Skip to content

Skip to secondary menu

Sipasimuneng Jehoba

Mentawai

Momoi pá Sirimanua Simamatei Murimanua Minca?

Momoi pá Sirimanua Simamatei Murimanua Minca?

Aponia alegiet Mui?

  • Momoi.

  • Támomoi.

  • Tátaagai.

 APONIA AIKUA BUKO SIPUNENAN

”Kababarat katusuruatda simamatei.”—Apostel 24:15, Buko Sipunenan LAI.

LULUNIA KA SITA

Maron paatuadda sia simageja baga.2 Korintus 1:3, 4.

Belaakénangan sia sikupkup pulotokat ka kamateijat.Ibrani 2:15.

Ai takakaroni baga katusuruat, oto paili sita minca ka sia simamatei.—Johannes 5:28, 29.

 MATONEM LEÚ BAGATTA APONIA AIKUA BUKO SIPUNENAN?

Ooi. Ai telu katukoloubatnia:

  • Taikamanua Sipasibabaraake purimanuaijat. Aikuangan Buko Sipunenan, Taikamanua Jehoba “katubum ai bakkat purimanuaiat”. (Psalmen 36:10; Apostel 17:24, 25) Taikamanua sipasiake sangamberi purimanuaijat, momoi itoiliake ele irimanuaake sia minca simamatei.

  • Siboiki aigalaian Taikamanua masisuruake sia simamatei. Ai balu ngaminca sitususurat ka Buko Sipunenan katusuruat sia simamatei—ai simabaja, sibau tubu, simanteu, samba leúet sinanalep—ai suruake sia minca bule rapurimanua minca ka polak. Ai simaruei peilé ailango, samba aileúet epat ngagogoian burúnia ka ratei!—Johannes 11:39-44.

  • Ka gogoi sibabara geti, ioba Taikamanua masisuruake minca sia simamatei. Tá ioba Taikamanua Jehoba masiitco kamateijat, patkuanangan kamateijat nenda iate saggak. (1 Korintus 15:26) Maolangan bagania Taikamanua masisapruake saggak nenda, samba masisuruake sangamberi simamatei sikuddu ka paatuatnia bule rapurimanua minca ka polak néné.—Job 14:14, 15.

 PAATUET TA

Angoi tamabajá samba tamamatei?

Buko Sipunenan masialegi panounougat néné ka 1 MOSE 3:17-19 samba ROMA 5:12.