Ukuya kwe vino vilimo

Ukuya kuno walanjizizye vino vilimo

Inte zya kwe Yehova

Solanipo ululimi Cinamwanga

 ISAMBILILO 11

Acani Cino Inte zya kwe Yehova Wakayila mu Kulongana Ukukuulu?

Acani Cino Inte zya kwe Yehova Wakayila mu Kulongana Ukukuulu?

Mexico

Germany

Botswana

Nicaragua

Italy

Amulandu ci wuno wa-a awantu wakuloleka awa cimwemwe? Wali pa kulongana kukuulu. Awawomvi wa kwe Leza awa kunsizi wawanenile ukulongana imiku yitatu mu mwaka, na sweswenye tukakunda sana ukulongana ponga mu mawumba makuulu. (Amasundo 16:16) Cila mwaka tukawa nu kulongana kutatu: ukulongana kwa muputule kuno tukakwata imiku yiwili mu mwaka, nga nu kulongana kwa citungu ukwa manda yatatu. Uzye ko-o ukulongana ku katwavwa wuli?

Kukawomya wuciwuza witu na Wina Klistu wanji. Tukawa sana ni nsansa ndi twalongana ponga wulyanye vino awina Israeli wivwanga pano wakulumbanya e Yehova pakasi ka “mawumba yano yalongine.” (Amalumbo 26:12; 111:1) Ko-o ukulongana kukatupa ulongo lwa kumanyana na wanawitu ukufuma mu ma wungwe yanji na wano wakafuma munsi zinji. Pano tukupuuza umusanya, tukaliila ivya kulya pe conye icifulo, swinya ukuwa ponga pe yo-o impindi kukalenga twawa sana ni nsansa. (Imilimo 2:42) Pa kulongana kwa musango ndi wo-o apano tukayilolela vino twakundana “na wanawitu wonsinye” ukuzinguluka insi.—1 Peter 2:17.

Kukatwavwa ukuwomelako mukupepa Leza. Ukulongana kwalenganga awina Israeli ukuwomelako mukupepa Leza amuno wawalondololelanga Amawaliko swinya ‘wivwicisyanga’ sana vino wasambilila. (Nehemiya 8:8, 12) Na sweswenye tukakwivwicisya sana vino wakatusambilizya pano tuli pa kulongana kukuulu. Ukulongana konsinye kukafuma pi Waliko. Amalyasi yakuwomelezya swinya amazima ni vilanjililo vikatwavwa sana ukucita ukulonda kwa kwe Leza mu mikaliile yitu. Swinya tukawomelezwa nga twivwa ku ntazi zino wamwi wakapitamo na vino wasipicizya, cikalenga naswenye twatwalilila ukusipicizya intazi zino tukapitamo. Ivilanjililo ivikulu vino vikawa pa kulongana kwa citungu mukawa wano wakazwala wulyanye vino awa mu Baibolo wazwalanga. Ukulola ivya musango wo-o kukalenga atwivwicisya amalyasi ya mu Baibolo swinya nu kusambililako ivivule. Pa kulongana ukukuulu, wano wakulonda cimanyikwe ukuti wayipa kwe Yehova wakabatizwa.

  • Amulandu ci wuno tukawela sana ni nsansa pa kulongana kukuulu?

  • Uzye avizima ci vino mulizana ndi mwazanwa ku kulongana kukuulu?