Ukuya kwe vino vilimo

Ukuya kuno walanjizizye vino vilimo

Inte zya kwe Yehova

Solanipo ululimi Cinamwanga

 ISAMBILILO 10

E Yesu Lyonsinye Wivwilaanga e Jehova na Wakwaasi Wakwe

E Yesu Lyonsinye Wivwilaanga e Jehova na Wakwaasi Wakwe

Wuzye cawa acipepuuke lyonsinye ukwivwiila awakwaasi wako?— Mpiindi ziimwi cisipepuuka. Wuzye wamaanya kuno e Yesu wivwilaanga e Jehova na wakwaasi wakwe?— Icakulolelaako cakwe cingakwaavwa ukwivwiila awakwaasi wako na pa mpiindi yino citapepusiile. Leka tusambiliile ivivuule pakwe coo.

Pano e Yesu ataani ayiize muunsi, waliinji nu Yisi, e Jehova kwi yuulu. Lelo e Yesu waliinji na wakwaasi na wanjinye muunsi. Amaziina yawo waliinji we Jozefu nu Mariya. Wuzye wamaanya vino wiziile awawa awakwaasi wakwe?—

E Jehova wasenziile uwuumi wakwe Yesu ukufuuma kwi yuulu nu kuwuwiika mu wuula wakwe Mariya. Wacisiile woo pakuti e Yesu angiiza akwaatwe nu kwikaala muunsi. Coo caliinji acizunguusyo! E Yesu wakuliziile mu wuula wakwe Mariya ndivino awaana wanji wakakuliila mu mawuula yakwe wamaama wawo. Mupiipi ni myeezi 9, e Yesu wakwasiilwe. Woo avino caliinji pakuti e Mariya nu muluume wakwe e Jozefu wiize wawe awakwaasi wakwe Yesu awa muunsi.

Pano e Yesu walinjivye ni myaaka 12, wacisiile ciimwi cino calanjiziizye ukuti wakunziile nkaninye e Yisi, e Jehova. Coo cacitisiile pano e Yesu na wakwaasi wakwe waliinji pa wuleendo uwuutali uwakuuya ku Yerusalemu ku Muteweeto wa Cakuulya Cakupitiliilwa. Pano wanyocelaanga ku mwawo, e Jozefu nu Mariya wazaniile kuno e Yesu ataliinji piwumba lyawo. Wuzye ungamaanya kuno waliinji?—

Amulanduci wuno e Yesu wayizile mu ng’anda ya kupepelamo?

Paponye, e Jozefu nu Mariya wapitisiizye ukunyoceela ku Yerusalemu, kuno wayiile awavwaamba e Yesu muviipya vyonsinye. Pano watamuzaniile, wasakamiile nkaninye. Lelo pansiizi ya maanda yataatu, wamuzaniile mu ng’anda ya kupepelamo! Unga manya umulandu wuno e Yesu wayiziile mu ng’anda ya kupepelamo?— Amulandu wakuti wamanyiile kuno koko ako waliinji nu kusambiliila pakwe Yisi, e Jehova. Wakunziile Jehova nu kulondesya ukumanya vino anga musecelesya. Nanti apano e Yesu wakuziile nu kuwa wesongo, watwaliliziile ukwivwiila e Jehova. E Yesu wivwilaanga nanti apampiindi yino citaliinji acipepuuke kwe weliwe, swinya nanti acakuti waliinji nu kuyiimba. Wuzye e Yesu wivwilaanga e Jozefu nu Mariya nye?— Molimonye, avino Baibolo yikalaanda.

Wuzye acaani cino ungasambiliila ku cakulolelako cakwe Yesu?— Uzipiziile ukwivwiila awakwaasi wako nanti pano citapepusiile. Wuzye avino wandi uwaciita?—

WAZYA MWE BAIBOLO WAKO

  • Luka 1:30-35; 2:45-52

  • Waefeso 6:1

  • Waheberi 5:8