Na̱ Cuerpo Gobernante kúú iin tiʼvi loʼo na̱ hermano na̱ káʼvi va̱ʼa xa̱ʼa̱ tu̱ʼun Ndióxi̱ ta na̱yóʼo kúú na̱ níʼi yichi̱ nu̱ú ndiʼi na̱ testigo Jehová na̱ ndóo iníí nu̱ú ñuʼú yóʼo. Ta chiñu yóʼo kúú ña̱ kéʼéna:

•   Kíʼinna kuenta ndáa ki̱ʼva íyo ña̱ kána nu̱ú tutu ña̱ sákuaʼayó xa̱ʼa̱ Ndióxi̱ xíʼin ña̱ káʼviyó ti̱xin reunión ta saátu ña̱ sanáʼa̱na ti̱xin escuela ña̱ kúúmií na̱ Testigo Jehová (Lucas 12:42).

•   Kíʼinna kuenta xíʼin chiñu ña̱ kéʼé na̱ testigo Jehová iníísaá ñuyǐví. Ta ña̱yóʼo kúú ña̱ kíʼinna kuenta xíʼin ña̱ nátúʼunna xa̱ʼa̱ tu̱ʼun Ndióxi̱ ta saátu ña̱ vií kuniñúʼuna ña̱ʼa ña̱ táxi na̱ hermano.

 Na̱ Cuerpo Gobernante ndíku̱nna yichi̱ ña̱ sa̱ndákoo na̱ apóstol xíʼin na̱ anciano na̱ xi̱ndoo ñuu Jerusalén na̱ ni̱xi̱yo tá siglo nu̱ú, na̱yóʼo ndáka̱xinna keʼéna ña̱ ndáyáʼvi keʼé na̱ congregación (Hechos 15:2). Na̱ Cuerpo Gobernante su̱ví na̱yóʼo kúú na̱ xáʼndachíñu nu̱ú na̱ ñuu Ndióxi̱ ta ni na̱ níʼi yichi̱ nu̱úna, tá ya̱chi̱ va̱ása níkeʼéna ña̱yóʼo, na̱yóʼo ndiʼi tiempo na̱ndukúna nu̱ú Biblia ndáaña keʼéna tá xa̱a̱ nda̱kaxinna keʼéna iin ña̱ʼa, ta ndákunina ña̱ mií Jehová kúú ta̱ nda̱kaxin ta̱ Jesús ña̱ níʼira yichi̱ nu̱ú na̱ congregación (1 Corintios 11:3; Efesios 5:23).

 Na̱ Cuerpo Gobernante kúú ta̱ Kenneth Cook, ta̱ Gage Fleegle, ta̱ Samuel Herd, ta̱ Geoffrey Jackson, ta̱ Stephen Lett, ta̱ Gerrit Lösch, ta̱ Mark Sanderson, ta̱ David Splane xíʼin ta̱ Jeffrey Winder. Ndiʼi na̱yóʼo íyona chí sede mundial ña̱ íyo chí Warwick (Nueva York).

 Na̱ Cuerpo Gobernante i̱xava̱ʼana i̱ñu̱ na̱ comité na̱ kíʼin kuenta xíʼin iin tá iin chiñu. Iin tá iin na̱ hermano yóʼo káchíñuna xíʼin iin á ku̱a̱ʼáka na̱ comité yóʼo.

•   Comité na̱ Coordinadores. Kíʼinna kuenta xíʼin ña̱ asunto legal, saátu íxatu̱ʼvana ña̱ʼa tá xa̱a̱ kúú iin desastre natural á tá xa̱a̱ yáʼa na̱ testigo Jehová nu̱ú tu̱ndóʼo ta saátu tá va̱ása táxi na̱ chíñu ña̱ natúʼunna xa̱ʼa̱ tu̱ʼun Ndióxi̱.

•   Comité na̱ Personal. Kíʼinna kuenta xíʼin ndiʼi na̱ íyo ti̱xin Betel a ndiʼi na̱ káchíñu ti̱xin ña̱yóʼo.

•   Comité ña̱ Publicación. Kíʼinna kuenta xíʼin tutu ña̱ távána ña̱ sakúaʼayó xa̱ʼa̱ Ndióxi̱ ta saátu ña̱ chíndaʼánaña ku̱a̱ʼa̱nña inka lugar ta saátu kíʼinna kuenta xíʼin ña̱ íxava̱ʼana inka salón xíʼin oficina ña̱ traducción a inkaka Betel.

•   Comité ña̱ Servicio. Kíʼinna kuenta xíʼin ña̱ natúʼunna “tu̱ʼun va̱ʼa xa̱ʼa̱ Reino Ndióxi̱” (Mateo 24:14).

•   Comité ña̱ Enseñanza. Kíʼinna kuenta xíʼin ndáa ki̱ʼva sanáʼa̱na ti̱xin reunión ta saátu kíʼinna kuenta xíʼin programa ña̱ audio xíʼin video.

•   Comité ña̱ Redacción. Íxatu̱ʼvana ndiʼi tutu ña̱ sakúaʼayó xa̱ʼa̱ Ndióxi̱ ta saátu ndiʼi ña̱ kána nu̱ú sitio ña̱ kúúmiíyó nu̱ú internet ta saátu kíʼinna kuenta xíʼin chiñu ña̱ kéʼéna ti̱xin ña̱ traducción.

 Ndiʼi chiñu ña̱ kéʼé na̱ comité yóʼo, na̱ Cuerpo Gobernante ndákutáʼanna iin yichi̱ ti̱xin iin semana ña̱ va̱ʼa kotona ndáa ña̱ʼa kúú ña̱ xíniñúʼu na̱ ñuu Ndióxi̱. Ti̱xin reunión ña̱ kúúmiína yóʼo xíniñúʼuna Biblia ña̱ va̱ʼa ndaka̱xinna ndáaña kúú ña̱ keʼéna ta saátu ndúkúna espíritu santo Ndióxi̱ ña̱ va̱ʼa chindeétáʼanña xíʼinna. Ta saátu ndiʼi tiempo chíka̱a̱na ndee̱ ña̱ inkáchi ná koo ña̱ ndaka̱xinna keʼéna (Hechos 15:25).

 Iin tá iin na̱ comité na̱ Cuerpo Gobernante, íyo na̱ hermano na̱ nda̱kú íyo ini xíʼin Ndióxi̱ ña̱ chíndeétáʼanna xíʼinna ña̱ ná keʼé viína chiñuna xa̱ʼa̱ ña̱ xínina (1 Corintios 4:2). Ta na̱ chíndeétáʼan xíʼin na̱ hermano yóʼo xáʼa̱nna ndiʼi reunión ña̱ xíyo semana tá semana ña̱ kúúmií na̱ comité yóʼo. Soo su̱ví na̱ hermano yóʼo kúú na̱ ndáka̱xin ña̱ keʼéna, soo káʼa̱nvana xa̱ʼa̱ sava ña̱ʼa ña̱ kivi chindeétáʼan xíʼin na̱ hermano yóʼo ña̱ ndaka̱xinna keʼéna, tasaá kixáʼana kéʼéna ña̱ ni̱ka̱ʼa̱n na̱ comité keʼéna. Na̱ Cuerpo Gobernante káʼa̱nna xíʼin na̱ hermano yóʼo ná ku̱ʼu̱nna kotona inka na̱ testigo Jehová na̱ íyo inka táʼví ña̱ ñuyǐví yóʼo á saátu kíʼinna kuenta xíʼin programa ña̱ xíyo ku̱i̱ya̱ tá ku̱i̱ya̱ á tá xiyo graduación ña̱ Escuela ña̱ Galaad.