Chí México ta saátu ti̱xin u̱ʼu̱n país ña̱ íyo Centroamérica, ki̱ʼva 290 na̱ yiví káchíñuna ña̱ sándaya̱ʼana tutu ña̱ tává na̱ ñuu Jehová yáʼaka 60 nu̱ú tu̱ʼun. ¿Nda̱chun ndáyáʼviní ña̱ chiñu yóʼo? Saáchi tá káʼvi na̱ yiví tutu tu̱ʼun miína, va̱ʼaníka kúnda̱a̱-inina xíʼinña ta nda̱a̱ níma̱na xáa̱ ña̱ káʼa̱nña (1 Corintios 14:9).

Ña̱ va̱ʼaka kunda̱a̱-ini na̱ yiví xíʼin tutu ña̱ tává na̱ ñuu Jehová, sava na̱ traductor na̱ xi̱kachíñu oficina ña̱ kúúmií na̱ testigo Jehová chí ñuu México ku̱a̱ʼa̱nna koona ñuu nu̱ú káʼa̱nna tu̱ʼun miína. Ta vitin na̱ traductor yatinka ndóona xíʼin na̱ yiví na̱ káʼa̱n tu̱ʼun miína, ta ña̱yóʼo chíndeétáʼanña xíʼinna ña̱ viíníka koo tutu ña̱ távána tasaá va̱ása ixayo̱ʼvi̱ña xíʼin na̱ yiví ña̱ kunda̱a̱-inina xíʼin ña̱ káʼa̱nña.

¿Ndáaña káʼa̱n na̱ traductor xa̱ʼa̱ ña̱yóʼo? Ta̱ Federico, ta̱ sándaya̱ʼa tutu ña̱ tu̱ʼun ínkóo (náhuatl) ña̱ káʼa̱nna chí Guerrero káchira: “U̱xu̱ ku̱i̱ya̱ ni̱xi̱yoi̱ chí ñuu México ta ndiʼi tiempo yóʼo iin kuití na̱ matrimonio na̱ káʼa̱n tu̱ʼi̱n nda̱ni̱ʼíi̱. Soo vitin, ndiʼi na̱ yiví na̱ íyo yatin nu̱ú íyo oficina ña̱ traducción káʼa̱nna tu̱ʼi̱n”.

Ñá Karin, ñá sándaya̱ʼa tutu ña̱ tu̱ʼun bajo alemán ku̱a̱ʼa̱nñá kooñá chí Chihuahua, ñáyóʼo káchiñá: “Xa̱ʼa̱ ña̱ yatinka íyoi̱ xíʼin na̱ menonita, chíndeétáʼanña xíʼi̱n ña̱ va̱ʼaka kunda̱a̱-inii̱ ndáa ki̱ʼva káʼa̱nna. Saáchi íyondi̱ iin ñuu loʼo ta xa̱ʼa̱ ña̱yóʼo tá xítondi̱ chí ventana, xítondi̱ na̱ yiví na̱ kivi xa̱a̱ sakúaʼa xa̱ʼa̱ Ndióxi̱”.

Ñá Neyfi, ñá sándaya̱ʼa tutu ña̱ tu̱ʼun maya ñá íyo chí Mérida (México) káchiñá: “Tá sánáʼa̱ndi̱ na̱ yiví na̱ káʼa̱n tu̱ʼun maya xa̱ʼa̱ Ndióxi̱, kíʼinndi̱ kuenta ndáa tu̱ʼun kúú ña̱ kǒo kúnda̱a̱-inina xíʼin. Tasaá kúú ña̱ kíʼinndi̱ kuenta ña̱ xíniñúʼu nasamandi̱ ña̱ tu̱ʼun yóʼo ña̱ va̱ʼaka kunda̱a̱-ini na̱ yiví xíʼinña ta va̱ása ixayo̱ʼvi̱ña xíʼinna”.

¿Ndáaña va̱ʼa kúú ña̱ ndákiʼin na̱ yiví na̱ káʼvi tutu yóʼo tu̱ʼun miína? Ná ka̱ʼa̱nyó xa̱ʼa̱ iin ejemplo. Ñá Elena ñá káʼa̱n tu̱ʼun váa (tlapaneco) yáʼaka 40 ku̱i̱ya̱ xi̱xa̱ʼa̱nñá reunión ña̱ kúúmií na̱ testigo Jehová ña̱ xíyo tu̱ʼun sáʼán. Soo kǒo níxi̱kunda̱a̱ káxi iniñá xa̱ʼa̱ ña̱ xi̱sanáʼa̱na. Ñáyóʼo káchiñá: “Xi̱xa̱ʼa̱n kuitíi̱ reunión saáchi xi̱ndakanixi̱níi̱ ña̱ xíniñúʼu ku̱ʼu̱nvai̱”. Soo tá ki̱xáʼana xíniñúʼuna sava folleto ña̱ íyo tu̱ʼun váa (tlapaneco) ña̱ sánáʼa̱nañá xa̱ʼa̱ Ndióxi̱, ki̱xáʼañá kúʼvi̱níka-iniñá xíniñára ta nda̱taxiñá miíñá ndaʼa̱ra ta nda̱kuchiñá tá ku̱i̱ya̱ 2013. Ñá Elena káʼa̱nkañá: “Táxiníi̱ tíxa̱ʼvi ndaʼa̱ Jehová xa̱ʼa̱ ña̱ chi̱ndeétáʼanra xíʼi̱n ña̱ ku̱nda̱a̱-inii̱ ña̱ nda̱a̱ xa̱ʼa̱ra”.