʼa espadaún, chi ndiʼi na̱ xíniñúʼu espada kuvina xíʼin espada” (Mateo 26:52). Ta̱ Jesús ni̱na̱ʼa̱ra ña̱ kúʼvi̱-inira xínira na̱ sáa̱-ini xíni miíra, i̱xakáʼnu-inira xa̱ʼa̱ na̱ i̱xandi̱va̱ʼa xíʼinra ta nda̱a̱ ni̱ka̱ʼa̱nra xíʼin Ndióxi̱ xa̱ʼa̱na (Lucas 23:33, 34; 1 Pedro 2:23).

 Biblia káʼa̱nña xa̱ʼa̱ ta̱ Jesús ña̱ kúúra “Ta̱ chíñu ta̱ táxi ku̱a̱ʼání ña̱ va̱ʼa”, saátu káʼa̱nña ña̱ si̱lóʼoní kúma̱ní ta sandíʼi-xa̱ʼa̱ra ndiʼi ku̱a̱chi ña̱ íyo ñuyǐví yóʼo (Isaías 9:6, 7). Tá kúni̱kaún kunda̱a̱-iniún xa̱ʼa̱ ña̱ʼa ña̱ liviní koo chí nu̱únínu, kaʼvi artículo ña̱ naní “Un mundo sin guerras y sin conflictos armados es posible”.