Ukuya kwe vino vilimo

Ukuya kuno walanjizizye vino vilimo

Inte zya kwe Yehova

Solanipo ululimi Cinamwanga

 ISAMBILILO 12

Umwiipwa Wakwe Pauli Waliinji Amusiinge

Umwiipwa Wakwe Pauli Waliinji Amusiinge

Leka tusambiliile pa mulumeendo wino wapususiizye e nyinaluume. E nyinaluume wa mulumeendonye wee waliinji a mupositile Pauli. Tutamaanya iziina lya mulumeendo. Lelo twamaanya kuno wacisiile iciintu ciimwi cino calanjiziizye ukuti waliinji amusiinge nkaninye. Wuzye ungakuunda ukumaanya cino wacisiile?—

E Pauli waliinji mujele ku Yerusalemu. Wamulemiile amuno wawizyaanga pa lwakwe Yesu. Awoonsi wamwi awawiipe wapasiile Pauli, acino wapangiine ipaange iwiipe. Watili: ‘Lekani tuleenge emusika mukuulu ukuti aleke awasilikaali walete Pauli ku koti. Twaandi tuvwaame mumbali ya museewo, pakuti pano Pauli akucilingaanya, tumukoome!’

Umwiipwa wakwe Pauli wawumbuziile ipaange iwiipe kwe Pauli na kwe musika mukuulu

Umwiipwa wakwe Pauli wivwiile pe lyoo ipaange. Wacisiile wuuli? Wayiile kujele nu kuneena Pauli vino wivwiile. Paponye, Pauli wamuneniile ukuti aneene emusika mukuulu pe lyoo ipaange iwiipe. Wuzye ukwelengaanya kuno caliinji acipepuuke kumwiipwa wakwe Pauli ukulaanda ne musika mukuulu?— Molimonye, amuno e musika mukuulu waliinji amoonsi wuumwi umucindaame. Lelo umwiipwa wakwe Pauli waliinji amusiinge icakuti walanziile ne musika mukuulu.

E musika mukuulu wamanyiile iceete nkaninye ivyakuciita. Wasenziile awasilikali awavuule mupiipi nu 500 ukuti wacinjiliile Pauli! Uwaanda wulyanye uwusiiku wawawuziizye ukuti watwaale Pauli ku Kesariya. Wuzye wawo awoonsi awawiipe wasansiile Pauli?— Acisinka, awoonsi awawiipe waviziilwe ukumukooma! Ipaange lyawo iwiipe litawomviile.

Wuzye acaani cino ungasambiliila kwe lyoo ilyaasi?— Nawewenye ungawa wemusiinge ndivino umwiipwa wakwe Pauli waliinji. Tuzipiziile ukuwa swewasiinge pano tukulaanda nawanji pa lwakwe Jehova. Wuzye nawewenye uliwawemusiinge nu kutwaliliila ukulaanda pe Jehova?— Ndiwaciita woo ungiiza upusuusye umuuntu.

WAZYA MWE BAIBOLO WAKO

  • Imilimo 23:12-24

  • Mateyu 24:14; 28:18-20

  • 1 Timoti 4:16