Nu̱ú Mateo 28:19, 20, ni̱ka̱ʼa̱n ta̱ Jesús ndáaña xíniñúʼu keʼéyó ña̱ va̱ʼa xa̱a̱yó kooyó testigo Jehová. Nu̱ú ña̱ versículo yóʼo káʼa̱nña xa̱ʼa̱ ña̱ʼa ña̱ ndáyáʼviní ña̱ va̱ʼa xa̱a̱yó kooyó discípulo ta̱ Jesús ta saátu ña̱ ka̱ʼa̱nyó xa̱ʼa̱ Jehová xíʼin na̱ yiví.

 Ña̱ nu̱ú: Sakuaʼa xa̱ʼa̱ ña̱ sánáʼa̱ Biblia. Ta̱ Jesús chi̱ndaʼára na̱ xi̱ndiku̱n miíra ña̱ ná sanáʼa̱na na̱ yiví chiñu ña̱ xa̱ʼndara nu̱úna (Mateo 28:19, 20). Tu̱ʼun ña̱ discípulo kúni̱ kachiña “na̱ sákuaʼa” á “iin na̱ sánáʼa̱na”. Nu̱ú ña̱ Biblia va̱xi ña̱ sa̱náʼa̱ ta̱ Jesús ña̱ kivi chindeétáʼan xíʼún ña̱ kivi koo si̱íún ta saátu ña̱ kunda̱a̱-iniún ndáa xa̱ʼa̱ kúú ña̱ tákún (2 Timoteo 3:16, 17). Kusi̱í-inindi̱ na̱ʼa̱ndi̱ nu̱ún ndáaña sánáʼa̱ ña̱ Biblia ta kǒo xu̱ʼún kíʼinndi̱ xa̱ʼa̱ ña̱yóʼo (Mateo 10:7, 8; 1 Tesalonicenses 2:13).

 Ña̱ u̱vi̱: Keʼé ña̱ sákuaʼún. Ta̱ Jesús ni̱ka̱ʼa̱nra xíʼin na̱ discípulora ña̱ va̱ása xíniñúʼu sakuaʼa kuitína ña̱ sa̱náʼa̱ra, chi xíniñúʼu keʼéna chiñu ña̱ xa̱ʼndara (Mateo 28:20). Ña̱yóʼo kúni̱ kachiña ña̱ va̱ása xíniñúʼu kunda̱a̱ kuití iniún xa̱ʼa̱ ña̱ va̱xi nu̱ú Biblia. Chi xíniñúʼún nasamaún ki̱ʼva ña̱ kéʼún xíʼin ña̱ ndákanixi̱níún (Hechos 10:42; Efesios 4:22-29; Hebreos 10:24, 25). Na̱ xíniso̱ʼo chiñu ña̱ xa̱ʼnda ta̱ Jesús kúni̱na kundiku̱nnara ta xa̱ʼa̱ ña̱yóʼo ndátaxina miína ndaʼa̱ Jehová (Mateo 16:24).

 Ña̱ u̱ni̱: Ña̱ ndakuchiún (Mateo 28:19). Ña̱ va̱xi nu̱ú Biblia chítáʼanña ña̱yóʼo xíʼin ña̱ ndúxu̱nna (chitáʼanña xíʼin Romanos 6:2-4). Tá ndákuchiyó náʼa̱yó ña̱ sa̱ndákooyó ña̱ va̱ása va̱ʼa ña̱ xi̱keʼéyó tá ya̱chi̱ ta kixáʼayó kéʼéyó ña̱ va̱ʼa. Ña̱kán tá ná ndakuchiún na̱ʼún nu̱ú ndiʼina ña̱ xa̱a̱ kéʼún u̱vi̱ ña̱ ni̱ka̱ʼa̱n ta̱ Jesús ta saátu káʼún xíʼin Ndióxi̱ ña̱ vií ná koo ña̱ xínitúni̱ún (Hebreos 9:14; 1 Pedro 3:21).

 Ka̱ʼa̱n xa̱ʼa̱ ña̱yóʼo xíʼin na̱ anciano na̱ íyo ti̱xin congregación. Na̱yóʼo ka̱ʼa̱nna xíʼún ña̱ va̱ʼa kiʼinna kuenta á ndixa kúnda̱a̱-iniún xíʼin ña̱ sánáʼa̱ ña̱ Biblia, ta á kéʼún ña̱ xa̱a̱ ku̱a̱ʼún sákuaʼún ta saátu á xa̱a̱ ni̱ka̱ʼún xíʼin Ndióxi̱ ña̱ keʼún ña̱ kúnira ta miíún nda̱kaxin keʼé ña̱yóʼo (Hechos 20:28; 1 Pedro 5:1-3).

 Ndi̱ʼi̱ sákuaʼnundi̱ se̱ʼendi̱ ta táxindi̱ “yichi̱ nu̱úna nda̱a̱ táki̱ʼva kúni̱ mií Jehová”, ta saátu nda̱a̱ táki̱ʼva káʼa̱n ña̱ Biblia (Efesios 6:4). Tá xáʼnuna, miína kúú na̱ xíniñúʼu ndaka̱xin ndáaña kúú ña̱ xíniñúʼu keʼéna xa̱ʼa̱ ña̱ sákuaʼana ta kuniso̱ʼona ña̱ káʼa̱n ña̱ Biblia tasaá va̱ʼa ndakuchina (Romanos 12:2). Soo tá ndíʼi iin tá iin na̱ yiví ndaka̱xin á ndasakáʼnuna Jehová á va̱ása keʼénaña (Romanos 14:12; Gálatas 6:5).