Ku̱a̱ʼání na̱ va̱lí kúa̱an na̱ íyo chí Tabasco (México) xi̱kuni̱na kaʼnína miína, xa̱ʼa̱ ña̱kán na̱ testigo Jehová ke̱ʼéna iin campaña especial ña̱ ni̱xi̱yo u̱vi̱ yo̱o̱ tá ku̱i̱ya̱ 2017, ña̱ va̱ʼa ku̱ʼu̱nna natúʼunna xa̱ʼa̱ Ndióxi̱ xíʼinna. Xa̱ʼa̱ ña̱kán ndi̱kó tukuna xi̱niñúʼuna revista ña̱ ¡Despertad! ña̱ ka̱na yo̱o̱ abril ku̱i̱ya̱ 2014, ña̱ naní “¿Vale la pena vivir? Tres razones para no darse por vencido”. Ta na̱ yiví va̱ʼaní xi̱niso̱ʼona ña̱ na̱túʼunna xíʼinna xa̱ʼa̱ Ndióxi̱.

Iin ta̱ kúú testigo Jehová ta̱ naní Faustino na̱túʼunra xíʼin iin ñaʼá ñá xi̱ndi̱ʼi̱ní-ini xa̱ʼa̱ se̱ʼeñá ta̱ xi̱kuumií 22 ku̱i̱ya̱. Ta, ta̱ loʼo se̱ʼe ñáyóʼo xi̱kuumiíra kue̱ʼe̱ ña̱ sándakava-inina á depresión ta xi̱kuni̱ra kaʼníra miíra. Ta ñáyóʼo kǒo níxi̱kunda̱a̱-iniñá ndáa ki̱ʼva chindeétáʼanñá xíʼin se̱ʼeñá. Soo tá ta̱xi ta̱ Faustino revista yóʼo ndaʼa̱ñá, ñákán ka̱chiñá: “Mií ña̱yóʼo kúú ña̱ xíniñúʼu se̱ʼi̱”. Tá ni̱ya̱ʼa inka ki̱vi̱, ta̱ Faustino ni̱xa̱ʼa̱nra xi̱tora se̱ʼe ñá ñaʼá kán, ta na̱túʼunra xíʼinra xa̱ʼa̱ consejo ña̱ ka̱na nu̱ú Biblia ña̱ va̱xi nu̱ú revista kán. Tá xa̱a̱ ni̱ya̱ʼa ku̱a̱ʼá yichi̱ ña̱ na̱túʼun ta̱ Faustino xíʼin ta̱ loʼo kán, ta̱yóʼo na̱samara ña̱ xi̱ndakanixi̱níra. Ta̱ Faustino káchira: “Vitin ta̱ loʼo yóʼo va̱ása ndíʼi̱ka-inira ta saátu kúsi̱í-inira”. Ta saátu ta̱ loʼo yóʼo nátúʼunra xa̱ʼa̱ ña̱ sákuaʼara xíʼin ñanira, chi saátu ta̱yóʼo kúúmiíra kue̱ʼe̱ ña̱ sándakava-inina á depresión.

Ñá Karla ñá íyo ñuu ña̱ naní Huimanguillo, xi̱niñúʼuñá ña̱ revista yóʼo ña̱ va̱ʼa chindeétáʼanñá xíʼin iin ñá loʼo ñá xi̱kaʼvi xíʼinñá escuela. Ñá Karla káchiñá: “Ki̱ʼi̱n kuenta ña̱ iin ñá loʼo ñá xi̱kaʼvi xíʼi̱n escuela ñá xi̱kuumií 14 ku̱i̱ya̱, xi̱kusuchí-iniñá. Ña̱kán na̱túʼi̱n xíʼinñá, ta ñáyóʼo ni̱ka̱ʼa̱nñá xíʼi̱n ndáa ki̱ʼva íyoñá xíʼin na̱ veʼeñá. Tasaá ki̱ʼi̱n kuenta ña̱ chí ndaʼa̱ yítinñá xi̱na̱ʼa̱ ña̱ xi̱xaʼndañáña”. Ñá loʼo yóʼo xi̱xaʼndañá ndaʼa̱ñá xíʼin xa̱ʼa̱ñá. Ta xi̱ndakanixi̱níñá ña̱ kininí xi̱na̱ʼa̱ñá, ta saátu ña̱ va̱ása si̱í íyoñá. Tasaá ñá Karla ta̱xiñá revista ña̱ ¡Despertad! ndaʼa̱ñá. Tándi̱ʼi ka̱ʼviñá ña̱ revista yóʼo, ni̱ka̱ʼa̱nñá ña̱ nda̱a̱ táki̱ʼva íyo ña̱ ka̱ʼyína xa̱ʼa̱ miíñá saá íyo ña̱ va̱xi nu̱úña. Tasaá ni̱xa̱ku̱ñá ta ni̱ka̱ʼa̱nñá ña̱ ndáyáʼviva ña̱ tákuyó.

Iin ta̱a ta̱ íyo ñuu ña̱ naní Villahermosa xi̱ndi̱ʼi̱ní-inira, saáchi ta̱vánara nu̱ú xi̱kachíñura, ta ñá síʼira sa̱ndákooñára xíʼin na̱ va̱lí se̱ʼera. Ña̱kán ni̱ka̱ʼa̱nra xíʼin Ndióxi̱ ña̱ ná chindeétáʼanra xíʼinra, soo kǒo ña̱ níxi̱sandíko-inira. Ña̱kán xi̱kuni̱ra kaʼníra miíra, soo mií ki̱vi̱ kán ni̱xa̱a̱ ta̱ Martín xíʼin ta̱ Miguel ka̱ni ndaʼa̱na yéʼéra, ta na̱yóʼo testigo Jehová kúúna. Tá xu̱ná ta̱ ta̱a yóʼo yéʼé, na̱yóʼo ta̱xina revista ña̱ ¡Despertad! ndaʼa̱ra. Tá xi̱ni ta̱ ta̱a kán título ña̱ revista yóʼo, nda̱kanixi̱níra ña̱ nda̱kuiin Ndióxi̱ ña̱ ni̱ka̱ʼa̱nra xíʼinra. Ta ta̱ Martín xíʼin ta̱ Miguel xi̱niñúʼuna Biblia ña̱ sa̱ndíkona-inira. Tá ni̱ya̱ʼa loʼo ki̱vi̱ ndi̱kó tukuna nu̱úra, ta ki̱ʼinna kuenta ña̱ va̱ása ndíʼi̱ va̱ʼaka inira ta xa̱a̱ va̱ʼa loʼo kúnira. Ta vitin, u̱vi̱ yichi̱ sánáʼa̱nara xa̱ʼa̱ Ndióxi̱ ti̱xin iin semana.

Tá ni̱xi̱yo campaña chí Tabasco (México) na̱ testigo Jehová ni̱xa̱ʼa̱nna na̱túʼunna xíʼin na̱ ñúʼu veʼeka̱a. Ta na̱túʼunna xíʼin na̱ ñúʼu veʼeka̱a xa̱ʼa̱ consejo ña̱ va̱xi nu̱ú Biblia ña̱ kivi chindeétáʼan xíʼinna ña̱ si̱í koona. Ña̱kán, na̱ testigo Jehová ni̱na̱ʼa̱na video nu̱úna xíʼin iin discurso ña̱ ka̱na nu̱ú Biblia ta saátu nda̱kanina nu̱úna xa̱ʼa̱ ña̱ káʼa̱n ña̱ revista, ta ña̱yóʼo káʼa̱nña xa̱ʼa̱ ña̱ kivi chindeétáʼan xíʼinna ña̱ va̱ása kuni̱na kaʼnína miína. Tá kúú, iin ta̱ ndíka̱a̱ veʼeka̱a ni̱ka̱ʼa̱nra: “Xa̱a̱ u̱ni̱ yichi̱ kúni̱i̱ kaʼníi̱ miíi̱. Savana xi̱ka̱ʼa̱nna xíʼi̱n ña̱ ndíʼi̱va-ini Ndióxi̱ xa̱ʼíi̱, soo va̱ása nína̱ʼa̱na nu̱úi̱ ndáa táʼví nu̱ú Biblia xi̱ka̱ʼa̱nña xa̱ʼa̱ ña̱yóʼo, soo ña̱ sa̱náʼa̱ ndóʼó yi̱ʼi̱ nda̱chika̱a̱níña ndeéi̱”.

Ndiʼina na̱kunda̱a̱-ini xa̱ʼa̱ ña̱ campaña yóʼo. Tá kúú, ta̱ secretario ña̱ salud ni̱ka̱ʼa̱nra xíʼin na̱ testigo Jehová ña̱ va̱ʼaní chiñu ke̱ʼéna ña̱ chi̱ndeétáʼanna xíʼin na̱ yiví na̱ ñuu kán. Ta, nda̱a̱ nu̱ú iin periódico ta̱vána iin artículo ña̱ xi̱ka̱ʼa̱n xa̱ʼa̱ campaña kán, ña̱ xi̱naní “Salen a combatir el suicidio”.