Skip to content

Skip to secondary menu

Sipasimuneng Jehoba

Mentawai

Nuoba’leukam Masiagai-aponia Katukolobat Nia Katubulanan?

Nuoba’leukam Masiagai-aponia Katukolobat Nia Katubulanan?

KATUBULANAN pagalaijat apa? Pagalaijat simaperlu kabagat purimanuaijat simarei-rei ranou-nou ake Sirimanua. Aileupa nupaatukam panou-nougat kelenene:

  • Bulatniapa Taikamanua Jehoba masipasikeli sita?
  • Bulatniapa pasaggangan samba pangoringen takbabara minca?
  • Kipapa galai tubutta ka teteret tu matei?
  • Aponia kiddijet bagadda sia Simamatei?
  • Kipa panindougatku bule iarepi Taikamanua Jehoba?
  • Kipa ku gagalai bule ibara kusilo puangkakat baga?

Kaipa tu gagaba aleigiet parerekat nenda? Ka perpustakaan ele ka toko buko, ai piga ngaribu pa buko masikua alegietnia. Tapoi, aileu sara buko tak makerenia ka buko bagei. Ailewet buko-buko malainge ituico tapoi tak mauju tusili minca.

Tapoi aileu sara buko siagai alegietnia sibaliu pukaronan bagatta. Buko nene iate katubulanan. Jesus Kristus masisegeake panindougat nia ka Ukkui Taikamanua Jehoba: ”Tiboijetnu poi Katubulanan.” (Yohanes 17:17) Kineineiget ataagaiyan tiboiyet et iate buko Sipunenan, kasimakolou pagalaijat panou-nougat kapata.

Bulatniapa Taikamanua Jehoba Masipasikeli Sita?

Sara si manteu katalagadda sirimanua simigi

ANGOI BARA PANOU-NOUGAT KELENENE: Purimanuaijatta kapolak nene maigi paoreat samba pasisiboat sipaoreiji sita. Maigi puaranan masigelai ake pagalaijat paoreat, sibaraake Taikamanua Jehoba.

APONIA AIGELAIAKE SITA BUKO SIPUNENAN: Sangamberi pangoringen paoreijat tak sibara akenen Taikamanua Jehoba. (Ayub 34:10) Kalulut nuntu bagania Taikamanua Jehoba ka Sirimanua, Jesus aigelaiake sita manindou, ”Ukkuimai sikuddu ka manua, bule onim le tupuneni, kau ibara purimataatnu, bule turedet teu bagam ke le ka manua, kasedda leu et ka Polak.” (Mateus 6:9, 10) Taikamanua Jehoba simanuntu baga kasita ioba masi patoila katet bagania bule muaili ka siniboinia.—Yohanes 3:16.

Icokam Kejadian 1:26-28; Zakobus 1:13; samba 1 Petrus 5:6, 7.

Bulatniapa Pasaggangan samba Pangoringen Takbabara Minca?

Tai tentera

ANGOI BARA PANOU-NOUGAT KELENENE: Aipoi pasaggangan marei-rei masi langoake Sirimanua, sangamberitta leuet masiorik pangoringen.

APONIA AIGELAIAKE SITA BUKO SIPUNENAN: Kasara tetre Taikamanua Jehoba masi bara ake paabanan ka sangaliot Polak. Kabagat purimataatnia Taikamanua Jehoba si tak anai pasaggangan ka Sirimanua. Ai poi sangamberidda ta masi pakei tegle, ele lanjau ra ka pasaggangan, tapoi ibaliu pakeijetda mumonei le. (Yesaya 2:4) Taikamanua Jehoba masilepaake sangamberi nia paorejat samba pangoringen. Buko Sipunenan masikua: ”Taikamanua Jehoba masiposa geti sangamberi elu sibara kamatadda. Tak anbabara kamateijat minca, pureu-reugat baga, sou baga ele pu bebesi leu tak babara minca. Sangamberi nia sibabara kasiboiki atusabawan.”—Pasipoilianan 21:3, 4.

Icokam Mazmur 37:10, 11; 46:9; samba Mika 4:1-4.

Kipapa’ Galai Tubutta ka Teteret tu Matei?

Puariat

ANGOI BARA PANOU-NOUGAT KELENENE: Aipoi maigi puaranan ka sangaliot Polak masikua, aipeileu sipuririmanua, katubudda Sirimanua, kenanen amateian nia. Sabagei masikua sia Simamatei momoi peile masibesiki Sirimanua sipuririmanua, ele Taikamanua Jehoba ioba masiukum, masipaoreiji Sirimanua si jo ka narako teret buru-buru.

APONIA AIGELAIAKE SITA BUKO SIPUNENAN: Kateteret Sirimanua matei, Sirimanua simamatei geti tak an iagai apa-apa. (Pengkhotbah 9:5) Aipoi sia simamatei tak anai puagaijat ra, tak an raorik samba tak raagai masipakatai, ele masirop make Sirimanua sipuririmanua.—Mazmur 146:3, 4.

Icokam Kejadian 3:19 samba Pengkhotbah 9:6, 10.

Aponia Kiddijet Bagadda Sia Simamatei?

Sara tatoga mureu-reu baga masipaatu kalulut amateian simanuntu baga nia

ANGOI BARA PANOU-NOUGAT KELENENE: Sita taoba murimanua simaeru, pasamba saaleita sabagei simanuntu bagata. Kele simatukle sangamberitta, bule paaili sita minca pasamba saaleita ele sa Epputa sia simamatei.

APONIA AIGELAIAKE SITA BUKO SIPUNENAN: Sangamberidda Sirimanua simamatei rangenaake ka Tusuruat. Jesus masikua: ”Sangamberi Sirimanua sikuddu kabagat ratei tusuru le sia.” (Yohanes 5:28, 29) Kisete obaket Taikamanua Jehoba kapanandaadnia ka sia sisuruakenen, raake oggag simaeru bule murimanuasia ka Paradaiso Kapolak. (Lukas 23:43) Kagogoi sibabara geti sangamberi Sirimanua sigalaiake simaeru murimanua teret buru-buru. Buko Sipunenan masi kua: Sia simareddet katiboijet Taikamanua rabakkati le’ Polak, teret buru-buru. (Mazmur 37:29)

Icokam Ayub 14:14, 15; Lukas 7:11-17; samba Galaijedda Tai Apostel 24:15.

Kipa Panindougatku Bule Iarepi Taikamanua Jehoba?

Sara simanteu manindou

ANGOI BARA PANOU-NOUGAT KELENENE: Sangamberi sipuarat mariu-riu le ra panindou ka Taikamanua. Tapoi tak sangamberi panindougadda ta’ iarepi Taikamanua.

APONIA AIGELAIAKE SITA BUKO SIPUNENAN: Jesus masigelai sita kabagat panindougatta, ”Tak momoi masipaolei minca tiboijet ke manindou kam. Ba paigikam nganga kele si kuadda si Puarat Sabulungan, masipaolei panindougadda.” (Mateus 6:7) Oto bule iarepi Taikamanua Jehoba panindougatta, kaule ta ului nia kele si obad bagania. Oto bule tagalaikam aponia siobad bagania Taikamanua Jehoba siripot panindougatta. Sara Yohanes 5:14 masikolouwake, ”Ke aponia tiddougetta ka Taikamanua Jehoba, ke sibara kaerut patuata ta isoppi iarepi nia.”

Icokam Mazmur 65:2; Johanes 14:6, 14; samba 1 Johanes 3:22.

Kipa Ku Gagalai Bule Ibara Kusilo Puangkakat Baga?

Sara sinanalep masigaba puangkakat baga nia pasamba masibasa buko Sipunenan

ANGOI BARA PANOU-NOUGAT KELENENE: Maigi Sirimanua mukaronanbaga ka bulagat, ka pulaingeat tubu, ele ka laingen tubu, samba ka erut sigalaira nenete ikausia ramasanang siripot ka pinatudda kasia. Niate lulunia sangamberidda masi-kukru samba masibesiake kelenene. Tapoi sangamberi sibeisiake kelenene—siboboi le tak ibaliu pusananganda.

APONIA AIGELAIAKE SITA BUKO SIPUNENAN: Jesus masi patoila enungan kasita bule malabbeita tasilo pusanangan: ”Mautuk te sia si maleppe baga raikemake poi Sangaliot Polak.” (Mateus 5:3) Pusanangan momoi itusilo kebai taoba masigelai samba masitun siripot obaket Taikamanua Jehoba—pasikat nia, malaje, maonggou kabagat puroipoat tiboijet Taikamanua Jehoba. Katubulanan nene ai ka buko Sipunenan. Ke ataagaiyan katubulanan iate siromake sita masigalaiake siripot simaroipo—samba sitaimaroipo. Kasioba’nia katubulanan nene te ipalulu sita ka sangamberi galaiakenenta, bulat ibaliu puuktunganta.—Lukas 11:28.

Icokam Amsal 3:5, 6, 13- 18 samba 1 Timotius 6:9, 10.

Sangamberi sikolou akenen kabagat si enem ngamata panou-nougat siboiki kasurat nene, iate alegietnia sibara ka buko Sipunenan. Nuobaleu masituppai puagaijatta kabagat pasigelaijat? Ke ai bai’ obata ”masigelai masi keruiji pagalaijat Katuareman simaeru,” malabbei taagainia. Aileu panou-nougat ka patuatta kele kise: ’Ke bai ai nuntu bagania Taikamanua Jehoba kasita, angoi maigi sikatai, ele pangoringen barania ka panandaatnia teret ka kineneiget? Apa gelaiakenenta bule tusilo enungan simaeru kabagat pu lalalep?’ Alegietnia Buko Sipunenan masikua tapoi kineneiget maigi sia tak raoba masibasa Buko Sipunenan. Rakuania kalulut makeppu bagania, tak raagai masipatunia samba tak raagai katukoloubat nia.

Tapoi, ai panou-nougat kele kise: Nuobaleukam turomakekam bule taagai apa alegietnia ka Buko Sipunenan? Saksi-Saksi Jehoba masisegeake: Ai rua enungan.

Si boiki iate, buko Kau tananam kam Purimanuaijat Sita moitata Kapolak Nene! Tubaraake buko nene uktuk masiromake sia simigi galaijet bule tubara ake sara oggak kasia uktuk masi keruiji pagalaijat alegietnia sibara ka Buko Sipunenan ka simakolou. Sikat Rua: Tubaraake pasigelaijat Buko Sipunenan kasenen lalep. Saksi-Saksi Jehoba matareksia momoi ka lalepta sangaminca kabagat sanga menggui tubaraake pasigelaijet Buko Sipunenan. Maigisia raoba masisilo pasigelaijat Buko Sipunenan kelenene, masitun masiromake galaijetnene. Maigi masikua atusesengan katubulanan.

Nenete sibailiu pukaiyoat atasese kasita. Katubulanan Buko Sipunenan iate si belaake sita si baraka Sanitu, pupuineng, samba muloto simakope, aipoi sibara katubulanan le ataagainia sangamberi si maeru samba si kausita muangkabaga. Kuanangan Jesus: ”Agaimuiyante Katubulanan, iageti Katubulanan et masi belaake kam.”—Johanes 8:32.

1. Sara simanteu masigelai pagalaijat aponia gelaiakenen buko Sipunenan; 2. Sara sinanalep masigelai pagalaijat aponia gelaiakenen buko Sipunenan